Málákuse 13
13
Yésu mɔ́yɛd gɛgada gá ɔnyɛb ɛ wá Gɔdányá
(Mat 24.1-3; Lúk 21.5-7)
1Gigúl Yésu máadɔ́gaán agá ɔnyɛb wá Gɔdányá, ɔfɔ́nɔfɔ́n wág ondodió ganyɛ gág ká: «Ofúnyifúnyi lɛ́ŋɛ́d, ɔɔ́b adány, ɔɔ́b bɛfuág!» 2Yésu ganyɛ gág ká: «Bɛnɔ́g bá bɛfuág ibiány ánaná, gagadɛg ták; ta nɛdany nímoom nídɛgɔlɔb nɛdálaán agá sɔ́gɔ nɛ́dányá.» 3Umabá ilukié agá nɔgɔnd ná bolifié, ɔnyɛb wá Gɔdányá agág góbusió, na Piéle, na Sáka, na Sáŋa nɔ́b na Andelé mabá babínyáŋɔ́nán na Yésu bófoon wɔ́ ká: 4«Diɔ́yɛ́dɛ́n niík búganúbiál na bulinsi búgenúdíyenyi ká manda amaány gabiál.»
Gɔbanyɛg gá meyú
(Mat 10.17-22; 24.4-14; Lúk 12.11-12; 21.8-19)
5Yésu gudúm guɔyɔɔn bɔ́ ká: «Ánubɛ́nyáŋanyáŋ, mɔnd dinúnéní. 6Giod gá band gɔbiɔ́sɛgɔɔn agá gélem gá ɔfɛ́n wám, bɔ́gɔyɔ ká: “Yaŋuá inyá Kilíse” bégenenenyi band giod. 7Gigúl nugɔnuɔ́bɔɔn ká bide#13.7 Bómodio guɔyɔ ká ɛnuanua. gúbɛ́nuanan ɔ́gɔ ká bígúlén, nudɛbiá buwa, góbusió ká búgúbianan ká búbiál nɔ́: Gɔg ká, guman gá gus gabá gúmányɛ gúdɛ́bá egúy. 8Bɛdɔŋ genusenyinyi, mefuŋ nuanan mɔ́mɔ́ na mɔ́mɔ́; gus biéyen mɔkɔɔ́m mɔkɔɔ́m, nsana gabá sɔ́n; búgabá anyɛ gubanyɛg gá meyú má nubiényé. 9Nubɛ́nyáŋanyaŋ. Bégenúgélenyi agá begél bɛsan, bénúgíde na dusue agá bians bás bá mbísógól. Bábaan nanɔ agá bɛngɔ́mɔnɔ na befuŋ; gám góbusió, ány, nuganúbá bél bɛ́laluá bám ɔgɔ́b góbusió. 10Búgaal guófoon ká egúl gidigid ɔɔ́b Ndág ya Nsɔ́m. 11Gɛsɛgɛl báganɔ́baan nanɔ gá guenúgélényí, nudɛbanyɛ́g gubiófoon na ɛŋágɛ́nɛ́n gidigid ká digɔguɔ́yɔ́ giág uguány e? Nugagála bugél ubú Gɔdányá ganúnúfá gá gigúl igiány, gágual ká saá banuá nuganúgálágal, Mefúny má Gɔdányá máganúgálagál. 12Belimen gandaan bɔsɔ́g belimen muala ká band ɔɔ́nɔ́ bɔ́, besié gala sɔ́n nɔ́ na baan bɔ́b; baan genusenyi besié bɔ́b, bála ká band ɔɔ́nɔ bɔ́. 13Band giod gɛɛ́y bambɛ́lɛmbɛ́l bán góbusió bá ɔfɛ́n wám, ewe gɔg ugɔnuɔ́d guám agá nisúgín, Gɔdányá gosódi wɔ́.
Guɔ́bɛ́gɛ ugugɔ́gɔ́n
(Mat 24.15-25; Lúk 21.20-24; 17.23; 21.8)
14«Anyɛ́ nuganuán gigégén gá buanda giganúsɛ́ŋɛn ɔnyɛb wá Gɔdányá, gɛ́gɛ́ ilukié kɔɔ́m ɔgɔ́ gídiábáná ká gɛ́bá; gígaal ká band diánd gubaan kɔ́. Ebe báganúbá agá giéns gá gus bábɛ́laná ká Yudé gabianan ká bɔ́biɔ́sɛ́gɔɔ́n agá dɔgɔnd; 15búdigófoon ká ewe uganuál udɛbá agá gians bíŋín ká wɔ́gɔ́l buanda kɔ́ nagadá; 16anaány sɔ́n ewe uganúbá agá gisién dɛgabiánan sɔ́n ká wónd agagá gá guɔgɔ́l gɛla! 17Mɔɔ́s amaány, gɔsɔ́g na bagánd bá eŋum, na ebe béfúŋenyé, gágual ká búgabɛ́ɛn bɔ́ meyú ká bágálaŋansaan na ɛdɛd! 18Ónubísógólónyí ká búdíbiál gɛsɛgɛl gá ɛmaŋ. 19Gágual ká, band ɔ́nuɔ́bɛ́gɔɔn giod mɔɔ́s amaány, nɛnama ɛnɛ́ mɔnd mabásaná udiɔ́bɛ́g, gutɔ guedúm anyɛ́ Gɔdányá málɔŋá gus, gusiám ínen, ta mɔnd udɛ́nuánd guɔ́bɛ́g nɛnama iniany#13.19 Dinyɛ bágɔ́lɛ́ŋɛ́d Daniɛl 12.1.. 20Ímábá ká Gɔdányá dɛmasɔ́mb ká medug amaány oónd mesúg, gesi ta mɔnd udɛɛ́núsɔ́d. Umondí mɔ́ mesúg góbusió bá band uméeyíd. 21Mɔnd mɔ́guɔyɛdɛn gɔg ká: “Ínɛ́, Mesí gúgúnyá Kilíse nyɛ aya! Ɔ́gɔ ká: Lɛ́ŋɛ́d, unyɛ éné” adiádáb. 22Gágual ká mubús na bemesí bá bɛsɔbɔ ánúsiám. Bágala bigégén bá manda na bisey ká bénéni ímábá bányɛ báguámɛ́nɛn, ta band ɔbɔ́ Gɔdányá méeyíd. 23Banuá gɔg, ánubɛ́nyáŋanyáŋ, iménúbiés gá buanda gidigid gúmányɛ gá nsuá.
Guúl gá mɔɔn wá mɔnd
(Mat 24.29-31; Lúk 21.25-28)
24«Mɔɔ́s amaány gɔg, guɔ́bɛ́g ánuál gúmádɔ́mb, na ɔɔ́ny na oól dɛɛ́nuánd guéŋeen gise, 25muódód ganáfɔ́gaán ugumuana músiguánán, manda mányá na bugaga ugumuana gebíbueŋidi. 26Agá gigúl yaŋuá Mɔɔn wá mɔnd ngenuúl agá gɛlɔndɔ nagadá, na bugaga giod na nugúm. 27Ngadɔ́m ɛngɛlɛs agá kɔɔ́m gidigid gá gus, gudúm nagɔ́n, guám negúné ká bágɔ́sa band bɔ́mɔ́ɔdɔ́bɔ́n.
Nsab ya figiyé
(Mat 24.32-35; Lúk 21.29-33)
28«Ánɔsɔ́ŋɔ́n gufúnyifunyi gúleniné agá bɔdɛ́d búnyá ɔfɛ́n ká figiyé: Gigúl ɛgɛ́ bɛgas bág mónuondo dɛbɛdɛb, bímɔ́dɔsɔ, anaány gúnyá ká, ginɔ́g gá gɛsɛgɛl ganyɛ egúy egúy. 29Nɛnama nímoom banuá sɔ́n, gigúl nuganuánan manda amaány biála, ánɔlɛ́ns ká búgányɛ egúy, búgányɛ agá nibíŋínin. 30Agá meliŋítas ngúnuɔ́yɔɔn ká, anyɛ́ búganúbiála, band bá nɔgɔndɔ enue gabá bámányɛ bédígú. 31Na gus na muana ánɔ́dɔ́mb, gɔg, moóny mám nyɛ na bánamana. 32Agá giáy gá budúg ɔ́gɔ ká gɛsɛgɛl, ta mɔnd udɛgúlɛnsan; ta ɛngɛlɛs bányá ugumuana, ta yaŋuá Mɔɔn waga, asiá Babá.
Énubíbídényí
(Mat 24.42; 25.13-15; Lúk 12.36-38; 19.12-13)
33«Ánubɛ́nyáŋanyáŋ, nubíbídenyi, gágual ká nudɛgɔ́lɛnsan gigúl búganɔ́bɛ́dɔ́mbaan. 34Búgabá anyɛ gɛsɛgɛl mɔnd ábaná gá ɔŋend: úgɔ́l nuyá nág, utɛ́nɛn bél buol, wéŋeen sig mɔnd a buol báguala. Usúgúdenyi guɔyɛdɛn obíd ɔmɛndɛ wág ká úbídenyi. 35Énubíbídényi, gágual ká nudɛgɔ́lɛnsan niík muát nuyá sióndónó, ala na niɔb, ala na ɔdɛm wá budug, ala na gided góbusió, ɔ́gɔ na budúdug, 36úmósiondo gibelédényé, búdiguófon ká únúfuɔgɛn gá dunɔ́. 37Buanda inuɔ́yɔnɔ́, nguɔ́yɔɔn band gidigid bɔ́: Énubíbídényí.»
ទើបបានជ្រើសរើសហើយ៖
Málákuse 13: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល