Yahwana 19
19
1Abə dawaŋ ta izey, Pilatu a zlapaŋta əŋ sewje iyi ley məl Yesu, amba ley kəlapu abə laway. 2Sewje iyi i ja digeɗ, i ɗiyaŋgu a talaŋ mənaŋ lapam tə bay. Baha, I ndəkaŋ rukut sə pəreŋ tə bay iyi a wucum. 3I kərəɗaha əŋ kelek ŋga, i zlapaŋgu, i zla: «Mbele, bay tə Yahuda iyi!» Abə dawaŋ ta, i vəlaŋ maraw.
4Pilatu a təɗaha a palah baha, a zlapaŋta əŋ hedi səndawl tə Yahuda iyi, a zla: «Hi teh zləm lawlaw! Sa nda i deɓeheniza a palah, amba heni səŋ sa kəlim kwa zlap madawar ntaɗ ley pekʉ seh halla.» 5Ɓa, Yesu a təɗaha ŋga izey. Mbiŋ abə lapam tə digeɗ a talaŋ abə rukut sə pireŋ. Pilatu a zlapaŋta, a zla: «Ehe, hedi ta!» 6Ama əŋ hedi səndawl iyi tə a talaŋ hedi iyi i mə ɗal kukus əŋ Bizlaf abə hedi mə jəɗ biŋ tə Bizlaf iyi i limʉ seh, i ja varay abə fagay, i zla: «Daru a mpay mazlaŋgal! Daru a mpay mazlaŋgal!» Pilatu a zlapaŋta, a zla: «Heni ɓətu, heni abə talaŋ təheni, hi daru, məŋgəvday sa seh, sa kəlim kwa zlap madawar ntaɗ ley pekʉ seh halla.» 7Yahuda iyi i ziŋgeŋ zlap, i zla: «Nini abə ma majaw tini, mənaŋ ma majaw ta mə zlap seh, sey a məc məŋgəvday a kəɗiy talaŋ ŋga əŋ Mbu tə Bizlaf» 8Əŋ Pilatu mə zlim ma iyi ta wa seh, kələndəŋ mbeh səku baha. 9A ziŋ əŋ ge, a ɗəp Yesu, a zla: «Hwa ndaha seh a tikey?» Ama Yesu kwa kəziŋgeŋ zlap halla. 10Pilatu a zlapaŋgu izey, a zla: «Hwa ziŋgeke zlap səku vaw? Hwa kəsəŋ sa abə mazla ley yakah, abə ley zlap amba i darah a mpay mazlaŋgal səku vaw?» 11Yesu a ziŋgeŋ zlap, a zla: «Hwa abə mazla kwa kʉsit a talaŋ na seh halla, sey mazla Bizlaf mə vəlah. Məŋgəvday a ɗek, hedi mə bereke əŋ ndəra təkwa, kəɗal hem pay day a hwa.» 12Mar tə əŋ hala ta mba, Pilatu a kəpələk wereh ley yak Yesu. Ama Yahuda iyi i kəceh ley ja varay abə fagay, i zla: «Əŋgah hwa kəyakza za seh, hwa maday tə Bay səndawl tə a talaŋ bay iyi tə Rawma səku! Məŋgəvday kwa viyey mə ɗiy talaŋ ŋga əŋ bay seh, hedi ta mba, ar məsəgər tə Bay tə Rawma.» 13Əŋ Pilatu mə zlim ma iyi ta wa seh, ɓa, a təɗaha Yesu a palah, a nja a lay kə mbəzl ma, əŋ lay i mə ɗafaŋ ma «Lay macərəzl tə abə nvəŋ iyi» abə ma tə Ibraniŋki iyi seh, «Gabbata». 14Ar pis kə sla wucum tə gugway tə Paska, abə pis cakacak. Pilatu a zlapaŋta əŋ Yahuda iyi, a zla: «Ehe, bay təheni!» 15Ama i mar ley ja varay abə fagay, i zla: «Ju! Ju! Daru a mpay mazlaŋgal!» Pilatu a ɗəpta, a zla: «Sa dar bay təheni izey vaw?» Hedi səndawl iyi tə a talaŋ hedi iyi i mə ɗal kukus əŋ Bizlaf i ziŋgeŋ zlap, i zla: «Bay tini par seh halla, sey Bay səndawl tə a talaŋ bay iyi tə Rawma dap.» 16Mənaŋ mba izey, Pilatu a vəlaŋta Yesu amba ley daru a mpay mazlaŋgal.
Sewje iyi i dar Yesu a mpay mazlaŋgal
(Matta 27:32-44; Markus 15:21-32; Luka 23:26-43)
I ŋgaslaha Yesu izey. 17Yesu abə talaŋ ŋga a kəɓətaha mpay mazlaŋgal ŋga ley təɗaha əŋ berne ley nda kəɗi əŋ lay i mə ɗafaŋ ma: «Lay tə Kirŋgisl tə talaŋ», i mə ɗafaŋ ma abə ma tə Ibraniŋki iyi «Gwalgwata». 18A namba, sewje iyi i dar Yesu a mpay mazlaŋgal abə hedi məzəwindi iyi bək baha a kelek ŋga, ntaɗ kəɗi əŋ ndəra zəma, ntaɗ kəɗi əŋ ndəra gula, Yesu mbə əŋ dəməs. 19Pilatu a wuzlel a kwambum, a lawu a mpay mazlaŋgal. Ehe, mbiŋ mə wuzlel ta: «Yesu lə Nasaratu, bay tə Yahuda iyi.» 20Yahuda iyi mbeh səku i kəjeŋge ma mawuzlel ta za, məŋgəvday lay i mə dar Yesu a mpay mazlaŋgal wa seh, mbehmbeh abə berne. Ma mawuzlel ta, mə wuzleli abə ma tə Ibraniŋki iyi abə ma tə Rawma iyi liŋ abə ma tə lə Gərek iyi. 21Hedi səndawl iyi tə a talaŋ hedi mə ɗal kukus əŋ Bizlaf tə Yahuda iyi i zlapaŋ əŋ Pilatu, i zla: «Hwa mba i wuzlel “Bay tə Yahuda iyi” səku, ama wuzlel seh: “Hedi ta kəzlap za, a zla: sa seh, sa Bay tə Yahuda iyi.”» 22Pilatu a ziŋgeŋta zlap, a zla: «Sa mə wuzlel wa mə nja mənaŋ mba.»
23Əŋ sewje mə cukwaɗ ley law Yesu a mpay mazlaŋgal seh, i ɓət rukut ŋga iyi. I wuɗak rukut iyi ta par par nfaɗ kwa viyey a ɓət ntaɗ. I ɓət rukut ŋga səndawl bahayim. Ar rukut mə tak zəv, majaha mar tə wuzlaf ha teyek. 24Sewje iyi i zlap əŋ faŋw tata, i zla: «Nakwa iyi mba i ŋgwahak rukut ta səku. Ama nakwa iyi ɗal kurwu amba nakwa iyi gəru mə nda i ɓət rukut ta seh viyey?» Mənaŋ wa, ma mawuzlel tə əŋ Ɗerewel tə Bizlaf kəɗal za, mə zlap, a zla:
«I kəwuɗak rukut na iyi əŋ faŋw tata,
i kəɗal kurwu amba i may rukut na#19:24 Jabura 22:19..»
Ehe, mənaŋ wa sewje iyi ta i mə ɗal.
25Mbehmbeh abə mpay mazlaŋgal tə Yesu, mama ŋga, zliŋgeŋ tə mama tə Yesu hazləma hazləma, Mariyama wala tə Kəlawpas liŋ Mariyama tə Magdala, i mə geri a namba. 26Əŋ Yesu mə gər mama ŋga abə gula mbiŋ mə mbaza mbeh səku, mə geri a kelek ŋga seh, a zlapaŋ əŋ mama ŋga, a zla: «Mama, ehe, mbu təkwa.» 27Ɓa, a zlapaŋ əŋ gula ŋga sey, a zla: «Ehe, mama təkwa.» Mar tə a pis mba, gula sey a ɓət Mariyama mama tə Yesu əŋ ge ŋga.
Məc tə Yesu
(Matta 27:45-56; Markus 15:33-41; Luka 23:44-49)
28Abə dawaŋ tə wa, əŋ Yesu mə səŋ mənjawa, məsəkəŋ iyi fuk i kəɗal kwata seh, a zlap, a zla: «Yim a kəjaka#19:28 Jabura 69:22; Jabura 22:16..» A zlap mənaŋ wa seh, amba ma mawuzlel tə əŋ Ɗerewel tə Bizlaf mə ɗal. 29A namba ta, duguzl tə abə mavu sə kuyiŋ magwaɗ aka. Sewje iyi i jəraɓ məsəkəŋ mənaŋ sifaŋw əŋ mavu ta#19:29 Jabura 69:22; Markus 15:36; Matta 27:48., i ɗiyu a ma ndəra tə mpay isawp, i ɗefʉ əŋ ma tə Yesu. 30Əŋ Yesu mə təl mavu sə kuyiŋ ta seh, ɓa, a zlap, a zla: «Kəzəɗ na fuk cukwaɗ!» A jʉk talaŋ, ɓak, a məc ŋga.
Sewje a ɓuw bəra tə Yesu
31Ar əŋ pis kə sla wucum tə gugway tə Paska. Yahuda iyi i kəmba i yak wucum iyi a mpay mazlaŋgal əŋ pis kə yip səku. Məŋgəvday pis kə yip ta seh, ar pis səndawl səntaŋ. Hedi səndawl tə Yahuda iyi i ɗalaŋ mbuh əŋ Pilatu amba mə zlap ley ŋga ŋgas tə hedi madar iyi ta, baha amba i mə bəreŋgehe wucum iyi ta. 32Sewje iyi i ndaha, i ŋgaŋ ŋgas iyi tə hedi titʉz madar tə a mpay mazlaŋgal tə abə Yesu, ɓa, tə hedi məbək ta bahayim. 33Ama əŋ tata i mə gwaraha əŋ kelek Yesu seh, i limʉ kəməc cuza, mənaŋ wa, i kəlim ley ŋgaŋ ŋgas seh halla ba. 34Ama hedi ntaɗ əŋ faŋw tə sewje iyi, a ɓuwaŋ bəra abə cakar, mbehmbeh mba, məmbəz abə yim a təɗaha. 35Hedi mə lim məsəkəŋ iyi ta wa kəɗal sedewe ŋga za, sedewe ŋga ta seh məndiwiŋ. A kəsəŋ a kəzlap zlap məndiwiŋ, amba heni bahayim, heni gula i kuw ma. 36Məŋgəvday məsəkəŋ iyi ta wa fuk i kəɗal za, amba ley gwaɗ ma mawuzlel tə əŋ Ɗerewel tə Bizlaf mə zlap, a zla: «Kirŋgisl ŋga iyi kwa ntaɗ mə nda i ŋga seh halla.» 37Əŋ lay məzəwindi mə wuzleli baha, a zla: «I nda i gər hedi i mə ɓuwu əŋ bəra wa.»
I kah Yesu
(Matta 27:57-61; Markus 15:42-47; Luka 23:50-56)
38Abə dawaŋ tə wa, Yusufa, hedi tə əŋ Arimatiya, ar gula tə Yesu tə abə ɓah sey, məŋgəvday a kələndəŋ abə hedi səndawl tə Yahuda iyi. Abə dawaŋ tə məc tə Yesu, a ndaha ley ɗəp Pilatu mə yakaŋ kataf ley ɓətaha wucum tə Yesu. Pilatu a vəlaŋ kataf. Abə dawaŋ ta izey, Yusufa a gwaraha, a ɓət wucum tə Yesu. 39Nikwademus a ndaha bahayim. Ar mbiŋ hedi mə ndaha əŋ kelek Yesu tə abə njaɗu sey. A daha ɓurdi i mə ɗafaŋ ma «mir» majavaɗ tə abə «daheŋcek» a ɗal mbeh kwata kilew ndəra maakaɗ. 40Yusufa abə Nikwademus, i ɓətaha wucum tə Yesu. I paɗu abə məsləga, ɓa, i mbaɗaŋ ɓurdi a ɗek. Ar mənaŋ kukus tə Yahuda iyi ley kah məce tata iyi. 41A lay i mə dar Yesu a mpay mazlaŋgal, a namba jerne aka. Əŋ jerne ta talaŋ jiɓ mara aka, kwa i kəter ley pəs hedi a ɗəməŋ halla. 42Ar waŋ tə Yahuda iyi kə sla wucum tə pis kə yip, talaŋ jiɓ ta mbehmbeh. Məŋgəvday a ɗek, Yusufa abə Nikwademus i nda i kah wucum tə Yesu əŋ jiɓ ta.
ទើបបានជ្រើសរើសហើយ៖
Yahwana 19: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
