Markus 7
7
Kukus tə dide iyi
(Matta 15:1-9)
1Farisa iyi abə metir tə ma majaw dakayta iyi i ndaha mar tə əŋ Urusalima, i kwas a kelek Yesu. 2I gər gula ŋga məzəwindi iyi i kəzəm wuda abə ndəra tə abə ndəra dəlay iyi, mənaŋ zlap ta, i kəbaŋ ndəra mənaŋ kukus mə mba seh halla. 3Məŋgəvday Farisa iyi abə Yahuda iyi fuk i kəziber kukus tə dide tə dide tata iyi, i kəzəm wuda ndəra mə tak baŋ səku, sey i mə baŋ ndəra za lawlaw. 4Əŋ ziŋgehe tata əŋ luma, i zəm wuda səku, sey i mə baŋ za ndagwa. I kəziber kukus məzəwindi iyi mbeh səku bahayim mənaŋ i mə sərəkta ley baŋ kwaɗum iyi, gəduda iyi liŋ tasaw tə malaway sə pəreŋ iyi.
5Farisa iyi abə metir tə ma majaw iyi i ɗəp Yesu, i zla: «Gula təkwa iyi i kəziber kukus tə dide tə dide takwa iyi səku, i kəzəm wuda abə ndəra tə abə ndəra dəlay iyi seh məŋgəvday a mey?» 6Yesu a ziŋgeŋta zlap, a zla: «Heni, hedi mə zlap ganaɗ sə bək bək iyi! Esaya kəzlap məndiwiŋ a talaŋ təheni, mənaŋ mbiŋ mə wuzlel tə əŋ Ɗerewel tə Bizlaf mə zlap, a zla:
“Hedi iyi wa, i kəwaŋgaka talaŋ abə ma haya,
ama nəf tata seh, guduk abə sa.
7I kəɗalaka mbuh, i kəfataka məsəkəŋ mandaham iyi, ama haya,
məŋgəvday kukus tata i mə sərək mba seh, ar ma matak tə hedi iyi#7:7 Esaya 29:13..”»
8Yesu a zlapaŋta, a zla: «Heni kəyak ma matak tə Bizlaf za abə bəra, heni kəziber kukus tə hedi iyi.»
9Abə dawaŋ ta, Yesu a zlapaŋta baha, a zla: «Heni gula i yak ma matak tə Bizlaf abə bəra amba ley ziber kukus təheni. 10Məŋgəvday Musa kəzlap za, a zla: “Waŋgaŋta talaŋ əŋ baba təkwa abə mama təkwa.” Kəzlap za, baha: “Hedi mə ra baba ŋga, aka səku mama ŋga seh, sey i ju.” 11Ama heni seh, hi kəzlap, hi zla: “Əŋgah hedi a zlapaŋ əŋ baba ŋga, aka səku əŋ mama ŋga: Məsəkəŋ sa mə nda i vəlah ley tərah wa seh, sa vəlah halla ba, məŋgəvday ar Kwarbaŋ”, Kwarbaŋ seh mənaŋ zlap ta: “Məsəkəŋ mavəl əŋ Bizlaf”. 12Əŋ mbamba seh, heni kəyakaŋ kataf əŋ hedi ley tər baba ŋga aka səku, mama ŋga seh halla. 13Mənaŋ mba seh, heni kəgay ma tə Bizlaf abə kukus təheni heni mə gizeŋta əŋ hedi iyi. Heni kəɗal məsəkəŋ par iyi mbeh səku mənaŋ mba.»
Məsəkəŋ mə mbaɗ hedi əŋ madawar
(Matta 15:10-20)
14Abə dawaŋ ta, Yesu a ɗafaŋta ma əŋ hedi makwas iyi baha, a zlapaŋta, a zla: «Heni teheke zləm heni fuk, hi zlim ma wa. 15Məsəkəŋ tə a palah mə təɗ əŋ dəməs hedi seh, a gula i mbaɗza əŋ hedi tə abə ndəra dəlay səku, ama məsəkəŋ mə təɗaha tə əŋ hedi seh, mə nda i mbaɗza əŋ hedi tə abə ndəra dəlay. [16Hedi abə zləm ley zlim, mə zlimʉ.]»
17Əŋ Yesu mə yak hedi makwas iyi seh, a təɗ əŋ biŋ, abə dawaŋ ta, gula ŋga iyi i ɗəpu a talaŋ ma marərək mbiŋ mə zlap ta. 18A ziŋgeŋta zlap, a zla: «Heni bahayim, heni abə burŋguzl ley zlimʉ halla vaw? Heni kəsəŋ məsəkəŋ tə a palah mə təɗ əŋ dəməs hedi seh, a gula i mbaɗ hedi ta əŋ hedi tə abə ndəra dəlay səku, 19məŋgəvday məsəkəŋ iyi ta i təɗ seh əŋ nəf ŋga səku, ama i təɗ seh əŋ dəməs, abə dawaŋ ta, i təɗaha tata a palah.» Yesu a kəgiz mənaŋ wa, nakwa iyi gula i zəm məsəkəŋ kwa vitikey fuk#7:19 Kəzəɗ tə Mələɓ iyi 10:9-16.. 20A zlapaŋta baha, a zla: «Məsəkəŋ mə təɗaha tə əŋ nəf tə hedi seh, ar məsəkəŋ ta mə nda i mbaɗza əŋ hedi tə abə ndəra dəlay. 21Məŋgəvday ar seh a ɗəməŋ, əŋ nəf tə hedi dəgənak wulək madawar iyi i kətəɗaha. I kəgaɗu ley nja əŋ nja tə barlaw, ley hil, ley ja hedi, 22ley ɓət wucum sifteleh a palah, ley mba məsəkəŋ, ley ɗal məsəkəŋ madawar əŋ hedi iyi, ley bərəsl ma, ley ɗal məsəkəŋ mə ɗal hawa, ley ɗal sərah, ley zlap ma madawar a talaŋ hedi iyi, ley ra hedi iyi, ley mbaɗ əŋ hedi mə hav talaŋ liŋ ley mbaɗ əŋ hedi mə tak burŋguzl. 23Məsəkəŋ madawar iyi wa fuk, i təɗaha seh əŋ nəf tə hedi, a mbaɗza əŋ hedi tə abə ndəra dəlay.»
Kuw ma tə wala lə Sirawfiniki
(Matta 15:21-28)
24Yesu a gar a namba, a nda əŋ hayak tə Tirʉs. A təɗ əŋ ge. A kəmba hedi iyi i səŋ mbiŋ mbə a namba səku, ama a gula i ɓah səku. 25Mbehmbeh mba, wala məzəwindi aka, mbu ŋgaŋ hazləma abə mimiɗ tə abə ndəra dəlay əŋ talaŋ, a zlim labara tə Yesu seh, a ndaha əŋ kelek ŋga, a dar malakw a ma ŋga. 26Wala ta, ar wala tə əŋ hayak tə hedi mə kuw ma tə Bizlaf iyi səku, a mbuwaha əŋ Finikiya tə əŋ hayak tə Siriya. A rək Yesu amba ley gam mimiɗ madawar tə əŋ talaŋ tə hazləma ŋga. 27Yesu a zlapaŋgu, a zla: «Yak wuziyi i mə gwaɗ ndagwa, məŋgəvday ləlaw səku ley ɓət wuda tə wuziyi ley kapaŋta əŋ wuziyi haza iyi.» 28Wala ta, a ziŋgeŋ zlap, a zla: «Məndiwiŋ, Bay Bayta na, ama kwa wuziyi haza iyi tə a kelek kwaɗum tə wuziyi i mə zəm wuda tə ɗəməŋ seh, i zəm wuda mapəpəs tə ndəra wuziyi ta za bahayim.» 29Abə dawaŋ ta izey, Yesu a zlapaŋgu, a zla: «Məŋgəvday zlap təkwa wa, nda təkwa, mimiɗ madawar ta kətəɗaha ŋga cuza əŋ talaŋ tə hazləma təkwa ta.» 30A nda əŋ wuta, a lim mbu ŋgaŋ mə weŋgi a kwambum, mimiɗ madawar kətəɗaha ŋga cuza əŋ talaŋ ŋga.
Yesu a rəzaŋ zləm tə hedi mədəgəzləm
31Abə dawaŋ ta, Yesu a gar əŋ hayak tə Tirʉs. A taŋ kəɗi hayak tə Sidaŋw, a ziŋgehe kəɗi gaw tə Galili, a gwar əŋ hayak i mə ɗafaŋ ma «Berne iyi wam#7:31 Markus 5:20.». 32Hedi iyi i dahaŋ hedi mədəgəzləm, mə təɗaha zlap tuwah tuwah. I rəku amba ley ɗiyaŋ ndəra a talaŋ. 33Yesu a deɓ hedi ta guduk abə hedi makwas iyi, a ɗiy wuziyi ndəra ŋga iyi əŋ zləm tə hedi ta, a pir mesleɓ a wuziyi ndəra ŋga iyi, ɓa, a ges a ganaɗ tə hedi ta. 34Ɓa, a kaf nje əŋ wuzlaf, a nəp abə fagay, a zlapaŋ əŋ hedi sey, a zla: «Efata!» Mənaŋ zlap ta: «Rəz təkwa!» 35Mbehmbeh mba, zləm ŋga iyi i rəz, məsəkəŋ mə jaw ganaɗ ŋga sey, kəpəl za, a gula i zlap lawlaw izey. 36Yesu a ŋgəzta fuk, amba i mə mba i giz ma ta kwa əŋ hedi səku. Ama əŋ mbiŋ mə takta fuk seh, i kəceh ley giz ma ta abə fagay. 37Hedi iyi i kəhar za mbeh səku, i zlap, i zla: «Mbiŋ mə ɗal məsəkəŋ iyi wa fuk ləlaw diya, a kəɗal amba hedi mədəgəzləm iyi i zlim zləm, madəda iyi bahayim i zlap.»
ទើបបានជ្រើសរើសហើយ៖
Markus 7: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល