Faʼ Ghaŋántɔ́b 11
11
Pětro kpéé mbəb siŋ pɛ Yúda pɛ́ pɔ́b kɛ pe pǔkristo nɛ́
1Njʉ́ yéré no kɛ záʼ nɛ́, pɛghaŋantɔ́b Yěsô pwɛ pǔkristo pɛ́ pɔ́b kɛ pɛ́ ŋgɔŋ Zhʉde nɛ́, zóʼ ŋgâ pɔŋ pɛ́ pɔ́b kɛ pé pɛ Yúda nɛ́ pó kɛ ke mbzyɛ́ yɔ́b nsó Mboʼmvé. 2Ŋkhoʼyɛ́ Pětro kɛ pɔ́rɔ́ Yerʉ́salɛm nɛ́, pǔkristo pɛ́ pɔ́b kɛ pé pɛ Yúda nɛ́, ghú njʉ́ wé, ntsó zúʼɔŋgyé yɔ́b pwó yé. 3Pɔ́b kɛ tsɔ́ pwó yé ŋgâ: «Wo ghú yóʼó pɔŋ pɛ́ pɔ́b psírime nɛ́ pó kaʼatɛ púŋ pɔ́b zó mɔ́b!» 4Néré, Pětro yɔ́ɔ́ njʉ́ no kɛ záʼ nɛ́, sí náá ne pɔ́b, ndzyěne ne ndzyě ye, ŋkéʼé ne pɔ́b ŋgâ:
5«Njʉ́ mə kɛ pɛ́ mbɛ́lʉ́ŋ Zhópe tsé ntsɛ́ʼɛ́ Mboʼmvé nɛ́, mə ntséʼé taʼ zhʉ́ywoʼ. Taʼ yɔ́b yɛ́ pe zé nɛ́ pó, njʉ́ cyó zhí mbziʼe ndzwé kəkwéʼe nɛ́, twɔ́ pépéé, pe gbaa ne tó pe pekwa. A shʉyí mbáŋa pfúŋɔ mo. 6Míí máá túŋɔ́ ndúŋú, mə mkpéʼe, njʉ́ pɛ nab kpee mékwa pɛ́ pɔ́b ndúŋú tsetsáʼ nɛ́, pɛ́ naa ndzɔ̌ʼkaʼ, pɛ́ pɔ́b yɛ̂yɛ̌ nɛ́, nné pɛ́ pɔ́b zyɛ̂ zyɛ̌ nɛ́. 7Mə mbó ndzóʼ taʼ ndzəb, a ntsɔ́ ne mo ŋgâ: “Pětro, ŋǎ syé, nɔ́ʼ pfód!” 8Mə mbód nɛ́ ŋgâ: “Ŋgáŋ kɛ Ntsɛɛpɔŋ. Ŋkyé ŋgâ féré ŋǎne máá syé, ywɔ̌ nsə, kii ŋgâ ywɔ̌ siŋɛ mbəb kǎ kɛ záʼá ntswee mo pó.” 9Ndzəb yéré ke mbó ntsɔ́ pépéé mbɛ́rɛ́ yípáá ŋgâ: “Yɔ́b yɛ́ Mboʼmvé séd a khú ye yáŋme nɛ́, wo, wo ndɛ nsó ŋgâ a ywɔ̌ nzə!” 10A kɛ zhyɛ́ néré kɛ́ɛ́ yíkyéd, ŋkɔŋɔ ŋkáá náá kɔ́ʼɔ́ pépéé. 11Kpaʼ ŋkhoʼyéré, pɔŋ pékyéd pɛ́ pɔ́b kɛ twɔ́ Sezare, pé twɔ́ wɔ́b pfúŋɔ́ mo nɛ́, páŋa ndzó ndáb yɛ́ psi kɛ pé nɛ́. 12Zhʉye Yáŋme tsɔ́ ne mo ŋgâ, psi pɔ́b ghǔ kii mə ntséʼé cyó kpaŋ. Pǔkristo péntóó pɔŋ kɛ tyáŋa ya, psi kúŋɔ́ ndáb ŋɔŋ wéré. 13A tsɔ́ ne psi mbziʼe njʉ́ aŋgere kɛ nyoʼ mbəb ye pwó yé ndáb yé mbó ntsɔ́ pwó yé ŋgâ: “T wɔ̂ ŋɔŋ Zhópe, a ghú fú Símo wɛ́ pé fú wé ne Pětro nɛ́. 14A ntsɔ́ pwó wo mbziʼe njʉ́ wo ntsɛ́ʼɛ́ ndzǔne puŋɛ́ yo ndǎ náá nɛ́.” 15Ŋkhoʼyɛ́ mə kɛ ké ndzyě ntsóne no kaʼa nɛ́, Zhʉye Yáŋme shʉyí mbəb pɔ́b njʉ́ a kɛ ke shʉyí mbəb piŋi ne ndzyě nɛ́. 16Néré, tó ya pó fú ne no yɛ́ Ntsɛɛpɔŋ kɛ ntsó nɛ́. No yéré kɛ pɛ́ɛ́ ŋgâ: “Zhâŋ kɛ fɛ́ kpênse ne puŋ pé ne nse, ntsʉ́ʼmbɛ ne puŋ, puŋ ŋkʉ́yó ntsɛ́ʼɛ́ yúŋ kpênse pé ne Zhʉye Yáŋme.” 17A pɛ́ɛ́ yɛ́ Mboʼmvé kɛ fɛ́ foʼndzəndzóʼ ne pɔ́b njʉ́ a kɛ fɛ́ ne piŋi ŋkhoʼyɛ́ piŋi kɛ psyɛ́ Ntsɛɛpɔŋ Yěsô Kristo nɛ́, mbǒ mo, mə kɛ pé wɔ̌, kaʼatɛ ŋgɛ́ náŋa Mboʼmvé njʉ́ a fáʼá faʼ yé nɛ́?» 18Njʉ́ a kɛ nsó néré nɛ́, pɔ́b zhirí náá ke tsʉ́ʼ ŋkhoʼyɔŋ ke ŋgúʼɔ Mboʼmvé ntsɔ́ ŋgâ: «Puŋ zhʉ́, Mboʼmvé ke ŋgyɛ́ ŋgâ pɔŋ pɛ pɔ́b pɛ́ Yúda nɛ́ po, séd mbziʼe yɔ́b ntséʼé tsómvé!»
Sɔ́ pǔkristo Aŋtyoshə
19Njʉ́ pé kɛ nɔ́ʼ Etyɛŋ, vaʼ vó nɛ́, pǔkristo gbéʼé náá kaʼatɛ mbáŋ Fenisya, pwɛ Shiiprə pú Antyoshə. Pɔ́b kɛ nyí néré, mbé ncʉ́rɛ no Mboʼmvé pwó ŋɔŋ fáá pɛ Yúda pó. 20Ntsʉʼmbé, ŋkoʼyɛ́ pecyó pɔŋ ndzɔ́ʼɔ́ pɔ́b pɛ́ pɔ́b kɛ pé mbé Shiiprə né Sirɛnə, kɛ páŋa Antyoshə nɛ́, pɔ́b ncʉ́ri Ŋkəŋ Sʉ́ʼʉ Ntsɛɛpɔŋ Yěsô pwó mbé Gerɛʼ. 21Ntsɛɛpɔŋ kɛ fɛ́ tʉ̌ŋ né pɔ́b, kaʼatɛ ndɔŋɔ pɔŋ pɛ́ pɔ́b kɛ sɛ́rɛ mbziʼe yɔ́b ntsɛ́ʼɛ́ psyɛ́ndzɔʼ ŋkyé Ntsɛɛpɔŋ nɛ́, záá. 22Pǔkristo pɛ́ pɔ́b kɛ pɛ́ Yerʉ́salɛm nɛ́, zóʼ no yɛ́ a kɛ záʼá nɛ́, tsɔ́ʼɔ́ Baanabasə twɔ́ Antyoshə. 23A páŋa yóʼó, njʉ́ no yɛ́ Mboʼmvé kɛ zhyɛ́ ne foʼndzəndzoʼ nɛ́. Ndzɔʼ ye yáŋ kaʼatɛ a fɛ́ metʉŋ pwó pǔkristo ŋgâ ŋkɔŋɔ wɔ́b náá cʉ̌yi gbáá Ntsɛɛpɔŋ sʉ́ʼʉ. 24Baanabasə wéré kɛ pé taʼ ŋɔŋ ŋgerɛ́ŋged wɛ́ a kɛ tséʼé psyɛ́ndzɔʼ, Zhʉye Yáŋme pó ndúŋɔ wé nɛ́. Pɔŋ zááme fɛ́ tsómvé yɔ́b pwó Ntsɛɛpɔŋ. 25Baanabasə ŋǎ nɛ́ yóʼó, ghú Taasə ne ntǎʼne Sɔlə. 26A páŋa yóʼó, njʉ́ wé, ndɔ́ɔ́ wé pú ye pód ndzəb Antyoshə. Pɔ́b tsó yóʼó ne taʼ ŋgǒʼmvé, kaa náá fáʼa pwó ndáméted, fɛ́ ntʉ́ʉ́ pwó pɔŋ zááme kaʼatɛ. A kɛ pɛ́ɛ́ Aŋtyoshə pé fú ŋgíŋgye Yěsô ne «pǔkristo» ne sɔ́ kɛɛ.
Ghebe yɛ́ pǔkristo kɛ maʼ fɛ́ Yerʉ́salɛm nɛ́
27A kɛ pɛ́ ndzɔ́ʼɔ́ péré zhyémve, pecyó ghaŋátsɔ́kpaŋató Mboʼmvé ŋáá Yerʉ́salɛm shʉyí Antyoshə. 28Zhʉye Yáŋme ŋáʼ míí cyó ŋɔŋ ndzɔ́ʼɔ́ pɔ́b wɛ́, pé kɛ fú wé ne Agabʉsə nɛ́. A ntsɔ́ ne pɔ́b ŋgâ taʼ títî náʼá mvɔ́, mgbáʼá ŋkɔŋɔ mvé náá. Yéré no kɛ záʼ kpaʼsísiŋ ŋkhoʼyɛ́ Kôlodə kɛ pé fɔŋ pɛ Roma nɛ́. 29Néré, pǔkristo nsó ŋgâ, pɔ́b máʼ mɔ́b ŋgebɛ́ pɔ́ŋmɛ́ pɔ́b pɛ́, pɔ́b kɛ tsó ndzó pɛ́rɛ́ ŋgɔŋ Zhʉde nɛ́, ŋɔŋ ke fɛ̌ yé fuʼ yɛ́ a tséʼé nɛ́. 30Pɔ́b kɛ nsó, ke ŋgyɛ́ néré. Pɔ́b máʼ mɔ́b péré, fɛ́ pwó Baanabasə pú Sɔlə, pɔ́b ghú fɛ́ pwó pɛ ghəkód Yerʉ́salɛm.
ទើបបានជ្រើសរើសហើយ៖
Faʼ Ghaŋántɔ́b 11: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
