Lúkasa 24
24
Guám gá Yésu agá gɛbɛl
(Mat 28.1-9; Mál 16.1-8)
1Tútútú wa sɔ́ndiɔ́, buɔ́s bá busió bá gɛny, bagánd abáb agá gɛbɛl na megud má ɔlɔ́f ɔmɔ́ bámáadábɔ́ná. 2Bámáal ná guám, abaán ká nɛdány nímáabá agá nibíŋínín ná gɛbɛl mabá nidíŋílídény agá buáy. 3Ebébíŋín gɔg, ta gufuɔg gɛlɔŋ gá Ɔgúnɔ́ Yésu. 4Anyɛ́ bámáabá bámányá guméŋemeŋ, band bándɛ abámɛ́n bɔ́, bɛla bɔ́b mabá bíségimine. 5Na buwa gidigid, bagánd abaány ɔbɔ́lɔŋɛmɛdɔɔn, band abaány ganyɛ gɔ́b ká: «Nudɛ́gúbianan ká nuámba band bɔgɔ́s agá gadágadá wa ebeguén. 6Udɛgábá aya, úguanyɔg aga ebeguén, ánubɛ́dágɛ́d gugál gág anyɛ́ umáabá umányɛ agá giéns gá gus gá Galilé. 7Umɔyɔ́ ká: “Búguófon ká búbífuógi. Béŋín Mɔ́ɔn wá mɔnd gá bafalafal ká bádɔ́ŋ wɔ́ agá kolós. Buɔ́s bá gádadɔ, wányɔg aga ebeguén.”» 8Ány gɔg bámáabɛ́dágɛ́d gugál gá Yésu; 9bámáal bádɔgaan agá gɛbɛl, obónd ɔbɔ́nɔyɔɔ́n bedúmeb bát na omoom na bɔsɔ́gɔ́ bómodió, buanda gidigid búmáabɛ́dɔ́mbaán. 10Ɛfɛ́n sá bád bagánd esie: Maliá wa Magadalá, Sána, Maliá inyódió Sáka. Bagánd bóndodi bámáabá ɔlɔŋ nɔbɔ mɔyɔɔ́n bedúmeb niɔy niád nímoom. 11Bedúmeb dɛmáadáb gugál ugú bagánd abaány mɔ́ɔyɔɔ́n bɔ́, gágual ká bámabɛ́dágá ká gugál uguány dɛbá meliŋítas. 12Ta anaány, Piéle gɔb agá gɛbɛl na ɔdɛd. Uwanám, uwafáfɛ́d, uwaán Kɔ́ɔk ndɔ́mb. Uwad guond agagá wuúl úméŋeméŋ buanda bumáabɛ́dɔ́mb.
Gubídíye gá Yésu
13Buɔ́s buád búmoom, bafɔ́nɔfɔ́n bándɛ mabaán agá gɛdɔŋ gínyá ɔfɛ́n ká Emayúse. Gínyɛ gɛnambɛ na tísɔn wa Yelúsalɛm buanda bá bakílométa bát na omoom. 14Bámabá bánda bóol bɔ́yɔ́ moóny gidigid mámáabɛ́dɔ́mbán. 15Bámáal bányɛ anaány, Yésu gubílédígenyi bɔ́, abáb gá guanda ɔlɔŋ. 16Bámáanaán wɔ́, ta anaány, bádɛmalɛns wɔ́. 17Uganyɛ gɔ́b ká: «Giág núlené nuɔ́yɔ́ agá nŋili e?» Abál síso, ebélidid mosió. 18Omoom wɔbɔ ɔfɛ́n ká Keleyópasa guondinyi wɔ́ ká: «Anyɛ aŋuá eŋényé Yelúsalɛm adiálɛnsáná buanda búbɛ́dɔ́mbaná kɔ́ mɔɔ́s eme e?» 19Yésu ganyɛ ká: «Kásiánda e?» Bágányɛ ká: «Ubú búnyá guámɛ́n Yésu wa Násalɛd unyá gubá gɛgaga gá ibús yá Gɔdányá agá bielínyélínyé na agá gugál agá busió bá Gɔdányá, na band. 20Bɔ́gɔ́gɔ na befuŋ bás nyá gusɔ́mb ká bɔ́ntɛ́dɛn wɔ́ agá kolós úgú. 21Díguondonyi ɔdɛm agagá ká ugaŋɔ́n Ísalayɛ́la, ta anyɛ́ búgányá inén medug mádadɔ manda amaány nyá gubɛ́dɔ́mbaan. 22Ta anyɛ́ gɛdam gá bagánd agás gá ɔlɔŋ séegudíkémi, gágual ká básaám agá gɛbɛl tútútú, 23ta gufuɔg gɛlɔŋ. Bɔ́mɔ́sídiɔ́yɛ́dɛ́n ká ɛngɛlɛs bá Gɔdányá sámɛ́n bɔ́, bɔ́mɔ́yɛ́dɛ́n bɔ́ ká unyɛ ugɔ́s. 24Gɛdám gá band agás gá ɔlɔŋ gímáab agá gɛbɛl mɔfuɔ́gɛ́n manda Kɔɔ́kɔ anyɛ́ bagánd mɔ́ɔyɔ́. Uwɔ́, bádɛ́maán wɔ́.» 25Yésu ganyɛ gɔ́b gɔ́g ká: «band bá kand nsiŋi ebe, nunyɛ na masɛ́nɛn ká nuádáb moóny ɔmɔ́ mubús má Gɔdányá mɔ́ɔyɔ́. 26Búdíguófoón ká Kilíse ɔ́bɛ́g nɛnama iniány úbád gubíŋín agág gá nugúm e?» 27Uwad gudúm gubúlúneen bɔ́ moóny málɛ́ŋaná wɔ́, gubanyɛg agá imbɔbɔnɔ ɛsɛ́ Moyíso mɔ́ɔŋɔ́, guám agá imbɔbɔnɔ gidigid ɛsɛ́ mubús má Gɔdányá mɔ́ɔŋɔ́. 28Bámáal bágányɛ egúy na gɛdɔŋ ɛgɛ́ bámábaán kɔ́, Yésu uwaal anyɛ ugúbaan na busió. 29Bɔ́bɔ́ ta gunɛɛn wɔ́ ká údɔ́mb, bágányɛ gág ká: «Lɔbɔ́ nasɔ, gágual ká mbíne ganyɛ kɔ́.» Uwɔlɔb nɔbɔ. 30Bámáal bémélukumin gá gúnyánan, Yésu uwɔgɔ́l gɛnyɔka, uwéŋín Gɔdányá nukany, uwáns, uweŋín gɔ́b. 31Eŋís yɔ́b eyébífuun, abálɛns wɔ́; kɔ́ nɔ kɔ́, uwaságɛ́nɛn bɔ́. 32Bágányá gúbiɔ́yɔɔn ká: «Saá disabá diɔ́bɔɔn bese agá nŋili gɛsɛgɛl uságubá udíbúlúnen moóny má Gɔdányá e?» 33Ebédúmbi guadɔg gá guond Yelúsalɛm; ɔbɔ́fuɔg bát na omoom na bɔsɔ́gɔ́ bɔ́b bámámán gúbɛ́gɔ́sɛ́d, 34bágányɛ gɔ́b ká: «Búnyɛ meliŋítas, Ɔgúnɔ́ sányɔg aga ebeguén, Símune saán wɔ́.» 35Bɔsɔ́gɔ́ bá bándɛ abaány sɔ́n guɔyɔɔn bɔ́ ubú búmáabɛ́dɔ́mb agá nŋili na anyɛ́ bámáalɛ́ns wɔ́ gigúl umáansá gɛnyɔka.
Yésu mébídíye gá bafɔ́nɔfɔ́n bág
36Bámáal bányá gúgála, Yésu guámɛ́n bɔ́ ɔgɔ́b gá gadágadá, uganyɛ gɔ́b ká: «Bumben bá nanɔ.» 37Gianta gá buwa igiádɛgɛn bɔ́, ebédúm gutataan bábɛ́dága ká inyɔl yɛ́. 38Uganyɛ gɔ́b ká: «Giág gínúbueŋenyé anaány e? Insuŋié sá giág nunyá na sɛ́ agán gá ɛdɛm e? 39Ánulɛ́ŋɛ́d ɛmbɔ́g sám na bɛgɔnd bám: Saá yaŋuá wɔ́ e? Énumbísíd, nunlɛ́ŋɛ́d; nnyɔl dɛbá ta na emeku ta na giko anyɛ́ yaŋuá mbiananá, nudiguánan banuá muát e?» 40Umabá wɔyɔ anaány udíyenyi bɔ́ ɛmbɔ́g na bɛgɔnd bág. 41Anyɛ́ bámáabá bámányɛ agá bɛdɔdɛn, bámányɛ bádiádáb meliŋítas, béméŋeméŋ, uganyɛ gɔ́b ká: «Nunyɛ na buanda bágúnyá aya e?» 42Ɔbɔ́gɔ́l giéns gá yɔbɔ ɛgɛfuan, ebéŋin wɔ́. 43Uwɔgɔ́l gɛ́, uwanyá bálɛ́ŋa wɔ́. 44Uganyɛ gɔ́b ká: «Moóny eme imɔ́ɔnuɔ́yɔɔ́n gigúl imáabá imányɛ nanɔ, búguófon ká buanda gidigid búnyá buɔ́ŋɔ́n gám góbusió agá bisele bá Moyíso, na agá imbɔbɔnɔ sá mubús na agá imbɔbɔnɔ sá isag, gúbianan ká búbífuógi.» 45Uwaal ká méne mɔ́b bífuun, bédúm gusɔ́ŋɔ́na moóny má Gɔdányá, 46uganyɛ gɔ́b ká: «Búnyɛ́ buɔ́ŋɔ́n ká: Kilíse gɔ́bɛ́gɔɔn, úgú, wányɔg aga ebeguén buɔ́s bá gádadɔ, 47búguófon ká, agám gá ɔfɛ́n gudúmín Yelúsalɛm, boól bédúmbényínyí band bá bɛdɔŋ gidigid bá gús ká bénúgi ɛdɛm sɔ́b, Gɔdányá bád gunɛnɛn bɔ́ bɛfal bɔ́b. 48Banuá nunyɛ bél bɛ́laluá gá bɔ́. 49Yaŋuá gɔ́g nganúdɔ́mɛ́n ubú Babá mánúdánɛ́n, nugúbianan ká núlɔ́bɛn aya agá tísɔn guám anyɛ́ bógonúnúfuógi na bugaga bá muana.» 50Agá gélem ány, uwɔban bɔ́ giáy gá gɛdɔŋ gá Betani, kɔ́, uwedugi ɛmbɔ́g, uwafɔna bɔ́. 51Anyɛ́ umáabá umányá gúfɔna bɔ́ anaány uwádɔ́gan nɔbɔ, uwɔb ugumuana. 52Bámáal ná gubúlígenyi wɔ́, obónd Yelúsalɛm bofuógón na bɛdɔdɛn. 53Bigúl gidigid bámabá agá ɔnyɛb wá Gɔdányá gá gúkanya wɔ́.
ទើបបានជ្រើសរើសហើយ៖
Lúkasa 24: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
