Faʼ Ghaŋántɔ́b 13
13
Mboʼmvé tsɔ́ʼ Baanabasə pú Sɔlə ne faʼ ye
1A kɛ mbɛ ndzɔ́ʼɔ́ pǔkristo pɛ́ pɔ́b kɛ pɛ ndzó mbɛ́lʉ́ŋ Antyoshə nɛ́, ghaŋátsɔ́kpaŋató Mboʼmvé pwɛ ghaŋáfɛ́ ntʉ́ʉ́ pɛ yóʼó. A kɛ pé Baanabasə, Simeyɔŋ wɛ́ pé kɛ fú wé ne Mɔ́ŋ sə́sé nɛ́, Lʉsyʉsə ŋɔŋ Sirɛnə, Manayɛŋ wɛ́ pú fɔŋ Erodə wɛ́ a kɛ sáʼá pɛ́rɛ́ ŋgɔŋ Galílya nɛ́ kɛ ghóʼ nɛ́, ne Sɔlə. 2Taʼ zhyémve yɛ́ pɔ́b kɛ téré tsé ŋgúʼɔ Ntsɛɛpɔŋ mbó ndzɛ́ nse nɛ́, Zhʉye Yáŋme tsɔ́ ne pɔ́b ŋgâ: «Puŋ ghə́yɛ Baanabasə pú Sɔlə ne fǎʼne faʼ yɛ́, mə tsɔ́ʼɔ́ wɔ́b ndúŋú nɛ́.» 3Néré, ŋkhoʼyɛ́ pɔ́b kɛ mě zɛ̌nse pwɛ ntsɛ́ʼɛ́ Mboʼmvé nɛ́, pɔ́b záb mbwó mɔ́b mbəb pɔ́b, ntéé wɔ́b pɔ́b ghú.
Baanabasə pú Sɔlə ghú Shiiprə
4Njʉ́ Zhʉye Yáŋme kɛ twɔ̌ wɔ́b nɛ́, Baanabasə pú Sɔlə pfiŋɛ Séləsi, kɔ́ʼɔ́ ndzó paŋ ndɔ́ɔ́ mɛndɔ́b Shiiprə. 5Ŋkhoʼyɛ́ pɔ́b kɛ páŋá Salaminə nɛ́, pɔ́b cʉrí nsó Mboʼmvé yóʼó, ndzó pɛ ndántéré pɛ Yúda. A kɛ ghɛmbɛ Zhâŋ, ntsyɛ wɔ́b, ke ŋgɛ mbɛ́ yé yóʼó. 6Ŋkhoʼyɛ́ pɔ́b kɛ siʼá ŋkhəŋnse náá kaʼatɛ mbáŋá Pafosə nɛ́, pɔ́b zhʉ́ taʼ ŋǔ Yúda wɛ́ tíí ye kɛ pe Báá Yěsô nɛ́, ŋgɛ̌ mbé maʼandzə́b, mbó shʉyɛ́ pɔŋ ŋgâ a ŋgaŋatsɔ́kpaŋató Mboʼmvé. 7A kɛ pé taʼ ŋɔŋ ndzɔ́ʼɔ́ pɔŋ pɛ́ pwɛ ntsɛ́ssó ŋgɔ́bmenaʼ Sɛɛzhyʉsə Pólyʉsə kɛ cʉ̌yi ndzɛ́ mbəb yɔ́b nɛ́. Ntsɛ́ssó pɛ ŋgɔ́bmenaʼ wéré kɛ pé taʼ ŋɔŋ tséʼé zé. A káʼá Baanabasə pú Sɔlə, ŋgyɛ́ pɔ́b zé ŋgâ a kɛ tsé ndzɔŋɔ́ ndzóʼó nsó Mboʼmvé. 8Tíí maʼndzə́b wéré ne nsó Grɛkə kɛ pe Elimasə. Elimasə wéré kɛ náŋa Baanabasə pú Sɔlə naŋ ne faʼ yɔ́b, mbó tsé mbé zɔ́ŋɔ ŋgâ ŋgɔ́bmenaʼ tséʼé psyɛ́ndzɔʼ pó. 9Néré kɛ́ʼɛ́, Sɔlə, wɛ́ tíí ke mbó mbé Pɔ́lə nɛ́, Zhʉye Yáŋme yúŋɔ́ wé, a tiŋí maʼndzə́b wéré ndzó míí mé, 10ntsɔ́ pwó ye ŋgâ: «Wo, Mɔ́ŋ Saŋaywoʼ, ŋgɔ́b pwɛ mənaŋ gháʼmbwo pfwɔ̂ wo, wo wɛ́ wo kǎ kɛ kʉyě no ŋgerɛŋgéd nɛ́ pó, wo náʼ ntee hyɛ́kɔ́ ne mgbǎne mɛndɔ́b Ntsɛɛpɔŋ wɛ́ a wé ŋgerɛ́ŋged nɛ́, ŋúrɔ́? 11Zhʉ́ nɛ́ njʉ́! A ghɛmbɛ ne ŋkhoʼyɔŋ, Ntsɛɛpɔŋ sǐ pwó ye nɛ́ ŋkebé wo núŋ: Wo ffɔ́, kaʼatɛ tsé mbe zhʉ́ ménab ŋkʉ́rʉ́ pó, kaʼatɛ mbáŋá ŋkhoʼyɛ́, a psyɛ́ nɛ́.» Kpaʼ ŋkhoʼyéré, míí mé síŋ, a syɛ́ mbɛ́ɛ́ ndzɔ́ʼɔ́ ndzə́ndzə́b, shʉ̌ ndzó taʼ ywoʼ, məbɛ ywoʼ, ntaʼa ŋɔŋ wɛ́ a tsyáŋá we nɛ́. 12Ŋkhoʼyɛ́ ŋgɔ́bmenaʼ kɛ zhʉ́ no yɛ́ a kɛ záʼ nɛ́, a tséʼé psyɛ́ndzɔʼ. Ŋkyé ŋgâ a kɛ zóʼ ntʉ́ʉ́ Ntsɛɛpɔŋ a kɛ́bɛ́ wé kaʼatɛ.
No yɛ́ Pɔ́lə kɛ tsɔ́ ndzó mbɛ́lʉ́ŋ Aŋtyoshə a Pisidi nɛ́
13Pɔ́lə pwɛ pɛkpee pé kɔ́ʼɔ ndzó páŋ ŋgú Pafosə, ŋgú Pɛɛzhe ndzó ŋgɔŋ Paŋfilya. Zhâŋ tee ye wɔ́b, mbód ye ndzəb Yerʉ́salɛm. 14Ŋgɛ ŋkhú ne pɔ́b, pɔ́b ŋáá Pɛɛzhe, ndɔ́ɔ́ mɛndɔ́b ŋgú mbáŋá ndzó Antyoshə yɛ́ a ndzó pɛ́rɛ́ ŋgɔŋ Pisidya nɛ́. Zhyéze pɛ Yúda, pɔ́b kúŋɔ ndántéré pɔ́b, ŋgɔ́rɔ́ syé. 15Ŋkhoʼyɛ́ pe kɛ mee fûne Ŋweʼekaŋ pwɛ Ŋweʼe Ghaŋátsɔ́kpaŋató Mboʼmvé nɛ́, pɛ ntsɛ́ssó ndántéré zhyɛ́ pe tsɔ́ ne pɔ́b ŋgâ: «Pɔ́ŋmɛ́ páá, a pɛ́ɛ́ yɛ́ puŋ tséʼé pɔ́ŋ ntʉ́ʉ́ ne fɛ́ne pwó pɔ́ŋmɛ́ nɛ́, puŋ fɛ́.» 16Pɔ́lə ŋáá nɛ́ syé, nyóʼ pwó ye ŋgâ pɔŋ naʼ ndzwəʼé, nsó ŋgâ:
«Pɔ́ŋ Issayɛ, ghɛmbɛ́ puŋ pɛ́ pǔŋ tséʼé pɔ́ɔ́ Mboʼmvé nɛ́, puŋ zóʼ no yɛ́ mə ndzɔŋɔ ntsɔ́ nɛ́. 17Mboʼmvé pɔ́ŋ Issayɛ kɛ tsɔ́ʼ tɛd tɛd piŋi. Ŋkhoʼyɛ́ pɔ́b kɛ pɛ́ ndzó ŋgɔŋ Egibto nɛ́, a zhyɛ́ pɔ́b pfíí ndzáá. A ghɛ́ kyáŋá, a zhyɛ́ pɔ́b twɔ́ ndzóó pé ne tʉ̌ŋ mé. 18A zhʉyí wɔ́b ghúŋkwéʼé ne ywɔ̌ ŋgǒʼmvé ghúbmekwa. 19Ŋkʉ́rʉ́, a pó mbóó yáʼ Yísambáá ndzó ŋgɔŋ Kanahaŋ, ŋgób tsetsáʼ yɔ́b ne mbɛd ne pɔ́b. 20Ŋkɔŋɔ meno péré náá kɛ pé kɛ́ʼɛ́ ne ywɔ̌ kpǐ ŋgǒʼmvé yíkwa ne ghúbmetáŋ. Njʉ́ a kɛ pe néré nɛ́, a tsɔ́ʼ pɛ ghaŋásábáfiʼ fɛ́ ne pɔ́b, pɔ́b pe pɛ tsyaŋa, kaʼatɛ mbáŋa mbəb ŋgaŋatsɔ́kpaŋató Mboʼmvé, Samyɛ. 21Pɔ́b psírí taʼ fɔŋ nɛ́. Mboʼmvé fɛ́ Sayʉ́lə ne pɔ́b. A kɛ pé Mɔ́ŋ Kisə, mbé ŋɔŋ ne ndǎ ndáb Bezhamɛŋ. Sayʉ́lə sáʼá wɔ́b ne ŋgǒʼmvé ghúbmekwa. 22Ŋkhoʼyɛ́ Mboʼmvé kɛ shʉʼɛ́ wé ndzó ywʉ fɔŋ nɛ́, a tsúbɔ́ Ndavíd. Mboʼmvé kɛ nsó ŋkyé wé ŋgâ: “Mə njʉ́ Ndavíd, Mɔ́ŋ Zhese, a taʼ ŋɔŋ njʉ́ ndzɔʼ ya psirɛ́ nɛ́, a ŋkʉ́yó ŋgyɛ́ ŋkɔŋɔ meno pɛ́ mə ndzɔ́ŋɔ náá nɛ́.” 23Mboʼmvé kɛ zhyɛ́ Yěsô twɔ́ ne ndǎ ndáb Ndavíd, njʉ́ a kɛ kaʼ nɛ́, mbé ŋgaŋakpê Issayɛ. 24Yěsô kɛ ghɛ́ ŋkʉ́yó, mbǒ Zhâŋ kɛrɛ́ pě cʉrí ŋgâ ŋkɔŋɔ pɔ́ŋ Issayɛ náá séd ndzɔʼ yɔ́b kpênse. 25Ŋkhoʼyɛ́ Zhâŋ kɛ tsé mee faʼ ye nɛ́, a tsɔ́ ne pɔ́b ŋgâ: “Ŋɔŋ wɛ́ pǔŋ kpaŋa ŋgâ mə ye nɛ́, mə ye pó! Ntsʉʼmbé, taʼ ŋɔŋ ndzəb mo tsé ŋkʉ́yó, mə mbé kúʼɔ́ ne ŋkěne kpǐ tɔ́kpee mé pó.”
26Pɔ́ŋmɛ́ páá, kii puŋ pɛ́ɛ́ pɛ Mɔ́ŋ ne ndǎ ndáb Ábraham, kii pǔŋ pɛ́ɛ́ pɔ́ŋ pɔŋ pɛ́ pɔ́b tséʼé pɔ́ɔ́ Mboʼmvé nɛ́, puŋ zɛ́ nɛ́ ŋgâ nsó ndzǔne wɔŋ, pé twɔ́ nɛ́ pe ne piŋi. 27Pɔŋ pɛ́ pɔ́b tsó Yerʉ́salɛm pwɛ péfɔŋ pɔ́b nɛ́ kɛ sirɛ́ Yěsô, ntséé fiʼ yé ŋgâ pe nɔ́ʼɔ́ wé. Kɛ́ʼɛ́, ndúŋɔ nsó pɛ ghaŋátsɔ́kpaŋató Mboʼmvé pɛ́, pe fú ŋkɔŋɔ zhyéze yiŋi náá nɛ́. 28Pɔ́b kɛ tsɔ́ pwó Piláto ŋgâ a nɔ́ʼɔ́ wé, kii zyé njʉ́ no yɛ́ a vô nɛ́. 29Ŋkhoʼyɛ́ pɔ́b kɛ yúŋú ŋkɔŋɔ meno pɛ́ pe kɛ ŋweʼe ŋkyé wé náá nɛ́, pɔ́b shʉʼɛ́ wé ndúŋú ŋgʉŋʉ, ndzab á wé ndzó sye. 30Ntsʉʼmbé, Mboʼmvé zhʉyɛ́ wé ne vó. 31A nyóʼ mbəb yé ne zhyémve zááme, pwó pɔŋ pɛ́ pwɛ pɔ́b kɛ ŋáá Galílya ŋkɔ́ʼɔ́ Yerʉ́salɛm nɛ́. A pɔ́b nɛ́ ŋkhoʼyɔŋ mbé ghaŋákpêntáŋ pé síŋ pɔŋ.
32Psi wɔŋ wɛ́ psi ghaŋ nɛ́, psi ke ncʉ́rɛ Ŋkəŋ sʉ́ʼʉ wéré ne puŋ. Ŋkəŋ sʉ́ʼʉ yéré, a no yɛ́ Mboʼmvé kɛ káʼa pwó pɛ tɛd nɛ́, 33Mboʼmvé cʉ̌yi ndúŋú kaʼ yéré ne psi pɛ́ psi pɔ́ŋ pɔ́b nɛ́, ŋkhoʼyɛ́ a kɛ zhʉyɛ́ Yěsô ne vó njʉ́ a ŋweʼéme ndzó Ŋweʼe Zɔ́bɔnse mbɛ́rɛ́ yípáá ŋgâ: “Wo Mɔ́ŋ ya. A ghɛmbɛ ne ndzebé, mo, mə mvé wo.”
34Mboʼmvé kɛ zhʉyɛ́ wé ne vó, tɛɛmbɛ a pó mbé yúb ŋkʉ́rʉ́ pó. A kpaʼ no yɛ́ a kɛ nsó nɛ́. No yéré pɛɛ ŋgâ:
“Mə ŋkʉ́yó fɛ mbúru yáŋme ne puŋ
mbó mbé yé ŋgerɛ́ŋged yɛ́ mə kɛ kaʼá pwó fɔŋ Ndavíd nɛ́.”
35A zhyɛ́ yéré kɛ́ʼɛ́ a tsɔ́ ndzó cyó ywoʼɔ ŋweʼe ŋkʉ́rʉ́ ŋgâ:
“Wo ghɛ́ náʼá mbé tee ŋgaŋafaʼ wo, á yúbɔ́ ndzɔ́ʼɔ́ tsetsáʼ pó”.
36Ŋgɛ ŋkhú ne fɔŋ Ndavíd, njʉ́ a kɛ mee fǎʼne faʼ yɛ́ Mboʼmvé kɛ tíí pwó yé ŋkhoʼyɛ́ a kɛ zɔŋɔ nɛ́, a pfó, pe núŋɔ́ wé pfúŋɔ́ tɛd pé. Ntsʉʼmbé, pfɔ́ ye yúb. 37Ntsʉʼmbé, ŋɔŋ wɛ́ Mboʼmvé kɛ zhʉyɛ́ wé ne vó nɛ́, a kâ yúb pó. 38Pɔ́ŋmɛ́ páá, puŋ zé nɛ́ ŋkhoʼyɔŋ ŋgâ, pe yáá ndǎ yé ntsɔ́ ne puŋ ŋgâ Mboʼmvé máʼ kəpɔŋ wuŋ. Kaŋ Mǔsê kɛ pe kúʼɔ́ ne kpêne wúŋ ndzɔ́ʼɔ́ kəpɔŋ wuŋ pó. 39Ntsye ŋɔŋ wɛ́ a tséʼé psyɛ́ndzɔʼ náá nɛ́, Mboʼmvé naʼ ndáá ndǎ ye ndiŋɛ́ wé njʉ́ ŋɔŋ ŋgerɛ́ŋged nɛ́.
40Puŋ maʼ fǐ ndzó ntəŋé múŋ ŋgâ nsó ghaŋátsɔ́kpaŋató Mboʼmvé wɔŋ ndɛ gbáá wuŋ. Nsó wéré pɛ́ɛ́ ŋgâ:
41“Puŋ, pɛ ŋkaboʼ fáá təŋé, puŋ tiŋi njʉ́,
A ŋgəyine gbâ wuŋ, kaʼatɛ puŋ pwó.
Ŋkyé ŋgâ puŋ ŋgɛ́ mpfɔ́, mə fáʼ taʼ faʼ.
Faʼ yéré, a ghɛmbɛ a tébé ŋumesɔŋ ne puŋ,
Mbǒ puŋ naʼ mbé psyɛ́ pó.”»
42Ŋkhoʼyɛ́ Pɔ́lə pú Baanabasə kɛ twɔ́ nɛ́, pe póʼmbwó ne pɔ́b kaʼatɛ, ŋgâ pɔ́b pó ŋkʉ́yó ntsó no ŋkʉ́rʉ́ ndúŋú, ne yiŋ zhyéze yɛ́ a tsé ŋkʉ́yó nɛ́. 43Ŋkhoʼyɛ́ pɔŋ kɛ gbéʼé nɛ́, pɛ́ Yúda zááme pwɛ pushʉyɛ pɛ́ pɔ́b kɛ psyɛ́ ŋgúʼune Mboʼmvé njʉ́ pɛ Yúda nɛ́, tyáŋa Pɔ́lə pú Baanabasə. Njʉ́ pwɛ pɔ́b kɛ ghód tsé səŋɛ́ nɛ́, pɔ́b níŋí ndzɔʼ yɔ́b ŋgâ pɔ́b tee mbəb yɔ́b a tyáŋa Mboʼmvé tyáŋa wɔ́b ne pǔpfob yé.
Pɔ́lə pú Baanabasə cʉrí Ŋkəŋ sʉ́ʼʉ pwó pɔŋ pɛ́ pɔ́b pɛ Yúda nɛ́ po
44Njʉ́ zhyéze pɛ Yúda kɛ kuʼu nɛ́, ŋkɔŋɔ pɔŋ pɛ́ pɔ́b kɛ pɛ́ mbɛ́lʉ́ŋ náá nɛ́ tɛ́rɛ, ne ndzóʼne nsó Ntsɛɛpɔŋ. 45Ŋkhoʼyɛ́ pɛ Yúda kɛ zhʉ́ ndɔŋɔ pɔŋ péré nɛ́, pɔ́b pʉ́ʉ́ŋgyé kaʼatɛ mbó ndɔ̂ ntó mbɔ́rɔ́ nsó Pɔ́lə núŋ. 46Pɔ́lə pú Baanabasə yɔ̌ shʉ̌ndzɔʼ, nsó ŋgâ: «A kɛ ghɛmbɛ a zɔŋɔ ŋgâ pe pee fɛ́ nsó Mboʼmvé pé ne puŋ! A kiʼi mbɛ njʉ́ puŋ kirɛ nsó wéré kiri nɛ́, mbó njʉ́ ne tómbəb yuŋ ŋgâ puŋ kúʼɔ́ ne tsómvé ŋeŋáŋ nɛ́ pó, psi séd mbəb zhí ŋkhoʼyɔŋ fɛ́ nsó wéré pwó pɛ́ pɔ́b pɛ Yúda nɛ́ pó. 47Ŋkyé ŋgâ, yekénɛ́ kpěnsenyi, a fɛ́ Ntsɛɛpɔŋ ne psi nɛ́. A pɛɛ ŋgâ:
“Mə ntíí wo ne ŋkaʼ mɔ́ɔ́ mvémvé,
kɛ́ʼɛ́ ŋgâ wo yɔ́ɔ́ nsó Mboʼmvé wɛ́ a fɛ́ ndzǔne nɛ́, ŋgú núŋ
kaʼatɛ mbáŋa ndzó ŋkɔŋɔ mbǎʼmvé náá.”»
48Ŋkhoʼyɛ́ pɔŋ pɛ́ pɔ́b pɛ Yúda nɛ́ pó kɛ zóʼ nsó wéré nɛ́, ndzɔʼ yɔ́b yaŋ kaʼatɛ, pɔ́b ghúʼú nsó Ntsɛɛpɔŋ. Mbɛ ŋkɔŋɔ pɔŋ pɛ́ Mboʼmvé kɛ tsɔ́ʼ wɔ́b ŋgâ pɔ́b ŋkʉ́yó ntsɛ́ʼɛ́ tsómvé ŋeŋáŋ náá nɛ́, pɔ́b tséʼé psyɛ́ndzɔʼ.
49Néré, nsó Ntsɛɛpɔŋ nzó ŋkɔŋɔ pɛ́rɛ́ ywoʼ yéré náá. 50Ntsʉʼmbé, pɛ Yúda tsiŋɛ pɛ mɛ́tó pěŋgyé pɛ́ pɔ́b kɛ ghúʼɔ Mboʼmvé nɛ́, mbɛ pɛ ghəkód pɛ́ pɔ́b kɛ pɛ́ ndzó mbɛ́lʉ́ŋ nɛ́. Pɔ́b kʉyɛ̌ pɔŋ ndzəb Pɔ́lə pú Baanabasə, pɔ́b zú wɔ́b yóʼó pɔ́b. 51Pɔ́b tsěd pfubɔ́ ne kpee mɔ́b ntee ne pɔ́b, ŋgú yɔ́b ndzó mbɛ́lʉ́ŋ Ikoniyɔŋ. 52Ŋgɛ́ ŋkhú ne pǔkristo ywoʼ yéré, pɔ́b tsʉ́ʼ, Zhʉye Yáŋme pwɛ ndebéne gháʼmbwo mɔ́b.
ទើបបានជ្រើសរើសហើយ៖
Faʼ Ghaŋántɔ́b 13: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
