Yahwana 20
20
Gula tə Yesu iyi i nda i gəraha talaŋ jiɓ tə Yesu
(Matta 28:1-10; Markus 16:1-8; Luka 24:1-12)
1Abə kafa vət tə luma gamtak, mar lay kədaŋgaha halla ndagwa, Mariyama lə Magdala a nda əŋ talaŋ jiɓ. A gər nje seh, nvəŋ bayta i mə pek talaŋ jiɓ tə abə mbiŋ sey, mə guduŋguli za. 2A hiy əŋ kelek Simaŋw Piyer abə gula par Yesu mə mbaza mbeh səku sey, a zlapaŋta, a zla: «I kəɓət wucum tə Bay Bayta cuza a jiɓ, nini kəsəŋ əŋ lay i mə ɗiyu səku.» 3Abə dawaŋ ta izey, Piyer a təɗaha abə gula par sey i nda əŋ talaŋ jiɓ. 4I hiy tata bək tata a lay ta, ama gula par ta, a hiy day Piyer, a gwar məpər əŋ talaŋ jiɓ. 5A reɓ ley wuzeɗ nje əŋ ɗəməŋ, a lim məsləga, i mə paɗ Yesu tə abə mbiŋ, mə ɗiyi abə bəra. Ama kətəɗ əŋ ɗəməŋ halla. 6Simaŋw Piyer, hedi mə ziberehew sey, mbiŋ bahayim a gwaraha, ɓa, a təɗ əŋ jiɓ. A lim məsləga i mə paɗaha Yesu tə abə mbiŋ mə ɗiyi abə bəra. 7Ɓa, a gər rukut i mə paɗaha talaŋ tə Yesu tə abə mbiŋ. Mbiŋ seh, kəjam abə məsləga dakayta iyi seh halla, ama mə peɗi, mə ɗiyi taataɗ ŋga a lay par. 8Abə dawaŋ ta izey, gula mə gwaraha məpər sey, mbiŋ bahayim a təɗ əŋ jiɓ ta. A gəru, a kuw ma. 9Ha əŋ hala ta mba, gula tə Yesu iyi i kəsəŋ ma mawuzlel tə əŋ Ɗerewel tə Bizlaf mə zlap tə a talaŋ Yesu, sey a garaha za əŋ faŋw tə hedi maməc iyi seh halla ndagwa#20:9 Jabura 16:10.. 10Ɓa, gula tə Yesu sə bək iyi sey, i ziŋ tata əŋ wuta.
Yesu a gizeŋ wucum əŋ Mariyama tə Magdala
(Matta 28:9-10; Markus 16:9-11)
11Əŋ hala ta mba, Mariyama mə geri a palah mbehmbeh abə talaŋ jiɓ, a kəhaŋ. Əŋ mbiŋ a kəhaŋ seh, a reɓ ley wuzeɗ nje əŋ talaŋ jiɓ. 12A lim mələɓ tə Bizlaf iyi bək abə rukut sə kweɗek iyi a wucum tata, i mə nji a lay i mə ɗiy wucum tə Yesu, ntaɗ kəɗi lay talaŋ tə Yesu, ntaɗ bahayim kəɗi lay tə ŋgas iyi. 13Mələɓ iyi ta i zlapaŋgu, i zla: «Wala, hwa haŋ seh mey?» A ziŋgeŋta zlap, a zla: «I kəɓət wucum tə Bay Bayta na cuza. Sa kəsəŋ əŋ lay i mə ɗiyu səku.» 14Əŋ mbiŋ mə zlap mənaŋ wa seh, a buw nje, a lim Yesu mə geri a namba, ama kəsəŋgu ar mbiŋ seh halla. 15Yesu a zlapaŋgu, a zla: «Wala, hwa haŋ seh mey? Hwa pələk seh viyey?» Mariyama a cek seh ar hedi mə jəɗ jerne, ɓa, a zlapaŋgu, a zla: «Bay na, əŋgah hwa mə ɓətu seh, gizeke a lay hwa mə ɗiyu, ɓa, sa nda i ɓətahaw.» 16Yesu a zlapaŋgu, a zla: «Mariyama!» Mariyama a buw nje kəɗi a mbiŋ, ɓa, a zlapaŋgu abə ma tə Ibraniŋki iyi, a zla: «Rabbuni!» Mənaŋ zlap ta seh: «Metir.» 17Yesu a zlapaŋgu, a zla: «Hwa mba i ges abə sa səku, məŋgəvday sa kətap kəɗi əŋ kelek Baba na halla ndagwa. Ama nda kəɗi əŋ kelek zliŋmana iyi, gizeŋta: “Sa kətap na kəɗi əŋ kelek Baba na, mbiŋ bahayim, ar Baba təheni, sa kətap kəɗi əŋ kelek Bizlaf na, mbiŋ bahayim, ar Bizlaf təheni.”» 18Mariyama tə Magdala a nda əŋ kelek gula tə Yesu iyi, ɓa, a gizeŋta ma ta, a zla: «Sa kəlim Bay Bayta za!» Ɓa, a mar ley gizeŋta məsəkəŋ Yesu mə zlapaŋgu iyi fuk.
Yesu a gizeŋta wucum əŋ gula ŋga iyi
(Matta 28:16-20; Markus 16:14-18; Luka 24:36-49)
19Abə məcukahw tə luma gamtak ta, gula tə Yesu iyi i mə kwesi a lay ta əŋ biŋ. I kəpek mebiŋ iyi cuza abə lekile, məŋgəvday i kələndəŋ a hedi səndawl tə Yahuda iyi. Yesu a ndaha, a gar əŋ faŋw tata, a zlapaŋta, a zla: «Zahay mə nja abə heni!» 20Abə dawaŋ tə mbiŋ mə zlap mənaŋ wa, a gizeŋta ndəra ŋga iyi abə bəra ŋga. Əŋ gula ŋga iyi i mə lim Bay Bayta seh, nəf tata kəgwaɗ za abə səsəm. 21Yesu a zlapaŋta baha, a zla: «Zahay mə nja abə heni! Mənaŋ Baba mə ləɓaka, sa bahayim sa kələɓaheni.» 22Abə dawaŋ tə zlap wa, a fiteŋta mimiɗ a tata, ɓa, a zlapaŋta, a zla: «Heni kuw Mimiɗ sə Kweɗek! 23Əŋ hedi iyi heni mə nda i yakaŋta hem tata iyi seh, Bizlaf a yakaŋta hem tata iyi za bahayim. Əŋ hedi iyi heni kəyakaŋta hem tata iyi halla bahayim, Bizlaf a yakaŋta hem tata iyi halla.»
Yesu a gizeŋ wucum əŋ Tawmas
24Əŋ Yesu mə ndaha əŋ kelek gula ŋga iyi seh, hedi ntaɗ əŋ faŋw tata, ar Tawmas, hedi, i mə ɗafaŋ ma «Musa», mbə abə tata halla. 25Gula dakayta iyi i zlapaŋgu, i zla: «Nini kəlim Bay Bayta za!» Ama Tawmas a ziŋgeŋta zlap, a zla: «Əŋgah sa kəgər lay tə paŋwti tə əŋ ndəra ŋga iyi halla, əŋgah sa kəndək mbu ndəra na əŋ lay tə paŋwti halla, əŋgah sa ndək ndəra na əŋ bəra ŋga halla seh, sa kənda i kuw ma ta halla.»
26Waŋ jamaakaɗ abə dawaŋ ta, gula iyi i mə kwesi a ge baha dap, Tawmas mbə abə tata. Mebiŋ iyi i mə peki abə lekile, Yesu a ndaha, a gar əŋ faŋw tata. A zlapaŋta, a zla: «Zahay mə nja abə heni!» 27Ɓa, a zlapaŋ əŋ Tawmas, a zla: «Ɗiy mbu ndəra təkwa a nawa, gər ndəra na iyi. Ɗefehe ndəra təkwa ta, ndəku əŋ bəra na. Hwa mba i yak ley kuw ma səku ba, mbaɗ əŋ hedi makuw ma!» 28Tawmas a ziŋgeŋ zlap, a zla: «Hwa seh, Bay Bayta na, Bizlaf na!» 29Yesu a zlapaŋgu, a zla: «Məŋgəvday hwa kəlimeke za wa seh, hwa kəkuw ma za izey vaw? Nja səntaŋ aka əŋ hedi iyi i kəlimeke halla, ama i kəkuw ma za!»
30Yesu kəɗal mazla iyi par za mbeh səku a ma tə gula ŋga iyi, i mə tak wuzlel əŋ ɗerewel wa. 31Ama ma mawuzlel tə əŋ ɗəməŋ seh, mə wuzleli amba heni kuw ma, Yesu seh, ar Almasihu, Mbu tə Bizlaf. Abə kuw ma ta seh, heni lim mədəŋcur za kəɗi a mbiŋ.
ទើបបានជ្រើសរើសហើយ៖
Yahwana 20: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
