Yahwana 10
10
Sərək tə Yesu a talaŋ njʉwiŋ səntaŋ
1Yesu a zlap, a zla: «Ayaw, sa kəzlapaheni məndiwiŋ, hedi mə təɗ əŋ bəzliɗ tə əŋ ntek iyi kwa kətaŋ kəɗi medigiɗ halla, ama a tap kəɗi kəv par seh, hedi ta mba, ar məhil, hedi mə la məsəkəŋ tə hedi iyi. 2Ama hedi mə təɗ kəɗi əŋ medigiɗ seh, ar njʉwiŋ tə ntek iyi. 3Hedi mə jəɗ medigiɗ a rəzaŋ lay, ntek iyi bahayim i kəzlim wula tə njʉwiŋ ta. A ɗafaŋta ma əŋ ntek ŋga iyi ntaɗ ntaɗ abə miya tata, ɓa, a təɗahata a palah. 4Əŋgah kətəɗahata za fuk a palah seh, a nda a ma tata, ntek iyi i ziberʉ, məŋgəvday i kəsəŋ wula ŋga. 5Ama i ziber hedi par tata i mə səŋ səku seh halla səlak. I nda i hiy tata guduk abə mbiŋ, məŋgəvday i kəsəŋ wula tə hedi madaway iyi səku.» 6Yesu a zlapaŋta abə ma marərək wa, ama hedi ŋga mə teh zləm iyi ta seh i kəsəŋ ma mbiŋ mə zlapaŋta seh halla.
7Yesu a zlap baha, a zla: «Ayaw, sa kəzlapaheni məndiwiŋ, sa seh, sa medigiɗ tə bəzliɗ tə ntek iyi. 8Hedi iyi i mə ndaha məpər tə a sa fuk, ar məhil iyi, hedi mə la məsəkəŋ tə hedi iyi. Ama ntek iyi i kəzlimeŋta zləm halla. 9Sa seh, sa medigiɗ. Hedi a təɗaha kəɗi a sa seh, a reh za. Hedi ta a gula za ley təɗ, a gula i təɗaha ŋga za, a lim məsəkəŋ kə zəm za. 10Hedi məhil seh, a ndaha seh ley hil dap, ley ja hedi, aka səku ley gay məsəkəŋ. Sa seh, sa kəndaha za amba hedi iyi i mə lim mədəŋcur, i mə limʉ mbeh səku, mbeh səku.»
11«Sa seh, sa njʉwiŋ səntaŋ#10:11 Jabura 23:1; Esaya 40:11; Ezekiyel 34:15; 37:24.. Njʉwiŋ səntaŋ a kəvəl mədəŋcur ŋga məŋgəvday ntek ŋga iyi. 12Hedi mə jaŋ məŋgəvday dala dap seh, ar njʉwiŋ məndiwiŋ səku. Ntek iyi mba, ar tə təŋga iyi səku. Əŋgah a lim haza damu a kəndaha seh, a hiy ŋga za, a yak ntek iyi. Mənaŋ wa, haza damu a məl ntek iyi ta, dakayta iyi i wʉweɗ tata. 13Hedi ta a ɗal mənaŋ wa seh, məŋgəvday a jaŋ tə dala dap, a kəwulək a ntek iyi səku. 14Sa seh, sa njʉwiŋ səntaŋ. Sa kəsəŋ ntek na iyi, ntek na iyi bahayim i kəsəŋgaka, 15mənaŋ mba bahayim, Baba a kəsəŋgaka, sa kəsəŋ Baba bahayim#10:15 Matta 11:27; Luka 10:22.. Sa kəvəl mədəŋcur na məŋgəvday ntek na iyi. 16Sa abə ntek par iyi baha, i mbə əŋ bəzliɗ wa halla. Sey sa dahata bahayim, i zlim wula na za, i mbaɗ za əŋ ntek iyi tə əŋ ŋgaɓa ntaɗ abə njʉwiŋ ntaɗ. 17Məŋgəvday a ɗek, Baba kəmbalaka, məŋgəvday sa kəvəl mədəŋcur na, abə dawaŋ ta, sa kuwahaza za baha. 18Hedi mə gula i ɓətaka mədəŋcur na ta seh halla, ama sa abə talaŋ na sa mə vəlu. Sa abə fagay ley vəlu, sa abə fagay ley kuwahaw baha. Ar mənaŋ ma matak Baba na mə vəlaku.»
19Məŋgəvday ma iyi ta wa, Yahuda iyi i kəwuɗak tata za əŋ faŋw tata baha. 20Hedi iyi mbeh səku əŋ faŋw tata, i kəzlap, i zla: «Hedi wa, abə mulula əŋ talaŋ, mbiŋ mulula, hi teheŋ zləm seh, məŋgəvday a mey?» 21Hedi dakayta iyi, i zla: «Hedi tə abə mulula tə əŋ talaŋ seh a zlap mənaŋ wa seh halla. Hedi tə abə mulula tə əŋ talaŋ seh, a gula i rəzaŋta nje tə hedi wuluf iyi za vaw?»
Yesu mbə əŋ gugway kə rəz biŋ tə Bizlaf
22I kəɗal gugway kə rəz biŋ tə Bizlaf əŋ Urusalima. Ar tiɗe əŋ ntəra tə mimiɗ. 23Yesu a kəpik a gədaŋ gəlaɓ, i mə ɗafaŋ ma gəlaɓ tə Sulaymanu əŋ biŋ tə Bizlaf. 24Yahuda iyi i kətuləkza kwata, i zlapaŋgu, i zla: «Wuzlaɗ talaŋ tini ta seh, a nda i cukwaɗ seh ha a pipey? Əŋgah hwa Almasihu məndiwiŋ seh, gizenini lawlaw!» 25Yesu a ziŋgeŋta zlap, a zla: «Sa kəgizeheniza za zlezle, ama heni kəkuw ma ta halla. Kəzəɗ iyi sa mə ɗalta abə fagay tə Baba na wa seh, i kəɗal sedewe a talaŋ na. 26Ama heni kəkuw ma ta səku, məŋgəvday heni mbə əŋ faŋw tə ntek na iyi seh halla. 27Ntek na iyi i kəzlim wula na. Sa kəsəŋta, i kəziberekʉ. 28Sa kəvəlaŋta mədəŋcur mə cukwaɗ səku, i kənda i kuɗəp halla səlak. Kwa hedi mə nda i lata a ndəra na seh halla. 29Məsəkəŋ Baba na mə vəlakta seh, pay səndawl a məsəkəŋ iyi fuk, kwa hedi mə gula i lata a ndəra Baba na seh halla. 30Sa abə Baba na, nini ntaɗ.»
31Yahuda iyi i ɓətaha nvəŋ baha, amba ley kapu. 32Ama Yesu a ziŋgeŋta zlap, a zla: «Sa kəɗal kəzəɗ səntaŋ iyi mbeh səku za a ma təheni abə fagay tə Baba na. A talaŋ məsəkəŋ sa mə ɗal iyi fuk wa seh, hi mba i jaka abə nvəŋ wa seh, məŋgəvday məsəkəŋ iyi vitikey?» 33Yahuda iyi ta i ziŋgeŋ zlap, i zla: «Nini mba i jah abə nvəŋ wa seh, ar məŋgəvday hwa mə ɗal kəzəɗ səntaŋ iyi wa səku, ama, ar məŋgəvday hwa mə ra Bizlaf wa. Hwa seh, hwa hedi dəgənak dap, ama hwa kəɗiy talaŋ təkwa əŋ Bizlaf.» 34Yesu a ziŋgeŋta zlap, a zla: «Mə wuzleli əŋ Ɗerewel tə ma majaw təheni, Bizlaf, a zla: “Sa seh, sa kəzlapaheni za, heni seh, bizlaf iyi#10:34 Jabura 82:6.”? 35Nakwa iyi kəsəŋ nakwa gula i vəvay ma mawuzlel tə əŋ Ɗerewel tə Bizlaf səku. Əŋ Ɗerewel tə ma majaw, hedi mə kuw ma tə Bizlaf iyi wa, ma majaw a ɗafaŋta ma bizlaf iyi. 36Sa seh, Baba kəmayaka za, kələɓaka za əŋ məŋhayak. Hi zla: “Hwa kəra Bizlaf za”, məŋgəvday sa mə zlap: “Sa seh, sa Mbu tə Bizlaf” wa seh viŋgey? 37Əŋgah sa ɗal wa kəzəɗ tə Baba na iyi səku seh, hi mba i kuwaka ma səku. 38Ama əŋgah sa kəɗal kəzəɗ iyi ta, kwa heni kəkuwaka ma səku seh, heni kuw kəzəɗ iyi ta amba heni səŋgu, heni zlimʉ lawlaw Baba mbə əŋ sa, sa bahayim sa mbə əŋ Baba.»
39I pələk ley məlu baha, ama kərehe za a ndəra tata.
40Yesu a taŋ kəɗi əŋ kəv məzəwindi tə lakwat Urdun, əŋ lay Yahwana mə mar ley ɗalaŋta batem əŋ hedi iyi, a nja a namba. 41Hedi iyi mbeh səku i ndaha əŋ kelek ŋga, i kəzlap, i zla: «Yahwana seh, kəɗal mazla kwa ntaɗ halla, ama ma mbiŋ mə zlap tə a talaŋ hedi ta wa fuk seh, məndiwiŋ.» 42A namba, hedi iyi mbeh səku i kəkuw ma tə Yesu za.
ទើបបានជ្រើសរើសហើយ៖
Yahwana 10: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
