Lúkasa 8
8
Band béméedílígén Yésu
1Mɔɔn wa gɛsɛgɛl máal úmádɔ́mb, Yésu gɔb agá bɛdɔŋ na Babálɛ́g ká údúmbenyi ndág ya nsɔ́m ya Bufuŋ bá Gɔdányá. Umabá ɔlɔŋ na bát na bándɛ bág, 2na gɛdám gá bagánd ɔbɔ́ uméelényí bɔ́ biád bá bíliíndié, na ɔbɔ́ uméeŋúgényí bɔ́ anama ya ɛgɔnɔ gidigid ɛfɛ́n sɔ́b esie: Maliá bábɛ́laná ká Maliá wa Magadalá, uwɔ́ waád Yésu méelí biád bá bíliíndié bɛ́tɛ́ndád nomo, 3Sána agány Susa, eŋél buol wa ngɔ́mɔnɔ anyɛ Elódo wa Antípasa, Susána na giod gá band gíndodió gímáagán bɔnɛ́m bɔ́b gá gúdúgúne bɔ́.
Nsab ya mɔnd uméebuénén imbu
(Mat 13.1-9; Mál 4.1-9)
4Gianta gá giŋi gá band máal gímábɛ́gɔ́sa, band bá bɔtísɔn gidigid obóloon agá Yésu. Uganyɛ gɔ́b agá nsab ká: 5«Mɔnd máab gá guebuénén imbu. Umáal uganyá gúfáman sɛ́, esie isiáguanan agá buáy bá nŋili, band ebébínde sɛ́, munoni umuɔ́sɔbɔɔn sɛ́ ták. 6Gɛdam gímodió igiáguanan agá anságáy. Gímáal na gusɔɔ́g, igiédúmbi guyɔ́yidɔn gágual ká gus mabá kɔ́d kɔ́d. 7Síndodió isiáguanan agá gadágadá wa bigud bá insánd, isiɔ́sɔɔ́g ɔlɔŋ na bɛ́, ibiámányɛ́gɛnɛn sɛ́. 8Símodió isiánaguá gɔg agá ginɔ́g gá gus, isiɔsɔ́g, isiómo sig gíndue eŋíny nɔgɔn.» Yésu guɔ́yɛ́kɛnɛn uganyɛ ekelu magɔ́gɔ́n ká: «Ewe ubiananá idú sá guɔ́b, wɔɔ́b!»
Gá giág Yésu ɔ́yɔnɔ́ manda agá insab?
(Mat 13.10-13; Mál 4.10-12)
9Bafɔ́nɔfɔ́n guófún wɔ́ buanda nsab ámbaná guɔyɛd. 10Uganyɛ gɔ́b ká: «Banuá bégunúlínsi niɔs ná Bufuŋ bá Gɔdányá. Gá bɔsɔ́gɔ́ gɔg, bɔ́guɔ́bɔn bú nsab nsaba, anaány ká bányɛ bágúlɛ́ŋa, bádián, bɔ́bɛ́dɔ́lɛ́gɔn, bádɛ́sɔ́ŋɔ́n.
Nɛsɔ́ŋɛ́nɛ́n na nsab
(Mat 13.18-23; Mál 4.13-20)
11«Nsab iyaány guɔ́yɔ ká: Imbu nyɛ moóny má Gɔdányá. 12Band bóndodió nyɛ anyɛ masiá má nŋili ɔmɔ́ insamɔ guananá. Bɔ́gúbɛ́dɔ́lɛ́gɔn gugál gá Gɔdányá, ta anaány, ahand ólúgun, wéli gugál uguány ɔgɔ́b gá ɔdɛm anaány ká bádiádáb, emény bɔ́gɔsɔ́d. 13Ebe bányá anyɛ anságáy, bányɛ ebe bágɛ́ndɛ́ganá gugál gá Gɔdányá na bɛdɔdɛn, gɛsɛgɛl bɔ́bɛ́dɔ́lɛ́gɔnɔ́ gú, bádɛ́tɛɛn ká moóny amaány lua ɛŋaŋa. Báguádábaan gá mɔɔn wá gɛsɛgɛl, gigúl yɔɔ́bɛ́dɛ́n mánusiám, bɔ́bígɔ́gɛ́d. 14Ɛsɛ́ símáaguá agá insánd, Bányɛ anyɛ ebe bɔ́bɛ́dɔ́lɛ́gɔnɔ́, ta anaány, na nŋágɛ́nɛ́n, na bɔnɛ́m, na manda má bese má gusɔ́d mányɛgɛnɛn gugál uguány, bédínúgí gusɔ́d. 15Sɛ́máaguá agá ginɔ́g gá gus, nyɛ anyɛ ebe bɔ́bɛ́dɔ́lɛ́gɔnɔ́ gugál gá Gɔdányá, bábɛ́dɛ́gan gú ɔgɔ́b gá ɛdɛm sɛ́nyá bese, na meliŋítas, sɛ́lɔ́bɔnɔ́ agá nuládad, bénúgi gusɔ́d.
Nsab ya lámba
(Mál 4.21-25)
16«Mɔnd dɛguágaan lámba yoóg ká úbɔgɛn wɔ́ na ɔlɔŋɔ, ɔ́gɔ ká wésunyígín wɔ́ agá ombílígis wá nɛbɛd; bágúdála wɔ́ agá gɛdálɛ́n lámba ká bébíŋené ánan gise. 17Buanda gidigid búnyá buɔsɛ́gɔ́n gɔbiɔ́sɔn, gidigid búnyá agá niɔs gadambɔg. 18Ɔ́nugɔ́l gɛsɛgɛl na ninama ɛnɛ́ nubídɔ́lígɔnɔ́, gágual ká ewe ubiananá, bɔ́nuɔ́yɛ́kɛnɛn wɔ́, ewe udiábiánáná, bégéli ta ubú ubɛ́dáganá ká unyɛ na bú.»
Mband nigúl ná Yésu
(Mat 12.46-50; Mál 3.31-35)
19Na inyódió na Belimen bá Yésu oboól gá gúsián wɔ́. Anyɛ́ band máabá giod, bádɛmabia giás gá guámɛ́n wɔ́ 20Ɔbɔ́nɔyɛ́dɛ́n wɔ́ ká: «Belimen bɔ́w na nigódió nyɛ agá ɔɔnd; báguámba guguán.» 21Uganyɛ gá band gidigid gɔg ká: «Iná wam na belimén bám nyɛ band gidigid bɔ́bɛ́dɔ́lɛ́gɔnɔ́ gugál gá Gɔdányá, bála anyɛ́ guɔ́yɔnɔ́.»
Yésu mélúŋí gianta gá ofufuny
(Mat 8.18,23-27; Mál 4.35-41)
22Buɔ́s búndodió, Yésu gubɔ́lɛ́g agá gilu na bafɔ́nɔfɔ́n bág. Uganyɛ ká: «Nsɛ́ dɛ́yɔɔg negúné wa manáŋ abɔ́sa.» Ebédúm gɔyɔgaan. 23Bámáal bámáanyá gúyɔgaan, Yésu gɔb gá dunɔ́ gá mɔɔn wa gɛsɛgɛl. Gianta gá ofufuny igiábanyɛg gufuŋe agá manáŋ abɔ́sa, madɛ́ga emédúm gubíŋen agá gilu, bámabá bágányá gúyɛɛ́g yɛg. 24Bafɔ́nɔfɔ́n abábɛ́sɛdɛnɛn Yésu, bágányɛ ká: «Ofúnyifúny, Ofúnyifúny, dimégú.» Umáal wanyugaan, uwánsɛ́dɛn ofufuny na binog, emélúŋ pɔ́ɔɔ. 25Uwad guófún bɔ́ ká: «Guádáb gán nyɛ nanyá e?» Bɔ́bɔ́ gɔg na buwa, na guméŋémeŋ gidigid ebédúm gubiófon ká: «Kasɛ́ bɔbɔnd ebue ubú na ofufuny na binog#8.25 Bómodió guɔ́yɔ ká: binob. ɔ́bɔnɛnɔ́ wɔ́ e?»
Yésu méŋúgí mɔnd umáabiánán biád bá bíliíndié
(Mat 8.28-34; Mál 5.1-20)
26Yésu na bafɔ́nɔfɔ́n bág abánaám negúné wa manáŋ abɔ́sa agá gɛdɔŋ gá Galasaniɛ́ŋ gílɛ́ŋaná giéns gá gus gá Galilé. 27Gigúl Yésu maádág bɛgɔnd egegus, mɔnd wa tísɔn umáabiánán biád bá bíliíndié uwúulín wɔ́. Mɔnd uwaány mabá umáman gúdúmbi gianta gá gɛsɛgɛl udibiágán gɛla, udibɛ́dɛ́mán agá gians, ubɛ́dɛ́man kɔɔ́kɔ agá bɛbɛl. 28Wánaan Yésu, uwenebiétínyí wɔ́ agá bɛgɔnd wuúl wágaán dugogó. Uganyɛ ekelu magɔ́gɔ́n ká: «Giág aŋambaná gá gɛ́ e, Yésu Mɔɔn wa Gɔdányá unyá ugumuana? Ngúgubísógólonyi, ediméŋélídí!» 29Yésu máal gá giád gá gíliíndié ká giám agá nuɔ́l ná mɔnd uwaány. Gímabá gímádɛgɛn wɔ́, bágɔ́da wɔ́ ɛmbɔ́g na bɛgɔnd na masɛŋɛ ká bábɛ́dɛ́gan wɔ́. Ta anaány, umabá ugása mɔ́, giád gá gíliíndié dɔ́maan wɔ́ agá giɔ́ndɔ́. 30Yésu guófún mɔnd uwaány ká: «Ɔfɛ́n wɔ́w ká ányá e?» Uwondinyi ká: «Gudege.» Umɔyɔ́ anaány gágual ká biád bá bíliíndié mabá giod agág gá nuɔ́l. 31Biád bá bíliíndié ibiány ibióbísógólonyi Yésu ka udiétí bɛ́ agá ɔmbɛl wá nugényígeny. 32Gianta gá gɛnaŋ gá ɛŋɔnaf mabá ány gímáabá giámba manyán agá nɔgɔnd. Ibióbísógólonyi wɔ́ ká wádábɛn bɛ́ ká bíbíŋín agá ɛŋɔnaf isiány, uwádábɛn bɛ́. 33Ibiádɔg agá mɔnd uwaány, ibiénebíŋén agá ɛŋɔnaf. Ɛŋɔnáf isiány isiénegúdúg uguány ugumuana wa nɔgɔnd, isiébiéti agá madɛ́ga, isiáfɔ́f.
34Begiíg ɛŋɔnaf máal na guán buanda búmáabɛ́dɔ́mbaán, ɔbɔ́bínɔnɔn, oboól bédúmbényí buóny agá tísɔn na agá gɛdɔŋ. 35Band obóloon gá gúsɛlɛnsɛ buanda búságubɛ́dɔ́mbaan. Abánaám egúy na Yésu, ɔbɔ́fuɔg mɔnd umáabiánán biád bá bíliíndié ilukié agá masiá má bɛgɔnd bá Yésu, uganyɛ cáŋ kilit na bɛla agá nuɔ́l. Abábia buwa. 36Ebe bámáanaán buanda gidigid ɔbɔ́yɔn bɔsɔ́gɔ́ anyɛ́ mɔnd wa biád bá bíliíndié méeŋúg.
37Kányɛ band bá giéns gá gus gá Gelaseniɛ́ŋ mɔ́ɔyɛ́d gá Yésu ká wélíki ɔgɔbɔ́, gágual ká bámabiánán gianta gá buwa. Yésu uwabɔ́lɛ́g agá gilu gá gɔdɔ́mb.
38Mɔnd uwaány uwobísógólonyi Yésu ká wádáb ká bábá ɔlɔŋ. Ta anaány, Yésu uwegúgi wɔ́, wɔyɔ ká: 39«Óndo ɔgɔwɔ, ɔ́yɔ buanda gidigid Gɔdányá mánúguala!» Mɔnd uwadɔ́mb, uwuúl wɔ́yɔ agá tísɔn gidigid buanda gidigid Yésu máal gág gá busió.
Giéŋugie gá agánd na guanyɔg gá ɔmbúlɔ wa Yálayuse
(Mat 9.18-26; Mál 5.21-43)
40Anyɛ́ Yésu máab guadɔ́g buáy ebúné bá manáŋ abɔ́sa, giŋi igiógóli wɔ́, gágual ká band mabá bébídenyi wɔ́. 41Mɔnd ɔfɛ́n ká Yálayuse uwasiam gɔ́g. Umabá ɔgɔn agá gians gá mbísógól gá Beyúdɛn, uwagɔɔn Yésu agá bɛgɔnd uganyɛ ká gubísógólonyi wɔ́ ká wɔ́b agagá, 42gágual ká ɔmbúlɔ waga táŋɛ omoom, umáabiánán duɔŋ duát na duándɛ mabá uganyɛ wa nigú. Giŋi gá band medidígén Yésu agá nŋili gigúl umáabán. 43Agá giŋi igiány, agánd mabá kɔ́ manɔŋ máabanyɛ́g guámaan wɔ́ búgányɛ duɔŋ duád na duándɛ. Uméeményí bɔnɛ́m bág gidigid gá gúnamaan baŋanyány, ta omoom udɛmáamɛ́nɛn ká wéŋúgi wɔ́. 44Uwabɛ́nyɛkɛnɛn Yésu agá gélem, uwebísíd nsónsó ya gɛla gág. Kɔ́ nɔ kɔ́, manɔŋ ɔmɔ́dɔmb guámaan. 45Yésu guófún ká: «Ányá uménúmbísíd?» Anɛ́ band gidigid mábɛ́sáŋɔ́ná, Piéle ganyɛ gɔg ká: «Ofúnyifúny, band bɔ́sɔ́gugubɔŋ bégúdidigené.» 46Yésu guondinyi ká: «Mɔnd mémbísid, imɔ́biɔ́b bugaga maám agám gá nuɔ́l.» 47Agánd máal na guán ká Yésu málɛns buanda bumánubɛ́dɔ́mb, uwabɛ́sɛdɛnɛn wɔ́ na bɛdagɛmɛn gidigid, uwanagɔɔ́n wɔ́ agá bɛgɔnd, agá eŋís yá band uwɔyɔɔn wɔ́ góbusió bá giág uségubísíd wɔ́, na anyɛ́ uségúeŋúg kɔ́ nɔ kɔ́. 48Uganyɛ gág gɔg ká: «Mɔɔn, giondiɔdɛ́m#8.48 Bómódió guɔ́yɔ ká: bióndi ɔdɛm. ɔ́ gɔ́w méguéŋúgi; ɛmbɛ, ɔdɛm wɔ́w bá fueee.» 49Anyɛ́ umáabá umányá gúgála, mɔnd uwonólín agá nuyá ná Yálayuse ɔgɔn wá gians gá mbísógól gá Beyúdɛn, uganyɛ gá waád Yálayuse ká: «Ɔmbúlɔ wɔ́w dɛgábá sɔ́n, adiánd gúsésidenyi ɔgúnɔ́.» 50Anyɛ́ Yésu mɔ́ɔbɔ, uganyɛ gá Yálayuse ká: «Adɛbiá buwa, óndi ɔdɛm gusúg, ɔmbúlɔ wɔw gɔgúsɔ́d.» 51Anyɛ́ bámáab guám agá nuyá ná Yálayuse, Yésu máadábɛ́n Piéle, sáŋa, Sáka, na sié na inyódió ɔmbúlɔ gusúg ká bébíŋín ɔlɔŋ. 52Band gidigid mabaŋá, bábɛ́sɔ́sɔ́la nigú ná ɔmbúlɔ. Yésu ganyɛ ká: «Nudiábaŋá, udimégú, unyɛ gá dunɔ́.» 53Band ebédúm gudɔ́gɔ Yésu gágual ká bámalɛnsán cácácá ká ɔmbúlɔ segú. 54Yésu guadɛgɛn ɔmbúlɔ agá ɔmbɔ́g, uganyɛ gág ekelu magɔ́gɔ́n ká: «Mɔɔnɔ́, anyɔ́g!» 55Giélúm gág igiósiondo, kɔ́ nɔ́ kɔ́, uwadɔg, uwedélímin, Yésu ganyɛ ká béŋin wɔ́ manyán 56Bebiényi bág ebédúm guméŋemeŋ giod, uwasásɛ́d bɔ́ ká bɔ́diɔyɛ́dɛ́n ta mɔnd buanda búmáabɛ́dɔ́md.
ទើបបានជ្រើសរើសហើយ៖
Lúkasa 8: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
