Kəzəɗ tə Mələɓ iyi 3
3
Piyer a mbəl hedi ŋgas sə gəlvaɗah
1Əŋ pis məzəwindi aka, Piyer abə Yahwana i tap əŋ biŋ tə Bizlaf ley ɗalaha mbuh abə məcukahw njamndi maakaɗ. 2Mbehmbeh abə mebiŋ tə biŋ tə Bizlaf, i mə ɗafaŋ ma mebiŋ səntaŋ, hedi sə gəlvaɗah aka, mar tə əŋ mbuwaha ŋga. A pis ta, a pis ta hedi iyi i kədahaw, i ɗiyu a namba ley rək məsəkəŋ a ndəra hedi mə təɗ əŋ biŋ tə Bizlaf iyi. 3Əŋ mbiŋ mə lim Piyer abə Yahwana i kətəɗ əŋ biŋ tə Bizlaf ta seh, ɓa, a rək dala a ndəra tata. 4Piyer abə Yahwana i kəgəru, ɓa, Piyer a zlapaŋgu, a zla: «Gəranini!» 5Ɓa, hedi ta a gərta lawlaw, a wulək seh a lim məsəkəŋ za a ndəra tata. 6Ama Piyer a zlapaŋgu, a zla: «Dala, aka səku malaway mawaɗ, a ndəra na halla, ama sa vəlah məsəkəŋ tə ndəra na za: Abə miya tə Yesu Almasihu lə Nasaratu, gar, nda!» 7Ɓa, Piyer a məlaŋ ndəra ŋga tə zəma, a garu. Mbehmbeh mba, ŋgas ŋga iyi abə cehesl tə ŋgas ŋga iyi i kəlim fagay za. 8A nəp abə fagay, a gar, a mar ley nda. A təɗ abə tata əŋ biŋ tə Bizlaf, a kənda, a kəmbir abə səsəm, a kəhəmən Bizlaf. 9Hedi iyi fuk, i limʉ a kənda, a kəhəmən Bizlaf. 10Əŋ tata i mə səŋgu ar mbiŋ hedi manja tə a mebiŋ səntaŋ tə biŋ tə Bizlaf ley rək seh, i kəhar za, i kələndəŋ za mbeh səku a talaŋ məsəkəŋ mə taŋ tə abə mbiŋ ta.
Piyer a kəgiz ma tə Bizlaf əŋ biŋ tə Bizlaf
11Əŋ hedi ta kəyak Piyer abə Yahwana halla seh, i wulehe a gədaŋ gəlaɓ i mə ɗafaŋ ma gəlaɓ tə Sulaymanu seh, hedi iyi fuk i hiyaha əŋ kelek tata, məŋgəvday i kəhar za, i kələndəŋ za mbeh səku#3:11 Yahwana 10:23.. 12Əŋ Piyer mə gər məsəkəŋ ta seh, a zlapaŋta əŋ hedi makwas iyi, a zla: «Heni, Israyila iyi, heni har a mbəl tə hedi wa seh, məŋgəvday a mey? Hi wulək seh hedi wa, a mar ley nda seh, məŋgəvday mazla tini, aka səku məŋgəvday nja tini lawlaw abə Bizlaf wa vaw? 13Bizlaf tə Ibrahima, Bizlaf tə Isiyaku liŋ Bizlaf tə Yakubu, Bizlaf tə dide tə dide takwa iyi, kəgizehe səndawl tə hedi mə ɗal kəzəɗ ŋga Yesu za. Heni abə talaŋ təheni, heni kəberza za əŋ ndəra hedi səndawl iyi, heni kəvəlza za əŋ Pilatu. Ama Pilatu, mbiŋ seh, a mba i yaku. 14Heni kəkap hedi mə tak hem za, hedi mə ɗal məsəkəŋ tə abə kataf ta, heni kəɗəp za a ndəra Pilatu amba mə yakaheni hedi mə ja hedi iyi#3:14 Matta 27:15-23; Markus 15:6-14; Luka 23:13-23; Yahwana 18:38-40; 19:12-15.. 15Mənaŋ wa, heni kəja hedi mə vəl mədəŋcur za. Ama Bizlaf kəgarahaza za əŋ faŋw tə hedi maməc iyi, nini bahayim, nini kəɗal sedewe a talaŋ ma ta. 16Hedi, heni mə gər wa, heni mə səŋgu wa, ar abə mazla tə miya tə Yesu a lim mbəl, məŋgəvday kuw ma ŋga. Ar kuw ma wa, mə vəlaŋ zʉzʉy tə wucum a ma təheni fuk.»
17«Ama mənjawa, zliŋmana iyi, sa kəsəŋ lawlaw, heni abə talaŋ habay təheni iyi, heni kəɗal za mənaŋ wa, məŋgəvday heni kəsəŋ səku. 18Ama mar zlezle Bizlaf kəɗal məsəkəŋ hedi mə giz ma abə miya tə Bizlaf iyi fuk i mə giz za, kəzlap za, a zla: Almasihu ŋga a zləŋ takwaŋ za#3:18 Luka 24:26-27.. 19Hi buw nja, hi ziŋgehe əŋ kelek Bizlaf, amba ley baŋgaheni hem təheni iyi. 20Abə dawaŋ ta izey, Bay Bayta Bizlaf a yipaheni za, a ləɓaheni Yesu Almasihu za, kəmayza za məpər əŋ heni. 21Mənjawa, sey Yesu a nda i njaha a wuzlaf ha əŋ hala məsəkəŋ iyi ta i mə nda i mbaɗ əŋ lawayaŋ, mar zlezle mənaŋ Bizlaf mə zlap kəɗi ma tə hedi mə giz ma abə miya tə Bizlaf iyi. 22Musa kəzlap za, a zla: “Bay Bayta təheni Bizlaf a ləɓaheni hedi mə giz ma abə miya ŋga za mənaŋ sa, ar hedi ntaɗ tə əŋ faŋw təheni. Sey hi zlimeŋ ma mbiŋ mə nda i zlapaheni fuk. 23Hedi mə zlimeŋ ma tə hedi mə giz ma abə miya tə Bizlaf səku, Bizlaf a təɗahaza za əŋ faŋw tə hedi ŋga iyi, ley kuɗəp.” 24Hedi mə giz ma abə miya tə Bizlaf iyi fuk, i kəzlap za, mar a Samʉyila abə hedi mə nda i ndaha tə abə dawaŋ ŋga iyi fuk, i kəgiz məsəkəŋ mə ɗal mənjawa iyi wa za. 25I zlap seh əŋ heni bahayim, Bizlaf kəjaw ma za abə dide tə dide təheni iyi, əŋ mbiŋ mə zlapaŋ əŋ Ibrahima, a zla: “Sa pireŋ ma za əŋ hedi tə əŋ hayak iyi fuk kəɗi ntaŋw təkwa iyi.” 26Ar məŋgəvday heni, titʉz ta, Bizlaf kəgaraha hedi ŋga mə ɗal kəzəɗ za, kələɓahaza za məŋgəvday heni amba ley pireheni ma, a buwaheni nəf təheni za əŋ kəzəɗ təheni madawar iyi wa.»
ទើបបានជ្រើសរើសហើយ៖
Kəzəɗ tə Mələɓ iyi 3: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
