Luka 20
20
Mə vəlaŋ fagay əŋ Yesu seh, viyey?
(Matta 21:23-27; Markus 11:27-33)
1Əŋ pis məzəwindi aka, Yesu a kəsərək hedi iyi əŋ biŋ tə Bizlaf, a kəgizeŋta Labara Səntaŋ Lawayaŋ. Hedi səndawl iyi tə a talaŋ hedi iyi i mə ɗal kukus əŋ Bizlaf abə metir tə ma majaw iyi liŋ hedi mə ɗal yawa iyi#20:1 Hedi mə ɗal yawa tə Yahuda iyi, aka səku, hedi səndawl tə Yahuda iyi. i ndaha, 2i ɗəpu, i zla: «Gizenini, mə zlapah ley ɗal məsəkəŋ iyi wa seh viyey? Aka səku, mə vəlah kataf ley ɗalta mənaŋ wa seh, viyey?» 3Yesu a ziŋgeŋta zlap, a zla: «Sa bahayim, sa mba i ɗəpaheni ma ntaɗ. Hi gizekʉ gey: 4Mə ləɓaha Yahwana mə ɗal Batem#20:4 3:3, 7. ley ɗalaŋta batem əŋ hedi iyi seh, viyey? Bizlaf vaw, aka səku hedi iyi vaw?» 5Ɓa, hedi iyi ta i ɗal yawa əŋ faŋw tata, i zla: «Əŋgah nakwa iyi ziŋgeŋ zlap: “Ar Bizlaf mə ləɓahaw” seh, a nda i ziŋgenakwa zlap: “Kaa, heni kuw ma tə Yahwana ta səku seh, məŋgəvday a mey?” 6Ama, əŋgah nakwa iyi zlap: “Ar hedi iyi i mə ləɓahaw” seh, hedi iyi fuk i nda i kapanakwa abə nvəŋ, məŋgəvday i kəsəŋ lawlaw Yahwana mə ɗal batem seh, ar hedi mə giz ma abə miya tə Bizlaf.» 7Abə dawaŋ ta izey, i ziŋgeŋ zlap, i zla: «Nini kəsəŋ hedi mə ləɓahaw seh viyey səku.» 8Yesu a zlapaŋta, a zla: «Sa bahayim, sa gizeheni hedi mə vəlaka kataf ley ɗal məsəkəŋ iyi wa seh halla.»
Ma marərək a hedi mə ɗəs madawar
(Matta 21:33-46; Markus 12:1-12)
9Abə dawaŋ ta, Yesu a zlapaŋta əŋ hedi iyi abə ma marərək, a zla: «Hedi məzəwindi aka, a ŋgəɓ mpay kə zəm iyi əŋ lay, a yakaŋta əŋ ndəra hedi mə ɗəs iyi#20:9 Esaya 5:1., ɓa, a nda ŋga ley pikehe guduk, kənjaha mbeh səku a namba. 10Əŋ ntəra kə mbal wuziyi tə mpay iyi kəhwasaha za, a ləɓ hedi ŋga mə ɗal kəzəɗ ntaɗ əŋ kelek hedi mə jəɗ lay iyi ta, amba i mə vəlaŋ ɓiz ŋga tə wuziyi tə mpay iyi ta bahayim. Ama hedi iyi ta i tawahaw, i sawrahaw ndəra misiŋ. 11Hedi tə lay ta, a ləɓ hedi ŋga mə ɗal kəzəɗ par, mbiŋ bahayim i tawahaw bahayim, i ru, i sawrahaw ndəra misiŋ. 12A ləɓ hedi ŋga mə ɗal kəzəɗ məmaakaɗ ta baha, i tawu ha i ɗalaŋ mbəlah, i jəjakahaw əŋ palah. 13Hedi tə lay ta, a zlap izey, a zla: “Sa nda i ɗal seh, viŋgeh? Sa nda i ləɓ mbu na mamba. Mbiŋ seh, i waŋgaŋ talaŋ za!” 14Ama əŋ hedi mə ɗəs iyi ta i mə limʉ a kəndaha seh, i zlap əŋ faŋw tata, i zla: “Ehe, hedi mə nda i zəm ge, a kəndaha. Mazukwa i ju amba lay mə nja əŋ nakwa.” 15I ŋgaslu guduk abə lay, ja, i ju.»
Yesu a ɗəp hedi makwas iyi, a zla: «Hedi tə lay ta, a nda i ɗal abə hedi iyi ta wa seh, viŋgey? 16A ndaha za, a nda i ja hedi mə ɗəs iyi ta, a nda i vəl lay ta əŋ ndəra hedi iyi par.» Əŋ hedi iyi ta i mə zlim ma ta wa seh, i zla: «Wa seh, a ɗal halla!» 17Ama Yesu a gərta, a zla: «Ma mawuzlel tə əŋ Ɗerewel tə Bizlaf mə zlap, a zla:
“Nvəŋ hedi mə ləm ge iyi i mə nahaw,
kəmbaɗ za əŋ nvəŋ tə təŋkumare”, ma ta, a mba i zlap seh, viŋgey#20:17 Jabura 118:22; Matta 21:42.?
18Hedi mə ndəv a talaŋ nvəŋ ta seh, a ŋga za. Əŋgah kənaha za a hedi bahayim, a gəzlu za kuɗkuɗ.»
Budu məŋgəvday bay tə Rawma
(Matta 22:15-22; Markus 12:13-17)
19Metir tə ma majaw iyi abə hedi səndawl iyi tə a talaŋ hedi iyi i mə ɗal kukus əŋ Bizlaf i pələk ley məl Yesu əŋ hala ta mba, ama i kələndəŋ za a hedi iyi, i kəsəŋ za Yesu a zlap abə ma marərək wa seh a talaŋ tata. Ama i kələndəŋ abə hedi sə mbeh səku iyi. 20Ɓa, i mar ley jəɗu, i ləɓ hedi iyi əŋ kelek ŋga, hedi iyi ta i ɗiy talaŋ tata mənaŋ hedi sə delele iyi, amba ley məl Yesu əŋ zlap ŋga iyi amba i lim ley vəlu əŋ ndəra hedi mə mbəzl ma iyi abə hedi tə abə mazla tə guverner. 21I ɗəpu, i zla: «Metir, nini kəsəŋ ma hwa mə zlap wa, abə məsəkəŋ hwa mə sərək iyi wa seh, məndiwiŋ. Hwa kəwuɗak hedi iyi səku, hwa kəsərək hedi iyi ley nja mənaŋ Bizlaf mə mba. 22Gizenini, kukus takwa, kəvəlanakwa kataf ley min budu əŋ Kaysara, bay səndawl tə a talaŋ bay iyi tə Rawma za vaw, aka səku halla vaw?» 23Yesu kəsəŋ wereh tata za, ɓa, a zlapaŋta, a zla: 24«Hi gizeke dala ta ntaɗ. Ar fawtaw abə miya vitey tə a ɗek?» I ziŋgeŋ zlap, i zla: «Ar tə Kaysara, bay səndawl tə a talaŋ bay iyi tə Rawma.» 25Abə dawaŋ ta izey, Yesu a zlapaŋta, a zla: «Mənaŋ mba seh, məsəkəŋ məŋgəvday Kaysara, bay səndawl tə a talaŋ bay iyi tə Rawma, hi vəlaŋgu, məsəkəŋ məŋgəvday Bizlaf, hi vəlaŋgu bahayim.» 26I kəlim ma ley məlu a ma ŋga iyi mbiŋ mə zlap tə a ma tə hedi iyi wa seh halla. Ama i kəhar za məŋgəvday a ma mbiŋ mə ziŋgeŋta, nja, i nja ka tete.
Ɗəp a talaŋ garaha tə hedi maməc iyi
(Matta 22:23-33; Markus 12:18-27)
27Abə dawaŋ ta, lə Saduki dakayta iyi i kərəɗaha əŋ kelek Yesu. Ar tata i mə zlap garaha tə hedi əŋ faŋw tə hedi maməc iyi#20:27 Kəzəɗ tə Mələɓ iyi 23:8. seh halla. I ɗəp Yesu mənaŋ wa, i zla: 28«Metir, Musa kəwuzlelenakwa kukus wa za, a zla: “Əŋgah hedi a məc, a yak wala, kwa mbu halla seh, sey zliŋgeŋ a ɓət wala məce ta, amba ley limeŋ mbu əŋ zliŋgeŋ maməc ta.” 29Hedi abə zliŋgeŋ tata iyi dʉsəlʉɗ aka. Titʉz a ɓət wala, a məc ŋga kwa mbu halla. 30Hedi məbək ta, a ɓət wala məce ta, 31hedi məmaakaɗ ta bahayim a ɓət wala məce ta. Mənaŋ mba, ha tata dʉsəlʉɗ tata iyi fuk i kəɓət wala məce ta za, i kəməc tata za, i kəlim mbu abə mbiŋ halla. 32Əŋ cukwaɗ ta seh, wala məce ta, məc a məc ŋga bahayim. 33Əŋgah mənaŋ mba seh, əŋ garaha tə hedi maməc iyi seh, wala məce ta, a nda i nja seh, əŋ wala vitey? Məŋgəvday tata dʉsəlʉɗ tata iyi fuk i kəɓətza za əŋ wala.»
34Yesu a ziŋgeŋta zlap, a zla: «Hedi tə əŋ məŋhayak mənjawa iyi wa, muwul iyi i kəɓət wala iyi, wala iyi i kənda əŋ ge muwul iyi. 35Ama muwul iyi abə wala iyi Bizlaf mə gərta tiɗe ley garaha əŋ faŋw tə hedi maməc iyi, tiɗe ley nja əŋ məŋhayak tə a ma wa seh, i ɓət wala, aka səku muwul halla ba. 36I kənda i məc halla ba. Tata mənaŋ mələɓ tə Bizlaf iyi, i mbaɗ za əŋ wuziyi tə Bizlaf iyi, məŋgəvday kəgarahata cuza əŋ faŋw tə hedi maməc iyi. 37Musa kəzlap za məndiwiŋ, hedi maməc iyi i garaha za. Mənaŋ mbiŋ mə zlap a talaŋ kahaw mə bas tə a talaŋ dəba vidiɗ iyi, əŋ mbiŋ mə ɗafaŋ ma əŋ Bay Bayta Bizlaf, “Bizlaf tə Ibrahima, Bizlaf tə Isiyaku liŋ Bizlaf tə Yakubu.”» 38Yesu a zlap baha, a zla: «Bizlaf seh, ar Bizlaf tə hedi maməc iyi səku, ama ar Bizlaf tə hedi tə abə nje iyi, məŋgəvday hedi iyi fuk i nja məŋgəvday mbiŋ.» 39Metir tə ma majaw dakayta iyi i zlap izey, i zla: «Hwa kəzlap za ləlaw diya, metir.» 40Məŋgəvday a ɗek, i kələndəŋ za ley ɗəpu a ma iyi par.
Almasihu pay day a Dawuda
(Matta 22:41-46; Markus 12:35-37)
41Yesu a zlapaŋta, a zla: «I nda i zlap Almasihu, ar mambuwaha tə əŋ ntaŋw tə Dawuda seh viŋgey? 42Məŋgəvday Dawuda abə talaŋ ŋga kəzlap za əŋ Ɗerewel mawuzlel tə Jabura:
“Bay Bayta Bizlaf kəzlapaŋ za əŋ Bay Bayta na:
Nja əŋ ndəra zəma na,
43ha əŋ sa mə ɗiy məsəgər təkwa iyi əŋ gədaŋ ŋgas təkwa#20:43 Jabura 110:1..”
44Dawuda a ɗafaŋ ma “Bay Bayta”, kaa, Almasihu a mbaɗ əŋ mambuwaha tə əŋ ntaŋw ŋga seh viŋgey?»
Yesu a ŋgəz gula ŋga iyi a metir tə ma majaw iyi
(Matta 23:1-36; Markus 12:38-40)
45Yesu a zlapaŋta əŋ gula ŋga iyi a ma tə hedi mə zlim ma ŋga iyi fuk, a zla: 46«Hi jaŋ talaŋ təheni abə metir tə ma majaw iyi i mə mba i pik tə abə rukut səndawl səndawl iyi, i mba hedi iyi i ɗalaŋta mbele abə waŋ talaŋ əŋ lay kə kwas hedi iyi. I kəmay lay kə nja səntaŋ əŋ biŋ iyi kə ɗal mbuh əŋ Bizlaf, i kəpələk lay tə hedi səndawl iyi, əŋgah i kəɗafaŋta ma za ley zəm wuda tə gugway. 47I kəlaŋta məsəkəŋ tə wala məce iyi, i kəɗal mbuh nja mbeh səku amba hedi iyi i mə gərta. I lim mbəzl ma sə ndʉlʉk za pay day a tə hedi dakayta iyi.»
ទើបបានជ្រើសរើសហើយ៖
Luka 20: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
