Lúkaasə 1
1
Ndzyě ŋwéʼe Lúkaasə
1-2Ŋgəkod ywí Tyofilə, pɔŋ kɛ zhʉ́ meno pɛ Mboʼmvé kɛ zhyɛ́ tsetsɛrɛ psi ne ŋkhoʼ ndzyě nɛ́, ndɔ́ɔ́ meno péré tsé cʉ́rɛ ndzó pɛ mbǎʼmvé. Záá pɔŋ zóʼ, ntsé ŋwɛ́ʼɛ́. 3Néré, mbɛ mo ya, mə ndɔ́ɔ́ ŋgəʼo, ntaʼ tsí meno péré zhʉ́ a kɛ ndzyě nɛ́, ntɛŋɛ wɔ́b ntíí, mbɔ́rɔ́ ŋwɛʼɛ. Mə kɛ ŋwɛ́ʼɛ́ pwó wo, kɛ Tɛd ya Tyofilə, 4ŋgâ wo yâ ndúŋú ndzé ŋgâ meno pɛ́ pe kɛ nyoʼ wo núŋ náá nɛ́, ŋgerɛ́ŋged.
Ncʉri ne mvěne Zhâŋ
5Á kɛ pɛ ndzó mbwó Erodə, fɔŋ ŋgɔŋ Zhʉde, taʼ ŋgaŋashʉ́ pɛ yóʼó ne ndǎ ndáb Ábya. Tíí pé Sakalya, tíí ŋgʉyé yé pé Lísaped, twɔ́ ndzɔ́ʼɔ́ ndǎ Árɔŋ, wɛ́ a kɛ pe tɛdshʉ́ wé kəkwéʼe nɛ́. 6Sakalya pú Lísaped kɛ pé ŋgerɛ́ŋged síŋ Mboʼmvé, ŋguʼɔ ŋkɔŋɔ kaŋ pwɛ ŋkɔŋɔ núŋú Ntsɛ́ɛ́pɔŋ náá kii shaŋa. 7Ntsʉʼmbé, pɔ́b kɛ pé tséʼé Mɔ́ŋ pó ŋkyé ŋgâ Lísaped kɛ pé zíŋ, pɔ́b pépáá pó ndzuŋ kaʼatɛ.
8Taʼ zhyémvé mve, Sakalya tsé faʼa faʼ yé ndáb Mboʼmvé ne tíí ndǎ yɔ́b ne yɔ́b kɛɛ. 9Njʉ́ núŋú pɛ ghaŋáshʉ́ kɛ pé nɛ́, pɔ́b tsɔʼɔ Sakalya ne ntɔ̌ŋne yaŋ ndzó ywoʼɔ́ze Ntsɛɛpɔŋ yéré zhyémvé. 10Ŋkhoʼyɛ́ a kɛ tɔ́ŋɔ yaŋ ndáb nɛ́, ŋkɔŋɔ pumésɔŋ Mboʼmvé náá tsɛ́ mvé tsé ntsɛ́ʼɛ́ Mboʼmvé. 11Néré, Sakalya ghɛ́ mvwɛ, taʼ aŋgere Ntsɛɛpɔŋ nyoʼ mbəb yé pwó yé ne ndzaʼ pwó ywoʼɔ́shʉ́ yé tɔ́ŋɔ yaŋ yé maʼ. 12Ŋkhoʼyɛ́ Sakalya kɛ zhʉ́ wé nɛ́, tó yé vaʼ, vod gbáá wé. 13Ntsʉʼmbé, aŋgere ntsɔ́ pwó yé ŋgâ: «Ndɛ mbɔ́ɔ́ kɛ Sakalya ŋkyé ŋgâ Mboʼmvé zóʼ tséʼé yo. Lísaped ŋgʉyé wo mvɛ́ taʼ Mɔ́ŋ ŋumbzí, wo tswé tíí yé ne Zhâŋ. 14Ŋkhoʼyɛ́ ŋgʉyé yo kʉ́yó mvɛ́ wé nɛ́, ndzɔʼ wo yáŋ tɛ, puŋɛ pɔŋ zááme pó ndebe kaʼatɛ. 15Zhʉye Yáŋme ndúŋɔ wé féré pfɔ̂ mɛ́ yé, ŋkyé ŋgâ a kʉ́yó mbɛ ŋɔŋ kəkwéʼe síŋ Ntsɛɛpɔŋ. Á kʉ́yó nɔ́ yoʼ pó, kii pó nɔ́ cyó yɔ́b yɛ́ tɛ a pɛ́ɛ́ ŋɔŋ nɛ́. 16Á kʉ́yó ŋgyɛ́ pɔŋ Issayɛ pod ndzəb pwó Ntsɛɛpɔŋ Mboʼmvé wɔ́b. 17Á kʉ́yó nyi síŋ Mboʼmvé ne zhʉye pú tʉ̌ŋ Elya, ŋgyɛ́ ŋgâ nsó ndzóʼ pɛ tsetsɛrɛ tɛd pwɛ pɔ́ŋ pɔ́b, pɛ ntʉ́ŋɔtó tséʼé zɛ́ no njʉ́ pɔŋ ŋgerɛ́ŋged nɛ́. Yânéré ne ntsuŋúne ndzɔʼ pɔŋ pwó Ntsɛɛpɔŋ.» 18Sakalya pɔ́rɔ́ pwó yé ŋgâ: «Mə ndzɛ́ɛ́ níŋ ŋgâ a no sísíŋ? Mə kɛ zuŋ, ŋgʉyé ya ké mbó ndzuŋɔ yé zuŋ?» 19Aŋgere ntsɔ́ pwó yé ŋkʉ́rʉ́ ŋgâ: «A mo Ŋgapreya, Ŋgaŋafaʼ ntsɛ́ pfúŋɔ́ Mboʼmvé. Á twɔ́ ya pfúŋɔ́ wo ŋgâ mə máʼ ŋkəŋ sʉ́ʼʉ yɔŋ. 20Á njʉ́ wo psyɛ́ nsó ya nɛ́ pó, wo móʼó, tɛ kékáŋ kpě no yéré pwɔ́ ne ŋkhoʼyɛ́ Mboʼmvé kɛ tíí nɛ́.» 21Pɔŋ kɛ pɛ́ mvé ndzwəʼɛ Sakalya, kpáŋa tó pɔ́b ŋgâ: «A pó ŋgyɛ́ kɔ́ ndzó ywoʼɔ́ze féré ŋkhoʼ?» 22Ŋkhoʼyɛ́ Sakalya kɛ twɔ́ yóʼó nɛ́, a tsʉ́ʼ fúʼɔ meno fuʼ pwó pɔŋ pɛ́ pɔ́b kɛ pɛ mvé nɛ́, ŋkyé ŋgâ tswée yé kɛ móʼ. Pɔ́b zóʼ ŋkhoʼyɔŋ ŋgâ Mboʼmvé kɛ nyoʼ taʼ no shʉyédme pwó yé ndzó ywoʼɔ́shʉ́. 23Njʉ́ ŋkhoʼ faʼ Sakalya kɛ myé nɛ́, a pod ndzəb ywoʼ yé. 24Á kɛ pé néré, pɔ́ŋ zhyémvé záʼ, ŋgʉyé yé Lísaped pé sǔme, ŋgíbí mbəb yé ne pénab pétáŋ, ntsɔ́ ŋgâ: 25«Yɔŋ no yɛ́ Ntsɛɛpɔŋ zhyɛ́ mbəb mo nɛ́. A kpaŋ ya, ntúbú pfɔ̂shʉ́ŋ mbəb mo tsetsɛrɛ pumésɔŋ.»
Ncʉri ne mvěne Yěsô
26Ŋkhoʼyɛ́ Lísaped kɛ pe sǔme ne pénab péntóó nɛ́, Mboʼmvé twɔ́ ŋgaŋáncʉri Ŋgapreya ndzó mbɛ́lʉ́ŋ Galílya yɛ́ pé fú ne Nǎzarɛd nɛ́, 27pfúŋɔ́ taʼ mɔ́ŋndɛ́mɛ́ wɛ́ Yesə́b, Mɔ́ŋ ne ndǎ ndáb fɔŋ Ndavíd, kɛ tsuwɛ́ tíí pé Malya nɛ́. 28Ngapreya ŋkúŋɔ ndáb yé ntsɔ́ pwó yé ŋgâ: «Ntséʼé ndebéne. Mboʼmvé fɛ́ foʼndzəndzóʼ pwó wo, a púŋ Ntsɛɛpɔŋ.» 29Ŋkhoʼyɛ́ a kɛ zóʼ néré nɛ́, tó yé vaʼ, a psírí mbəb yé ŋgâ: «A yɛ́rɛ́ mbziʼe tséʼé kaʼa?» 30Aŋgere ntsɔ́ pwó yé ŋgâ: «Malya, ndɛ mbɔ́ɔ́ cyó yɔ́b ŋkyé ŋgâ wo tséʼé foʼ ndzəndzóʼ síŋ Mboʼmvé. 31Zóʼó! Wo mbɛ́ sǔme, mvɛ́ taʼ Mɔ́ŋ ŋumbzí tswɛ́ tíí ne Yěsô. 32Á kʉ́yó mbɛ ŋɔŋ kəkwéʼe, pé fú wé ne Mɔ́ŋ fɔŋ Mboʼmvé wɛ́ kpaʼ pépéé nɛ́. Ntsɛɛpɔŋ Mboʼmvé kʉ́yó fɛ́ ywʉ tɛd yé Ndavíd pwó yé. 33Á kʉ́yó sáʼá ndǎ ndáb Yakɔb ne ŋgǒʼ ne ŋgôʼ. Nofɔŋ yé naʼ myé pó.» 34Malya ntsɔ́ pwó aŋgere ŋgâ: «Yéré no kʉ́yó ndzáʼá níŋ njʉ́ mə ndzɛ́ ŋumbzí nɛ́ pɔɔ?» 35Ŋgapreya pɔ́rɔ́ pwó yé ŋgâ: «Zhʉye Yáŋme kʉ́yó mbəb wo. Tʉ̌ŋ fɔŋ Mboʼmvé wɛ́ kpáʼá pépéé nɛ́ ŋkúbú wo ne méziŋ yé. Á ŋgyɛ́ yéré Mɔ́ŋ yáŋme wɛ́ wo mvɛ́ nɛ́, pe fú wé ne Mɔ́ŋ Mboʼmvé. 36Zoʼo! Lísaped, ndzuŋ məŋgʉ́yé, mɔ́ŋmɛ́ wo wɛ́ pé kɛ fú ne zíŋ nɛ́, a sǔme ŋkhoʼyɔŋ ne pénab péntóó. 37Cyó yɔ́b yɛ́ tɛɛmbɛ a ntsɛ́ɛ́ Mboʼmvé nɛ́ yóʼó po!» 38Néré, Malya nsó ŋgâ: «Mə Ŋgaŋafaʼ Ntsɛɛpɔŋ. Á zhyɛ́ ne mo njʉ́ wo nsó nɛ́.» Ŋgapreya nyʉ́yí.
Malya gháŋá Lísaped
39Ŋkhoʼyɛ́ pɔ́ŋ zhyémvé kɛ záʼ nɛ́, Malya ké ŋǎ zǎŋazâŋa ŋgú ndzó taʼ mbɛ́lʉ́ŋ ne pɛ́rɛ́ ŋgɔŋ Zhʉʉde. Zhʉʉde yéré pɛ̌ ndzɔ́ʼɔ́ pɛ ŋkə́ŋ. 40A paŋa yóʼó, ŋkúŋɔ ndáb Sakalya, ntsɛ́ʼɛ́ Lísaped. 41Ŋkhoʼyɛ́ Lísaped kɛ zóʼ tséʼé Malya nɛ́, Mɔ́ŋ ŋɛ́rɛ́ pfɔ̂ yé, Zhʉye Yáŋme yuŋɔ wé. 42Á yíʼe ŋgâ: «Malya, mbúru mbəb wo tsetsɛrɛ ŋkɔŋɔ pěŋgyé náá, mbúrú pɛ mbəb Mɔ́ŋ wɛ́ a pfɔ̂ wo nɛ́! 43Yɔŋ pútó ya nɛ́! tɛ mɛ́ Ntsɛɛpɔŋ ya kʉ́yó ywoʼ mo! 44ŋkyé ŋgâ tséʼé yo ké mvɔ́ ndzó təŋé ya nɛ́ kɛ́ʼɛ́, ndzɔʼ Mɔ́ŋ yáŋ, a ŋɛ́rɛ pfɔ̂ mo! 45Mbéne sʉ́ʼʉ pwó ŋɔŋ wɛ́ a tséʼé psyɛ́ ndzɔʼ nɛ́, ŋkyé ŋgâ no yɛ́ Ntsɛɛpɔŋ kɛ kaʼa pwó wo nɛ́, kʉ́yó mbɛ́.»
Zɔ́bɔnse Malya
46Néré, Malya nsó ŋgâ:
«Méne ya ghuʼɔ Ntsɛɛpɔŋ,
47Ndzɔʼ ya tséʼé ndebéne kaʼatɛ,
ŋkyé Mboʼmvé ŋgaŋakpê ya.
48Ŋkyé ŋgâ, a máʼ míí mé mbəb mo, Ŋgaŋafaʼ yé wé ghəghəŋ.
Ɔ́ŋɔ́! Ndzyěne ŋkhoʼyɔŋ ŋkɔŋɔ ŋgɔbɔ ŋumesɔŋ náá kʉ́yó ntsɔ́ ŋgâ mə sʉ́ʼʉ.
49Ŋkyé ŋgâ Mboʼmvé Fɔŋ metʉŋ zhyɛ́ meno kəkwéʼe mbəb mo.
Tíí yé yáŋme.
50Tsaaghəghəŋ yé mbəb pɔŋ pɛ́ pɔ́b pɔ́ɔ́ wé nɛ́, ne ŋgǒʼ ne ŋgôʼ.
51Á sí pwó yé ne ŋkɔŋɔ tʉ̌ŋ mé náá
Saŋa pɛ ŋkamboʼ fáá təŋé,
52Á sú ywʉŋ tsi pɔŋ ntʉ̌ŋme máʼá wɔ́b syé,
Mbó ŋkʉ́rʉ́ pɛ ghəghəŋ.
53Á fɛ́ mɔ́b zááme pwó gháŋ ŋgəʼo.
Mbó ndzú ghaŋáfoʼ ne mbwó wéé.
54Á tuʼɔ Issayɛ Ŋgaŋafaʼ yé,
Kii zhǐ pǔpfob yé,
55Njʉ́ a kɛ ntsɔ́ pwó tɛd tɛd piŋi
Ndáá mbəb Ábraham pwɛ pɔ́ŋ pé ne ŋgǒʼ ne ŋgôʼ nɛ́.»
56Malya tsó pú Lísaped ne yɔ́b pénab pékyéd mbɔ́rɔ́ mbɔ́rɔ́ ywoʼ yé.
Lísaped pfɛ́ Zhâŋ
57Ŋkhoʼyɛ́ Lísaped kɛ ghɛ̌ ŋkéé póʼ, kɛ ŋkuʼu nɛ́, a pffé taʼ mɔ́ŋ ŋumbzí 58Ndǎ ŋɔŋ yé pwɛ tɛdyáʼ pé zóʼ ŋgâ Ntsɛɛpɔŋ tsaa ghəghəŋ yé, pwɛ pɔ́b kpaʼ ndebe. 59Ŋkhoʼyɛ́ zhyémvé péfwɔ̂ kɛ kuʼu nɛ́, pɔ́b kʉ́yó psírɛ Mɔ́ŋ, ntaʼa fú wé ne Sakalya, tíí tɛd yé. 60Ntsʉʼmbé, mɛ́ yé gháá: «Ŋgáŋ! Tíí yé mbɛ̌ ŋgâ Zhâŋ.» 61Pɔ́b tsɔ́ pwó yé ŋgâ: «Ŋɔŋ tséʼé tíí yékénɛ́ ndzó ndǎ yúŋ pó.» 62Pɔ́b ntébé ne mbwó mɔ́b pwó tɛd yé ŋgâ, pé tswɛ́ tíí Mɔ́ŋ pé ne kɔ́? 63Sakalya psírí taafrəre ne pɔ́b, ŋwéʼɛ́ ndúŋú ŋgâ: «Tíí Mɔ́ŋ Zhâŋ.» Á tsɛ́ɛ́ wɔ́b náá. 64Fǐme nɛ́ tswée yé ŋáʼ, kʉ́kpaŋ yé kee, a ndzyě ntsɔ́ no mbó ŋguʼɔ Mboʼmvé. 65Néré ŋkɔŋɔ ghaŋ pɛ́rɛ́ yáʼ péré náá pɔ́ɔ́ yɔ́b. Pé kɛ tsʉʼ ké ntsɔ́ yéré ndzó ŋkɔŋɔ pɛ́rɛ́ ŋgɔŋ Zhʉde náá. 66Ŋkɔŋɔ pɔŋ pɛ́ pɔ́b kɛ zóʼ yéré no nɛ́, ŋgʉʼɔ ndzó ndzɔʼ yɔ́b mbó mbzírɛ́ mbəb yɔ́b ŋgâ: «Tɛ wɔŋ Mɔ́ŋ kʉ́yó mbɛ́ níŋ?» Kpaʼ sísíŋ, pwó Ntsɛɛpɔŋ kɛ pɛ́ mbəb yé.
Zɔ́bɔnse Sakalya
67Zhʉye Yáŋme ŋkúŋɔ mbəb Sakalya, tɛd Mɔ́ŋ, a ndzyě ntsóne njʉ́ ŋgaŋatsɔ́kpaŋató Mboʼmvé nɛ́ ŋgâ:
68«Ŋgúʼune pɛ pwó Ntsɛɛpɔŋ, Mboʼmvé Issayɛ
ŋkyé ŋgâ á ghaŋá pɔ́ŋ pé mbó ntséé mkpii mbəb pɔ́b.
69Á fɛ́ taʼ ŋgaŋákpêpɔŋ wé kəkwéʼe ne piŋi,
Wɛ́ a twɔ́ ndzó ndǎ ndáb Ndavíd, Ŋgaŋafaʼ yé.
70A no yɛ́ Mboʼmvé kɛ kaʼ, ndzáʼá mbəb pɛ ghaŋátsɔ́kpáŋató pe, pe yáŋme ssə́só nɛ́.
71Ŋgaŋákpêpɔŋ wɛ́ a kpê wíŋi ndzó mbwó ghaŋákepeŋe,
Pwɛ ŋkɔŋɔ mbáŋa piŋi náá nɛ́.
72Mboʼmvé nyoʼ tsaaghəghəŋ yé pwó tɛd tɛd piŋi
Mbó mbzyɛ́ kaŋ yáŋme yɛ́ pwɛ pɔ́b kɛ ŋgbɛd nɛ́.
73Á no yɛ́ Mboʼmvé kɛ tíí pwó Ábraham tɛd tɛd piŋi nɛ́,
Ɔ́ŋɔ́! A kɛ nsó ŋkyé wíŋi:
74“Mə kʉ́yó sáʼá pɔ́ŋ pe wo ndzó mbwó ghaŋákepeŋe pɔ́b,
Kɛ́ʼɛ́ ŋgâ pɔ́b kʉ́yó fáʼa ne mo kii pɔ́ɔ́,
75Mbó nyi yáŋme síŋ mo, ndzɔ́ʼɔ́ ŋgerɛ́ŋged
Ŋkɔŋɔ yɔ́b tsómvé náá.”
76Ŋgɛ́ ŋkhú ne Wo, Mɔ́ŋ tíí Mɔ́ŋ, pé fú wo ne ŋgaŋatsɔ́kpaŋató Mboʼmvé, yé wɛ́ á kpaʼ pépéé nɛ́.
Ŋkyé ŋgâ wo kʉ́yó nyi síŋ Ntsɛɛpɔŋ ntsuŋɔ mɛndɔ́b yé.
77Yɔŋ no yɛ́ nɛ́ wo ncʉ́rɛ nɛ́: “Mboʼmvé máʼ vɔ̌no yúŋ mkpê wúŋ”.
78Mboʼmvé wíŋi tséʼé tsaaghəghəŋ zááme.
Yânéré, ndáŋne twɔ́ pépéé, ndaŋa mbəb piŋi njʉ́ sáʼ ménab nɛ́.
79Ne ŋkyáʼane pɔŋ pɛ́ pɔ́b ghɔ́rɔ́ ndzɔ́ʼɔ́ ndzəb pú mésɔvó nɛ́,
Mbó ntyaŋa wíŋi ndzó mɛndɔ́b ntsóne fwóme.»
80Zhâŋ kɛ ghóʼó, Zhʉye Mboʼmvé fɛ́ tʉ̌ŋ pwó zhʉye yé. Á tsʉʼ ké ntsǒ ghúŋkwéʼé kaʼatɛ mbáŋ zhyémvé yɛ́ á kɛ ghɛ́ nyoʼ mbəb yé pwó pɔ́ŋ Issayɛ nɛ́.
ទើបបានជ្រើសរើសហើយ៖
Lúkaasə 1: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
