Lomɛ́ŋ 15
15
Nsɛ́ dílád bulinsi bá Kilíse
1Basuá dɛnyá bágúnínan agá guádáb, dɛgúbiánan ká dídúgúne beédeb bámányaná bádɛ́gɔ́nɛn. Dɛdiámbɛd ká diála ubú dɛlɛ́ganá. 2Nsɛ́ síg mɔnd a agás gá ɔlɔŋ ámbɛd ká wála sɔ́gɔ bese ugenúdídígen wɔ́ ká úgúnínan agá guádáb. 3Gágual ká, Kilíse dimamba buanda búmáalá wɔ́ bese. Búnyɛ buɔ́ŋɔ́n agá mbɔbɔnɔ ya Gɔdányá ká: Nsɛgɛ ɛsɛ́ band máagúsɛ́gá, yaŋuá bámaánsɛga#15.3 Esak 69.10 . 4Buanda gidigid búmɔ́ɔbiɔ́yɔ́ nsua agá Musámb má Mbɔbɔnɔ, nyɛ góbúsió bágual ká búdífúnyifunyi, búdífánan guɔ́mínɔɔn na makánya ká diágaan ɔdɛ́m. 5Nsɛ́ Gɔdányá walaná ká band ɔ́mínɔɔ́n, wéŋeen bɔ́ makánya, ál ká nuɔ́bɔnɛn banuá na banuá gɔɔ́gɔ́ anyɛ́ Yésu Kilíse méenúdíyé, 6ká núgúmenyi Gɔdányá sié wa Ɔgúnɔ́ wasɔ Yésu Kilíse ekelu táŋ ómoom, na ɔdɛm ómoom.
Anama yá band gidigid gegúmenyi Gɔdányá
7Ánugɛ́ndɛ́gánɛ́n banuá na banuá gɔɔ́gɔ anyɛ́ Kilíse máanúgɛ́ndɛ́gɛ́n gá nugúm ná Gɔdányá. 8Ngúnuɔ́yɔn ká, Kilíse mɛ́ɛy eŋél buol wa Beyúdɛn ká, úsifuógi ɛndán sá Gɔdányá ɛsɛ́ umáadánɛ́n besié bɔ́b, na ká údíye ká Gɔdányá nyɛ na nuládad. 9Umóol sɔ́n góbúsió bágual ká ebe bádiábá Beyúdɛn gúmenyi Gɔdányá gá bese waga, gɔɔ́gɔ́ anyɛ́ búnyá buɔ́ŋɔ́n agá mbɔbɔnɔ ká: Buád buanda nganúkányá ɔfɛ́n wɔ́w, ngúdɔ́ŋɔɔn ɛsak gadágadá wa ebe bádiábá Beyúdɛn. 10Mbɔbɔnɔ guánd guɔyɔ ká: Banuá nudiábá Beyúdɛn, ánuyayábá ɔlɔŋ na band bá Gɔdányá! 11Mbɔbɔnɔ guánd guɔyɔ sɔ́n ká: Banuá gidigid nudiábá Beyúdɛn, énugúményí Ɔgunɔ́, Ánukanyá wɔ́ banuá gidigid nunyá egegus! 12Ibús Esayí sɔ́n, agág gá mbɔbɔnɔ, mɔ́yɛ́d ká: Mɔnd goólín agá nɔgɔgɔ ná Yése, ugedélímin ká wéndenyi ebe bádiábá Beyúdɛn, ká baág ɛdɛm sɔ́b agagá. 13Nsɛ́ Gɔdányá wéŋeniné giágɔdɛ́mɔ́, núfuógi na bɛdɔdɛn na bumben gá gual ká núguádáb wɔ́. Agá gual uguány, bugaga bá Ɛsamb yá Mefúny gaal ká núbia giágɔdɛ́mɔ́ gudúmbídenyi.
Buol bá Pólo
14Belimen bám agá guádáb, nguánan agá meliŋítas ká edény wán nyɛ́ bese giod, nulɛnsaan bese na bese buand gidigid buófonó ká núlɛ́ns, nunyɛ sɔ́n béguéŋenin ɛsɔ́m banuá na banuá. 15Ta anaány, agá mbɔbɔnɔ eye, inyɛ na mat mat ká ínúbídégisi ɛduá sá moóny síndodió nuságuman gɔfɔ́nɔfɔɔn! Mmáal bú gá bese ɔwɔ́ Gɔdányá máaŋalá, 16ká yɛ́y eŋél buol wá Yésu Kilíse góbúsió bá ebe bádiábá Beyúdɛn. Umɔndɔ́bɔ́n ká ndúmbenyi Ndág ya Nsɔ́m yaga. Anaány ebe bádiábá Beyúdɛn ganuɛ́y bibiág ɛbɛ́ Gɔdányá bílénené, bɛ́bɛ́ biád Ɛsamb yá Mefúny máanyáŋɔ́nɛ́n wɔ́. 17Buád buanda anyɛ́ inyá aladán na Yésu Kilíse inyɛ na bidɔdɛn gá buol ubú yalaná Gɔdányá. 18Mmaál ká yɔ́yɛd buanda, nguɔ́yɔ gɔɔ́g ubú Kilíse máadɔ́mbɛ́n gám ká wáal gá ebe bádiábá Beyúdɛn bála Gɔdányá nŋɔ́bɛnɔ. Umáal nɔ́ agá gugál na agá bielínyélínyé, 19na bugaga bág búméebídíyényí agá bisey na bigégén bá manda, na bugaga bá Ɛsamb yá Mefúny yá Gɔdányá. Anaány iméedúmbényí Ndág ya Nsɔ́m ya Kilíse ta bɔ́guɔyɔ máy mem gudúm Yelúsalɛm guám agá giéns gá Ililí. 20Mmebiéŋín ká ndúmbenyi Ndág ya Nsɔ́m gɔɔ́g kɔɔ́m ɔgɔ́ bámáabá bámányɛ bɔ́diɔ́b ɔfɛ́n wá Kilíse. Ndimamba ká mfuák gians gám agá nidágɛ́n gians ná sɔ́gɔ́ ondodió. 21Mmáalá anyɛ́ Musamb má mbɔbɔnɔ ɔ́yɔ́nɔ́ ká: Ebe ɔbɔ́ bámáal bɔ́diɔyɛ́dɛn bɔ́ buanda gág góbúsió gaán wɔ́, Ebe bámáal bɔ́diɔ́b ɔfɛ́n wág, gasɔ́ŋɔ́n.
Ɛŋɛnd sá Pólo
22Bubɔ́ búnyá gubá bɛsɛgɛl gidigid búlegeen ká ndisiám aganuá. 23Nɛ́nuan gɔg ndɛgábá na buol agá biéns bá gus ibiány, búgányɛ duɔŋ giod mbílénené ká nsɛ́núyɔ́l, 24búgabiál gigul nganúsɛbɛ Ɛsɛpány. Gágual ká inyɛ na mbɛ́dágɛ́dɛ́n ká ínuán anyɛ́ nganúsidɔ́mb. Nguóndonyi ɔdɛm ká nugendúgún gá gɔb agá gɛdɔŋ igiány, ímámán gudúmbi mɔɔn wá gɛsɛgɛl ɔlɔŋ nanɔ. 25Anɛ́ inyá aya, gám gɔb egue Yelúsalɛm gá masɔ́m, góbúsió bá beédeb bányá uguány agá Tísɔn uwaány. 26Gá guán, biɔ́b bá beédeb bá Maseduán na bá Akayí ɔ́guɔ́bɔ́n ká bágɔsɛ́d muonyi gá gɔ́dɔ́mɛ́n giɔ́b gá beédeb gá Yelúsalɛm bányá gɔsɔ́g. 27Bɔ́bɔ́ muát bányá guɔ́bɔ́n ká baál anaány, kand gɛgɔ́dá. Búnyɛ́ ofín wá feké biɔ́b bá beédeb ibiány nyá gubianan. Gágual ká anyɛ́ Beyúdɛn bá Yelúsalɛm bámáadáb Kilíse méedúgún beédeb bá Maseduán na bá Akayí ká bábia guádáb, bɔ́bɔ́ sɔ́n bádiábá Beyúdɛn, bágúbianan ká bédúgún beédeb bá Yelúsalɛm na bunɛ́m bɔ́b. 28Ngaal ímánamaná búsɔ́m, imónd iméŋín muonyi, ngandɛn aganuá, mbád gɔdɔ́mb Ɛsɛpány. 29Ngúlɛnsaan ká, gigúl ngenúlúgun aganuá, ngoól na giánt gá gɛfɔn gíleniné aga Kilíse. 30Belimen bám bá guádáb, ngúnuɔ́yɔɔn aga Ɔgúnɔ́ wasɔ Yésu Kilíse na agá ɛlɛ́gá ɛyɛ́ Ɛsamb yá Mefúny éŋené: Énunuúsényi ɔlɔŋ nam gigul nubísógólonyó Gɔdányá gám góbusió. 31Ónubísógólónyí ká ndɛgɔɔ́n agá ɛmbɔ́g sá band bádiádábáná Kilíse bányá Yudé, na ká, beédeb bá Yelúsalɛm gɛ́ndɛ́gɛn na gɛnɔ́g gá ɔdɛm gidúgune ɛgɛ́ yɛbanɛná bɔ́ na gɛ́. 32Gɔdányá maádáb, ngasiám aganuá na bɛdɔdɛn gidigid, ngedúkid mɔɔn wá gɛsɛgɛl agá gadágadá wanɔ. 33Nsɛ́ Gɔdányá wéŋeniné bumben bá nanɔ, banuá bem! Anaány.
ទើបបានជ្រើសរើសហើយ៖
Lomɛ́ŋ 15: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
