Kəzəɗ tə Mələɓ iyi 28

28
Pawl mbə əŋ hayak tə əŋ dəməs tə yim tə Malta
1Əŋ nini mə rehehe seh, nini zlim hayak tə əŋ dəməs tə yim ta seh miya ŋga Malta. 2Hedi manja tə a namba iyi i kəkuwanini za lawlaw. Əŋ vaŋ a kəzah, mimiɗ a kəɗal seh, i bas kahaw bayta a namba, i kuwanini fuk a meɗek kahaw ta. 3Pawl a kəcaha celem ley kʉy əŋ kahaw seh, ama hursla a təɗaha əŋ celem ta, məŋgəvday var tə kahaw, a law a ndəra ŋga. 4Əŋ hedi manja tə əŋ hayak tə əŋ dəməs tə yim iyi i mə lim zʉzʉk ta mə lewi a ndəra tə Pawl seh, i zlap əŋ faŋw tata, i zla: «Hedi wa, məndiwiŋ ar hedi mə ja hedi iyi, kwa kəreheh za əŋ talafay wa seh, mbəzl ma tə Bizlaf a yakza ley nja abə nje seh halla.» 5Ama Pawl a kwetek zʉzʉk sey əŋ kahaw. Ama kwa məsəkəŋ mə ɗalaŋ halla. 6Hedi dakayta iyi i kəgəbar seh wucum ŋga a havaha za, aka səku a məc ŋga za mbehmbeh mba. Ama, abə dawaŋ ta, i kəgəbar ha nja mbeh səku, i kəlim kwa məsəkəŋ mə ɗalaŋ halla, i buw wulək, i zla: «Mbiŋ seh, ar kuli mə mbaɗ əŋ hedi.» 7Mbehmbeh abə lay ta, lay tə bay tə hayak tə əŋ dəməs tə yim ta aka. Hedi ta miya ŋga Pʉbiliyus. Hedi ta kəkuwanini za əŋ ge ŋga abə səsəm, kəɗiyanini za a ge ŋga ha waŋ maakaɗ. 8Baba tə Pʉbiliyus mə weŋgi a kwambum ŋga, wucum ŋga kahaw kulat, a kəla nva. Pawl a nda əŋ kelek ley gərahaw, a ɗal mbuh, a ɗiyaŋ ndəra a mbiŋ, ɓa, a mbəlu. 9Abə dawaŋ tə wa, hedi dakayta iyi tə əŋ hayak tə əŋ dəməs tə yim mə dal iyi i ndaha əŋ kelek Pawl bahayim, i kəmbəl za. 10I kəhəmənanini za abə məsəkəŋ iyi mbeh səku, əŋ nini kəgar tini seh, i vəlanini məsəkəŋ nini mə mba tə əŋ pik tini iyi.
Pawl a gwar əŋ Rawma
11Ntəra maakaɗ abə dawaŋ ta, nini nda tini baha abə kambuwal mandaha tə əŋ Alekzandəriya, i mə ɗafaŋ ma kuli tə Musa iyi. Kambuwal ta seh, kətaŋ misfiɗ za əŋ lay kə gar kambuwal iyi tə əŋ hayak tə əŋ dəməs tə yim. 12Nini gwar əŋ Sirakʉs, nini kənja a namba waŋ maakaɗ. 13A namba ta, nini ziber kəɗi əŋ bəra zəzay ha nini gwar əŋ Regiyaŋw. Garaha kafa ta, mimiɗ kəɗi əŋ kəv tə teyek a mar ley ɗal. Əŋ waŋ bək nini gwar əŋ Pawtiyawli. 14Əŋ berne ta seh, nini kəlim zliŋge tə əŋ kuw ma iyi za a namba, i kərəkanini za ley nja abə tata tə waŋ dʉsəlʉɗ. Ar mənaŋ wa, nini gwar əŋ Rawma. 15Əŋ zliŋge tə Rawma iyi i mə zlim labara ta seh, i ndaha ley gbam talaŋ abə nini ha əŋ Luma tə əŋ Appiyus abə əŋ Biŋ iyi Maakaɗ kə kuw muluk iyi. Əŋ Pawl mə limta seh, a ɗalaŋ sʉse əŋ Bizlaf, kəməl nəf za. 16Abə dawaŋ tə gwaraha tini əŋ Rawma seh, i vəlaŋ kataf əŋ Pawl ley nja əŋ biŋ par aka taataɗ ŋga, abə sewje ntaɗ a kəjəɗu.
Pawl a giz Labara Səntaŋ Lawayaŋ əŋ Rawma
17Waŋ maakaɗ abə dawaŋ ta, Pawl a ɗafaŋ ma əŋ hedi səndawl tə Yahuda iyi tə əŋ Rawma ley gbam talaŋ abə tata. Əŋ tata i kəkwasaha kwata seh, a zlapaŋta, a zla: «Zliŋmana iyi, sa kəɗal kwa mey əŋ hedi takwa iyi seh halla, kwa a talaŋ kukus tə dide tə dide takwa iyi seh halla, ama i kəməlaka za əŋ Urusalima, i kəvəlaka za əŋ ndəra hedi tə Rawma iyi. 18Abə dawaŋ ta, i kəɗəpaka kwata a talaŋ məsəkəŋ sa mə ɗal seh, i mba i yakaka, məŋgəvday i kəlim məsəkəŋ sa mə ɗal madawar tiɗe amba i jaka məce seh halla. 19Ama hedi səndawl tə Yahuda iyi i kəkuw ley yakaka seh halla, sey sa rək amba i mə mbəzlaka ma a ma tə Bay tə Rawma, kwa sa abə wulək ley vəlaŋta hem əŋ hedi na iyi seh halla. 20Ehe, məŋgəvday a ɗek, sa kəɗəp za ley gəraheni abə ley zlapaheni. Sa ɓət calalu iyi wa seh məŋgəvday hedi, Israyila iyi i mə ɗiy wulək tata tə a mbiŋ wa.» 21I ziŋgeŋ zlap, i zla: «Nini seh, nini kəlim letir kwa ntaɗ tə əŋ hayak tə Yahudiya mə zlap tə a talaŋ təkwa seh halla, kwa zliŋge iyi ntaɗ mə ndaha mar tə a namba ley gizehe, aka səku, ley zlapanini a talaŋ məsəkəŋ hwa mə ɗal seh halla. 22Ama nini kəmba i zlim hwa abə talaŋ təkwa, hwa gizenini wulək təkwa, məŋgəvday, kataf hwa mə ziber wa, nini kəsəŋ kwa a tikey fuk hedi iyi i kəkuw ley ziberʉ səku.» 23I may waŋ par baha amba i jam abə Pawl, i ndaha abə hedi iyi mbeh səku i limʉ a lay mbiŋ mə waŋ. Mar tə kafa ha məcukahw Pawl a kəgizeŋta ma tə Bay tə Bizlaf. A kəpələk ley gizeŋta lawlaw a talaŋ ma tə Yesu mar tə əŋ Ɗerewel tə ma majaw tə Musa abə tə əŋ Ɗerewel tə hedi mə giz ma abə miya tə Bizlaf iyi. 24Hedi dakayta iyi i kəkuw ma ta za, ama hedi dakayta iyi i kəkuw ma ta halla. 25Abə dawaŋ ta izey, i nda tata, kwa i kəjam wulək tata iyi a yawa ta seh halla, ɓa, Pawl a zlapaŋta abə ma sə ndʉlʉk səku, a zla: «Mimiɗ sə Kweɗek kəzlapaŋta za əŋ dide tə dide təheni iyi məndiwiŋ kəɗi a hedi mə giz ma abə miya tə Bizlaf, Esaya! 26Kəzlap za, a zla:
“Nda i zlapaŋta əŋ hedi iyi wa:
Heni zlim za abə zləm təheni, ama heni səŋ ma ta halla.
Heni gər za abə nje təheni, ama heni lim kwa mey halla.
27Məŋgəvday hedi iyi wa, i kəmbaɗ za əŋ hedi mə səŋ məsəkəŋ iyi səku,
i kədəzl zləm tata iyi za,
i kəpek nje tata iyi za, məŋgəvday i kəmba i gər nje abə nje tata iyi səku,
i kəmba i zlim abə zləm tata iyi səku,
i kəmba i səŋ məsəkəŋ abə burŋguzl tata iyi səku,
mənaŋ wa, i kəmba i ziŋgehe əŋ kelek na amba sa mbəlta səku#28:27 Esaya 6:9-10..”»
28Pawl a zlap baha, a zla: «Hi səŋ ma wa lawlaw, Bizlaf a ləɓaha labara kə reh hedi iyi wa seh, əŋ hedi Yahuda iyi səku#28:28 Jabura 67:3; Luka 3:6.. Tata seh, i zlim ma ta za!» [29Abə dawaŋ tə ma iyi ta wa, Yahuda iyi i nda tata, i kəɗal yawa əŋ faŋw tata mbeh səku.] 30Pawl kənja va bək əŋ biŋ mbiŋ mə ɓət sey abə dala ŋga. A kəkuw kwa viyey fuk hedi mə ndaha əŋ kelek ŋga. 31A kəgiz ma tə Bay tə Bizlaf, a sərəkaŋta əŋ hedi iyi ma tə Bay Bayta Yesu Almasihu, a kəzlapaŋta əŋ hedi iyi abə ləndəŋ səku, kwa hedi mə takza halla.

ទើបបានជ្រើសរើសហើយ៖

Kəzəɗ tə Mələɓ iyi 28: xmd

គំនូស​ចំណាំ

ចែក​រំលែក

ចម្លង

None

ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល