Matta 23
23
Yesu a zlap əŋ gula ŋga iyi ley sla wucum a talaŋ metir tə ma majaw iyi abə Farisa iyi
(Markus 12:38-39; Luka 11:43, 46; 20:45-46)
1Abə dawaŋ ta izey, Yesu a zlapaŋta əŋ hedi makwas iyi abə əŋ gula ŋga iyi, a zla: 2«Metir tə ma majaw iyi abə Farisa iyi i mə ɗiyi ley gizeŋta ma majaw tə Musa əŋ hedi iyi. 3Hi waŋgaŋta talaŋ, hi ɗal məsəkəŋ i mə gizeheni fuk, ama hi mba i ziber kəzəɗ tata səku, məŋgəvday i kəɗal kəzəɗ abə məsəkəŋ tata mə giz səku. 4I kəjaw məsəkəŋ sə ndʉndʉlʉk iyi, tuwah ley ɓət, i kəɗiyaŋta a mabəsa tə hedi iyi, ama tata abə talaŋ tata seh, i kəkuw ley ges a məsəkəŋ sə ndʉndʉlʉk ta, kwa abə mbu ndəra tata iyi səku. 5I kəɗal kəzəɗ tata iyi fuk amba hedi iyi i mə gərta. I kəɗiy məsəkəŋ iyi bayta bayta a manuk tata iyi abə əŋ ndəra tata iyi i mə ɗafaŋta ma filakter iyi, i kəja serek tə gəgəmay sə jiŋ jiŋ a meɗek tə rukut tata iyi. 6I kəmba lay tə hedi səndawl iyi, əŋgah i kəɗafaŋta ma za ley zəm wuda tə gugway. I kəmba lay kə nja səntaŋ əŋ biŋ iyi kə ɗal mbuh əŋ Bizlaf. 7I mba hedi iyi i mə ɗalaŋta mbele abə waŋ talaŋ əŋ lay kə kwas hedi iyi, i mba hedi iyi i mə ɗafaŋta ma: “Metir”. 8Ama heni seh, heni mba i kuw amba i mə ɗafaheni ma “metir iyi” səku, məŋgəvday heni fuk heni a zliŋgeŋ təheni iyi, heni abə “Metir” ntaɗ dap. 9Hi mba i ɗafaŋ ma əŋ hedi kwa ntaɗ əŋ məŋhayak “Baba” səku, məŋgəvday heni abə Baba ntaɗ dap, tə wuzlaf. 10Hi mba i kuw, i mə ɗafaheni ma “Bay iyi” səku, məŋgəvday Bay təheni seh, ntaɗ dap, ar Almasihu. 11Hedi səndawl tə əŋ faŋw təheni seh, ar hedi mə nda i ɗalaheni kəzəɗ. 12Hedi mə kaf talaŋ ŋga əŋ səndawl seh, Bizlaf a bəreŋgeheza za əŋ mekedek. Hedi mə bəreŋgehe talaŋ ŋga bahayim, Bizlaf a kafza za əŋ səndawl.»
Yesu a zlap a talaŋ nja tə metir tə ma majaw iyi abə Farisa iyi
(Markus 12:40; Luka 11:39-52; 20:47)
13«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi, heni kəpek medigiɗ tə Bay tə wuzlaf a ma tə hedi iyi fuk. Heni abə talaŋ təheni, hi təɗ halla, heni kətak hedi mə mba ley təɗ iyi.
[14«Tuwah a ndaha za a talaŋ təheni, heni metir tə ma majaw iyi abə Farisa iyi, heni hedi mə zlap ganaɗ sə bək bək iyi! Heni kəlaŋta məsəkəŋ tə wala məce iyi, heni kəzlap mbeh səku əŋ ɗal mbuh təheni amba hedi iyi i mə gəraheni. Məŋgəvday a ɗek, Bizlaf a mbəzlaheni ma za pay day tə hedi dakayta iyi.]
15«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi, heni kəpik kwa a tikey a tikey əŋ hayak, a talaŋ talafay fuk amba ley limehe hedi kwa ntaɗ ley kuwaheni ma təheni. Ama əŋgah heni kəlimehe za, hi nda i mbaɗza əŋ hedi tə kahaw mə cukwaɗ səku səlak mə dayaheni ha ŋgas bək.
16«Tuwah a ndaha za a talaŋ təheni, heni hedi wuluf mə ŋgasl hedi iyi. Hi kəzlap: “Əŋgah hedi a meɗ abə biŋ tə Bizlaf seh, ar a ɗal məsəkəŋ haya, ama əŋgah a meɗ abə malaway mawaɗ tə əŋ biŋ tə Bizlaf seh, sey a ɗal məsəkəŋ mənaŋ mbiŋ mə zlap ta.” 17Hedi mə tak burŋguzl iyi, hedi wuluf iyi, biŋ tə Bizlaf abə malaway mawaɗ seh, pay day seh vitikey? Malaway mawaɗ vaw? Aka səku, biŋ tə Bizlaf mə mbaɗ malaway mawaɗ əŋ sə kweɗek vaw? 18Heni kəzlap baha: Əŋgah hedi a meɗ abə lay kə məsaw məsəkəŋ seh, ar a ɗal məsəkəŋ haya, ama əŋgah a meɗ ley ɗal məsəkəŋ abə məsəkəŋ kə vəl əŋ Bizlaf maɗiy tə a lay ta seh, sey a ɗal məsəkəŋ ta mənaŋ mbiŋ mə zlap ta. 19Hedi wuluf iyi! Məsəkəŋ kə vəl əŋ Bizlaf, aka səku lay kə məsaw məsəkəŋ mə mbaɗ məsəkəŋ kə vəl əŋ Bizlaf ta əŋ sə kweɗek wa seh, pay səndawl seh vitikey? 20Məŋgəvday a ɗek, hedi mə meɗ abə lay kə məsaw məsəkəŋ seh, mənaŋ zlap ta, a meɗ abə lay ta liŋ abə məsəkəŋ tə a ɗek ta fuk. 21Hedi mə meɗ abə biŋ tə Bizlaf seh, mənaŋ zlap ta, a meɗ abə biŋ ta liŋ abə lay Bizlaf mə nja tə ɗəməŋ. 22Hedi mə meɗ abə lay tə wuzlaf seh, mənaŋ zlap ta, a meɗ abə lay kə nja tə bay tə Bizlaf liŋ abə lay Bizlaf manja tə a ɗek.
23«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi. Məŋgəvday heni kəvəl zaka təheni iyi tə wuri tə əŋ jerne iyi mənaŋ minti, fenuwil, kumin, ama hi kəyak sərək səndawl tə əŋ ma majaw, mənaŋ ley ɗal məsəkəŋ səntaŋ abə kataf ta, ley səŋ nje həhər, ley kuw ma. Ar wawa, məsəkəŋ iyi heni mə nda i ɗal, kwa ley yak dakayta iyi səku. 24Heni hedi wuluf mə ŋgasl hedi iyi, heni kəjujur mavu təheni məŋgəvday jijʉwiɗ iyi tə əŋ ɗəməŋ, ama hi kəmiɗ ŋgelebe əŋ dəməs!
25«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi! Heni kəbaŋ dawaŋ tə kwaɗum tə yim təheni iyi abə kwaɗum tə wuda təheni iyi, ama lay tə ɗəməŋ seh, mə gweɗi abə məsəkəŋ mehil iyi liŋ abə mba məsəkəŋ təheni madawar iyi. 26Hwa hedi Farisa wuluf! Baŋ lay tə ɗəməŋ za ndagwa, abə dawaŋ ta izey, dawaŋ tə kwaɗum tə yim ta a baŋ ŋga za.
27«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi! Heni mənaŋ talaŋ jiɓ iyi makulawɓ sə kweɗek mə ŋgəm ley gər kəɗi a palah, ama lay tə ɗəməŋ seh, mə gweɗi abə kirŋgisl tə hedi maməc iyi, baha, abə məsəkəŋ mahərəɗa iyi fuk. 28Heni seh, mənaŋ mba bahayim, a nje tə hedi iyi seh, heni hedi səntaŋ iyi, ama nəf təheni mə gweɗi abə ma kə zlap ganaɗ sə bək bək iyi liŋ abə məsəkəŋ madawar iyi fuk.
29«Tuwah a ndaha za a talaŋ təheni, metir tə ma majaw iyi abə Farisa iyi, hedi mə zlap ganaɗ sə bək bək iyi. Heni kələm talaŋ jiɓ iyi tə hedi mə giz ma abə miya tə Bizlaf iyi, hi kəɗiyaŋ məsəkəŋ ley ŋgəm talaŋ jiɓ tə hedi sə delele iyi, 30abə dawaŋ ta, heni kəzlap: “Əŋgah nakwa iyi mbə əŋ hala tə dide tə dide takwa iyi zlezle seh, nakwa iyi jam abə tata ley ja hedi mə giz ma abə miya tə Bizlaf iyi halla.” 31Mənaŋ wa seh, hi kəgizʉ abə talaŋ təheni, heni mambuwaha tə hedi iyi mə ja hedi mə giz ma abə miya tə Bizlaf iyi. 32Ayaw, hi ziberʉ, hi cukwaɗ kəzəɗ tə dide tə dide təheni iyi, i mə marahaw ley ɗal zlezle! 33Heni zʉzʉk iyi, wuziyi tə hursla iyi, hi nda i reh a mbəzl ma tə kahaw mə cukwaɗ səku səlak seh viŋgey? 34Məŋgəvday a ɗek, ehe, sa kələɓaheni hedi mə giz ma abə miya tə Bizlaf iyi, hedi tə abə burŋguzl iyi liŋ metir tə ma majaw məndiwiŋ iyi. Hi ja dakayta iyi za, hi dar dakayta iyi za a mpay mazlaŋgal, hi kəlap dakayta iyi za bahayim əŋ biŋ təheni iyi kə ɗal mbuh əŋ Bizlaf, hi ziberta za ley zləŋgaŋta takwaŋ əŋ berne iyi par par. 35Mənaŋ wa, məmbəz mambaɗ əŋ teyek tə hedi sə delele iyi, a wufaha za a talaŋ təheni. Mar, ja tə Habila hedi sə delele ha a gwar əŋ ja tə Zakariya mbu tə Barakiya, hedi heni mə ja tə əŋ walaŋ tə biŋ tə Bizlaf abə lay kə məsaw məsəkəŋ. 36Sa kəzlapaheni məndiwiŋ, məmbəz tə hedi iyi ta a wufaha za a hedi tə jemere iyi wa.»
Yesu a haŋ a talaŋ hedi tə Urusalima iyi
(Luka 13:34-35)
37«Haya! hedi tə Urusalima iyi, hedi tə Urusalima iyi, heni kəja hedi mə giz ma abə miya tə Bizlaf iyi za, heni kəkap mələɓ ŋga maləɓaha iyi za abə nvəŋ. Ŋgas mbeh səku sa kəmba i ɓiceheni mənaŋ gamtak mə ɓic wuziyi ŋga iyi əŋ gədaŋ pumpa ŋga, ama heni kəmba səku. 38Ehe! biŋ təheni, a mbaɗ za əŋ ŋgifiɗ. 39Sa kəzlapaheni, mar tə eci, heni kənda i limeke a nje aka səku ba, ha əŋ pis heni mə nda i zlap: “Bizlaf mə ɗiy ndəra bay ŋga a hedi mə ndaha tə abə miya tə Bay Bayta#23:39 Jabura 118:26.!”»
ទើបបានជ្រើសរើសហើយ៖
Matta 23: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
