Luka 5
5
Yesu a ɗafaŋta ma əŋ gula ŋga titʉz iyi maakaɗ ley ɗal kəzəɗ
(Matta 4:18-22; Markus 1:16-20)
1Əŋ pis məzəwindi aka, Yesu mə geri a meɗek gaw tə Genesaret. Hedi iyi mbeh səku i kəŋgəcaha wucum əŋ kelek ŋga ley zlim ma tə Bizlaf. 2Yesu a lim kambuwal iyi bək a meɗek gaw ta. Hedi mə məl kəlif iyi i kəbəreŋgehe tata cuza a ɗəməŋ, i kəbaŋ kʉse tata iyi. 3Yesu a tap əŋ kambuwal ntaɗ əŋ faŋw tə kambuwal iyi ta, ar kambuwal tə Simaŋw. A rəku mə gaɗ kambuwal guduk mbizek abə bəra zəzay. Yesu a nja a ɗəməŋ, ɓa, a mar ley sərək hedi iyi mbeh səku#5:3 Matta 13:1-2; Markus 3:9-10;4:1..
4Əŋ mbiŋ mə cukwaɗ ley zlap seh, a zlapaŋ əŋ Simaŋw, a zla: «Gaɗ kambuwal təkwa əŋ lay gaw sə seleleŋ. Ɓa, hwa abə hedi heni mə ɗal kəzəɗ lalaŋ iyi, hi kap kʉse təheni iyi əŋ yim ley məlaha kəlif.» 5Simaŋw a ziŋgeŋ zlap, a zla: «Bay tini, njaɗu njaɗu wa, nini kətəɓəlaha za əŋ kəlif ta, nini kəməlaha halla. Ama məŋgəvday zlap təkwa, sa kap kʉse iyi ta za baha.»
6Ɓa, i kap kʉse iyi ta əŋ yim, i kəməlaha kəlif iyi mbeh səku ha kʉse tata i kənda i ŋgwahak. 7Abə dawaŋ ta izey, i ɗafaŋta ma abə ndəra əŋ maday tata iyi tə əŋ kambuwal məzəwindi, amba ley ndaha i tərta. I ndaha, i gwaɗ kambuwal iyi bək tata fuk abə kəlif, ha kambuwal iyi ta i kəmba i təɗ tata əŋ ndaŋw yim. 8Əŋ Simaŋw Piyer mə lim mazla ta wa, ɓa, a daraŋ malakw a ma tə Yesu, a zla: «Bay Bayta, jel təkwa za abə sa, məŋgəvday sa seh, sa hedi mə ɗal hem.» 9Simaŋw Piyer abə hedi tata i mə məl kəlif lalaŋ iyi fuk i kələndəŋ za, məŋgəvday kəlif iyi mbeh səku tata i mə məlaha wa. 10Mənaŋ mba bahayim, Yakuba abə Yahwana, wuziyi tə Zebede iyi, hedi mə ɗal kəzəɗ tə abə Simaŋw iyi, i kələndəŋ za bahayim. Ama Yesu a zlapaŋ əŋ Simaŋw, a zla: «Hwa mba i ləndəŋ səku, mar tə eci hwa nda i ŋgaslaha hedi iyi ley ziber ma tə Bizlaf.» 11Ɓa, i deɓ kambuwal tata iyi əŋ bəra zəzay, yak, i yak məsəkəŋ iyi fuk, ɓa, i ziber Yesu.
Yesu a baŋ hedi kwalkwala
(Matta 8:1-14; Markus 1:40-45)
12Əŋ Yesu mbə a wuta par aka, hedi məzəwindi kwalkwala a wucum fuk, a ndaha əŋ namba. Əŋ mbiŋ mə lim Yesu seh, ɓa, a dar malakw a ma ŋga tik talaŋ əŋ teyek, a ɗalaŋ mbuh, a zla: «Bay Bayta na, əŋgah hwa kəmba, hwa gula i baŋgaka.» 13Yesu a ɗef ndəra, a ges a mbiŋ, a zla: «Sa kəmba, mbaɗ əŋ hedi mabaŋ.» Mbehmbeh mba, məc ta a yaku. 14Yesu a ŋgəzu, a zla: «Hwa mba i giz əŋ kwa viyey səku, ama nda i gizeŋ talaŋ təkwa əŋ hedi mə ɗal kukus əŋ Bizlaf, abə dawaŋ ta, vəlaŋ məsəkəŋ əŋ Bizlaf mənaŋ ma majaw tə Musa mə zlap, məŋgəvday ley gizeŋta əŋ hedi iyi fuk kwalkwala təkwa kəbaŋ cuza.» 15Abə mbiŋ ta fuk, labara tə Yesu a kənda a ma a ma əŋ faŋw tə hedi iyi. Hedi iyi mbeh səku i kwasaha əŋ kelek ŋga ley teheŋ zləm, baha, amba a mbəlta əŋ məc tata iyi bahayim. 16Ama Yesu a təɗaha ŋga əŋ faŋw tata, a nda ŋga əŋ təp damu ley ɗalaŋ mbuh əŋ Bizlaf.
Yesu a mbəl hedi mahuluɓ
(Matta 9:1-8; Markus 2:1-12)
17Əŋ pis məzəwindi aka, Yesu a kəsərəkaŋta ma tə Bizlaf əŋ hedi iyi. Farisa iyi abə metir tə ma majaw iyi i mə nji a namba a kelek Yesu, i ndaha a wuta iyi par par tə əŋ hayak tə Galili, Yahudiya liŋ tə əŋ berne tə Urusalima. Fagay tə Bay Bayta Bizlaf mbə abə mbiŋ ley mbəl hedi mə dal iyi. 18Hedi məzəwindi iyi aka, i ndaha, i daha hedi mahuluɓ a talaŋ ɓəɓele. I pələk kataf ley təɗu əŋ biŋ amba ley ɗiyu a ma tə Yesu. 19Ama i kəlim kataf ley təɗu seh halla, məŋgəvday hedi iyi mbeh səku. Ɓa, i tap a talaŋ biŋ, i rəz lay, i bəreŋgu abə ɓəɓele ŋga ta, əŋ faŋw tə hedi iyi a ma tə Yesu. 20Əŋ Yesu mə gər kuw ma tata seh, a zlapaŋ əŋ hedi mahuluɓ, a zla: «Maday na, hem təkwa iyi i mə beŋgi za.»
21Metir tə ma majaw iyi abə Farisa iyi i wulək əŋ faŋw tata, i zla: «Ar viyey hedi mə ɗiy talaŋ ŋga əŋ Bizlaf wa? Ayaw, mə gula i baŋ hem tə hedi iyi seh viyey? Sey Bizlaf taataɗ ŋga mə gula i baŋ hem tə hedi iyi səku vah?» 22Ama Yesu kəsəŋ wulək tata cuza, a zlapaŋta, a zla: «Hi wulək mənaŋ wa, əŋ nəf təheni seh, məŋgəvday a mey? 23Ma sə kefeŋ ley zlap seh vitikey? Ley zlap: “Hem təkwa iyi i mə beŋgi za” vaw, aka səku ley zlap: “Gar, nda təkwa” vaw? 24Ama sa kəmba hi səŋgu Mbu tə Hedi abə mazla ley yakaŋta hem tə hedi tə əŋ məŋhayak iyi.» Mənaŋ wa, Yesu ɓa, a zlapaŋ əŋ hedi mahuluɓ sey, a zla: «Ehe, sa kəzlapah gar, ɓət ɓəɓele təkwa, nda əŋ ge təkwa.» 25Mbehmbeh mba, hedi ta a gar a ma tə hedi iyi fuk, a ɓət ɓəɓele mbiŋ mə waŋ tə a ɗek sey, ɓa, a nda ŋga əŋ ge, a kəhəmən Bizlaf. 26Hedi tə a namba iyi fuk i kəhar za, i kəhəmən Bizlaf abə ləndəŋ, i zla: «Eci, nakwa iyi kəlim məsəkəŋ mə day fagay iyi za.»
Yesu a ɗafaŋ ma əŋ Lewi amba ley ziberʉ
(Matta 9:9-13; Markus 2:13-17)
27Abə dawaŋ tə Yesu kəɗal mazla iyi wa kwata, a təɗaha, a lim hedi mə cakal budu, miya ŋga Lewi, mə nji əŋ lay ŋga kə cakal dala tə budu. A zlapaŋgu, a zla: «Ziberekʉ!» 28Lewi#5:28 Lewi seh, i kəɗafaŋ ma baha Matta. pərta! a gar, yak, a yak məsəkəŋ iyi fuk, ɓa, a ziberʉ. 29Abə dawaŋ tə nja mbizek, Lewi a ɗalaŋ gugway səndawl əŋ Yesu a ge ŋga. Hedi mə cakal budu iyi mbeh səku abə hedi məzəwindi iyi i kəzəm wuda abə tata. 30Farisa iyi abə metir tə ma majaw iyi i kəguŋgur ma əŋ faŋw tata, i zlapaŋta əŋ gula tə Yesu iyi, i zla: «Heni zəm wuda abə hedi mə cakal budu iyi liŋ abə hedi mə ɗal hem iyi seh, məŋgəvday a mey?» 31Yesu a ziŋgeŋta zlap, a zla: «Hedi sə ndaŋwndaŋw iyi ŋgem tata abə hedi mə vəl mənjivek seh halla, sey hedi mə dal iyi. 32Sa kəndaha ley ɗafaŋta ma əŋ hedi sə delele iyi seh halla, ama sa ndaha seh, məŋgəvday hedi mə ɗal hem iyi amba i mə buw nja tata.»
Ɗəp a talaŋ ley ɗal dalyam
(Matta 9:14-17; Markus 2:18-22)
33Farisa iyi i zlapaŋ əŋ Yesu, i zla: «Gula tə Yahwana iyi i kəɗal dalyam, i kəɗalaŋ mbuh əŋ Bizlaf a pis ta, a pis ta, mənaŋ gula tini iyi bahayim. Ama gula təkwa iyi i kəzəm məsəkəŋ, i kəsa məsəkəŋ a pis ta, a pis ta seh, məŋgəvday a mey?» 34Yesu a ziŋgeŋta zlap, a zla: «Hi wulək seh heni gula i takaŋta wula za əŋ hedi maɗaf ma iyi tə əŋ gugway kə ɓət wala, aka səku kə ɓət muwul ley ɗal dalyam əŋ muwul dəma mbə abə tata za vaw? A ɗal səku. 35Ama pis ta a ndaha za, əŋ muwul dəma i kəɓətza za əŋ faŋw tata. Əŋ pis ta mba, i ɗal dalyam za.»
36A zlapaŋta abə ma marərək baha, a zla: «Kwa hedi mə nda i ŋgwahak rukut lawayaŋ ley mbasl rukut mavəva seh halla. Əŋgah kəɗal za mənaŋ mba ta seh, kəgay rukut lawayaŋ za, rukut ta a kənda i zlar abə rukut mavəva seh halla. 37Kwa hedi mə nda i ɗiɗe mavu sə deɗek əŋ kwenkwene mavəva seh halla. Əŋgah kəɗiɗeza za, mavu sə deɗek ta a na seh, a ŋgwahak kwenkwene ta za. Mavu a mbaɗ ŋga za əŋ teyek, kwenkwene bahayim a gay ŋga za. 38Ama a kəlim seh, hi ɗiɗe mavu sə deɗek əŋ kwenkwene lawayaŋ. 39Əŋgah hedi a kəsa mavu mana seh, a kuw ley sa mavu sə deɗek seh halla ba, məŋgəvday a wulək seh, mavu mana pay səntaŋ a sə deɗek.»
ទើបបានជ្រើសរើសហើយ៖
Luka 5: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
