Matta 22
22
Ma marərək a talaŋ gugway kə ɓət wala, aka səku kə ɓət muwul
(Luka 14:15-24)
1Yesu a mar ley zlap baha abə ma marərək, a zlapaŋta, a zla: 2«Bay tə wuzlaf seh mənaŋ wa: bay aka, a ɗal gugway kə ɓət wala, aka səku kə ɓət muwul tə mbu ŋgaŋ. 3A ləɓ hedi mə ɗal kəzəɗ ŋga iyi ley ɗafaŋta ma əŋ hedi maɗaf ma iyi əŋ gugway ta, ama hedi iyi ta i ŋgəm ley ndaha səku. 4A ləɓ hedi mə ɗal kəzəɗ iyi par baha, abə ley zlap mənaŋ wa, a zla: “Hi zlapaŋta əŋ hedi maɗaf ma iyi: Mənjawa, wuda mə di kwata, zla na iyi abə ŋhwa na magap iyi i mə feti kwata, məsəkəŋ iyi fuk i mə sli kwata. Hi ndaha əŋ gugway kə ɓət wala, aka səku kə ɓət muwul.” 5Ama hedi maɗaf ma iyi ta i kəɗiy wulək a ɗaf ma ta seh halla, i nda tata əŋ kəzəɗ tata iyi: hedi məzəwindi əŋ lay ŋga, hedi məzəwindi bahayim ley berehe məsəkəŋ ŋga iyi. 6Hedi dakayta iyi i məl hedi mə ɗal kəzəɗ tə bay iyi ta, i zləŋgaŋta takwaŋ, i jata. 7Bay ta, nəf a mar ley dəmaŋgu, a ləɓ sewje ŋga iyi ley jaha hedi mə ja hedi iyi ta, ɓa, ley var berne tata. 8Ɓa, a zlapaŋta əŋ hedi mə ɗal kəzəɗ ŋga iyi, a zla: “Wuda tə gugway kə ɓət wala, aka səku kə ɓət muwul seh, mə di kwata, ama hedi maɗaf ma iyi wa, i kəhwas tiɗe ley zəm wuda ta halla. 9Məŋgəvday a ɗek, hi nda əŋ zləzlar tə kataf iyi, i ɗafaŋta ma əŋ hedi heni mə lim iyi fuk, i mə ndaha əŋ gugway.” 10Hedi mə ɗal kəzəɗ iyi sey, i nda əŋ kataf iyi, i ɗafaŋta ma əŋ hedi tata i mə lim iyi, madawar iyi abə səntaŋ iyi fuk. Mənaŋ wa, ha biŋ kə ɗal gugway kə ɓət wala, aka səku kə ɓət muwul ta, a gwaɗ abə hedi iyi. 11Bay ta, a təɗ ley gər hedi maɗaf ma iyi, a namba a lim hedi mə tak rukut tə gugway kə ɓət dəma. 12A zlapaŋgu, a zla: “Maday na, hwa təɗaha əŋ nawa mə tak rukut tə gugway wa seh viŋgey?” Ama hedi ta a gula i ziŋgeŋ zlap səku səlak. 13Abə dawaŋ ta izey, bay ta, a zlapaŋta əŋ hedi mə ɗal kəzəɗ iyi, a zla: “Hi jawaŋta ndəra ŋga iyi abə ŋgas ŋga iyi, hi kapu a palah əŋ ləvəŋ. A namba, a haŋ za, a ɓam ndiŋ za#22:13 Matta 8:12..”» 14Yesu a zlap baha, a zla: «Hedi maɗaf ma iyi mbeh səku, ama hedi mamay iyi ɓəraŋ.»
Ləlaw diya ley min budu əŋ Kaysara vaw?
(Markus 12:13-17; Luka 20:20-26)
15Abə dawaŋ ta izey, Farisa iyi i nda i jam ley ɗal yawa amba ley məl Yesu əŋ ma mbiŋ mə nda i zlap iyi. 16I ləɓ gula tata dakayta iyi abə hedi tə Hirudus#22:16 Markus 3:6. iyi əŋ kelek Yesu, ley ɗəpahaw, i zlapaŋgu, i zla: «Metir, nini kəsəŋ hwa seh hedi sə delele, hwa kəgizeŋta ma tə Bizlaf əŋ hedi iyi abə kataf ta, hwa kələndəŋ abə hedi iyi səku, hwa kəgər hedi iyi fuk ntaɗ a ma təkwa. 17Gizenini a məsəkəŋ hwa mə wulək mənaŋ wa: Ləlaw diya ley min budu əŋ Kaysara, bay tə Rawma vaw, ləlaw səku vaw?» 18Ama Yesu a kəsəŋ wulək tata madawar iyi ta, ɓa, a zlapaŋta, a zla: «Hey, heni hedi mə zlap ganaɗ sə bək bək iyi, heni mba i təlaku wa seh, məŋgəvday a mey? 19Hi gizeke dala i mə min budu tə abə mbiŋ.» I gizeŋ dala tə malaway ta ntaɗ. 20Abə dawaŋ ta izey, Yesu a ɗəpta, a zla: «Tə a dala ta wa seh, ar fawtaw abə miya vitey?» 21I ziŋgeŋ zlap, i zla: «Ar tə Kaysara.» Ɓa, Yesu a zlapaŋta, a zla: «Məsəkəŋ məŋgəvday əŋ Kaysara, hi vəlaŋgu, məsəkəŋ məŋgəvday əŋ Bizlaf bahayim, hi vəlaŋgu.» 22Əŋ tata i mə zlim Yesu mə ziŋgeŋta zlap mənaŋ wa seh, i har fuk. I yaku, ɓa, i nda tata.
Ɗəp a talaŋ garaha tə hedi maməc iyi
(Markus 12:18-27; Luka 20:27-40)
23Əŋ pis ta mba, Saduki iyi i kərəɗaha əŋ kelek Yesu. Ar tata, hedi iyi i mə zlap, i zla: Garaha tə hedi əŋ faŋw tə hedi maməc iyi seh halla#22:23 Kəzəɗ tə Mələɓ iyi 23:8.. I ɗəp Yesu, i zla: 24«Metir, ehe Musa mə zlap, a zla: “Əŋgah hedi a məc, a yak wala, kwa mbu halla seh, sey zliŋgeŋ a ɓət wala məce ta, amba ley limeŋ mbu əŋ zliŋgeŋ maməc ta.” 25Əŋ faŋw tini, hedi abə zliŋgeŋ tata iyi dʉsəlʉɗ aka. Titʉz a ɓət wala, ɓak! a məc ŋga, kwa kəlim mbu halla. Mənaŋ wa, yak a yakaŋ wala məce ta əŋ zliŋgeŋ. 26Məsəkəŋ ta, kəɗal za mənaŋ mba abə zliŋgeŋ məbək, abə dawaŋ ta, abə zliŋgeŋ məmaakaɗ ha a gwar a zliŋgeŋ tata mədʉsəlʉɗ tata iyi fuk. 27Abə dawaŋ tata fuk, wala ta ɓak, a məc ŋga bahayim. 28Əŋ pis tə garaha tə hedi maməc iyi seh, əŋ faŋw tata sə dʉsəlʉɗ iyi wa, wala ta, a nda i nja seh əŋ wala vitey? Məŋgəvday tata fuk, i kəɓətza za əŋ wala.»
29Yesu a ziŋgeŋta zlap, a zla: «Heni seh, heni kəkuɗəp talaŋ təheni, məŋgəvday heni kəsəŋ ma mawuzlel tə əŋ Ɗerewel tə Bizlaf səku, heni kəsəŋ fagay tə Bizlaf səku. 30Məŋgəvday əŋ pis tə garaha tə hedi maməc iyi seh, muwul iyi i kənda i ɓət wala iyi halla ba, wala iyi bahayim i kənda i ɓət muwul iyi halla ba, ama i nda i nja mənaŋ mələɓ tə Bizlaf iyi tə wuzlaf. 31Məŋgəvday ma tə a talaŋ garaha tə hedi iyi əŋ faŋw tə hedi maməc iyi seh, heni kəjeŋge ma Bizlaf mə zlapaheni seh halla vaw? A zla: 32“Sa seh, sa Bizlaf tə Ibrahima, Bizlaf tə Isiyaku liŋ Bizlaf tə Yakubu.”» Yesu a zlap baha, a zla: «Bizlaf seh, ar Bizlaf tə hedi tə abə nje iyi, ama ar Bizlaf tə hedi maməc iyi səku.»
33Hedi iyi i mə zlim ma ŋga iyi ta fuk, i kəhar za mbeh səku a talaŋ sərək ŋga ta.
Ma matak pay səndawl seh vitikey?
(Markus 12:28-34; Luka 10:25-28)
34Əŋ Farisa iyi i mə zlim Yesu kəbes Saduki iyi za əŋ zlap tata seh, ɓa, i kwas. 35Hedi ntaɗ əŋ faŋw tata, metir tə ma majaw iyi aka, a mba i təl Yesu. A ɗəpu, a zla: 36«Metir, ma matak səndawl tə əŋ ma majaw seh vitikey?» 37Yesu a ziŋgeŋ zlap, a zla: «“Mba Bay Bayta Bizlaf təkwa abə nəf təkwa fuk, abə mədəŋcur təkwa fuk, abə wulək təkwa fuk.” 38Wawa, ar ma matak səndawl, titʉz. 39Ehe, məbək ta mənaŋ mba baha: “Mba məslige təkwa mənaŋ hwa mə mba talaŋ təkwa.#22:39 Məsəkəŋ matak tə Lewiŋki iyi 19:18.” 40Ma majaw tə Musa abə sərək tə hedi mə giz ma abə miya tə Bizlaf iyi fuk i mə jemi əŋ ma matak sə bək iyi wa.»
Almasihu abə Dawuda
(Markus 12:35-37; Luka 20:41-44)
41Əŋ Farisa iyi i mə kwesi, Yesu a ɗəpta, a zla: 42«Hi wulək a Almasihu seh viŋgey? Mambuw tə əŋ ntaŋw vitey?» I ziŋgeŋ zlap, i zla: «Mambuwaha tə əŋ ntaŋw tə Dawuda.» 43Yesu a zlapaŋta, a zla: «Mənaŋ viŋgey, Dawuda, kəɗi əŋ Mimiɗ sə Kweɗek, a ɗafaŋ ma “Bay Bayta” ŋga seh viŋgey? Məŋgəvday Dawuda kəzlap za, a zla:
44“Bay Bayta Bizlaf kəzlapaŋ za əŋ Bay Bayta na:
Nja əŋ ndəra zəma na,
ha əŋ sa mə ɗiy məsəgər təkwa iyi əŋ gədaŋ ŋgas təkwa#22:44 Markus 12:36; Jabura 110:1..”
45«Əŋgah Dawuda a ɗafaŋ ma “Bay Bayta”, kaa, Almasihu a mbaɗ əŋ mbu mambuwaha tə əŋ ntaŋw ŋga seh viŋgey?»
46Kwa hedi ntaɗ əŋ faŋw tata mə gula i ziŋgeŋ zlap ntaɗ seh halla. Mar tə pis mba, kwa hedi ntaɗ mə wulək ley ɗəpu seh halla ba.
ទើបបានជ្រើសរើសហើយ៖
Matta 22: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
