Zhâŋ 18
18
Pɛ káŋató gbáá Yěsô
(Mat 26:47-56; Máá 14:43-50; Lúk 22:47-53)
1Ŋkhoʼ yɛ́ Yěsô kɛ nsó néré nɛ́, a yɔ́ɔ́ ŋgíŋgye pé, pwɛ pɔ́b ghú ne yiŋ ndzáʼá nse Sédorɔŋ. Taʼ faʼ pɛ́ yóʼó, pwɛ pɔ́b kúŋɔ́ ndzóó. 2A kɛ ghɛmbɛ, Zhʉ́da wɛ́ a kɛ ghɛ́ fí wé nɛ́, zé ywoʼ yéré, ŋkyé ŋgâ Yěsô pwɛ ŋgíŋgye pé kɛ tɛ́rɛ yóʼó kɛ́ɛ́ zááme. 3Zhʉ́da kpɛ́ɛ́ siŋ pɛ káŋató pwɛ pɛ ghaŋápsíbɛ ndámboʼmvé pɛ, ntsɛ́ssó ghaŋáshʉ́ pwɛ pɛ Farízya kɛ twɔ́ nɛ́. Pɔ́b páŋá faʼ ndzó ywoʼ yɛ́ Yěsô kɛ pé nɛ́, ne pɛ ŋkaʼmɔ́ɔ́, ne pɛ lámbo pwɛ mwɔ̌ntsɔ̂. 4Njʉ́ Yěsô kɛ zé ŋkɔŋɔ meno pɛ́ a kɛ ghɛ́ kúŋɔ́ wé náá nɛ́, a suʼú mbəb yé mbɛ́rɛ́ wɔ́b, ntsɔ́ ne pɔ́b ŋgâ: «Pǔŋ táʼá wɔ́?» 5Pɔ́b pɔ́rɔ́ pwó yé ŋgâ: «Psi táʼá Yěsô, Ŋɔŋ Nǎzarɛd.» A ntsɔ́ ne pɔ́b ŋgâ: «A mo!» A kɛ ghɛmbɛ, Zhʉ́da wɛ́ a kɛ fi wé nɛ́, pɛ ndzɔ́ʼɔ́ pɔ́b. 6Njʉ́ Yěsô kɛ ke tsɔ́ ne pɔ́b ŋgâ: «A mo!» nɛ́, pɔ́b núʼú ndzə́ndzə́b, mvɔ̂ sye. 7Yěsô ké mbó mbziri ŋkʉ́rʉ́ ŋgâ: «Puŋ táʼá wɔ̂?» Pɔ́b pód ŋgâ: «Yěsô, Ŋɔŋ Nǎzarɛd.» 8Yěsô tsɔ́ ne pɔ́b ŋgâ: «Mə kɛ tsɔ́ ne puŋ, a mo! Mbéyɛ́ puŋ taʼa páá nɛ́, puŋ tee pɔŋ pɔ́ŋ, pɔ́b ghú.» 9Yɔŋ pé nɛ́ njʉ́ tónsó wɛ́ Yěsô kɛ nsó nɛ́, kɛ ghɛ́ ndúŋɔ nɛ́. Nsó wéré pɛ́ɛ́ ŋgâ: «Ndíí ŋɔŋ ndzɔ́ʼɔ́ pɔŋ pɛ́ wo fɛ́ ne mo nɛ́, pwó pó.» 10Néré, Símo Pětro wɛ́ a kɛ tséʼé káfáá ndzó mbáŋ yé nɛ́, ntúbú, gbíí ŋgaŋafaʼ tɛdshʉ́ kəkwéʼe nuŋ, tséé ntəŋé yé maʼ. Tíí ŋgaŋafaʼ wéré kɛ pé Maləkʉsə. 11Ntsʉʼmbé Yěsô tsɔ́ pwó Pětro ŋgâ: «Níŋí káfáá yo ndzó mbáŋ yé! Ndɔ́ŋ ŋgəʼo yɛ́ Tɛd ya fɛ́ nɛ́, mə nɔ́ pɔɔ?» 12Ntsɛ́ssó pɛ káŋató pwɛ káŋató pwɛ pɛ ghaŋápsíbɛ ndámboʼmvé pɛ́, pɛ ntsɛ́ssó pɛ Yúda kɛ twɔ́ nɛ́, gbáá Yěsô, ŋkúrɔ́ wé.
Yěsô síŋ Anə, tɛdshʉ́ kəkwéʼe
(Mat 26:57-58; Máá 14:53-54; Lúk 22:54)
13Pɔ́b pee ntyaŋa wé síŋ Anə, nsě Kayifə wɛ́ a kɛ pe tɛdshʉ́ kəkwéʼe ne yéré ŋgǒʼmvé nɛ́. 14A Kayifə wéré wɛ́, a kɛ tʉ́ʉ́ tó ntsɛ́ssó pɛ Yúda ŋgâ: «A pú ŋgâ taʼ ŋɔŋ pfɔ́ ne tó yáʼ» nɛ́.
(Mat 26:69-70; Máá 14:66-68; Lúk 22:55-57)
15Símo pětro pú cyó meŋkho Yěsô zɔ́ŋɔ́ wé. Njʉ́ tɛdshʉ́ kəkwéʼe kɛ zɛ́ meŋkho Yěsô wéré nɛ́, pú Yěsô kpaʼ ŋkuŋɔ ntɔ́ʼ tɛdshʉ́ kəkwéʼe. 16Pětro kɛ tsɛ́ yé pe mvé pfúŋɔ́ ntswěndáb, meŋkho wɛ́ tɛdshʉ́ kəkwéʼe kɛ zɛ́ wé nɛ́, ntwɔ́ nsó no pwó məŋgʉ́yé wɛ́ a kɛ psibɛ ntswěndáb nɛ́, ŋgyɛ́ Pětro kúŋɔ́ ndáb. 17Məŋgʉ́yé wéré ntsɔ́ pwó Pětro ŋgâ: «Tó mbəb wo, wo cyó meŋkho ŋɔŋ wɔŋ pɔɔ?» Pětro pɔ́rɔ́ pwó yé ŋgâ: «Mə cyó pó!» 18Ŋgaŋafaʼ pwɛ ghaŋápsibɛ ndábmboʼmvé kɛ nə́b mɔ́ɔ́ ne kpaŋ ŋkɔʼ tsé ndzɔɔ, ŋkyé ŋgâ fóó kɛ tsé kpɛ́ɛ́. Pětro ke ŋkʉ́yó yé pwɛ pɔ́b nsé, a tsé ndzɔɔ yé.
(Mat 26:59-66; Máá 14:55-64; Lúk 22:66-71)
19Tɛdshʉ́ kəkwéʼe tsé mbzírɛ Yěsô ne pɛ meno ŋkyé ŋgíŋgye pé pwɛ ntʉ́ʉ́ yɛ́ a kɛ fɛ́ nɛ́. 20Yěsô pɔ́rɔ́ pwó yé ŋgâ: «Mə kɛ tsɔ́ pwó pɔŋ pé tétáá. Mə kɛ ke nyóʼó ndzó pɛ ndántéré pwɛ Ndámboʼmvé, ndzó ywoʼ yɛ́ ŋkɔŋɔ pɛ Yúda náá tɛ́rɛ nɛ́, cyó yɔ́b yɛ́ mə kɛ nyáʼá nyáʼá nsó nɛ́ ghú pó. 21Wo pó mbzírɛ́ páá ŋkyé kɔ́? No yɛ́ mə kɛ nsó nɛ́, psirɛ́ pwó pɔŋ pɛ́ pɔ́b kɛ zóʼ nɛ́. Pɔ́b cʉ̌yi zé no yɛ́ mə kɛ nsó nɛ́.» 22Njʉ́ a kɛ nsó néré nɛ́, taʼ ŋɔŋ ndzɔ́ʼɔ́ pɛ ghaŋápsíbɛ ndámboʼmvé gbíí pwó ndzó təŋé Yěsô, nsó ŋgâ: «Yɔ̌ŋ njʉ́ wo pɔ́rɔ́ no pwó tɛdshʉ́ kəkwéʼe nɛ́?» 23Yěsô pɔ́rɔ́ pwó yé ŋgâ: «A pɛ́ɛ́ yɛ́ mə nsó kəpɔŋ nɛ́, wo nyóʼ yɔ́b yɛ́ a yáŋ nɛ́ pó! A pɛ́ɛ́ yɛ́ mə ntsɔ̌ néré nɛ́, wo pó gbíí ya pe ne kɔ́?» 24Néré, Anə twɔ́ Yěsô yóʼó tɛdshʉ́ kəkwéʼe wɛ́ tíí yé kɛ pe Kayifə nɛ́, ŋgɛmbɛ a ke mbɛ́ɛ́ kwódme.
(Mat 26:71-75; Máá 14:69-72; Lúk 22:58-62)
25A kɛ ghɛ mbɛ néré Símo Pětro pɛ yóʼó tsé ndzɔ́ɔ́ mɔ́ɔ́. Pe psirɛ́ wé ŋgâ: «Tó mbəb wo, wo cyó meŋkho yé pɔɔ?» Pětro sírí, nsó ŋgâ: «Mə cyó pó!» 26Cyó taʼ ŋgaŋafaʼ tɛdshʉ́ kəkwéʼe, mɔ́ŋmɛ́ ŋɔŋ wɛ́ pětro kɛ tséé təŋé yé nɛ́, tsɔ́ pwó yé ŋgâ: «Mə kɛ zhʉ́ wo faʼ puŋ yé pɔɔ?» 27Pětro ké mbó sírí ŋkʉ́rʉ́. Kpaʼ ŋkhoʼ yéré, ŋkhoʼ tú.
Yěsô síŋ Piláto
(Mat 27:1-2; 27:11-14; Máá 15:1-5; Lúk 23:1-5)
28A kɛ ghɛ́ mbɛ néré, pe yɔ́ɔ́ Yěsô yóʼó Kayifə, ŋgú ne yé yóʼó ntsɛ́ssó pɛ ŋgɔ́menaʼ. A kɛ pɛ́ɛ́ ndáá ne fʉ́ʉ́wáá. Pɔŋ pɛ́ pɔ́b kɛ yɔ̂ wé ŋkʉ́yó ne yé nɛ́, pe kúŋɔ́ ndáb pó, kɛ́ʼɛ́ ŋgâ pɔ́b ndɛ siŋ mbəb yɔ́b mbó mbé ŋkúʼɔ́ ne ndzône mɔ́b Pasəka pó. 29Piláto twɔ́ mvé njʉ́ wɔ́b, nsó ŋgâ: «Puŋ sɔbɔ ŋɔŋ wɔŋ pe ne no kɔ́?» 30Pɔ́b pód ŋgâ: «A ghɛ́ mbɛ ŋɔŋ wɔŋ pe zhyɛ́ no kəpɔŋ pó, mbǒ psi fɛ́ wé pwó wo?» 31Piláto tsɔ́ ne pɔ́b ŋgâ: «Puŋ yɔ́ɔ́ wé, fiʼɛ wé ne tómbəb yuŋ, njʉ́ kaŋ múŋ tsɔ́ nɛ́.» Pɛ ntsɛ́ssó pɛ Yúda tsɔ́ pwó yé ŋgâ: «Psi tsɛʼɛ ne ŋgyɛ̌ne ŋɔŋ pfɔ̂ pó!» 32Yɔ̌ŋ pe nɛ́ njʉ́ nsó wɛ́ Yěsô kɛ tsɔ́ ŋkyé mbziʼe vó yé nɛ́, kɛ ghɛ́ ndúŋɔ nɛ́.
33Piláto pód ndzəb ndáb yé, fú Yěsô mbzírɛ́ wé ŋgâ: «A kɛ́ʼɛ́ a wo mbé fɔŋ pɛ Yúda?» 34Yěsô pɔ́rɔ́ pwó yé ŋgâ: «Yekénɛ́ twɔ́ pfɔ̂ wo, kii pe nsó nsó pwó wo ŋkyé ya mɔ?» 35Piláto tsɔ́ pwó yé ŋgâ: «Mo, mə ŋɔŋ Yúda? A fɛ́ kpaʼ mbé ŋgɔŋ wo pwɛ ntsɛ́ssó ghaŋáshʉ́, fɛ́ wo ne mo! Wo zhyɛ́ níŋ?» 36Yěsô pód ŋgâ: «Nofɔŋ ya pɛ́ɛ́ ndzó mvé yɔŋ pó. A ghɛ́ mbɛ Nofɔŋ ya pɛɛ ndzó mvé yɔŋ, mbǒ pû páá maʼ ntsɔ kaʼatɛ ŋɔŋ pé fí ya pwó ntsɛ́ssó pɛ Yúda pó. Ntsʉʼ ŋgɛmbɛ ne ŋkhoʼyɔŋ, Nofɔŋ ya pɛ́ɛ́ ghaŋ pó.» 37Piláto tsɔ́ pwó yé ŋgâ: «Wo ghɛ́ɛ́ kaʼa mbé fɔŋ?» Yěsô pɔ́rɔ́ pwó ŋgâ: «A tsɔ́ wo nɛ́ ŋgâ mə fɔŋ. Pe kɛ pfɛ́ ya, mə ŋkʉ́yo mvé ne ŋgyɛ̌ne pɔŋ zé no sísíŋ. Ntsye ŋɔŋ wɛ́ a ŋɔŋ no sísíŋ nɛ́, ndzóʼó no yɛ́ mə ntsɔ́ nɛ́.» 38Piláto psirɛ́ wé ŋgâ: «A kɔ́ mbé no sísíŋ?»
(Mat 27:15-31; Máá 15:6-20; Lúk 23:13-25)
Njʉ́ a kɛ psírí néré nɛ́, a ké mbó ŋgú mvé njʉ́ pɛ ntsɛ́ssó pɛ Yúda, ntsɔ́ ne pɔ́b ŋgâ: «A ne mo, mə njʉ́ ya cyó yɔ́b yɛ́ puŋ sɔ́bɔ́ ŋɔŋ wɔŋ ndúŋú nɛ́ pó. 39Ntsʉʼmbé, njʉ́ a ne nuŋu yúŋ ŋgâ mə ntubɔ́ taʼ ŋɔŋ ndábtsáŋ fɛ́ ne puŋ ŋkhoʼ ndebéne Pasəka nɛ́, puŋ zɔŋɔ ŋgâ mə ntéé fɔŋ pɛ Yúda?» 40Néré, pɔ́b ndzyě ne ŋgéʼne ŋgâ: «Ŋgaŋ! Wékénɛ́ pó! Fɛ̌ Barabasə ne psi.» A kɛ ghɛmbɛ Barabasə wéré pe taʼ səbntswee.
ទើបបានជ្រើសរើសហើយ៖
Zhâŋ 18: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
