Lúkaasə 3
3
Zhâŋ ncʉ́rí no Mboʼmvé pwó pɔŋ
(Mat 3:1-6; Máá 3:1-6)
1A ŋkhoʼyɔŋ, ŋgǒʼmvé ntsɔ̌btáŋ njʉ́ Tibɛɛ fɔŋ pɛ Roma nɛ́. Pɔŋtyo Piláto pɛ yé ntsɛ́ssó pɛ ŋgɔ́menaʼ ndzó pɛ́rɛ́ ŋgɔŋ Zhʉde, Erodə pé fɔŋ ndzó pɛ́rɛ́ ŋgɔŋ Galílya, mɔ́ŋmɛ́ yé Filipo pé yé pɛ́rɛ́ ŋgɔŋ Itʉré pú Trakonitidə, Lisaniya pé yé pɛ́rɛ́ ŋgɔŋ Ábilɛnə. 2Anə pú Kayifə pé pɛ tɛdshʉ́ kəkwéʼe. Mboʼmvé twɔ́ nsó yé pwó Zhâŋ Mɔ́ŋ Sakalya. Zhâŋ wéré kɛ tsóó ghúŋkwéʼé. 3Á ghǔ ndzó ŋkɔŋɔ pɛ́rɛ́ ŋgɔŋ pɛ́ a kɛ pɛ́ ne gháánse Zhuudɛŋ náá nɛ́, ncʉ́rí ŋgâ: «Puŋ séd mbziʼe yúŋ, kpênse, Mboʼmvé máʼ vɔ̌no yúŋ» 4njʉ́ a ŋwéʼéme ndzó Ŋwéʼe Ezaya ŋgaŋatsɔ́kpaŋató Mboʼmvé nɛ́:
«Ŋɔŋ ghéʼe nɛ́ ghúŋkwéʼé:
Puŋ tsúŋú mɛndɔ́b Ntsɛɛpɔŋ,
sǐ pɔ́ŋ mɛndɔ́b pé, a nsé ŋgerɛ́ŋged!
5Ŋkɔŋɔ ghə́b náá kʉ́yó mbɛ yúŋúme
Ŋkɔŋɔ pɛ ŋkə́ŋ náá ŋkʉyó mbɛ ŋkɔ̌me,
Pɛ mɛndɔ́b ŋwɔ́me náá ŋkʉyó mbɛ sǐme,
Pɛ mɛndɔ́b ŋgɔʼ náá ŋkʉyó mbɛ ntsuŋume!
6Néré, ŋkɔŋɔ pɔŋ náá kʉ́yó njʉ́ ndzǔne mɛ́, a twɔ́ Mboʼmvé nɛ́!»
Mboʼmvé fiʼɛ́ pumésɔŋ
(Mat 3:7-10)
7Zhâŋ kɛ tsɔ́ pwó pɔŋ zááme pɛ́ pɔ́b kɛ kʉ́yó ne mkpêne nse pwó yé nɛ́ ŋgâ: «Ndǎ ŋkɔ́b! A nsó wɔ̌ ŋgâ puŋ kí pʉ̌ŋgye Mboʼmvé yɛ́ puŋ taʼ, a tsé kʉ́yó nɛ́? 8Puŋ nyoʼ kiŋi séd ndzɔʼ yɛ́ puŋ séd nɛ́. Puŋ ndɛ tsé ŋkɔbɔ́ ndzɔʼ yúŋ ŋgâ: “Ábraham tɛd ywí”. Ɔ́ŋɔ́! mo, mə sə́ŋɛ́ wúŋ ŋgâ, tɛɛmbɛ Mboʼmvé séd pɛ ŋgɔʼ pɔŋ, pɔ́b tsʉʼ pɔ́ŋ Ábraham. 9Nsó yɛ́ a tsé mbé zwɔ́ ntáá sʉ́ʼʉ nɛ́ pó, pé tséé wé máʼá mɔ́ɔ́. Ndzǎb kɛ pe nɛ́ pe tsi yé, ne ntsêne nyǐme.»
Kiŋi yɛ́ a nyóʼó sɛrɛndzɔʼ nɛ́
10Mvúʼ pɔŋ psirɛ́ Zhâŋ ŋgâ: «Tɛ psi zhyɛ́ kɔ́ nɛ́ ŋkhoʼyɔŋ?» 11A pɔ́rɔ́ ne pɔ́b ŋgâ: «Ŋɔŋ wɛ́ a tséʼé ndzwé yípáá nɛ́, a fɛ́ taʼ yé pwó ŋɔŋ wɛ́ a tséʼé nɛ́ pó. Ŋɔŋ wɛ́ a tséʼé mwɔ̌zó nɛ́, a ké ŋgyɛ́ néré.» 12Ghaŋákpêsebe ké ŋkʉ́yó yɔ́b ne mkpêne nse, mbáŋ mviri ŋgâ: «Kéʼeyáŋ, psi zhyɛ́ zhí pé kɔ́?» 13A pɔ́rɔ́ ne pɔ́b ŋgâ: «Puŋ zé fuʼ sebe yɛ́ a zɔŋɔ ŋgâ pé kpê nɛ́, kii puŋ ndɛ kpê, a záʼ.» 14Pɛ káŋató ké mvirɛ yɔ́b ŋgâ: «Tɛ psi nɛ́?» Á ntsɔ́ ne pɔ́b ŋgâ: «Kii puŋ ndɛ ŋgbáá ŋɔŋ ne tʉ̌ŋ kpê yɔ́b yé, kii pó kpê yɔ́b ŋɔŋ ne ffé d. Puŋ ké ndiŋɛ́ péé yúŋ.»
Zhâŋ ncʉ́rí ŋɔŋ wé á kʉ́yó nɛ́
(Mat 3:11-12; Máá 1:7-8)
15Njʉ́ pɔ́ŋ Issayɛ kɛ tsé ndzwəʼɛ Ŋgaŋákpê wɔ́b nɛ́, pɔ́b psirɛ́ mbəb yɔ́b ŋgâ: «A kɛ́ʼɛ́ mbé pé Zhâŋ mbé ŋɔŋ wɛ́ Mboʼmvé tsɔʼ mbó nuʼ nɛ́ pɔɔ?» 16Á ntsɔ́ pwó ŋkɔŋɔ wɔ́b náá ŋgâ: «Mo, mə fɛ́ɛ́ ndaʼ kpênse ne puŋ, ntsʉʼmbé taʼ ŋɔŋ tsé ŋkʉ́yó, tséʼé tʉ̌ŋ ntsɛ́ɛ́ ya. Mə ŋkúʼɔ́ ne ŋkěne kpǐtɔ́kpee mé pó. Wéré ŋɔŋ ŋkʉ́yó fɛ́ kpênse ne puŋ pé ne Zhʉye Yáŋme ne mɔ́ɔ́. 17Á tséʼé sakere pwó yé, ntsɛ́rɛ mɔ́b núŋ. Ndɔ́ɔ́ pé sʉ́ʼʉ fɛ́ nsó yé, ntɔŋɔ ghób pé ndzɔ́ʼɔ́ mɔ́ɔ́ wɛ́ náʼá mbwó nɛ́ po!» 18Yɔŋ pé nɛ́ njʉ́ Zhâŋ kɛ cʉ́rɛ Ŋkəŋ Sʉ́ʼʉ mbó fɛ́ pecyó ntʉ́ʼʉ́ zááme pwó pumésɔŋ nɛ́.
No Erodə pú Zhâŋ
(Mat 14:3-4; Máá 6:17-18)
19Fɔŋ Erodə kɛ sáʼá Erodyadə, ŋgʉyé mɔ́ŋmɛ́ yé ne ŋgʉyé, mbó zhyɛ́ pecyó meno kəpɔŋ zááme. Zhâŋ ghú mbɛ́rɛ́ wé tsʉʼe təŋé mé. 20Mbɛ néré, Erodə ké mvǐ faʼ kəpɔŋ ŋgú ne ssó, ŋgbáá Zhâŋ, máʼ ndátsáŋ.
Kpênse Yěsô
(Mat 3:13-17; Máá 1:9-11)
21Zhâŋ kɛ ghɛ́ ŋkúŋɔ tsáŋ, ŋkɔŋɔ pɔŋ náá kɛ kpênse. Yěsô ké kʉ́yó yé kpênse. Ŋkhoʼyɛ́ Yěsô kɛ ntsɛ́ʼɛ́ Mboʼmvé nɛ́, pépéé ŋaʼ. 22Zhʉye Yáŋme shíí njʉ́ fɔŋzɔ́tsaʼ nɛ́ ŋkúŋɔ mbəb yé. Taʼ ndzəb ntsɔ́ pépéé ŋgâ: «Wo Mɔ́ŋ ya wé tʉŋɔ ndɔŋ, wɛ́ mə tíí ŋkɔŋɔ ndzɔʼ ya náá mbəb yé nɛ́.»
Ndǎ ndáb Yěsô
(Mat 1:1-16)
23Yěsô kɛ tséʼé yɔ́b ŋgǒʼmvé ghúbmekyéd ŋkhoʼyɛ́ a kɛ ndzyě faʼ yé nɛ́. Njʉ́ pé kɛ kpáŋa ŋgâ Yěsô mɔ́ŋ Yesə́b nɛ́, Yesə́b pɛ́ yé mɔ́ŋ Elya. 24Elya pé mɔ́ŋ Matad, Matad pé mɔ́ŋ Levi, Levi pé mɔ́ŋ Mɛləki, Mɛləki pé mɔ́ŋ Zhanayi, Zhanayi pé mɔ́ŋ Yesə́b. 25Yesə́b pé mɔ́ŋ Matatyasə, Matatyasə pé mɔ́ŋ Ámosə, Ámosə pé mɔ́ŋ Nawuŋ, Nawuŋ pé mɔ́ŋ Esəli, Esəli pé mɔ́ŋ Nagayi. 26Nagayi pé mɔ́ŋ Mád, Mád pé mɔ́ŋ Matatyasə, Matatyasə pé mɔ́ŋ Seməyi, Seməyi pé mɔ́ŋ Yose, Yose pé mɔ́ŋ Yoda. 27Yoda pé mɔ́ŋ Yoyanaŋ, Yoyanaŋ pé mɔ́ŋ Reza, Reza pé mɔ́ŋ Zorobabɛlə, Zorobabɛlə pé mɔ́ŋ Salasyɛ, Salasyɛ pé mɔ́ŋ Neri. 28Neri pé mɔ́ŋ Mɛki, Mɛləki pé mɔ́ŋ Ádi, Ádi pé mɔ́ŋ Kosaŋ, Kosaŋ pé mɔ́ŋ Ɛmadaŋ, Ɛmadaŋ pé mɔ́ŋ Ɛɛ. 29Ɛɛ pé mɔ́ŋ Yǒswâ, Yǒswâ pé mɔ́ŋ Elyézɛɛ, Elyézɛɛ pé mɔ́ŋ Yoriŋ, Yoriŋ pé mɔ́ŋ Matad, Matad pé mɔ́ŋ Levi. 30Levi pé mɔ́ŋ Simeyɔŋ, Simeyɔŋ pé mɔ́ŋ Yúda, Yuda pé mɔ́ŋ Yesə́b, Yesə́b pé mɔ́ŋ Yonaŋ, Yonaŋ pé mɔ́ŋ Elyakim. 31Elyakim pé mɔ́ŋ Meleya, Meleya pé mɔ́ŋ Mena, Mena pé mɔ́ŋ Matata, Matata pé mɔ́ŋ Nataŋ, Nataŋ pé mɔ́ŋ Ndavíd. 32Ndavíd pé mɔ́ŋ Zhese, Zhese pé mɔ́ŋ Obɛd, Obɛd pé mɔ́ŋ Boozə, Boozə pé mɔ́ŋ Sala, Sala pé mɔ́ŋ Nǎsɔŋ. 33Nǎsɔŋ pé mɔ́ŋ Áminadab, Áminadab pé mɔ́ŋ Ádmiŋ, Ádmiŋ pé mɔ́ŋ Ani, Ani pé mɔ́ŋ Esərɔŋ, Ɛsərɔŋ pé mɔ́ŋ Pérɛsə, Pérɛsə pé mɔ́ŋ Yúda. 34Yúda pé mɔ́ŋ Yakɔb, Yakɔb pé mɔ́ŋ Izaʼ, Izaʼ pé mɔ́ŋ Ábraham, Ábraham pé mɔ́ŋ Tera, Tera pé mɔ́ŋ Nakɔɔ. 35Nakɔɔ pé mɔ́ŋ Seru, Seru pé mɔ́ŋ Rebu, Rebu pé mɔ́ŋ pélɛʼ, Pélɛʼ pé mɔ́ŋ Ebɛɛ, Ebɛɛ pé mɔ́ŋ Sala. 36Sala pé mɔ́ŋ Kayinaŋ, Kayinaŋ pé mɔ́ŋ Alfazad, Alfazad pé mɔ́ŋ Seŋ, Seŋ pé mɔ́ŋ Nuwa, Nuwa pé mɔ́ŋ Ləmɛd. 37Ləmɛd pé mɔ́ŋ Matusala, Matusala pé mɔ́ŋ Enɔʼ, Enɔʼ pé mɔ́ŋ Ered, Ered pé mɔ́ŋ Maleleyɛ, Maleleyɛ pé mɔ́ŋ Kayinaŋ. 38Kayinaŋ pé mɔ́ŋ Enosə, Enosə pé mɔ́ŋ Sed, Sed pé mɔ́ŋ Ádam, Ádam pé mɔ́ŋ Mboʼmvé.
ទើបបានជ្រើសរើសហើយ៖
Lúkaasə 3: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
