2 Korɛŋto 12
12
Zhʉ́ywoʼ né no yɛ́ Pɔ́lə kɛ zhʉ́ nɛ́
1Ntiʼéne ŋkhoʼyɔŋ kaʼa mbɛ́ɛ́ kɔ́? A tséʼé cyó ghebe pó! Ntsʉʼmbé, mə ntsɔ́ pecyó meno pɛ́, Ntsɛɛpɔŋ nyóʼó ne mo nɛ́, meno pɛ́ a kɛ zhyɛ́, mə njʉ́ nɛ́. 2Mə ndzé taʼ ŋukristo, a ŋkhoʼyɔŋ ntsɔ̌b ŋgǒʼmvé yíkwa, wɛ́ Mboʼmvé kɛ kúʼɔ́ wé kaʼatɛ, a páŋa ndúŋú zhʉbɛ́ pépéé yíkyéd, kii a kɛ pɛɛ ne mbəb ye yɔŋɔ, kii a kɛ pɛɛ ne mbəb ndúŋɔ? Mbǒ mə ndzé pó, ndaʼ Mboʼmvé zé.
3Kii a kɛ pɛɛ ne mbəb ye yɔŋ? Kii a kɛ pɛɛ ne ye ndúŋɔ? Mbǒ mə ndzé pó, ndaʼ Mboʼmvé ndzé, mə ndzé ŋgâ ŋɔŋ wéré, 4Mboʼmvé kɛ kúʼɔ́ wé kaʼatɛ a páŋa paradisə, ndzoʼ pɛ nsó pɛ tɛɛmbɛ a pe fuʼ ntsɔ́ pwó ŋɔŋ nɛ́ pó, nsó pɛ́ a tsyɛ́ pwó ŋumesɔŋ ŋgâ a pó ntsó nɛ́ pó. 5Tɛɛmbɛ mə ntiʼé ŋkyé ŋɔŋ wéré. Ntsʉʼmbɛ ne mo, a pɛ́ɛ́ no ntiʼéne, mbǒ mə ntiʼɛ́ ne mbɔ́dne máá. 6Oooʼ! A kaʼa, a ghɛmbɛ mə ndzɔŋɔ ntiʼé ntiʼe, mbǒ tɛɛmbɛ cyó ŋɔŋ pe nsó ŋgâ, mə ŋkhu mbɛ́ɛ́ pó. Ŋkyé ŋgâ, mbǒ no yɛ́ mə ntsɔ́, ntiʼɛ́ núŋ nɛ́, ke mbɛ̌ no sísíŋ. Ntsʉʼmbé, mə mgbǎ mbəb ya ŋkyé ŋgâ, mə tsé mbé zɔŋɔ pɔŋ tiŋɛ̂ ya mbziʼe yɛ́ a tsɛ̌, mbziʼe njʉ́ pɔ́b zhʉ́ ya nɛ́ pó, kii ŋgâ ne no yɛ́ pɔ́b zoʼo, mə ntsɔ́ nɛ́, pó. 7A njʉ́ no yéré yɛ́ mə kɛ zhʉ́ nɛ́, kɛ shʉyéd kaʼatɛ nɛ́, ne ŋgyɛ̌ne ŋgâ mə ndɛ tsé ntiʼɛ, pe níŋi taʼ ndzɔ́ŋ yɔ́b mbəb mo, a pé taʼ aŋgere Sátaŋ, gbíí ya, kɛ́ʼɛ́ ŋgâ mə ndɛ tsé ntiʼɛ. 8Néré, mə mbóʼmbwó pwó Ntsɛɛpɔŋ kɛɛ yíkyéd, ŋgâ a túbu yéré ŋgəʼo mbəb mo. 9Ntsʉʼmbé, a pó mbɔ́rɔ́ ne mo pé ŋgâ: «Foʼndzəndzoʼ ya kuʼɔ́ pwó wo. Pe tsʉyɛ̌ njʉ́ tʉ̌ŋ máá, pé ŋkhoʼyɛ́ pé pɔ́d nɛ́.» Néré, a pɛɛ ntiʼéne, mbǒ mə tiʼɛ ŋkhoʼyɛ́ tʉ̌ŋ máá nzwɛ̌ nɛ́, yânéré ŋgâ tʉ̌ŋ Kristo pɛ mbəb mo.
10A zhyɛ́ yéré, mə mbé ne ndebéne,
ŋkhoʼyɛ́ mə tséʼé tʉ̌ŋ nɛ́ pó,
ndzɔ́ʼɔ́ pɛ ntó,
pɛ ŋgəʼo,
pɛ ŋgəʼo pɛ́ pe záá ya núŋ nɛ́,
pɛ́ pɔ́ɔ́ pɛ́ mə kɛ tsɛ́ʼɛ nɛ́,
ŋkɔŋɔ meno péré náá, ne tíí Kristo nɛ́!
Ŋkyé ŋgâ, á ŋkhoʼyɛ́ mə mbɔ́d nɛ́, mbé ŋkhoʼyɛ́ mə tsɛʼɛ tʉ̌ŋ nɛ́.
Pɔ́lə tsúŋí ŋkyé pǔkristo Korɛŋto
11Puŋ zhyɛ́ nɔŋ mə ntsʉ́ʼɔ njʉ́ taʼ mbɛ́ɛ́ nɛ́. A ghɛmbɛ a zɔŋɔ ŋgâ a nyóʼo puŋ nyoʼ ya ŋgâ tɛɛmbɛ pé tíí ndzɔʼ mbəb mo, ŋkyé ŋgâ, pɔŋ pekénɛ́ puŋ fú ne mɛ́mɛ́ ghaŋántɔ́b nɛ́ tsáá ne cyó yɔ́b pó, mbɛ njʉ́ ŋkoʼɔtómbəb ya, mə ŋkúʼú cyó yɔ́b nɛ́ pó. 12Meno pɛ́ a nyóʼó ŋgâ mə ndáá ŋgaŋantɔ́b nɛ́, kɛ záʼa tsetsɛrɛ puŋ. A kɛ pé gbaa mbəb ndúŋú ŋkɔŋɔ mbziʼe mkpeʼe náá, ne pɛ meno shʉyédme pɛ́ mə kɛ zhyɛ nɛ́, pɛ meno kəkwéʼe, pwɛ pɛ meno ntʉ̌ŋme. 13A yɛ́rɛ́ yɔ́b yɛ́ puŋ tséʼé, a pe kúʼu yé pecyó yáʼméted nɛ́ pɔɔ? Ndaʼ njʉ́ mə kɛ pe pé taʼ peʼ ne puŋ nɛ́ pó! A pɛ́ɛ́ yɛ́ puŋ zhʉ́ yéré, a pɛɛ taʼ no kəpɔŋ yɛ́ mə kɛ zhyɛ́ mbəb puŋ nɛ́, puŋ mâʼ vɔ̌no ndɔ́ɔ́ ya.
14Mə nsé nɛ́ mɛndɔ́b ne ŋkʉyóne yóʼó puŋ ne njʉbɛ yikyed. Mbé ŋkʉ́yó ne ntǎʼne pfiŋi mbəb puŋ pó, ŋkyé ŋgâ mə ntaʼá mɔ́b puŋ pó. Ntsʉʼmbé mə ntaʼá ŋkɔʼɔtombəb yúŋ. A ndɛ mbé ŋgʉʼɔ pɛ mɔ́ŋ ŋgʉʼɔ tɛd pó. A ndɛ ŋgʉ́ʼɔ tɛd ŋgʉ́ʼɔ mɔ́ŋ. 15Ŋgɛ́ ŋkhú ne mo, yɔ́b yɛ́ mə ntséʼé nɛ́, mə ŋkʉ́yé ne ŋgyɛ̌ne no núŋ ne puŋ pé ne ndebéne, mbɛ a pɛɛ tómbəb ya. A pɛ́ɛ́ yɛ́ mə kʉ́yé wúŋ zááme néré nɛ́, mbǒ a ŋkɔ́ɔ́ fuʼ kəŋe yɛ́ puŋ tséʼé ŋkyé ya nɛ́? 16A sísíŋ ŋgâ mə kɛ pe pé taʼ peʼ ne puŋ pó. Ntsʉʼmbé pecyó pɔŋ tsɔ̂ ŋgâ ŋgaŋa mbwɔ̂ njʉ́ mo nɛ́, mə ndzɔ wúŋ pé ne ŋgɔb. 17Puŋ yɔ́ɔ́ mbɛ́ taʼ ŋɔŋ wɛ́ puŋ kʉ́yé nɛ́, ndzɔ́ʼɔ́ pɔŋ pɛ́ mə ntwɔ́ ne puŋ nɛ́. Mə ndzáʼá mbəb taʼ ŋɔŋ wɔ́b ntsɔʼ pfiŋi mbəb puŋ? 18Mə kɛ póʼmbwó pwó Titə, ŋgâ a kʉ́yo pfúŋɔ́ puŋ, pú mɔ́ŋmɛ́ wɛ́ mə kɛ pě ntsó nɛ́. Titə kɛ tsɔ́ʼ pfiŋi mbəb puŋ? Psi yé kɛ pe nyí ndúŋú taʼ kpaŋató pɔɔ? Ké mbé nyí ndúŋú taʼ mɛndɔ́b pɔɔ? 19Féré mɛ́ zhyémve, puŋ kpâŋ ŋgâ psi zhyɛ́ síŋi puŋ kaʼa, pe ŋgâ puŋ zhʉ́ ywí njʉ́ puŋgerɛ́ŋged nɛ́? Ŋgáŋ! a pɛɛ njʉ́ psíyɛ Kristo tə́b mbé taʼ ye nɛ́, psi tsɔ́ siŋ Mboʼmvé nɛ́. Pɔ́ŋmɛ páá pɛ́ mə ŋkʉyě kaʼatɛ nɛ́, ndúŋú ŋkɔŋɔ no wéré náá, psi taʼá ŋgâ psyɛ́ndzɔʼ yúŋ ghóʼ. 20Mə tsé nɛ́ mbɔ́ɔ́ ŋgâ tɛɛmbɛ mə ŋgɛ ŋkʉyo, mbé zhʉ́ wúŋ puŋ ntsɛ́ njʉ́ mə ndzɔŋɔ nɛ́ pó, kii ŋgâ puŋ ké mbó mbé zhʉ́ ya njʉ́ puŋ zɔŋɔ nɛ́ pó. Mə tsé mbɔ́ɔ́ ŋgâ sǔntsoʼ, sháŋá, zúʼɔŋgyé, tébé, ntsɔ́ndzəb pɔŋ, peghaa, cóʼómvé pwɛ ŋkɔŋɔ vaʼ náá, tɛɛmbɛ a pɛ tsetsɛrɛ puŋ. 21Mə mbɔ́ɔ́ ŋgâ ŋkhoʼyɛ́ mə́ mbó ndzáʼá pfúŋɔ́ puŋ nɛ́, Mboʼmvé ya ndɛ ŋkɔɔ ya siŋ puŋ, mə mbó tse ŋkhɔ̂ ŋkyé pɔŋ zááme pɛ́, pɔ́b kɛ zhyɛ́ meno kəpɔŋ pɛ́ pɔ́b kɛ pě ŋgyɛ́ nɛ́, mbó mbé kɛ sɛrɛ́ ndzɔʼ yɔ́b nɛ́ pó. Meno péré pɛ́ pɔ́b kɛ zhyɛ́ nɛ́, pé nɔ́ŋ: meno siŋɛ́ mbəb, meno fáátó, sakhə!
ទើបបានជ្រើសរើសហើយ៖
2 Korɛŋto 12: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល