1 Korɛŋto 14
14
Ntsóne kpaŋató Mboʼmvé pwɛ mbziʼe mbziʼe nsó
1Puŋ mbɔŋɔ ŋgɛ ŋgyɛ́ mbɛ kɔ́, puŋ pě ntáʼa ne tséʼene kəŋe, mbó ntaʼa ne tséʼene fɛ Zhʉye Yáŋme, mbɛ náá, ye ntsɔ́ kpaŋató Mboʼmvé. 2Ŋkyé ŋgâ ŋɔŋ wɛ́ a tsɔ́ mbziʼe mbziʼe nsó nɛ́, tsɔ̌ pwó pumésɔŋ pó. Ntsʉʼmbé, a tsɔ́ɔ́ pwó Mboʼmvé. Cyó ŋɔŋ yóʼó, tsé ndzóʼo no yɛ́ a tsɔ nɛ́ pó. A zhyɛ́ Zhʉye Yáŋme a tsɔ meno ywʉ̂me. 3Ntsʉʼmbé, ŋɔŋ wɛ́ a ntsɔ́ kpaŋató Mboʼmvé nɛ́, tsɔ̌ pwó pumésɔŋ. A ghaŋá mvíí psyɛ́ndzɔʼ yɔ́b, ntʉ́ʉ́ wɔ́b mbó níŋ ɛ ndzɔʼ yɔ́b. 4Ŋɔŋ wɛ́ a tsɔ́ mbziʼe mbziʼe nsó nɛ́, tʉ̌ tómbəb ye. Ŋɔŋ wɛ́ a ntsɔ́ kpaŋató Mboʼmvé nɛ́, zhyɛ́ ŋgâ ndáméted ghú ssó. 5Mə kʉ́yé ŋgâ ŋkɔŋɔ wuŋ náá nsó mbziʼe mbziʼe nsó. Ntsʉʼmbé a pó kúʼɛ́ ne mo pe ŋgâ, puŋ nsó kpaŋató Mboʼmvé. Ŋkyé ŋgâ ŋɔŋ wɛ́ a ntsɔ́ kpaŋató Mboʼmvé nɛ́, ntsɛ̌ ŋɔŋ wɛ́ a tsɔ mbziʼe mbziʼe nsó nɛ́. Kii ŋgâ mbǒ ŋ ŋkɔʼɔtómbəb ŋkeʼe njʉ́ ŋkɔŋɔ pɔŋ náá ndáméted ndzóʼó, a pfíí psyɛ́ndzɔʼ yɔ́b nɛ́. 6Pɔ́ŋmɛ́ páá, piŋi nsó ŋgâ, a pɛ́ɛ́ yɛ́ mə kʉ́yó ŋkhoʼyɔŋ njʉ́ wúŋ, tsɔ no ne puŋ pe ne mbziʼe mbziʼe nsó nɛ́, mbǒ ya ghebe ne púŋ mbɛ́ɛ́ kɔ́? A pɛ́ɛ́ yɛ́ tɛɛmbɛ nsó ya pe zhʉ́ kpaŋató yúŋ pó, kii pó fɛ́ zɛ́no ne puŋ, kii pó tsɔ̌ kpaŋató Mboʼmvé ne puŋ, kii pó fɛ̌ cyó ntʉ́ʉ́ nɛ́, mbǒ ya ghebe ne puŋ mbɛɛ kɔ́? 7A ké mbé nɛ́ njʉ́, mwɔ̌ póʼóndzúʼ, yɔ́b njʉ́ toʼ, kii ŋgâ yɔ́ŋ nɛ́: mbéyɛ́ pe póʼo a pe tsyɛ nɛ́ pó, mbǒ pe ŋgyɛ́ɛ́ níŋ ndzɛ́ ndzəb toʼ kii yɔ́ŋ yéré? 8A pɛ́ɛ́ yɛ́ ndzəb ntaŋ twɔ́ ndáŋ nɛ́ pó, mbǒ a tsuŋɔ́ wɔ̂ tsuŋɔ́ mbəb ye, ne mǎʼne ntsɔ̂? 9Ntsʉ́ŋtsʉ́ŋ njʉ́ puŋ nɛ́, a pɛ́ɛ́ yɛ́ kpəkpaŋ yuŋ tsɔ́ no a pe yaŋá nɛ́ pó, mbǒ pe ŋgyɛ́ níŋ ndzóʼó no yɛ́ puŋ tsɔ nɛ́? Puŋ gbíí kɔbɔ́ntswee puŋ pe ndzəndzoʼ. 10Pɛ mbziʼe mbziʼe ndii nsó záá ndúŋú tsetsáʼ kaʼatɛ, pe pó zɛ́ ndɔŋɔ ye pó, ntsʉʼmbé mbɛ wɛ́rɛ́ ke tsɔ̌ no. 11Ntsʉʼŋgɛmbɛ, a pɛ́ɛ́ yɛ́ mə tsé mbé zóʼo taʼ ndii nsó yɛ́ ŋgaŋ yé tsɔ́ nɛ́ pó, mbǒ mə pwó yé mbɛ́ɛ́ ŋushʉyɛ́, ŋgaŋ ye pɛ́ ne mo mbé ŋúshʉyɛ́ nɛ́. 12Ntsʉ́ŋtsʉ́ŋ njʉ́ puŋ nɛ́, puŋ sɛ́ɛ́ zǎŋazâŋa ne ntséʼéne fɛ Zhʉye Yáŋme kaʼatɛ, ŋkyé ŋgâ a yɔ́b yɛ́, ndzye tse zí wuŋ kaʼatɛ nɛ́. Ntsʉʼŋgɛmbɛ, mbɛ́ɛ́ ne ŋgyɛ̌ne ŋgâ ndáméted ghú ssó. 13A zhyɛ́ yéré nɛ́, a nzɔŋɔ ŋgâ ŋɔŋ wɛ́ a tsɔ́ mbziʼe mbziʼe nsó nɛ́, ntsɛ́ʼɛ́ Mboʼmvé, a fɛ́ zé ŋkéʼene pwó yé. 14A pɛ́ɛ́ yɛ́ mə tsé tsɛ́ʼɛ́ Mboʼmvé ne mbziʼe mbziʼe nsó nɛ́, mbǒ ndzɔʼ ya pɛ́ɛ́ ndzɔ́ʼɔ́ ntsɛ́ʼɛ́ Mboʼmvé, ntsʉʼmbé, kpáŋa tó ya pɛ́ɛ́ fǔŋme.
15Tɛ mə ŋgyɛ́ níŋ nɛ́? Mə ntsɛ́ʼɛ́ Mboʼmvé njʉ́ Zhʉye Yáŋme fɛ́ ne mo nɛ́. Ntsʉʼmbé, ŋgɛ ké mbó ntsɛ́ʼɛ́ ne kpaŋató yá. Mə ndzɔbɔ́ nse njʉ́ Zhʉye Yáŋme fɛ́ ne mo. Ntsʉʼmbé ŋgɛ ké mbó ndzɔbɔ́ ne kpaŋató yá. 16Ŋkyé ŋgâ, a pɛ́ɛ́ yɛ́ mə tsé tsɛ́ʼɛ́ Mboʼmvé fɛ́ ŋgúʼune pwó ye, ne mbziʼe mbziʼe nsó nɛ́, mbǒ ŋɔŋ wɛ́ a kʉyo ye pe ne ndzóʼne nɛ́, tsɔ̌ níŋ ŋgâ: «Á pé néré!» ŋkyé ŋgâ a tsé mbé zóʼó no yɛ́ mə tsɔ́ nɛ́ pó. 17A sísíŋ ŋgâ Mboʼmvé tsé ndzóʼo no yɛ́ wo tsɔ́ nɛ́ kaʼatɛ, ntsʉʼmbé a pe tsé ŋgebɛ cyó ŋɔŋ pó. 18Me fɛ́ ŋgúʼune pwó Mboʼmvé, ŋkyé mə ntsɔ́ mbziʼe mbziʼe nsó, kaʼatɛ ntsɛ́ɛ́ ŋkɔŋɔ wuŋ náá. 19Ntsʉʼmbé ŋkhoʼyɛ́ pɔ́ŋmɛ́ téré ndáméted, mə ŋgɛ mbɛ́ tsetsɛrɛ pɔ́b nɛ́, mə kʉ́yé ne ntsóne ndii nsó yítaŋ yɛ́, pɔŋ ndzóʼó, a tʉ́ʉ́ wɔ́b nɛ́, ntsɛ́ɛ́ yɛ́ mə tsɔ̌ v wɔ̂ ŋkáb ndii nsó, ne mbziʼe mbziʼe nsó kii ŋɔŋ ghɛ̂ ndzóʼó nɛ́.
20Pɔ́ŋmɛ́ páá, kii puŋ ndɛ tsé kpaŋató pe njʉ́ pɛ mɔ́ŋ nɛ́. Ŋgɛ khú ne ŋgyɛ̌ne no kəpɔŋ puŋ pɛɛ njʉ́ pɔŋti pɛ mɔ́ŋ nɛ́. Ŋgɛ khú ne kpaŋató, puŋ kpaŋató pe njʉ́ ŋgəkód nɛ́. 21A ŋweʼéme ndzó kaŋ ŋkyé, Ntsɛɛpɔŋ ŋgâ: «Mə náʼá ŋgɛ ntsɔ no pwó pɔŋ pɔŋ, ndzáʼa mbəb pɔŋ pɛ́, pɔ́b tsɔ nsó ndúŋ nɛ́. Mə náʼá ndɔ́ɔ́ ntswee pushʉyɛ ntsɔ no nuŋ, pwó pɔŋ pɔŋ. Mbɛ néré pɔ́b ké mbé zóʼ pó.»
22Néré kɛ́ʼɛ́, ntsóne mbziʼe mbziʼe nsó, a pɛɛ taʼ kiŋi pó, pwó pɔŋ pɛ́ pɔ́b tséʼé psyɛ́ndzɔʼ nɛ́. Ntsʉʼmbé, mbé taʼ kiŋi pwó pɔŋ pɛ́ pɔ́b tséʼé psyɛ́ndzɔʼ nɛ́ pó. Tsɔ́ kpaŋató Mboʼmvé taʼ kiŋi pó, pwó pɔŋ pɛ́ pɔ́b tséʼé psyɛ́ndzɔʼ nɛ́ pó. Ntsʉʼmbé, mbé taʼ kiŋi pwó pɔŋ pɛ́ pɔ́b tséʼé psyɛ́ndzɔʼ nɛ́. 23A pɛ́ɛ́ yɛ́ ŋkɔŋɔ wíŋi náá sɛrɛ́ ndáméted, ŋkɔŋɔ pɔŋ náá ke tsɔ̌ mbziʼe mbziʼe nsó nɛ́, mbǒ pɔŋ pɛ́ pɔ́b ke kʉ́yó yɔ́b kʉ́yó nɛ́, kii ŋgâ pɛ́ pɔ́b tséʼé psyɛ́ndzɔʼ nɛ́ pó, fú wúŋ pé ne pɛ mbɛ́ɛ́ pɔɔ? 24A pó mbɛɛ yɛ́ ŋkɔŋɔ ŋɔŋ náá tsé ntsɔ́ kpaŋató Mboʼmvé nɛ́, mbǒ pɔŋ pɛ́ pɔ́b tséʼé psyɛ́ndzɔʼ nɛ́ pó, kii ŋgâ ŋɔŋ wɛ́ a ke kʉ́yó ye kʉ́yó nɛ́, pe tɛ ndzóʼó, a tsǒ njʉ́ kii ŋkɔŋɔ pɔŋ náá ke tsɔ̂ tó ye, kii ŋgâ ke fiʼɛ péé nɛ́. 25Néré, no yɛ́ a ndzó ndzɔʼ ye nɛ́ ŋkě tétáá, a vɔ́ syé ŋkubú záŋ ye. Ŋguʼɔ́ Mboʼmvé, mbó tsɔ́ ŋgâ Mboʼmvé wéré tsetsɛrɛ puŋ sísíŋ.
Kii vaʼ ndɛ mbɛ ndáméted
26Pɔ́ŋmɛ́ páá, tɛ piŋi ŋgyɛ̌ níŋ? Ŋkhoʼyɛ́ puŋ téré nɛ́, tɛɛmbɛ mbɛwɔ̂ ndzɔ́ʼɔ́ puŋ zɔbɔ́ nse, kʉ́yó ne taʼ tʉ́ʉ́, kii taʼ no yɛ́ Mboʼmvé nyoʼó pwó ye nɛ́, ntsó mbziʼe mbziʼe nsó, kii ŋgâ keʼ pɛ mbziʼe mbziʼe nsó péré. A puŋ zhyɛ́ ŋkɔŋɔ yé náá, a pɛɛ ne ŋgebéne ŋkɔŋɔ pɔŋ náá, ŋgâ puŋ ghu ssó. 27A pɛ́ɛ́ yɛ́ pecyó pɔŋ yóʼó nzɔŋɔ tsɔ̌ mbziʼe mbziʼe nɛ́, ŋgâ pɔŋ pépáá kii pékyéd nsó, a kúʼu. Pe ke tsɔ̌ pɛ mɔʼɔ́ mɔʼɔ́, cyó ŋɔŋ pó ŋkéʼe. 28A pɛ́ɛ́ yɛ́ ŋɔŋ wɛ́ a ŋkéʼe nɛ́ yóʼó nɛ́ pó, ŋɔŋ wɛ́ a nzɔŋɔ tsɔ́ nɛ́ zhirí ndáméted, ntsɔ ndzó ndzɔʼ ye, mbó tsɔ́ pwó Mboʼmvé. 29Ŋgɛ khú ne nsó kpaŋató Mboʼmvé, ŋgâ pépáá kii pékyéd yɔ́ɔ́ nsó, pfuʼɔ pé kpeʼé, njʉ́. 30A pɛ́ɛ́ yɛ́ Mboʼmvé nyoʼo no pwó ŋɔŋ nɛ́, a zɔŋɔ ŋgâ ŋɔŋ wɛ́ a ghɛmbɛ a tsé tsɔ no nɛ́, zhirí. 31Tɛɛmbɛ ŋkɔŋɔ wuŋ náá ntsó kpaŋató Mboʼmvé, ntsʉʼmbé ŋɔŋ ke tsɔ̌ ne yé kéé, kɛ́ʼɛ́ ŋgâ a ntʉ́ʉ́ mbó níŋí ndzɔʼ ŋkɔŋɔ pɔŋ náá. 32A nzɔŋɔ ŋgâ Zhʉye wɛ́ a mbəb ŋgaŋatsɔ́kpaŋató Mboʼmvé nɛ́, zóʼó pwó ye. 33Ŋkyé ŋgâ Mboʼmvé, Mboʼmvé we vaʼ pó, a pɛ́ɛ́ Mboʼmvé mbúru.
Njʉ́ a ndzó ŋkɔŋɔ yáʼméted náá nɛ́, 34ŋgâ pěŋgyé zhírɛ́ ndáméted, pɔ́b tséʼé cyó nsó ndzóó pó. Pɔ́b fɛ́ mbəb yɔ́b syé, njʉ́ kaŋ ke mbó ntsɔ́ nɛ́. 35Pɔ́b ntsɛ́ʼɛ́ taʼ no ne mviríne, pɔ́b khú ndáb mvirɛ́ pwó y wɔ̂ pɔ́b. A pú ŋgâ məŋgʉ́yé tsɔ́ no ŋkhoʼyɛ́ pǔkristo tɛ́rɛ ndáméted nɛ́ pó. 36Nsó Mboʼmvé kɛ twɔ̌ ne puŋ? A ndaʼ puŋ mbé pɔŋ pɛ́ puŋ kɛ zóʼ nɛ́? 37A pɛ́ɛ́ yɛ́ ŋɔŋ kpǎŋa ŋgâ a ŋgaŋatsɔ́kpaŋató Mboʼmvé kii ŋgâ Zhʉye Yáŋme nsó cyó no pwó ye nɛ́, a zé nɛ́ ŋgâ, no yɛ́ mə ŋweʼe kaʼa nɛ́, a taʼ kaŋ yɛ́ nɛ́ Ntsɛɛpɔŋ fɛ́ nɛ́. 38Ŋkyé ŋgâ a pɛ́ɛ́ yɛ́ ŋɔŋ psyɛ́ kaŋ yéré nɛ́ pó, mbǒ Mboʼmvé ké mbé zɛ́ wé pó.
39Néré kɛ́ʼɛ́ kɛ pɔ́ŋmɛ́ páá, puŋ kʉyě ne mbéne ghaŋátsɔ́kpaŋató Mboʼmvé, kii pó náŋ pɔŋ pɛ́ pɔ́b tsɔ̌ mbziʼe mbziʼe nsó nɛ́. 40Ntsʉʼmbé, a zɔŋɔ ŋgâ ŋkɔŋɔ no náá nyí njʉ́ a zɔŋɔ nɛ́, kii vaʼ ndɛ mbé.
ទើបបានជ្រើសរើសហើយ៖
1 Korɛŋto 14: XMG
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល