Yahwana 11
11
Lazarus, maday tə Yesu kəməc za
1Hedi mə dal aka, miya ŋga Lazarus. Mbə əŋ Baytaniya, wuta tə Mariyama abə zliŋgeŋ wala wala Marta#11:1 Markus 11:1; Luka 10:38-39.. 2Mariyama ta seh, ar wala mə mbaɗaŋ ɓurdi a ŋgas tə Bay Bayta, mə takwaɗaŋza tə abə bujuguɗ tə talaŋ ŋga iyi sey. Zliŋgeŋ, Lazarus, wucum a kədəmaŋgu#11:2 Yahwana 12:3.. 3Zliŋgeŋ wala wala iyi bək, i ləɓaha hedi əŋ kelek Yesu ley zlapaŋgu, i zla: «Bay Bayta, maday təkwa wucum a kədəmaŋgu.» 4Əŋ Yesu mə zlim ma ta seh, a zla: «Məc ta wa a kənda i jaza halla. Ama a ɗal amba a gizehe səndawl tə Bizlaf, amba Mbu tə Bizlaf a lim həmən.»
5Yesu a kəmba Marta abə zliŋgeŋ Mariyama liŋ Lazarus. 6Ama əŋ mbiŋ mə zlim Lazarus wucum a kədəmaŋgu seh, a nja waŋ bək baha əŋ lay mbiŋ mə njaha tə a namba ta. 7Ɓa, a zlapaŋta əŋ gula ŋga iyi, a zla: «Mazukwa i ziŋ əŋ hayak tə Yahudiya.» 8Gula ŋga iyi i ziŋgeŋ zlap, i zla: «Rabbi, əŋ waŋ iyi ta wa, hedi səndawl tə Yahuda iyi i kəpələk ley jah abə nvəŋ, ama hwa mba i ziŋ əŋ namba baha wa seh viŋgey?» 9Yesu a ziŋgeŋta zlap, a zla: «Əŋ vah ntaɗ seh, njamndi wam a meɗek bək səku vaw? Əŋgah hedi a kənda abə pis seh, micimbiɗim a tawza halla, məŋgəvday a kəlim lay mawaɗ tə məŋhayak wa. 10Ama əŋgah hedi a kənda abə njaɗu seh, micimbiɗim a tawza za, məŋgəvday lay mawaɗ əŋ mbiŋ seh halla.» 11Abə dawaŋ tə mbiŋ mə zlap ma iyi ta wa, a zlapaŋta baha, a zla: «Maday takwa Lazarus kəwaŋ cuza, ama sa nda za ley fəɗahaw.» 12Gula ŋga iyi i ziŋgeŋ zlap, i zla: «Bay Bayta, əŋgah a kəwaŋ seh, a fəɗahaha za.» 13Mənaŋ wa, Yesu a mba i zlap seh a talaŋ məc tə Lazarus, ama gula ŋga iyi i wulək seh a kəzlap a talaŋ waŋ məndiwiŋ. 14Abə dawaŋ ta izey, Yesu a gizeŋta ma ta lawlaw, a zla: «Lazarus kəməc cuza. 15Ama sa səsəm wa məŋgəvday heni, baha, məŋgəvday məsəkəŋ ta mə ɗal wa, sa mbə a lay ta mba halla, mənaŋ wa seh, heni kəkuw ma na za. Mənjawa, mazukwa za əŋ kelek ŋga.» 16Tawmas, hedi i mə ɗafaŋ ma «Musa», a zlapaŋta əŋ gula dakayta iyi, a zla: «Mazukwa za əŋ namba bahayim, ley məcaha abə metir takwa!»
Yesu seh, ar hedi mə vəl mədəŋcur
17Əŋ Yesu mə gwar əŋ Baytaniya, a zlim i kəpəs Lazarus cuza əŋ jiɓ, kəɗal waŋ nfaɗ cuza. 18Baytaniya seh, mbehmbeh abə Urusalima, a ɗal mbeh kwata kilewmetir maakaɗ. 19Yahuda iyi mbeh səku i kəndaha za əŋ kelek Marta abə Mariyama ley dakaŋta nəf a məc tə zliŋgeŋ tata.
20Əŋ Marta mə zlim Yesu a kəndaha seh, ɓa, a nda i gbamaŋ talaŋ. Ama Mariyama seh, mə nji a ge. 21Marta a zlapaŋ əŋ Yesu, a zla: «Bay Bayta, əŋgah hwa mbə a nawa seh, zliŋmana a kənda i məc halla. 22Ama sa səŋ seh kwa mənjawa baha, məsəkəŋ hwa mə nda i ɗəp tə ndəra Bizlaf fuk, a vəlah za.» 23Yesu a ziŋgeŋ zlap, a zla: «Zliŋgeh a garaha za əŋ faŋw tə hedi maməc iyi.» 24Marta a ziŋgeŋ zlap, a zla: «Ayaw, sa kəsəŋ a garaha za əŋ garaha tə hedi maməc iyi i mə nda i garaha əŋ faŋw tə hedi maməc iyi əŋ pis tə məŋhayak mə nda i cukwaɗ.»
25Yesu a ziŋgeŋ zlap, a zla: «Sa seh, sa hedi mə garaha hedi maməc iyi əŋ faŋw tə hedi maməc iyi, sa mə vəlaŋta mədəŋcur. Hedi mə kuw ma na seh, a lim mədəŋcur za, kwa əŋgah kəməc za. 26Kwa hedi tə abə nje iyi, mə kəkuw ma na iyi i məc halla səlak. Hwa kəkuw ma ta za vaw?» 27Marta a ziŋgeŋ zlap, a zla: «Ayaw, Bay Bayta, sa kəkuw ma ta za, hwa seh, hwa Almasihu, Mbu tə Bizlaf, hedi mə nda i ndaha əŋ məŋhayak.»
Garaha tə Lazarus əŋ faŋw tə hedi maməc iyi
28Abə dawaŋ tə zlap iyi wa, Marta a nda i ɗafaŋ ma əŋ zliŋgeŋ Mariyama, ɓa, a zlapaŋgu abə ɓah, a zla: «Metir mbə a nawa, a kəɗəpah.» 29Əŋ Mariyama mə zlim ma ta wa seh, a gar mbehmbeh mba, a nda əŋ kelek Yesu. 30Yesu kətəɗ əŋ wuta halla ndagwa, ama mbə a lay Marta mə gbamaŋ talaŋ sey. 31Yahuda manja tə abə Mariyama tə biŋ iyi ley dakaŋ nəf sey, i limʉ a gar ŋga viyu, a təɗaha ŋga, i ziberʉ. I wulək seh a nda əŋ talaŋ jiɓ ley haŋgaha a namba. 32Mariyama a gwar əŋ lay Yesu tə a namba. Əŋ Mariyama mə limʉ seh, a ndəv əŋ gədaŋ ŋgas ŋga iyi, a zlapaŋgu, a zla: «Bay Bayta, əŋgah hwa mbə a nawa seh, zliŋmana a kənda i məc halla.» 33Əŋ Yesu mə gər Mariyama abə Yahuda iyi i mə ndaha tə abə mbiŋ bahayim i kəhaŋ seh, kəkuɗfaraŋ nəf za, kəwuzlaɗaŋ talaŋ za. 34A ɗəpta, a zla: «Heni pəsahaw seh, a tikey?» I ziŋgeŋ zlap, i zla: «Bay Bayta, ndaha, nda i gəru.» 35Ɓa, Yesu a haŋ. 36Yahuda iyi i zlap izey, i zla: «Hi gəru, a kəmbaza mbeh səku!» 37Ama hedi dakayta iyi tə əŋ faŋw tata, i kəzlap, i zla: «Mbiŋ mə rəzaŋ nje tə hedi wuluf, a gula i tak məc tə Lazarus wa səku bahayim vaw?»
38Abə dawaŋ ta izey, nəf tə Yesu a kuɗfaraŋgu baha mbeh səku, a nda əŋ talaŋ jiɓ. Ar gədaŋ mbudum, meɗek ta mə peki abə beler bayta. 39Yesu a zlapaŋta, a zla: «Hi guduŋgul beler wa za.» Marta, zliŋgeŋ tə hedi maməc ta, a ziŋgeŋ zlap, a zla: «Bay Bayta, a nda i njif madawar, məŋgəvday kəɗal waŋ nfaɗ mbə a nawa a jiɓ.» 40Yesu a ziŋgeŋ zlap, a zla: «Sa kəzlapah halla vaw? Əŋgah hwa kəkuwaka ma za seh, hwa gər səndawl tə Bizlaf za.» 41I guduŋgul beler sey. Abə dawaŋ ta izey, Yesu a kaf nje əŋ wuzlaf, ɓa, a zlap, a zla: «Waa Baba na, sa kəɗalah sʉse məŋgəvday hwa kəteheke zləm za. 42Sa seh, sa kəsəŋ hwa kəteheke zləm kwa a pipi a pipi, ama sa zlap mənaŋ wa seh, məŋgəvday hedi makwas magar tə a kelek na iyi, amba i mə kuw hwa seh, hwa mə ləɓaka.» 43Abə dawaŋ tə zlap iyi wa seh, ɓa, a ja varay abə fagay, a zla: «Lazarus, təɗaha təkwa za a namba!» 44Hedi maməc sey a təɗaha, ndəra abə ŋgas ŋga iyi i mə peɗi abə məsləga, nje ŋga mə sʉrʉti abə rukut. Yesu a zlapaŋta əŋ hedi tə a namba iyi, a zla: «Hi pəlu, hi yaku mə nda ŋga.»
Hedi səndawl tə kukus iyi i jaw ma a talaŋ Yesu
(Matta 26:1-5; Markus 14:1-2; Luka 22:1-2)
45Yahuda iyi mbeh səku tə əŋ faŋw tə hedi mə ndaha əŋ kelek Mariyama iyi, i gər məsəkəŋ Yesu mə ɗal ta, i kuwaŋ ma. 46Ama hedi dakayta iyi tə əŋ faŋw tata, i nda əŋ kelek Farisa iyi, i gizeŋta məsəkəŋ Yesu mə ɗal. 47Abə dawaŋ ta izey, hedi səndawl iyi tə a talaŋ hedi iyi i mə ɗal kukus əŋ Bizlaf abə Farisa iyi i ɗafaŋta ma əŋ hedi səndawl mə ɗal yawa kə mbəzl ma iyi, i zla: «Nakwa iyi nda i ɗal seh viŋgey? Məŋgəvday hedi ta a kəɗal mazla iyi mbeh səku. 48Əŋgah nakwa iyi yaku a kəɗal mənaŋ wa dap seh, hedi iyi fuk i nda i kuwaŋ ma. Abə dawaŋ ta, hedi tə Rawma iyi i nda i təɗ əŋ ma ta, i nda i gayanakwa biŋ tə Bizlaf abə hedi takwa iyi.» 49Hedi ntaɗ tə əŋ faŋw tə Yahuda iyi, miya ŋga Kayafas, mbiŋ hedi səndawl tə a talaŋ hedi iyi i mə ɗal kukus əŋ Bizlaf a va ta mba, a zlapaŋta, a zla: «Heni kəsəŋ kwa mey səku. 50Hi wulək lawlaw, gelɓe hedi ntaɗ mə məc a lay tə hedi makwas iyi fuk, i mə nda i məc səku vaw? Mənaŋ wa seh, hedi tə əŋ hayak takwa iyi fuk i kənda i kuɗəp halla.» 51Ma Kayafas mə zlap wa seh, ar wulək ŋga səku. Ama a giz ma mənaŋ hedi mə giz ma abə miya tə Bizlaf, a zla: sey Yesu a məc məŋgəvday hedi iyi fuk. A zlap mənaŋ wa seh məŋgəvday mbiŋ, ar hedi səndawl tə a talaŋ hedi iyi i mə ɗal kukus əŋ Bizlaf a va ta mba. 52Yesu a məc seh, məŋgəvday Yahuda iyi taataɗ səku, ama ley jamaŋta talaŋ əŋ wuziyi tə Bizlaf iyi mawʉweɗ tə əŋ məŋhayak fuk bahayim.
53Mar tə pis mba, hedi səndawl tə Yahuda iyi i jaw ma ley ja Yesu. 54Məŋgəvday a ɗek, Yesu a yak ley pik ma nje hedi iyi əŋ faŋw tə hedi səndawl tə Yahuda iyi. A nda ŋga əŋ wuta sə mbehmbeh tə abə təp damu, əŋ berne, i mə ɗafaŋ ma Efrayim, a nja a namba abə gula ŋga iyi.
55Mbeh kwata gugway tə Yahuda iyi, i mə ɗafaŋ ma «Paska». Hedi iyi mbeh səku tə wuta iyi par par i yak wuta tata i nda əŋ Urusalima mar gugway a wuliŋ ndagwa, amba ley mbaɗ kweɗkweɗ. 56I mbə əŋ biŋ tə Bizlaf, i kəpələk Yesu. I kəɗəp wucum əŋ faŋw tata, i zla: «Hi wulək seh viŋgey? Yesu a ndaha əŋ gugway ta wa halla məndiwiŋ vaw?» 57Hedi səndawl iyi tə a talaŋ hedi iyi i mə ɗal kukus əŋ Bizlaf abə Farisa iyi i kəzlapaŋta za əŋ hedi iyi, i zla: «Əŋgah hedi a kəsəŋ əŋ lay Yesu mbə ɗəməŋ seh, sey mə ndaha ley gizʉ, amba nakwa iyi məlaha Yesu ta.»
ទើបបានជ្រើសរើសហើយ៖
Yahwana 11: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
