Matáyoso 8
8
Gieŋugie gá oŋúnúŋun
(Mál 1.40-44; Lúk 5.12-14)
1Anɛ́ Yésu méesemeén agá nɔgɔnd, bianta bá biŋi bá band maládaán wɔ́. 2Oŋúnúŋun omodió uwabɛ́sɛdɛnɛn Yésu, uwɔlɔŋɛ́mɛd agág góbusió uganyɛ ká: «Ɔgúnɔ́, ɔ́gɔ egúbíléne, anyɛ bágɔnsɔgɔn#8.2 Beŋún-ŋun mabá band bámáal bádiádábaán bɔ́ agá ɔnyɛb gobusió bágúnúma gɔ́b, buád buanda bámáasɛgɛ́mánán ká bábɛ́sɔ́gɔn..» 3Yésu gugenunyi ɔmbɔ́g, gubísíd wɔ́, uganyɛ ká: «Ngúbíléne, bá asɔgɔ́nán.» Kɔ́ na kɔ́, oŋúnúŋun uwéŋúg. 4Yésu ganyɛ gág ká: «Bínyáŋanyáŋ, ɔdiɔyɛ́dɛ́n mɔnd buanda. Gebídíyé gá esigíd bidug wa Gɔdányá, éŋin bɛbiág ɛbɛ́ Moyís mɔ́yɛ́d ká béŋen, ány bágalɛns ká éguéŋúg.»
Ɛŋádáb ya ɔgɔn wa musia
(Lúk 7.1-10; Sáŋ 4.46-54)
5Anyɛ́ Yésu mabá ubíŋén Kapɛlɛnahúm, ɔgɔn wa ɔlɔŋ wá musia nɔgɔn uwabɛ́sɛdɛnɛn Yésu, uwobísógolonyi wɔ́ téeee. 6Umɔyɔ́ ká: «Ɔgúnɔ́, eŋél buol wám nyɛ ɛmbɛ́diá agá nuyá, ugúnúma. Uguɔ́bɛ́gɔɔn bese na bese na buánana.» 7Yésu guɔyɛdɛn ɔgɔn wa musia ká: «Yaŋuá ngeguéŋúgi wɔ́.» 8Ɔgɔ́n wa musia guondinyi wɔ́ ká: «Ɔgúnɔ́, ndibá agá edeny wá gual ká ébíŋín agám gá gians, ɔyɛ́d gɔg buóny táŋ búmoom eŋél buol wám éŋúg. 9Gágual ká yaŋuá ngúbianan ɔgɔn wumbiananá, mbianan sɔ́n musia yendenyé. Ímɔ́yɛdɛn omoom ká: “ɛmbɛ” wɔb, gá omodió ká: “ólo” wuúl; ímɔ́yɛdɛn sɔ́n eŋél buol wám ká: “Gáal gíná” uguála.» 10Anaány Yésu máyígíná ɔgɔn wá musia uwaány, umáal úmɔ́ɔbɔn gugál gág, uganyɛ gá ebe bámáaládaán wɔ́ ká: «Búnyɛ meliŋítas, imabása ndián nɛnama ná mɔnd enie Ísalayɛ́la wondonyó ɔdɛm aga Gɔdányá. 11Ngúnuɔ́yɔn gɔg ká, band giod goólonin buáy bá niámɛn, na buáy bá nɛbɛ́dɛ́mɛ́nɛ́n ná ɔɔny, bénúlúkumen sɔ́n agá Bufuŋ bá muana gá ɔnyɔ́ na Ábalaháma na Isáka, na Yákɔba. 12Ebe bámásɛ́gɛ́mánán gubíŋín agá Bufuŋ bá muana, bénuéti bɔ́ agá ɔɔnd, agá mbíne, bánúbáŋa kɔ́, bábɛ́bánda sɔ́n bikeled.» 13Yésu ganyɛ gɔg gá ɔgɔn wá musia ká: «Ondó ɔgɔ́w gá nuyá, bubiál agá nɛnama ná giond ɔdɛm gɔ́w.» Eŋeli buol wa ɔgɔn wa musia uwéŋúg aga gɛsɛgɛl igiány.
Yésu méŋúgi ɛsɔm ya mɔɔn ya Piéle
(Mál 1.29-31; Lúk 4.38-39)
14Yésu uwɔb agá nuyá na Piéle, uwɔfuɔgɛn ɛsɔm ya mɔɔn ya Piéle mbɛ́diá na niyo. 15Yésu uwebísíd wɔ́ aga ɔmbɔ́g, niyo iniám. Uwadɔg, uwedúm gudúmábaan wɔ́.
Biéŋugie
(Mál 1.32-34; Lúk 4.40-41)
16Anyɛ́ niɔ́b niɔ́bɔ́ méesiég, obólónin Yésu giod gá band bámáabiánán biád bá bíliíndié, Yésu uwakɔ́ŋa bɛ́ kɔɔ́kɔ na gugál, uwéŋúgenyi sɔ́n ebe bámáanúmá. 17Ká, ubú ibús yá Gɔdányá Isayi mɔ́ɔyɛ́d bífuógidonyi, ɔmɔyɔ́ ká: Uwɔ́ umɔ́ɔgɔ́l bugóndi bás, uwabɛ́dɔ́gɛn ɛgɔnɔ saás.
Band bálɛ́ganá gulád Yésu
(Lúk 9.57-60)
18Anyɛ́ Yésu máanán giŋi gá band gímɔ́ɔbɔŋɔ́ wɔ́, uwasásɛ́d bafɔ́nɔfɔ́n bág ká báb negúné wa manáŋ abɔ́sa. 19Oŋóŋ bisele omoom uwabɛ́sɛdɛnɛn Yésu uganyɛ gág ká: «Ofúnyifúny, ngaguládaan kɔɔ́m gidigid ɔgɔ́ aganúbaan.» 20Yésu uwondinyi wɔ́ ká: «Imfág gúbianan meés, munoni bianan aŋana, Mɔɔn wá mɔnd ɔwɔ́ udigúbianan kɔɔ́m gá gudál ɔduɔ́.» 21Omodió umáabá agá ɔlɔŋ wá bafɔ́nɔfɔ́n bág ganyɛ gág ká: «Ɔgúnɔ́, ál guntɛ́n yónyó sié wam.» 22Yésu ganyɛ gɔg gág ká: «Ɛ́lad, nɛɛ́n beguén bónyonon bɛlɔ́ŋ bɔ́b.»
Yésu mélúŋi gianta gá ofufuny
(Mál 4.31-41; Lúk 8.23-25)
23Yésu uwabɔ́lɛ́g aga gilu, bafɔ́nɔfɔ́n bág abálád wɔ́. 24Kɔ́ na kɔ́, gianta gá ofufuny igiábanyɛg gufuŋe agá manáŋ abɔ́sa nɛnám nínyá ká binob bá madɛ́ga máal bɛ́bɔgɛn gilu. Agá gɛsɛgɛl igiány Yésu uwɔ́, umabá ubɛ́dɛ́maan. 25Anyɛ́ bámáabɛ́sɛ́dɛ́nɛ, ebényi wɔ́, bágányɛ gág ká: «Ɔgúnɔ́, dídúgún, kand nɔ́, dimáfɔ́f.» 26Yésu guondinyi bɔ́ ká: «Nugúdíne giag e? Banuá band bá nŋádáb fág fág.» Uwedélímin gɔg uwánsɛ́dɛn ofufuny na manáŋ abɔ́sa, kɔɔ́m egélúŋ yéménéméné. 27Band meméŋéméŋ, bɔ́yɔ sɔ́n ká: «Ewe nyɛ ányá ká ta ofufuny ta manáŋ abɔ́sa ɔ́bɔnɛn wɔ́ e?»
Yésu méŋúgí band bándɛ bá biád bá bíliíndié
(Mál 5.1-20; Lúk 8.26-39)
28Anyɛ́ bámáab guám negúné wa manáŋ abɔ́sa, agá gidɔŋ gá band bá Gadala, band bándɛ bámáabiánán biád bá bíliíndié ebénegúdúgín wɔ́, bómoólónín agá bɛbɛl, ta mɔnd wa guandɛn agá nŋili iyaány udɛmabá, gágual ká bámabá na ɔndɔndɔ. 29Ebédúm gɔg guánsa bɔ́yɔ ká: «Mɔɔn wá Gɔdányá, agúdiámba na buóny e? Osoól aya ká ásidífá nusésídény gɛsɛgɛl ta gueg e?» 30Nánié gɛnaŋ gá ɛŋɔnaf mabá ány agá masiá gínyánan agá nɔgɔnd. 31Biád bá bíliíndié ibiány ibiábanyɛg gubísógólonyi Yésu biɔ́yɔ ká: «Ámádɛ́kɔ́ŋɛ́d, dɛ́dɔ́m agá gɛnaŋ gá ɛŋɔnaf igíné.» 32Uganyɛ gá bɛ́ ká: «Ánɔbɔ». Ibiénebíŋén agá ɛŋɔnaf. Ɛŋɔnaf isiány isiénegúdúg agá nɔgɔnd, isiébiétenyi aga manáŋ abɔ́sa, isiégú. 33Begiíg iŋonáf ɔbɔ́bɛ́nɔnɔn, oboól bɔ́yɔ́ agá bɔtísɔn buanda gidigid búmáabɛ́dɔ́mbaán na buóny bá band bándɛ bá biád bá bíliíndié. 34Band bá tísɔn uwaány gidigid abámaan gá guelumén na Yésu. Bámáal bánaán wɔ́, ebédúm gubísógólonyi wɔ́ ka wélíki ɔgɔ́b gá giéns gá gus.
ទើបបានជ្រើសរើសហើយ៖
Matáyoso 8: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
