Lúkaasə 14
14
Yěsô pɛ́d taʼ ŋɔŋ wɛ́ mɔ́ɔ́syé kɛ pɛ mbəb yé nɛ́ zhyémvé ze
1Taʼ zhyéze pɛ Yuda, Yěsô ŋkúŋɔ ndáb taʼ ntsɛ́ssó pɛ Farízya ne ndzóne mɔ́b. Pɔŋ pɛ́ pɔ́b kɛ pɛ yóʼó náá nɛ́ kpɛʼɛ wé. 2A kɛ ghɛ́mbɛ taʼ ŋɔŋ wɛ́ mɔ́ɔ́syé kɛ pɛ mbəb yé nɛ́, pɛ yóʼó. 3Yěsô ntsɔ́ pwó pɛ ntsɛ́ssó ghaŋákeʼekaŋ pwɛ pɛ Farízya ŋgâ: «kaŋ miŋi psyɛ́ ŋgâ tɛɛmbɛ pé pɛ́d ghɔŋ zhyéze, kii ŋgáŋ?» 4Ntsʉʼmbé pɔ́b zhírí zhírí. Yěsô yɔ́ɔ́ ŋgaŋaghɔŋ, mbɛ́d wé, ntsɔ́ pwó yé ŋgâ a ghú. 5Yěsô ntsɔ́ ne pɔ́b ŋgâ: «A wɔ́ ndzɔ́ʼɔ́ puŋ wɛ́ Mɔ́ŋ yé kii naʼ yé vɔ́ ndzó píínse, a tee kii túbú wé zaŋa zhyéze nɛ́?» 6Pɔ́b pé kúʼu ne mbǒdne yéré no pó.
Yěsô ntʉ́ʉ́ pɔŋ ŋgâ pé yɔ́ɔ́ ywoʼ ghɔ́rɔ́ pé ndzəb
7Yěsô zhʉ́ ŋgâ pɛ ghəŋ ké zɔŋɔ ndɔ́ɔ́ pɛ sɔ́ ywoʼ ghɔ́rɔ́. A máʼ fuʼno ne pɔ́b ŋgâ: 8«Ŋkhoʼyɛ́ pé kaʼ wo ne ndebéne kpaʼ ndáá nɛ́, ndɛ ŋgɔ́rɔ́ ndzó sɔ́ ywoʼ. Cyǒkhoʼ pé kaʼ cyó ŋɔŋ wɛ́ a ntsɛ́ɛ́ wo nɛ́. 9Kɛ́ʼɛ́ ŋgâ ŋɔŋ wɛ́ a kaʼa wúŋ náá nɛ́ ndɛ ntsɔ́ pwó ŋgâ: “Tee ywoʼ pwó ŋɔŋ wɔŋ, ghú ŋgɔ́rɔ́ yo ndzəb.” Néré wo tséʼé pfɔ̂shʉ́ŋ zááme ne ŋgúne ŋgɔ́rɔ́ ndzəb. 10Ntsʉʼmbé, ŋkhoʼyɛ́ ŋɔŋ kaʼ wo nɛ́, a pú ŋgâ wo kʉ́yó ŋgɔ́rɔ́ ndzəb. Kɛ́ʼɛ́ ŋgâ ŋɔŋ wɛ́ a kaʼ wo nɛ́ kʉ́yó ntsɔ́ pwó ŋgâ: “Sɔ́ŋ ya, ŋǎ ŋkɔ́ʼɔ́ ssó.” Néré, wo tséʼé ŋgúʼune síŋ pɔŋ pɛ́ puŋ pɔ́b ŋgɔ́rɔ́ nɛ́. 11Ŋkyé ŋgâ: ŋɔŋ wɛ́ a ŋkʉ́rʉ́ mbəb yé nɛ́, pé ŋkɔɔ wé, ŋɔŋ wɛ́ a ŋkɔɔ mbəb yé fɛ́ syé nɛ́ pé ŋkʉ́rʉ́ wé.»
Yěsô fɛ́ ntʉ́ʉ́ ŋgâ pé káʼá pɛ mbɔ́ŋmbɔŋ
12Njʉ́ Yěsô kɛ nsó néré nɛ́, a ntsɔ́ pwó ŋɔŋ wɛ́ a kɛ kaʼ wé nɛ́ ŋgâ: «A pɛ yɛ́ wo ntsɛ́ʼɛ́ ne fɛ́ne mwɔ̌zó nwɔ̌nsó kii yé ŋkhoʼfwɔ̂nab pwó pɔŋ nɛ́, wo ndɛ kaʼ sɔ́ŋ pó, ndɛ kaʼ pɔ́ŋmɛ́ pó, ndɛ kaʼ ŋɔŋ ne ndǎ yúŋ, ndɛ kaʼ tɛdyáʼ pe wo pɛ pɔ́b tséʼé foʼ nɛ́. Mbǒ pɔ́b náʼá ké kaʼa yo ywoʼ ne yɔ́b no, kɛ́ʼɛ́ ne núʼune mɔ́b pwó wo. 13Ntsʉʼmbé, wo tsɛ́ʼɛ́ taʼ ndebéne, kaʼa pɛ mbɔ́ŋmbɔŋ, pɛ ntʉʼekpee, pɛ ŋkʉ́ŋʉ́, pɛ ffǒme. 14Mbéne sʉ́ʼʉ kʉ́yó mbɛ́ pwó wo ŋkyé ŋgâ pɔ́b tséʼé yɔ́b yɛ́ pɔ́b núʼɔ́ pwó wo nɛ́ pó. Ntsʉʼmbé Mboʼmvé naʼ núʼɔ́ ŋkhoʼyɛ́ pɔŋ ŋgerɛ́ŋged zhʉyɛ́ ne vó nɛ́.»
Fuʼno njʉyíne pɛ ghəŋ
(Mat 22:1-10)
15Taʼ ŋɔŋ wɛ́ pwɛ Yěsô kɛ ghód nɛ́, zóʼ péré nsó, ntsɔ́ pwó yé ŋgâ: «Mbéne sʉ́ʼʉ pwó ŋɔŋ wɛ́ a náʼá ndzɔ́ mɔ́b ndzó Nofɔŋ Mboʼmvé nɛ́!» 16Yěsô máʼ taʼ fuʼno pwó yé ŋgâ: «Taʼ ŋɔŋ kɛ tséʼé taʼ ndebéne kəkwéʼe, kaʼ pɔŋ zááme. 17Ŋkhoʼ zɔ̂ mɔ́b ŋkuʼu, a twɔ́ Ŋgaŋafaʼ yé ŋgâ a ghú fú pɛ ghəŋ pɛ́ a kɛ kaʼ nɛ́, ŋgâ: “Puŋ kʉ́yó ŋkhoʼyɔŋ, mɔ́b p ffé nɛ́.”
18Ntsʉʼmbé ŋkɔŋɔ pɛ ghəŋ náá ké ŋgyɛ́ mépsiʼe. Sɔ́ yé ntsɔ́ Ŋgaŋafaʼ ŋgâ: “Mə ké kɛ nzúŋɔ taʼ ywoʼ faʼ zúŋ, a zɔŋɔ ŋgâ mə ŋgú zhʉ́. Mə mbóʼmbwó, máʼ vɔ̌no ndɔ́ɔ́ ya.” 19Cyó gháá: “Mə ndzúŋ vwɔ́ naʼ. Mə ŋgú mwɔ́ wɔ́b. Mə mbóʼmbwó, máʼ vɔ̌no ndɔ́ɔ́ ya.” 20Cyó ŋkʉ́rʉ́ gháá: “Mə ké kɛ zɔʼɔ ndáá zɔʼ, a zhyɛ́ yéré tɛɛmbɛ mə mbé kʉ́yó pó.” 21Ŋgaŋáfaʼ pod ndzəb ne ŋkəŋ ntsɔ́ pwó tɛdfaʼ. Tɛdfaʼ zúʼú ŋgyé, ntsɔ́ Ŋgaŋafaʼ yé ŋgâ: “Ghǔ nzaŋa ndzó pɛ záŋ, pɛ mɛndɔ́b syé mbɛ́lʉ́ŋ. Ndɔ́ɔ́ pɛ mbɔ́ŋmbɔŋ, pɛ ŋkʉ́ŋʉ́, pɛ ffǒme, pɛ ntʉʼekpee, puŋ pɔ́b kʉ́yó ghaŋ.” 22Mɔ́ŋtiʼa ŋkhoʼ, Ŋgaŋafaʼ pod, ntsɔ́ tɛdfaʼ yé ŋgâ: “Ntsɛ́ssó, psi ŋgyɛ́ no yɛ́ wo nsó nɛ́, ntsʉʼmbé ywoʼ ghɔ́rɔ́ kɛ kɛrɛ.” 23Ntsɛ́ssó ntsɔ́ Ŋgaŋafaʼ yé ŋgâ: “Ghǔ ndzó pɛ ndúŋú mɛndɔ́b pwɛ mpfuŋ. Pɔŋ pɛ́ puŋ pɔ́b séré nɛ́, ziʼɛ́ wɔ́b ŋgâ pɔ́b ŋkúŋɔ ywoʼ mo. Yânéré ndáb ya yúŋ. 24Ŋkyé ŋgâ mə sə́ŋɛ́ wúŋ ne taʼ no: A ndzɔ́ʼɔ́ pɛ sɔ́ ghəŋ, ŋɔŋ wɔ́b kʉ́yó ndzwə́ʼé mɔ́b pɛ ya pó.”»
Těne ŋkɔŋɔ no náá nzɔŋɔ Yěsô
25Pɔŋ zááme kɛ nyi ndzəb Yěsô, a séd mbəb yé ntsɔ́ ne pɔ́b ŋgâ: 26«A pɛ́ɛ́ yɛ́ ŋɔŋ kʉ́yó pfúŋɔ́ mo, kii kʉyě ya ntsɛ́ɛ́ tɛd yé, ntsɛ́ɛ́ mɛ́ yé, ntsɛ́ɛ́ ŋgʉyé yé, ntsɛ́ɛ́ pɔ́ŋ pé, ntsɛ́ɛ́ pɔ́ŋmɛ́ pé pé pěŋgyé pwɛ pé mbzíŋi, mbɛ tómbəb yé. Mbǒ a kúʼɔ́ ne mbéne meŋkho ya pó. 27Ŋɔŋ wɛ́ a ŋkyɛ́ ŋgʉŋʉ yé ntsʉʼɔ ndzəb mo nɛ́ pó, a kúʼɔ́ ne mbéne meŋkho ya pó.
28A wɔ́ tsetsɛrɛ puŋ wɛ́ a tsé nzɔŋɔ ŋkwórɔ́ ndáb kəkwéʼe, mbe pê ŋgód mkpaŋ ndɔŋ yé, njʉ́ mbéyɛ́ a tséʼé mɔ́b pɛ a ŋkwórɔ́ núŋ tɛ méé nɛ́ pɔɔ? 29Á máʼá tsindáb kii kúʼɔ́ ne měne, mbǒ ŋkɔŋɔ pɔŋ pɛ́ pɔ́b náʼá zhʉ́ wé náá nɛ́, ké túŋɔ wé túŋɔ, 30ntsɔ́ ŋgâ: “Puŋ zhʉ́! Yiŋ ŋɔŋ wɛ́ a kɛ ndzyě kwórɔ́ ndáb, mbé kúʼɔ́ ne měne nɛ́ pó.”
31Kii, a wɛ́rɛ́ fɔŋ táʼá ŋgú máʼá ntsɔ pú cyó taʼ fɔŋ, a pé ndzyě ŋgɔ́rɔ́ syé mviri mbəb yé ŋgâ: “Mə tséʼé vwɔ́ ŋkáb káŋató. A kɛ́ʼɛ́, tɛ mə ŋgú máʼá ntsɔ psi mbáŋ ya wɛ́ a kʉ́yó ne ŋkáb káŋató ghúbmebáá nɛ́?” 32Mbéyɛ́ a kuʼú nɛ́ pó, mbǒ a twɔ́ ghaŋántɔ́b pé pfúŋɔ́ fɔŋ wéré, ŋkhoʼyɛ́ a kɛ kɛrɛ ntaŋa sesɛ nɛ́, ne mbzírine ntsóne fwóme.
33A ké mbɛ njʉ́ ŋɔŋ mbɔŋɔ mbé pɛ tsetsɛrɛ puŋ, ntéé ŋkɔŋɔ mɔ́b pe náá nɛ́ pó, tɛɛmbɛ a pé pé meŋkho ya pó.»
Nsé ndɛ mbzyě ŋkʉ̌ne mé
(Mat 5:13; Máá 9:50)
34Yěsô pó nsó ŋgâ: «Ɔ́ŋɔ́, nsé gbáŋ taʼ yɔ́b sʉ́ʼʉ, ntsʉʼmbé a pɛ yɛ́ a psyé ŋkʉ̌ne mé nɛ́, tɛ pé nuʼu ŋkʉ̌ne méré pé ne kɔ́? 35Tɛ a pó mbé tséʼé ghebe ndúŋú tsetsáʼ ŋkʉ́rʉ́ pó. Kii pó mbé pférɛpfo. A cʉ́ʼɔ́ ne mǎʼne mvé. Ŋɔŋ wɛ́ a tséʼé təŋé ne ndzóʼne nɛ́, a zóʼ!»
ទើបបានជ្រើសរើសហើយ៖
Lúkaasə 14: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
