Faʼ Ghaŋántɔ́b 25

25
Pɔ́lə síŋ Fɛsətʉsə
1Njʉ́ Fɛsətʉsə kɛ zhyɛ́ zhyémve pékyéd ndzó pɛ́rɛ́ ywoʼ yéré nɛ́, a ŋáá Sezare ŋkɔ́ʼɔ́ Yerʉ́salɛm. 2Pɛ ntsɛ́ssó ghaŋáshʉ́ pwɛ pɛ ghəkód pɛ Yúda kʉ́yó sɔ́bɔ́ Pɔ́lə pwó yé. Pɔ́b tɔ́ʼ kpee, 3ne ŋgɔ́b ndɔŋɔ pwó ye ŋgâ a tyáŋa Pɔ́lə Yerʉ́salɛm. A kɛ ghɛmbɛ néré, pɔ́b táʼá mverɛ́ taʼ wě mɛndɔ́b a nɔ́ʼɔ́ Pɔ́lə. 4Ntsʉʼmbé, Fɛsətʉsə pód ŋgâ a zɔŋɔ ŋgâ pé tee Pɔ́lə pe ndátsáŋ Sezare, ŋkyé ŋgâ mɔ́ŋtiʼa ŋkhoʼ, ŋ ŋkɔʼɔtómbəb ye ŋáá ye ŋǎ. 5A nsó ŋgâ: «Pɔŋ pɛ́ pɔ́b pɛ ntsɛ́ssó ndzɔ́ʼɔ́ puŋ nɛ́, pɔ́b kʉ́yó psi pɔ́b ghú Sesaré. A pɛ́ɛ́ yɛ́ taʼ no yóʼó yɛ́ ŋɔŋ wɔŋ zhyɛ́ a pe nyí nɛ́ pó, pɔ́b sɔ́bɔ́ wé yóʼó!»
6Fɛsətʉsə kɛ pé tsó yóʼó pɔ́b kaʼatɛ zhyémve péfwɔ̂ kii v wɔ̂ zhyémve kuʼu pó. Ŋkhoʼyɛ́ a kɛ páŋa Sezare nɛ́, mvé kee, a ghɔ́rɔ́ ndzó ywoʼɔ́ sábáfiʼ, nyáŋá ŋgâ pe fú Pɔ́lə. 7Ŋkhoʼyɛ́ a kɛ kʉ́yó nɛ́, pɛ Yúda pɛ́ pɔ́b kɛ ŋǎ Yerʉ́salɛm mviŋɛ́ yóʼó nɛ́, zhyɛ̂ wé ntíí pɛ paŋ tó yé zááme. Ntsʉʼmbé pɔ́b pé kúʼɔ́ ne nyóʼne kiŋi pó. 8Ghɛmbɛ́ ne Pɔ́lə, a ke ntíí kpee yé pé ne no yɛ́ a kɛ pee ntsó nɛ́. A kɛ tsɔ́ɔ́ ŋgâ: «Mə mvó cyó no pó, kii pó sháŋa ndúŋú kaŋ pɛ Yúda. Mə sháŋa cyó no mbəb Ndámboʼmvé pó, kii mbɛ mbəb fɔŋ pɛ Roma pó.» 9Njʉ́ Fɛsətʉsə kɛ zɔŋɔ ŋgâ pɛ Yúda tiŋɛ́ wé ne mbzítíí sʉ́ʼʉ nɛ́, a psirɛ́ Pɔ́lə ŋgâ: «Tɛɛmbɛ wo kɔ́ʼɔ́ Yerʉ́salɛm, kɛ́ʼɛ́ ŋgâ pe fiʼ wo síŋ mo?» 10Ntsʉʼmbé Pɔ́lə pód ŋgâ: «Njʉ́ mə kɛ pɛ́ síŋ ghaŋásábáfiʼ fɔŋ pɛ Roma nɛ́, pé fiʼɛ ya ghaŋ taʼ kɛɛ. Mə ŋgyɛ́ cyó no kəpɔŋ pwó pɛ Yúda pó njʉ́ ŋ ŋkɔʼɔtómbəb wo, wo cʉ̌yi njʉ́ nɛ́. 11A pɛ́ɛ́ yɛ́ mə mvəhó kpaʼ sísíŋ nɛ́, a pɛ́ɛ́ yɛ́ mə ŋgyɛ́ no kəpɔŋ yɛ́ a tsyɛ́ ŋgâ pe nɔ́ʼɔ́ ya nɛ́, mbǒ mə kí vó pó. Ntsʉʼmbé, a pɛ́ɛ́ yɛ́ ŋɔŋ zhʉ́ no yɛ́ pe sɔbɔ́ ya ndúŋú nɛ́ pó, mbǒ cyó ŋɔŋ tséʼé tʉ̌ŋ ne fíne ya ne pɔ́b pó. Pe ghú ne mo síŋ fɔŋ pɛ Roma.» 12Fɛsətʉsə psirɛ́ pɔŋ pɛ́ pwɛ pɔ́b kɛ sabafiʼ nɛ́, mbód ŋgâ: «Wo gháá pe ghú ne wo síŋ fɔŋ pɛ Roma yɔ́ɔ́? Wo ŋgú síŋ ye!»
Pɔ́lə síŋ fɔŋ Agripa pú Berénisə
13Njʉ́ pɔ́ŋ zhyémve kɛ záʼ nɛ́, fɔŋ Agripa pú Berénisə páŋa Sezare, ŋgú ŋgáŋá Fɛsətʉsə. 14Njʉ́ pú pɔ́b kɛ ghɛ̌ náʼá kyáŋá nɛ́, Fɛsətʉsə sə́ŋɛ́ fɔŋ ne no Pɔ́lə. A kɛ tsɔ́ pwó yé ŋgâ: «Cyó ŋɔŋ ghaŋ wɛ́ Felisə tee wé ndátsáŋ nɛ́. 15Ŋkhoʼyɛ́ mə́ mbɛ́ Yerʉ́salɛm nɛ́, pɛ ntsɛ́ssó ghaŋáshʉ́ pwɛ pɛ ghəkód pɛ Yúda kʉ́yó sɔ́bɔ́ wé né mo, ndzɔŋɔ ŋgâ pe fúŋɔ́ wé. 16Mə mbɔ́rɔ́ ne pɔ́b ŋgâ kaŋ pɛ Roma psyɛ ŋgâ pe fúŋɔ́ taʼ ŋɔŋ, kii pê ntíí wé pwɛ pɔŋ pɛ pɔ́b sɔbɔ wé nɛ́ síŋ ghaŋásábáfiʼ a tsɔ́ yé no pó. 17Pɔ́b kiʼi kʉ́yó ghaŋ ne yé, kpaʼ ŋkhoʼ keemvé, kii zyé fɛ́ mɔ́ŋ saŋ ne mo, mə ŋgú ŋgɔ́rɔ́ ndzó ywoʼɔ́ sábáfiʼ, nyáŋá ŋgâ pe kʉ́yó ne yé. 18Ŋkhoʼyɛ́ pɔŋ pɛ́ pɔ́b kɛ sɔ́bɔ́ wé nɛ́, kɛ tɛrɛ́ pfúŋɔ́ yé nɛ́, pɔ́b pe nsó cyó mbɔŋɔ no ndúŋú meno pɛ́ a kɛ zhyɛ́, a pɛ́ tó mo mbɛ́ɛ́ yé kəpɔŋ nɛ́ pó. 19Pú pɔ́b kɛ ke mɛ́ʼɛ́ntswee pé ndaʼ ndúŋú no Mboʼmvé wɔ́b, méé mbɛ́ náá, no taʼ Yěsô wɛ́ a kɛ pfó, ntsʉʼmbé Pɔ́lə tsɔ́ ŋgâ a kɛ kɛ́rɛ́ mvé nɛ́. 20Njʉ́ mə kɛ pé zhʉ́ no yɛ́ tɛɛmbɛ mə mbɔ́rɔ́ yá ndúŋú nɛ́ pó, mə ntsɔ́ pwó yé ŋgâ a ghú Yerʉ́salɛm, yânéré pé fiʼ no yéré yóʼó. 21Ntsʉʼmbé Pɔ́lə pó ndzɔ́ŋɔ yé pé ŋgâ pe ke fiʼɛ́ wé pe ndaʼ síŋ fɔŋ wíŋi. A zhyɛ́ yéré mə nyáŋá ŋgâ pe ywʉʼɔ́ wé ndátsáŋ kaʼatɛ mbáŋ zhyémve yɛ́ pé ntwɔ́ wé síŋ fɔŋ nɛ́.» 22Agripa tsɔ́ pwó Fɛsətʉsə ŋgâ: «A zɔŋɔ ŋgâ mə kémbó ndzóʼó yá ŋɔŋ wékénɛ́.» A pód pwó yé ŋgâ: «Wo ndɛ ndzóʼó wé nǐmwɔ̂.»
23Keemvé, Agripa pú Berénisə páŋ, ŋgɛ́ mbáŋa pe tú pɛ ntaŋ, pwɛ pɛ ntsɛ́ssó pɛ́ káŋató pwɛ pɛ ghəkód pɛ́ pɔ́b mbɛ́lʉ́ŋ nɛ́, kúŋɔ́ ndzó ywoʼɔ́sábafiʼ, ŋgód. Fɛsətʉsə zhyɛ́ pe kʉ́yó ne Pɔ́lə. 24A nsó ŋgâ: «Fɔŋ Agripa pwɛ ŋkɔŋɔ wuŋ wɛ́ piŋi ghaŋ náá nɛ́, puŋ zhʉ́ ŋɔŋ wɔŋ? Ŋkɔŋɔ pɛ Yúda náá ŋǎ ŋkʉ́yó mbɛd ya Yerʉ́salɛm, mbɛ ghaŋ ŋkyé ŋɔŋ wékénɛ́, ŋgéʼé ŋgâ pe nɔ́ʼ wé. 25A kiʼi ŋgɛ mbɛ ne mo, mə mbé zhʉ́ cyó no yɛ́ a zhyɛ́ kaʼatɛ a ke tsyɛ́ ŋgâ pe nɔ́ʼ wé nɛ́ pó. Ntsʉʼmbé, a njʉ́ a gháá pe ke fiʼɛ wé pe ndaʼ síŋ fɔŋ wíŋi nɛ́, mə ntwɔ́ wé pwó yé. 26Njʉ́ mə ndzɛ́ kpaʼ no yɛ́ mə ŋwɛʼɛ pwó fɔŋ ŋkyé wé nɛ́ pó, mə ntíí wé síŋ puŋ ŋgâ puŋ fiʼɛ wé. Mbɛ náá síŋ wo, fɔŋ Agripa, kɛ́ʼɛ́ ŋgâ mə tséʼé no yɛ́ mə ŋwɛʼɛ́ pwó fɔŋ ŋkhoʼyɛ́ puŋ ŋkwórɔ́ tó yé nɛ́. 27Ŋkyé ŋgâ mə njʉ́ yá ŋgâ a ndáá no shʉyédme ne ntwɔ́ ne ŋgaŋatsáŋ kii nsó no yɛ́ pé sɔ́bɔ́ wé ndúŋú nɛ́.»

ទើបបានជ្រើសរើសហើយ៖

Faʼ Ghaŋántɔ́b 25: XMG

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល