Luka 2
2
Mbuwaha tə Yesu
(Matta 1:18-25)
1Əŋ hala i mə mbuwaha Yahwana mə ɗal batem seh, Agustus, bay səndawl tə a talaŋ bay iyi tə Rawma, a zlap ley wuzlel miya tə hedi iyi tə əŋ hayak ŋga iyi fuk. 2Ar wuzlel zləm titʉz, a ɗal əŋ bay Kiriniyus ar guverner tə əŋ hayak tə Siriya. 3Hedi iyi fuk i nda i wuzlelehe zləm tata iyi, kwa viyey fuk əŋ berne tə dide tə dide tata iyi.
4Yusufa bahayim a gar a Nasaratu əŋ hayak tə Galili, a nda əŋ hayak tə Yahudiya, ha əŋ Baytilama, berne tə bay Dawuda, məŋgəvday Yusufa mambuwaha tə əŋ ntaŋw tə bay Dawuda. 5A nda əŋ namba ley wuzlelehe zləm, mbiŋ abə Mariyama, ncew ŋga, mbə abə dəməs. 6Əŋ tata i mbə a namba, pis ley mbuwaha tə Mariyama kəhwasaha za. 7A mbuwaha mbu muwul, gwenje ŋga. A dəpu abə rukut, a waŋgu əŋ lay kə zəm tə məsəkəŋ mandaham tə ge iyi, məŋgəvday i kəlim lay kə waŋ muluk iyi halla.
Mələɓ tə Bizlaf a gizeŋ əŋ njʉwiŋ iyi mbuwaha tə Yesu
8Əŋ hayak ta mba, njʉwiŋ iyi aka a damu, i kəjəɗ ŋgaɓa tə məsəkəŋ tata mandaham tə ge iyi abə njaɗu. 9Mələɓ tə Bay Bayta Bizlaf a təɗaha əŋ faŋw tata. Mawaɗ tə Bay Bayta Bizlaf a ndaha a talaŋ tata. Njʉwiŋ iyi ta i kələndəŋ za mbeh səku. 10Ama mələɓ tə Bizlaf a zlapaŋta, a zla: «Hi mba i ləndəŋ səku, məŋgəvday sa dahaheni Labara Səntaŋ Lawayaŋ mə nda i vəl səsəm mbeh səku əŋ hedi iyi fuk. 11Əŋ njaɗu nakaha wa, hedi mə nda i reh hedi iyi kəmbuwaha za, məŋgəvday təheni əŋ berne tə bay Dawuda, ar Almasihu, Bay Bayta. 12Ehe, heni səŋza za mənaŋ wa: Heni lim mbu veɗek mə dipi abə rukut, mə weŋgi əŋ lay kə zəm tə məsəkəŋ mandaham tə ge iyi.»
13Mbehmbeh mba, mələɓ tə Bizlaf iyi tə wuzlaf mbeh səku i ndaha əŋ kelek mələɓ tə Bizlaf sey. I kəhəmən Bizlaf mənaŋ wa, i zla:
14«Səndawl əŋ Bizlaf tə wuzlaf,
zahay mə nja əŋ məŋhayak a hedi mbiŋ mə mba iyi.»
Njʉwiŋ iyi i nda əŋ Baytilama
15Əŋ mələɓ tə Bizlaf iyi i mə yakta seh, i ziŋ tata əŋ wuzlaf, njʉwiŋ iyi i zlap əŋ faŋw tata, i zla: «Mazukwa i gwar ha əŋ Baytilama, ɓa, nakwa iyi gəraha məsəkəŋ mə ɗal tə a namba, Bay Bayta Bizlaf mə gizenakwa sey.» 16I kəvaz za ley nda əŋ namba. I lim Mariyama abə Yusufa liŋ mbu veɗek mə weŋgi əŋ lay kə zəm tə məsəkəŋ mandaham tə ge iyi. 17Abə dawaŋ ta, i lim mbu sey lim, ɓa, i giz ma mələɓ tə Bizlaf mə zlap tə a talaŋ mbu sey əŋ hedi iyi. 18Hedi iyi i mə zlim ma njʉwiŋ iyi i mə zlapaŋta wa seh, i kəhar za mbeh səku. 19Ama Mariyama kəməl ma ta fuk əŋ nəf ŋga, a kəwulək mbeh səku a ɗek. 20Abə dawaŋ ta, njʉwiŋ iyi sey, i ziŋ tata, i kəhəmən Bizlaf, i kəsəbaŋgu məŋgəvday məsəkəŋ iyi mbeh səku i mə zlimehew, i mə limehew fuk i kəɗal za mənaŋ mələɓ tə Bizlaf mə gizeŋta sey.
I ɗiyaŋ miya əŋ Yesu
21Əŋ waŋ jamaakaɗ tə ley mbuwaha tə mbu, hala ley zla viɗe tə mbu kəhwasaha za, i ɗiyaŋ miya Yesu. Miya ta, mənaŋ mələɓ tə Bizlaf mə gizeŋ əŋ mama ŋga, mar kəɗal dəməs halla ndagwa.
I deɓ Yesu əŋ biŋ tə Bizlaf
22Abə dawaŋ ta, waŋ kə ɗal kukus kəhwasaha za ley mbaɗ əŋ səntaŋ a ma tə Bizlaf, mənaŋ ma majaw tə Musa mə zlap tə a talaŋ wala muwas. Ɓa, Yusufa abə Mariyama i deɓ mbu əŋ Urusalima əŋ Biŋ tə Bizlaf amba ley gizʉ a ma tə Bay Bayta Bizlaf. 23Məŋgəvday mə wuzleli əŋ ɗerewel tə ma majaw tə Bay Bayta Bizlaf, a zla: «Mbu mambuwaha gwenje iyi fuk, Bay Bayta Bizlaf mə sla a tata.» 24I ndaha bahayim məŋgəvday ley vəlaŋ məsəkəŋ əŋ Bay Bayta Bizlaf mənaŋ ma majaw mə zlap, a zla: «Wuɗwuɗga iyi bək, aka səku wanaɗ mekedek iyi bək.»
Simeyaŋw a həmən Bizlaf məŋgəvday Yesu
25Hedi par aka, a Urusalima, miya ŋga Simeyaŋw. Hedi ta ar hedi sə delele, a kəziber ma tə Bizlaf, a kəgəbar hedi mə nda i ndaha ley reh Israyila iyi, Mimiɗ sə Kweɗek mbə abə mbiŋ. 26Mimiɗ sə Kweɗek ta, kəgizeŋ za, a zla: «Hwa məc halla, sey hwa mə lim Almasihu Bay Bayta Bizlaf mə nda i ləɓahaw za.» 27Mimiɗ sə Kweɗek a deɓ Simeyaŋw ta, əŋ biŋ tə Bizlaf, ɓa, əŋ hala ta mba, baba tə Yesu iyi i deɓʉ əŋ biŋ ta, ley cukwaɗ kukus tə a talaŋ ŋga, mənaŋ ma majaw tə Musa mə zlap tə əŋ Ɗerewel tə Bizlaf. 28Simeyaŋw a ɓət mbu ta əŋ ndəra ŋga, ɓa, a ɗalaŋ sʉse əŋ Bizlaf mənaŋ wa, a zla:
29«Mənjawa, waa Bay Bayta Bizlaf, ma hwa mə zlap sey,
kəɗal za,
hwa gula i yak hedi təkwa mə ɗal kəzəɗ mə məc əŋ zahay.
30Məŋgəvday abə nje na, sa kəlim hedi təkwa mə nda i reh hedi iyi cuza.
31Reh wa, hwa kəslaŋta za əŋ hedi iyi fuk.
32Ar waɗ ley waɗaŋta lay əŋ hedi mə səŋ Bizlaf iyi səku,
ar səndawl əŋ Israyila iyi, hedi təkwa iyi#2:32 Esaya 42:6; 49:6; 52:10..»
Simeyaŋw a zlapaŋ əŋ Mariyama
33Baba abə mama tə Yesu iyi i kəhar za məŋgəvday a ma Simeyaŋw mə zlap tə a talaŋ Yesu mənaŋ wa. 34Simeyaŋw a pireŋta ma, ɓa, a zlapaŋ əŋ Mariyama, mama tə Yesu, a zla: «Bizlaf a may mbu wa amba hedi iyi mbeh səku i ndəv əŋ hem, baha, amba hedi iyi mbeh səku i garaha əŋ Israyila. A mbaɗ za əŋ hedi mə nda i gizeŋta əŋ hedi iyi, Bizlaf mə mba i rehta əŋ hem tata, ama hedi iyi i kuwza halla. 35A gizehe wulək maɓah tə əŋ nəf tə hedi iyi mbeh səku za. Hwa bahayim mama tə mbu, nəf təkwa a dəm za mənaŋ i kəɓuwaha za abə masalam.»
Anna, wala mə giz ma abə miya tə Bizlaf
36Wala mə giz ma abə miya tə Bizlaf aka, miya ŋga Anna, hazləma tə Fanuwel, mambuwaha tə əŋ ntaŋw tə Aser. Kəɗal məsəra wala kwata cəkufcəkuf. Əŋ dalay ŋga, a ɓət muwul, i kənja abə muwul ŋga ta, va dʉsəlʉɗ. 37Abə dawaŋ ta, muwul ŋga a məc, mə nji taataɗ ŋga wala məce. Va ŋga ndəra jamaakaɗ a meɗek nfaɗ. Kəɓət muwul par halla. Mbə əŋ biŋ tə Bizlaf a pis ta, a pis ta, a kəɗalaŋ kəzəɗ əŋ Bizlaf njaɗu abə pis fuk, a kəɗal dalyam, a kəɗal mbuh. 38A ndaha əŋ hala ta mba, ɓa, a ɗalaŋ sʉse əŋ Bizlaf. A zlap a talaŋ mbu ta, əŋ hedi mə gəbar reh tə əŋ Urusalima iyi fuk.
39Əŋ Yusufa abə Mariyama i kəcukwaɗ za fuk ley ɗal mənaŋ ma majaw tə Bay Bayta Bizlaf mə mba, i ziŋ tata əŋ hayak tə Galili, əŋ berne tata tə Nasaratu#2:39 Matta 2:23.. 40Mbu a kəgəl, a kəlim fagay. Mbiŋ abə burŋguzl mbeh səku, səntaŋ tə Bizlaf mbə a mbiŋ.
Yesu, va ŋga wam a meɗek bək, mbə əŋ biŋ tə Bizlaf
41A va ta a va ta, baba tə Yesu iyi i kənda əŋ Urusalima ley ɗalaha gugway tə Paska. 42Əŋ Yesu va ŋga wam a meɗek bək, ɓa, i nda əŋ namba mənaŋ kukus tə gugway mə zlap. 43Abə dawaŋ tə gugway cukwaɗ seh, ɓa, i ziŋ tata əŋ wuta, ama Yesu kəyakaha za əŋ Urusalima, baba ŋga iyi i kəsəŋ halla. 44I cek seh mbə əŋ faŋw tə hedi tata iyi i mə ndaha lalaŋ, i kənda vah ntaɗ a kataf. Ɓa, i pələku əŋ faŋw tə vəŋ tata iyi abə əŋ faŋw tə hedi tata mə səŋ iyi. 45Ama i kəlimʉ halla. A namba, i ziŋ əŋ Urusalima, i kənda abə pələk. 46Əŋ waŋ maakaɗ ta, i limʉ əŋ biŋ tə Bizlaf. Mə nji əŋ faŋw tə metir tə ma majaw iyi, a kəteheŋta zləm, a kəɗəpta. 47Hedi mə teheŋ zləm iyi fuk, ma ta kəwuzlaɗaŋta talaŋ za, məŋgəvday səŋ məsəkəŋ ŋga abə ley səŋ i ziŋgeŋta zlap. 48Baba ŋga iyi, i limʉ, i lim seh, i kəhar za mbeh səku. Mama ŋga a zlapaŋgu, a zla: «Mbu na, hwa ɗalanini mənaŋ wa seh, məŋgəvday a mey? Baba təkwa abə sa, talaŋ tini kəwuzlaɗ za mbeh səku abə ley pələkah.» 49A ziŋgeŋta zlap, a zla: «Hi pələkaka seh, məŋgəvday a mey? Hi kəsəŋ sey sa nja a ge Baba na seh halla vaw?» 50Ama i kəsəŋ ma mbiŋ mə zlapaŋta halla.
51Ɓa, Yesu a nda abə tata əŋ Nasaratu. A kəkuwaŋta ma. Ama mama ŋga kəməl məsəkəŋ mataŋ iyi ta fuk əŋ nəf ŋga. 52Yesu a kəgəl, burŋguzl ŋga a kənda a ma a ma. Mbiŋ a kəŋgəmaŋ əŋ Bizlaf abə əŋ hedi iyi fuk.
ទើបបានជ្រើសរើសហើយ៖
Luka 2: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
