Kəzəɗ tə Mələɓ iyi 12
12
I kəja Yakuba za, i kəpek Piyer za
1A va ta mba, bay Hirudus a mar ley zləŋgaŋta takwaŋ əŋ hedi dakayta iyi tə əŋ jam talaŋ tə hedi makuw ma iyi. 2A ja Yakuba, zliŋgeŋ tə Yahwana abə masalam. 3Əŋ mbiŋ mə gər məsəkəŋ ta kəŋgəmaŋta za əŋ Yahuda iyi seh, a ɓət wulək baha ley məl Piyer. A ɗal əŋ hala tə gugway tə peŋ mə tak is tə ɗəməŋ. 4A məlu, a nahaw əŋ daŋgay. A zlapaŋta əŋ sewje iyi dəl nfaɗ amba ley jəɗu: əŋ dəl ntaɗ seh sewje iyi nfaɗ a ɗəməŋ. Hirudus ta, a wulək ley mbəzlaŋ ma a ma tə hedi iyi fuk, abə dawaŋ tə gugway tə Paska. 5Piyer mə peki lawlaw əŋ daŋgay, ama jam talaŋ tə hedi makuw ma iyi i kəɗalaŋ mbuh əŋ Bizlaf abə nəf ntaɗ məŋgəvday mbiŋ.
Mələɓ tə Bizlaf kətəɗaha Piyer za əŋ daŋgay
6Əŋ njaɗu Hirudus mə nda i mbəzlaŋ ma a ma tə hedi iyi wa seh, Piyer mə weŋgi əŋ faŋw tə sewje iyi bək. Mə jewi abə calalu iyi bək, sewje iyi bahayim i mbə əŋ lay tə kəzəɗ tata a mebiŋ tə daŋgay. 7Mbehmbeh mba, mələɓ tə Bay Bayta Bizlaf a ndaha, lay tə biŋ ta a waɗ. Mələɓ a ges ndəra a bəra tə Piyer, a fəɗahaw, a zlapaŋgu, a zla: «Gar viyu!» Calalu iyi i kəkʉy tata a ndəra ŋga iyi. 8Mələɓ tə Bizlaf a zlapaŋgu, a zla: «Jaw gaŋ təkwa, ndək kərap təkwa iyi!» Piyer a ɗal mənaŋ mba, ɓa, mələɓ a zlapaŋgu baha, a zla: «Ɗiy rukut təkwa a wucum, ziberekʉ.» 9Piyer a təɗaha əŋ daŋgay, a ziber mələɓ ta. A kəsəŋ məsəkəŋ mə taŋ tə abə mələɓ ta wa seh məndiwiŋ səku: a wulək seh, ar səsiŋ. 10I taŋ hedi mə jəɗ titʉz iyi, i taŋ hedi mə jəɗ məbək iyi, ɓa, i gwar a mebiŋ tə njamndi kəɗi əŋ kəv tə berne. Mebiŋ a rəz taataɗ ŋga a ma tata, i təɗaha tata. I nda tata kəɗi əŋ kataf mə nda əŋ berne ta, mbehmbeh mba, mələɓ tə Bizlaf a yak Piyer. 11Abə dawaŋ ta izey, Piyer a səŋ məsəkəŋ mə taŋ tə abə mbiŋ sey, a zlap, a zla: «Mənjawa, sa kəsəŋ za məndiwiŋ Bay Bayta kələɓaha mələɓ ŋga za, kəreheke za a ndəra Hirudus, baha, kəjəɗaka za a məsəkəŋ madawar iyi Yahuda iyi i mə mba i ɗalaka bahayim.»
12Əŋ Piyer mə zlim məsəkəŋ ta seh, a nda əŋ ge Mariyama, mama tə Yahwana, i mə ɗafaŋ ma Markus. Hedi makuw ma iyi mbeh səku i mə kwesi a namba, i kəɗal mbuh. 13Piyer a ɗaf ma a medigiɗ. Hazləma mə ɗal kəzəɗ, miya ŋga Rawde, a ndaha ley gər mə ɗaf ma seh viyey. 14Əŋ mbiŋ mə səŋ wula tə Piyer seh, kəsəsəm za mbeh səku, ama kərəz medigiɗ seh halla. A hiy ley nda i gizeŋta əŋ hedi dakayta iyi, a zla: «Piyer mə geri a nawa, a medigiɗ!» 15Hedi dakayta iyi, i zlapaŋgu, i zla: «Hwa mulula vaw?» Ama a kəceh ley zlapaŋta, a zla: «Mbə a nawa, məndiwiŋ!» I zlapaŋgu, i zla: «Mənaŋ mba seh, ar mələɓ ŋga kəvah.» 16Piyer a kəɗaf ma a medigiɗ dap. Ɓa, i rəz medigiɗ, i lim seh Piyer, i kəhar za mbeh səku. 17Piyer a kafaŋta ndəra amba i mə nja tete. A gizeŋta məsəkəŋ Bay Bayta Bizlaf mə ɗalaŋgu, əŋ Bizlaf mə təɗahaw əŋ daŋgay. A zlapaŋta baha, a zla: «Hi gizeŋ məsəkəŋ ta əŋ Yakuba abə zliŋmana dakayta iyi.» Ɓa, a təɗaha ŋga, a nda ŋga əŋ lay par. 18Əŋ lay mə daŋgaha seh, sewje iyi i kələndəŋ za mbeh səku. I ɗəp talaŋ tata, i zla: «Məsəkəŋ mə taŋ tə abə Piyer seh mey?» 19Hirudus a pələku, ama kəlimza halla. Hirudus a ɗəp sewje mə jəɗ Piyer iyi sey, ɓa, a zlapaŋta i mə jata. Abə dawaŋ ta, Hirudus a gar a Yahudiya, a nda əŋ Kaysariya, a njaha a namba tə waŋ mbizek.
Məc tə Hirudus Agaripa
20Hirudus nəf kədəmaŋ za mbeh səku a talaŋ hedi tə əŋ Tirʉs iyi abə hedi tə əŋ Sidaŋw iyi. I jam, i ndaha əŋ kelek ŋga. I mar ley zlar ndəra abə Balastus, gula səndawl tə bay Hirudus. I ɗəp a ndəra Hirudus amba mə ɗalaŋta zahay, məŋgəvday məsəkəŋ tata kə zəm a ndaha seh əŋ hayak tə bay ta. 21Əŋ waŋ i mə ɗiy ley gbam talaŋ abə bay Hirudus kəgwaraha kwata seh, a ɗiy rukut ŋga tə bay, a nja a lay ŋga kə nja tə bay, a zlapaŋta. 22Hedi iyi i mar ley ja varay, i zla: «Ar bizlaf mə zlap, ar hedi dəgənak səku#12:22 Ezekiyel 28:2.!» 23Ama, mbehmbeh mba, mələɓ tə Bay Bayta Bizlaf a taw Hirudus ta, məŋgəvday mbiŋ abə talaŋ ŋga a kəmba həmən tə Bizlaf. Guŋkuɗ iyi i zəmu, ɓa, a məc ŋga#12:23 Daniyel 5:20.. 24Ama, ma tə Bizlaf, a kənda a ma a ma.
25Barnabas abə Sawl, abə dawaŋ tə i mə cukwaɗ kəzəɗ tata əŋ Urusalima seh, i ziŋ tata əŋ Antakiya, i ŋgaslaha Yahwana, i mə ɗafaŋ ma Markus ley nda abə tata.
ទើបបានជ្រើសរើសហើយ៖
Kəzəɗ tə Mələɓ iyi 12: xmd
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
