Lúkasa 17
17
Ɛsɔ́m yá Yésu
1Yésu ganyɛ gá bafɔ́nɔfɔ́n bág ká: «Manda málaná ká mɔnd ál bɔbɛ dɛbá mégúsúg, gɔsɔ́g na mɔnd uwɔ́ búgenúlín agagá. 2Búnyɛ́ menyí bese ká bádɔ́ŋ wɔ́ gianta gá nɛdany agá ekelu, béti wɔ́ agá manáŋ abɔ́sa, na ká úbúbényi mɔnd umányaná udigɔ́nɛ́n agá guádáb. 3Ánubɛ́nyáŋanyáŋ!
(Mat 18.15,21-22)
«Endimen wɔ́w mágual buanda bá bɔbɛ, gálɛ́dɛ́n wɔ́ bese na bese, úménúgi bielínyélínyé bág, nɛ́nɛ́n wɔ́. 4Ta ugual bɔbɛ bigúl bɛ́tɛ́ndád nomo gá buɔ́s, wuúl ɔgɔ́w gá masiá bigúl bɛ́tɛ́ndád nomo gá buɔ́s gá “gúsiguɔŋɛ́n bɛnɛnɛna”, nɛɛ́nɛ́n wɔ́.»
(Mat 17.20)
5Bafɔ́nɔfɔ́n abaál gá Ɔgúnɔ́ ká: «Ɔ́yɛ́kɛ́nɛ́n guádáb gás.» 6Uganyɛ gɔ́b ká: «Guádáb gán bánán ta siɔdɛd anyɛ ansamɔ wá ndásia, nunyɛ bɔ́guɔyɛdɛn bɔdɛ́d ebúné ká: “Bálɛ́g ány, ábɛ́gɔ́n agá manáŋ abɔ́sa”, búbiál nɔ́.
Bél buól bá kand mfié
7«Búmánɛ́g ká mɔnd agán gá ɔlɔŋ gúbianan eŋél buol walaná buol agág gá gisién, ɔ́gɔ ká úbídenyinyi wɔ́ bidug. Úmósiónd gá buol, mɔnd uwaány nyɛ bágual gág ká: “Ólo fiaŋ gesílukúmín ányánan e?” 8Saá ugaguál gág ká: “Nŋalɛ́n buanda bágúnyá, ébínúgi bɛla, ásɛŋafɛ́n. Ngaguál ímányá, imábúwá, igiány gigúl aŋuá ányá, ábúwá e?” 9Ugéguéŋin eŋél buol uwaány giod gá bese gaguál ká usaal buanda ubú ɔsɔ́guɔyɛdɛ́n wɔ́ ká waál e? 10Anaány búnyá sɔ́n gán. Númaála buanda gidigid ubú bɔ́sɔ́gunuɔ́yɛdɛn ká nuál, ɔ́nuɔyɛ́d ká: “Dinyɛ gɔɔ́gɔ bél buol, dɛmaál buol ubú dɛbiananá ká diál.”»
Gieŋugie gá beŋúnuŋun bát
11Ányɛ́ Yésu mábaán giáy gá Yelúsalɛm, uwandɛn agá ambál wá gus únyá na Samalí na Galilé. 12Agá nibíŋínín ná gɛdɔŋ, beŋúnuŋún bát oból gá gúsilumén naga. Ebénedélímín ayáyá, 13bágányá guɔyɔ ekelu magɔ́gɔ́n ká: «Yésu, ofúnyifúny, dián gɔsɔ́g.» 14Yésu gulɛ́ŋɛ́d bɔ́, uganyɛ gɔ́b ká: «Ánɔ́b guebídíyé aga aságɔsag wa Gɔdányá.» Bámáal bámányá guanda ká baába, ebéŋúg. 15Anɛ́ wa omoom máan ká uméŋúgu, uwond na gélem wuúl úgúményí Gɔdányá ekelu magɔ́gɔ́n. 16Uwasɛgɔɔ́n Yésu agá bɛgɔnd, nɔbɔl egegus gá gueŋen wɔ́ giod gá bese. Ɔwɔ e umabá wá Basamalítɛ́ŋ. 17Yésu ganyɛ gɔg ká: «Saá bem bát seéŋúg e, bɔsɔ́gɔ́ bá bányɛ́mányɛ nomo nyɛ nány e? 18Mɔnd dɛmábɛ́dágɛd ká wónd úsiéŋín giod gá bese, asiá eŋenyi ewe umónuóndo gá gúsigúményí Gɔdányá e?» 19Yésu ganyɛ gá Samalitɛ́ŋ uwaány ká: «Adɔ́g dɔ́mbɔ́, guádáb gɔ́w mógusódí.»
Gúul gá Bufuŋ bá Gɔdányá
20Buɔ́s búndodi, Bafalisiɛ́ŋ obófuún Yésu ká: «Bufuŋ bá Gɔdányá gól niík e?» Uwondinyi bɔ́ ká: «Bufuŋ bá Gɔdányá digoól nulɛ́ŋa bɔ́ geŋul geŋul. 21Bɔ́dɛgɔyɛd ká: “Énuúl, búnyɛ́ aya” ɔ́gɔ ká “Búbúné éné” gágual ká, búgányɛ agá gadágadá wanɔ, ánɔlɛ́ns nɔ́.»
Buɔ́s bégúul bá mɔɔn wá mɔnd
22Uwɔb nobusió uganyɛ gá Bafɔ́nɔfɔ́n bág ká: «Gɛsɛgɛl gesiege ɛgɛ́ nuganuámba guŋán yaŋuá Mɔɔn wá mɔnd ta gá buɔ́s búmoom, nudigaŋán.
23«Band gɔnuɔ́yɔɔn ká: “Uwúné, ɔ́gɔ́ uwe.” Nudibísésídényí, nudɛbɛ. 24Gɛsɛgɛl ɛgɛ́ imanyɛmany manyɛmɛnaná agá enie nibéŋ ná imelemend, iguédégényí eníné nibéŋ. Anaány búganúbá nam yaŋuá Mɔɔn wá mɔnd na buɔ́s bám bá guúl, 25búgaal guófoon gɔg ká yɔ́bɛ́g giod, band bá ínen bámbɛ́sáŋɔ́n.
(Mat 24.37-39)
26«Buɔ́s ubú yaŋuá Mɔɔn wá mɔnd ngenuúl, búgabá Kɔɔ́kɔ anyɛ́ búmáabɛ́dɔ́mbaán gá gigúl gá Nowé#17.26 Alɛ́ŋɛ́d mbɔbɔnɔ ya Nid 6,7, 27gigúl igiány, band manyánán, bábúwánan, bébígíŋe, bébénenyi, gutɔ guám buɔ́s ubú Nowé méebíŋín agá gilu; nɔbɔl unuéfúfi band gidigid. 28Búgabá anyɛ́ búmáabá gigúl gá Lóto, gigúl igiány, band manyánán, bábúwánan, bɔ́ndɔ́, béduénen, bágɔ́na, báfuága; 29buɔ́s Lóto mám Sódom, Gɔdányá uwegusi nɔbɔl ná indusu sá yoóg númólónín ugumuaná, unuéfúfi bɔ́ ták#17.29 Alɛ́ŋɛ́d mbɔbɔnɔ ya Nid 19.. 30Anaány búganúbá buɔ́s yaŋuá Mɔɔn wá mɔnd ngenuúl.
31«Buɔ́s ubuány, ewe uganúbá ndáliá agá nsaga diánd gúsel ká úbíŋín agá gians ká wɔ́gɔ́lɔɔ́n manda mág. Buanda búmóm na ewe uganúbá budiádany, udiánd guond agá nuyá. 32Ánubɛ́dágɛ́d buanda búmáal agány Lóto.#17.32 Gɔdányá máal gá agany Lot ká udibíguágálɛ́d anyɛ́ bámáamaán Sódɔm, agánd uwány uwabɛ́guagalɛd, uwɛ́y gikúm gá nɛgɔb. 33Ewe uganuámbɛd ká wánsɛg gusɔ́d gág genyími gú. Ewe uganuádáb ká únyími gusɔ́d gág, gansɛg gú. 34Ngúnuɔ́yɔɔn, budúg ubuány, band bándɛ maábá ɛmbɛ́diá agá nɛbɛd, bɔ́gɔgɔ́l omoom, bátɛɛ́n ondodió. 35Bagánd bándɛ báganúbá bágúla agá nɔgɔl, bɔ́gɔgɔ́l omoom, bátɛɛ́n ondodió.» [ 36]
37Bafɔ́nɔfɔ́n obófuún wɔ́ ká: «Ɔgúnɔ́, ubuány gabɛ́dɔ́mbaan nány e?» Uwondinyi ká: «kɔɔ́m gɛlɔŋ gá buanda nyá, kɔɔ́m agány munoni óbítiól tiólió.»
ទើបបានជ្រើសរើសហើយ៖
Lúkasa 17: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
