2 Korɛŋto 10
10
Pɔ́lə kpéé mbəb ye ndúŋú faʼ ye
1Kpaʼ mo Pɔ́lə ne tómbəb ya, mə mvírɛ́ nɛ́ ne puŋ ne mbúru pwɛ pǔpfob Kristo, mo wɛ́ mə fɛ mbəb ya syé siŋ puŋ nɛ́, ntsʉʼmbé ŋkhoʼyɛ́ mə pfúŋɔ́ puŋ nɛ́ pó, mə mbó mî wúŋ mǐ nɛ́, 2mbó mbóʼómbwó nɛ́ ne puŋ ŋgâ, puŋ ndɛ ŋgyɛ̌ njʉ́ mə ntsɔ́ no ne tʉ̌ŋ ne puŋ nɛ́, mbziʼe njʉ́ mə tsé kpáŋa ŋgâ mə ntsɔ́ ŋkhoʼyɛ́ mə ŋkʉ́yó pfúŋɔ́ puŋ nɛ́. Mə tsé kpáŋa ne ntsóne néré pwó pɔŋ pɛ́ pɔ́b ndzɔ́ʼɔ́ puŋ, kpáŋa ŋgâ psi zhyɛ́ zhí no pe ne kpaŋató pumésɔŋ nɛ́. 3A sísíŋ ŋgâ psi ke mbɛ́ zhí pé kpaʼ pumésɔŋ. Ntsʉʼmbé psi maʼa zhí ntsɔ̂ pe njʉ́ pumésɔŋ maʼa nɛ́ pó. 4Ŋgáŋ! khǔntsɔ̂ myí twɔ́ pwó pumésɔŋ pó, tʉŋ myí twɔ̌ pwó Mboʼmvé ne mbône ŋkɔŋɔ tʉŋ mɛ́ a maʼa Mboʼmvé ne ntsɔ̂ náá nɛ́. A mbziʼe yɛ́ nɛ́ psi maʼa mbóó pɛ kpaŋató mbwɔ̂ nɛ́, 5pwɛ ŋkɔŋɔ tʉ̌ŋ mɛ́ a ŋǎsyé ne tətoʼ náŋa zɛ́no Mboʼmvé nɛ́. Psi mgbâ ŋkɔŋɔ kpaŋató náá, ŋgyɛ̌ ŋgâ pɔ́b zóʼntswee Kristo. 6Psi kɛ mvyéb mbəb zhí ne fɛ́ne ŋgəʼo pwó pɔŋ pɛ́, pɔ́b tsé mbé zóʼntswee nɛ́ pó, ŋkhoʼyɛ́ psi kɛ zé ŋgâ puŋ zóʼontswee ne ŋkɔŋɔ no náá nɛ́. 7Puŋ cʉ̌yi ndíŋí pɛ meno njʉ́, a pɛ́ɛ́ yɛ́ ŋɔŋ zé kpaʼ sísíŋ ŋgâ a pɛɛ pwó Kristo nɛ́, a cʉ̌yi kpaŋató ye ne no yɔŋ taʼ kɛɛ: A pɛ́ɛ́ yɛ a ŋukristo nɛ́, mbǒ psi ke mbɛ zhí! 8Mbɛ mbé yɛ́ mə naʼ tsé tiʼɛ ŋgaʼmbwó ne tʉ̌ŋ mɛ́ Ntsɛɛpɔŋ fɛ́ ne psi, ne ŋgyɛ̌ne ŋgâ psyɛ́ndzɔʼ yuŋ tʉ̌ŋ, mbé pɛɛ ne mbône wúŋ nɛ́ pó, tɛɛmbɛ mə mbé tséʼé cyó pfɔ́shʉ́ŋ ndúŋú pó. 9Mə tsé mbé nzɔŋɔ puŋ kpâŋ ŋgâ mə mvúrɔ wuŋ mvurú ne ŋweʼe páá pó, 10ŋkyé ŋgâ pe tsɔ́ ŋgâ: «Ŋweʼe pé tʉ̌ŋ mbó cʉyó ŋgaʼmbwó. Ntsʉʼmbé ŋkhoʼyɛ́ a nyí mbáŋa ghaŋ ne tómbəb ye nɛ́, a zyé mbé tíŋɛ́ ŋɔŋ ndzó míí mé pó, nsó ye ké mbó mbé fwɛ́ɛ́ cyó yɔ́b pó.» 11Ŋɔŋ wéré wɛ́ a tsɔ́ néré nɛ́, a cʉ̌yi nɛ́ ndzé ŋgâ no yɛ́ psi taŋa səsɛ ntsɔ ndzó ŋweʼe psi nɛ́, a ke mbé no yɛ́ nɛ́ psi ŋgyɛ́, ŋkhoʼyɛ́ psi paŋa pfúŋɔ́ puŋ nɛ́. 12Ŋkyé ŋgâ tɛɛmbɛ psi zyé mbé mwɔ̂ ndɔ̂ fwɛ́ɛ́ no, kii ŋgâ fuʼ no, mbəb pɔŋ pɛ́ pɔ́b nyóʼó mbəb yɔ́b ne tómbəb yɔ́b ŋgâ tɛɛmbɛ, pe tíí ndzɔʼ mbəb pɔ́b nɛ́, pó. Mbziʼe njʉ́ pɔ́b yɔɔ mbəb yɔ́b njʉ́ fwɛ́ɛ́ no kii ŋgâ fuʼ no nɛ́, yéré nyoʼó ŋgâ tó yɔ́b vaʼ. 13Ŋgɛmbɛ ne psi, psi nyóʼ ntiʼéne kaʼatɛ fáá njʉ́ a ŋgɛmbɛ́ nɛ́ pó. Tsʉʼmbé, psi ke ndɔ́ɔ́ fuʼ no yɛ́ ŋkɔʼɔtómbəb Mboʼmvé kɛ fɛ́ ne psi mbó ŋgyɛ kaʼatɛ psi nyí mbáŋa pfúŋɔ́ puŋ nɛ́. 14Psi kɛ pe záʼ ndii zhí pó, njʉ́ psi kɛ pɛɛ pɔŋ pɛ́ pɔ́b kaa kɛ kʉ́yó yóʼó pʉŋ nɛ́ pó. Ɔ́ŋɔ́, kpaʼ sísíŋ! Psi kɛ ghaŋ mbé pɛ sɔ́ pɔŋ ne mbáŋne yóʼó puŋ ne Ŋkəŋ sʉ́ʼʉ Kristo. 15Ntiʼéne myi záʼ fáá ndii njʉ́ kii pe yɔ́ɔ́ fuʼ no pe ndúŋú faʼ yɛ́ pecyó pɔŋ faʼa nɛ́ pó. Ntsʉʼmbé psi tsé shʉ́rɛ ŋgâ psyɛ́ndzɔʼ yuŋ pfíí, psi pó ŋgyɛ́ pecyó pɛ meno kəkwéʼe tsetsɛrɛ puŋ ŋkʉ́rʉ́, ntsʉʼmbé ŋkɔŋe náá ke mbɛ́ɛ́ kii záʼ ndii yɛ́ Mboʼmvé kɛ tíí ne psi nɛ́. 16Néré, tɛɛmbɛ psi fáá ywoʼɔ́ yuŋ ncʉri Ŋkəŋ sʉ́ʼʉ ŋgú ssó, kii pó tsé ntiʼɛ ne faʼ yɛ́, pecyó pɔŋ fǎʼ ndzó yɔ́b ywoʼ nɛ́. 17A ŋweʼéme ŋgâ: «A tsé tiʼɛ ŋɔŋ, á tiʼɛ́ ne no yɛ́ Ntsɛɛpɔŋ zhyɛ nɛ́.» 18Á ŋɔŋ wɛ́ a nyóʼ mbəb ye ne tómbəb ye, ŋgâ tɛɛmbɛ pe tíí ndzɔʼ mbəb yé nɛ́, mbé ŋɔŋ wɛ́ pe mbzyɛ wé nɛ́ pó. Ntsʉʼmbé, ŋɔŋ wɛ́ pe mbzyɛ́ wé nɛ́, á ŋɔŋ wɛ́ Ntsɛɛpɔŋ nyǒʼ nɛ́.
ទើបបានជ្រើសរើសហើយ៖
2 Korɛŋto 10: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល