Yahwana Təɗ
Təɗ
Labara Səntaŋ Lawayaŋ sə nfaɗ iyi wa seh, tə Yahwana pay səntaŋ. Mənaŋ wa, ŋgalaw tə əŋ wulək tə Yesu seh, mə ɗiyi par (fasuwal 18–19), i lim a ɗəməŋ seh, məsəkəŋ iyi kʉsit nawa mənaŋ tə əŋ Labara Səntaŋ Lawayaŋ dakayta iyi. Par par abə dakayta seh, mbiŋ taataɗ ŋga mə giz zlap mənaŋ tə a talaŋ ɓət wala, aka səku ɓət muwul tə Kanana (fasuwal 2:1-12) abə gbam talaŋ tə Yesu tə abə Nikwademus (fasuwal 3:1-21), tə abə wala lə samariya (fasuwal 4:1-12), tə abə hedi mahuluɓ iyi tə Baytijata (fasuwal 5:1-18), tə abə hedi mawuluf mar tə əŋ mbuwaha ŋga (fasuwal 9:1-41) mənaŋ sla ta. Abə ley sla abə Labara Səntaŋ lawayaŋ dakayta iyi seh, a kəməl məsəkəŋ iyi kʉsit nawa əŋ nja tə Yesu tə əŋ məŋhayak. Ama, a kəvəlaŋta səndawl mbeh səku, ndəra səndawl ta tə əŋ faŋw tata seh, ar kataf tə sərək sə lawlaw mavəl kəɗi Yesu.
Əŋ mar ta letir ŋga (fasuwal 1:1-18) mənaŋ dərif, Labara Səntaŋ Lawayaŋ a kəgiz Yesu mənaŋ zlap tə Bizlaf mə cukwaɗ səku, mə mbaɗ əŋ hedi, a ndaha ley nja abə hedi dəgənak iyi, mbə əŋ faŋw tata abə mədəŋcur, abə lay mawaɗ liŋ abə zlap məndiwiŋ.
Labara Səntaŋ Lawayaŋ fuk ta seh, a gula i wuɗak əŋ kəv səndawl səndawl bək kəɗi «hala» tə Yesu, mənaŋ zlap ta seh, hala tə məc ŋga, ar seh kaf ŋga əŋ səndawl (fasuwal 2:4–12:23).
– Məpər a hala tə Yesu (fasuwal 1:19–12:50): kəv titʉz ta seh, a kəgiz sedewe iyi ndagwa: Yahwana mə ɗal batem, gula ŋga Andəre, Filip, Natanayel i kəgiz, kwa viyey mənaŋ wulək ŋga, məsəkəŋ tata i mə lim əŋ Yesu mbə əŋ wucum tə hedi dəgənak. Abə dawaŋ ta, Labara Səntaŋ Lawayaŋ a kəgiz gbam talaŋ tə Yesu iyi abə kəzəɗ mə har hedi iyi, mbiŋ mə giz mənaŋ «məsəkəŋ mə giz iyi», a giz mənaŋ wa, səntaŋ seh, ar ley səŋ səntaŋ tə zlap. Yahwana a cukwaɗ kəv titʉz seh, kəɗi məsəkəŋ mbiŋ mə giz fuk abə kəɗi cukwaɗ tə zlap tə Yesu (fasuwal 12:37-50).
– Əŋ hala ta kəgwaraha za seh (fasuwal 13:1), Yesu a yakaŋta əŋ gula ŋga iyi zlap ŋga maɗ ma iyi, mənaŋ zlap ta seh, jaw ma ŋga tə kuw ma (fasuwal 13–16). Abə dawaŋ ta, əŋ ɗal mbuh, a kəsla wucum ley gbam talaŋ abə məc, ɓa, a vəlaŋta əŋ Baba ŋga hedi iyi mbiŋ mə nda i yakta tə abə dawaŋ ŋga iyi (fasuwal 17). Abə dawaŋ ta izey, abə ley giz məl ŋga, pek abə məc tə Yesu tə a mpay mazlaŋgal, abə dawaŋ ta, i lim talaŋ jiɓ ŋga məsəkəŋ a ɗəməŋ halla, Yahwana mbə əŋ lay səndawl tə ŋgalaw tə Labara Səntaŋ Lawayaŋ dakayta iyi (fasuwal 18–20). Waŋ tə Paska seh, mə ɗiyi kəɗi giz wucum tə Almasihu tə əŋ garaha ŋga tə əŋ hedi maməc iyi əŋ Mariyama tə Magdala, abə dawaŋ ta əŋ gula ŋga iyi, təday ta seh, əŋ Tawmas. Fasuwal 21 (gula iyi dʉsəlʉɗ, abə Piyer, i gbamaŋ talaŋ abə hedi mə garaha tə əŋ faŋw tə hedi maməc iyi a meɗek lakwat tə Tiberiyas) ar wawa məsəkəŋ mafəfəl abə dawaŋ tə cukwaɗ tə ɗerewel ta.
Cukwaɗ ta wa seh (fasuwal 20:30-31) a kəgiz mar tə Labara Səntaŋ Lawayaŋ: a kədeɓ hedi mə jenge letir ta ley səŋ əŋ Yesu seh, ar Almasihu Bizlaf mə zlap a vəl za wa, Mbu tə Bizlaf. Ar mənaŋ wa, a nda i lim mədəŋcur, mbiŋ seh, Yesu məndiwiŋ, maləɓaha tə Baba, ar mənaŋ mbiŋ mə zlap, mbiŋ abə talaŋ ŋga, «kataf, zlap məndiwiŋ liŋ mədəŋcur» (fasuwal 14:6).
ទើបបានជ្រើសរើសហើយ៖
Yahwana Təɗ: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល