Lúkasa 10
10
Ndɔ́ma ya bafɔ́nɔfɔ́n bóndodi
(Mat 9.37-38; 10.7-16; Mál 6.8-11; Lúk 9.3-5)
1Agá gélem ány, Ɔgúnɔ uweyid band etín ádadɔ na bát na bándɛ, uwesuŋinyi bɔ́ bándɛ bándia agá bɔtísɔn na bɔkɔɔ́m gidigid umásígímánán ká wúban kɔ́. 2Uganyɛ gɔ́b ká: «Gugay nyɛ giod, begeyi siɔdɛd, ónubísógólónyí gɔg muát gugay ká údɔ́m begeyi gág gá gugay. 3Ánɔbɔ, mmánɔ́dɔ́m anyɛ bɛdɔ́mbá agá gadágadá wa banyaŋɛma. 4Nudɛ́bán muonyi, ta gɛgad, ta mfaŋáŋá#10.4 Bómodió guɔ́yɔ ká: mfaŋana., nudidélímén agá nŋili gá mbígélid.
5«Anyɛ́ nugenúbíŋín agá gians, nuakɛn guɔyɛdɛn band bányá kɔ́ ká: “Nsɛ́ bumben bá nanɔ”. 6Mɔnd mábá agá gians igiány unyá na bumbén, mbísógól yanɔ gólón gɛfɔn, kand nɔ́, mbísógól yanɔ digóloón gɛfɔn. 7Ánubábá agá gians igiány, nudɛbɔ́ndábá agá bíndodió. Núnyánan, nubúwánan, ubú baganúnúfánan kɔ́, gágual ká eŋél buol gúsigimanan na bɛnama.
8«Tísɔn gidigid nuségubíŋín gá wɔ́, bómónúgóli, ánunyánán buanda bégenúnuéŋin. 9Nuéŋúgenyi band bánúmaná agá tísɔn uwaány, nuond nuɔyɔɔn band bá tísɔn uwaány ká: “Bufuŋ bá Gɔdányá ganyɛ nanɔ” 10Tísɔn gidigid nugenúbíŋín gá wɔ́, bémeén gunúgólí, nuámaan agá bɔkɔ́m band lumenené giod nuɔyɔ ká: 11“Diménúgídídín otuútu wá tísɔn wanɔ únyá agás gá bɛgɔnd, ánulɛ́ns ká Bufuŋ bá Gɔdányá ganyɛ nanɔ.”
(Mat 11.21-23,24)
12«Ngúnuɔ́yɔɔn ká buɔ́s bá nɛ́gál, guɔ́bɛ́g gá band bá tísɔn uwaány, gadɔ́mb guɔ́bɛ́b gá band bá Sɔdɔ́m#10.12 Alɛ́ŋɛ́d mbɔbɔnɔ ya Nidúmin 19. Band bá tísɔn uwány mabá bála biád bá manda. . 13Gɔsɔ́g nanɔ band bá tísɔn wa Kolasíŋ, gɔsɔ́g nanɔ band bá tísɔn wa Bɛ́tɛ́sáyída, gágual ká, ɔ́gɔ bisey bímáabiála aganuá, mabiál agá tísɔn wa Tíl na Sidɔ́ŋ#10.13 Band bá bɔtísɔn abaan y mabá na giád gá ɔdɛm, kanyɛ Gɔdányá máasɔ́mb ká báfɔ́f. Alɛ́ŋɛ́d Esa 23; Ese 26-28; Amo 1.9-10 gesí búgányɛ gianta gá gɛsɛgɛl band bá tísɔn uwaány mélukúmín bébífuénen ɔtɔ́, bábiágaan bɛla bá nigú ká bédíye ká bégunúgi gusɔ́d. 14Buád buanda, buɔ́s ubú Gɔdányá genúgélenyi band, guɔ́bɛ́g gán gabá duúmé gɔdɔ́mb gá Tíl na Sidɔ́ŋ. 15Banuá gɔg band bá tísɔn wa Kafalanahúm, nugúbɛdága ká nugebíbúlígenyi guám ugumuana e? Ta, bégenúséli agá kɔɔ́m gá ebeguén.
16«Mɔnd unúbídɔ́lɛ́gɔnɔ́, yaŋuá wumbɛ́dɔ́lɛ́gɔnɔ́, ewe unúbisené, yaŋuá wumbisené, ewe wumbisene, gubise ewe umáandɔ́m.»
17Anyɛ́ bafɔ́nɔfɔ́n etín ádadɔ na bát na bándɛ móosióndo, bɔ́mɔ́ɔbɔɔ́n bese. Bágányɛ gág ká: «Ɔgúnɔ́, ɔgɔ́w gá ɔfɛ́n, biád bá bíliíndié sadiála ɛŋɔ́bɛnɔ anyɛ́ dɛságugála gá bɛ́.» 18Uganyɛ gɔ́b ká: «Nsánaan Sátan wáfúgaan ugumuana, gá gúsiguá anyɛ imanyimany. 19Ɔ́nubɛ́dɔ́lɛ́gɛ́n, ngunúfá bugaga bágúmadaan inyɔ́k na ɛ́ŋɛŋɛ, na bugaga bágúmányɛ́ganɛn bugaga bá ɔmbɛ́lɛmbɛ́l, ta buanda ɔbɔbɛ́ dɛganuál. 20Nudiyayábá gágual ká biád bá bíliíndié sanuála nŋɔ́bɛnɔ, ánuyayábá gágual ká ɛfɛ́n sán ganyɛ siɔ́ŋɔ́n ugumuana.»
Yésu mélinsí Sié
(Mat 11.25-27)
21Kɔ́ nɔ kɔ́, Ɛsámb yá Mefúny iyófuógi Yésu na gianta gá bɛdɔdɛn. Uganyɛ ká: «Ooo Babá, Ɔgúnɔ́ wá gus na muana, ngúgufánan isasádá yá nukany, gágual ká égudíye ebe bébísélenyé anyɛ bábayɔ ubú ɔmɔ́sɛ́gɛ́n band bányá na nsiŋi na gɔlɛns. Ooo Babá, búnyɛ anaány gágual ká égubíléne ká búbá nɔ́. 22Babá mamfá manda gidigid, ta mɔnd dɛgɔ́lɛnsan Mɔɔn asiá Sié, ta Mɔnd dɛgɔlɛnsaan Sié, asiá Mɔɔn, ta ebe Mɔɔn ámbaná gulinsi bɔ́.»
Bese wa bafɔ́nɔfɔ́n
(Mat 13.16-17)
23Yésu gubigebelidinyi bafɔ́nɔfɔ́n bág, uganyɛ gɔ́b bɔ́bɔ́ eŋényé ká: «Bese na eŋís yánaná ubú nuánaná! 24Búnyɛ nɔ́, ngúnuɔyɔn ká, giod gá mubús na befuŋ mambá ká baán ubú nuánaná, bɔ́bɔ́ ta guán, ká bɔ́b ubú nuɔ́bɔnɔ́, bɔ́bɔ́ ta guɔ́b.»
Ɛlɛ́ga, nŋili yá gusɔ́d gá kand nimaníná
(Mat 22.34-40; Mál 12.28-31)
25Oŋóŋ bisele ondodió uwadɔg ká waág Yésu agá yɔɔ́bɛ́dɛn, uganyɛ gág ká: «Ofúnyifúny, yaál nanyá ká ndáŋáb gusɔ́d gá kand nɛmanɛ́na e?» 26Yésu guondinyi ká: «Giág gínyá giɔ́ŋɔ́n agás gá bisele, agúsɔ́ŋɔ́na kɔ́ ká giág e?» 27Mɔnd uwondinyi wɔ́ ká: «Bíléné Ɔgúnɔ́ Gɔdányá wɔw na ɔdɛm wɔ́w gidigid, na ɛdány yɔ́w gidigid, na mbɛ́dágɛ́dɛ́n yɔ́w gidigid na magɛ́nda mɔ́w gidigid.» 28Yésu ganyɛ ká: «Omóndínyí bese, alá nɔ́ agabia gusɔ́d gá kand nɛmanɛ́ná.» 29Oŋóŋ bisele mambá gudíye ká unyɛ mɔnd unyá osi, owófún Yésu ká: «Ányá unyá endimen wamɛ e?» 30Yésu gág ká: «Mɔnd móolónín Yelúsalɛm, udúnúgen Yelíko. Gɔɔ́gɔ bɛmbuánsɛl máabɛ́ŋ wɔ́, ibiɔ́g manda ɔmɔ́ umáabiánán, ibiégide wɔ́, ibiósió bɛ́matɛ́n wɔ́ ány agɔ́ndán. 31Ubuámɛ́nɛn ká aságɔsag wa Gɔdányá medúnúgénín agá nŋili yaád ɛyány, anyɛ́ umáan mɔnd uwaány, uwabɛ́sándɔ́n wɔ́, uwanandán buáy ebúné, uwadɔ́mb. 32Nɛnám niád nímoom mɔnd wa nigúl ná Léfi máand gúsiámɛ́nɛ́n agá gád kɔɔ́m, uwaán wɔ́, uwabɛ́sándɔ́n wɔ́, uwadɔ́mb. 33Kányɛ mɔnd wa gɛdɔŋ gá Samalí umáabaán gá ɔŋɛnd, mándɛ́n agá nŋili iyaány, uwasiam, uwaán mɔnd uwaány, uwabɛ́sɛdɛnɛn wɔ́ mahan amádɛgɛn wɔ́. 34Uwɔb agág gá masiá, uwogódonyi wɔ́ mfeŋ, ná megud, na magɛ́b, uwagɔ́da sɛ́ na mándás, uwabɛ́dɔ́gɛn wɔ́ agág gá nnyád, uwɔban wɔ́ agá gians gá benyi, uwɔgɔ́l gɛsɛgɛl naga. 35Gúbélénenyi, uwɔsɔm muonyi muándɛ, gudóŋinyi gá ogiíg gians igiány, uganyɛ ká: “Sién ógódónyí wɔ́, anyɛ́ nsondónó gá ɔŋend, ngagusuɛn bɛdálag”. 36Yésu guɔ́yɛ́kɛnɛn ká: Agá band ebe bádadɔ, gú gɔ́w guán, unúm unyá sɔ́g mɔnd a wa mɔnd bɛmbuánsɛl máabɛ́ŋ é?» 37Ofúnyifúny bisele ganyɛ ká: «Sɔ́gɔ́ umáan wɔ́ gɔsɔ́g uwond uwedugún wɔ́.» Yésu gág ká: «Ála sɔ́n nɔ́.»
Manda ɔmɔgɔ́s na má bilunu
(Mat 9.16-17; Mál 2.21-22)
38Anyɛ́ Yésu máabá wanda na bafɔ́nɔfɔ́n bág agá nŋili, agánd mabá kɔ́ ɔfɛ́n ká Mata umáagɛ́ndɛ́gɛ́n wɔ́ agág gá nuyá. 39Umabiánán endimen waga agánd ɔfɛ́n ká Maliá. Maliá melukúmín agá bɛgɔnd bá Yésu gá gúbɛ́dɔ́lɛ́gɔɔn gufúnyifunyi gág. 40Mata mabá kɔ́ wala masɔ́m agá gians. Uwɔb agá masiá má Yésu, uganyɛ gág ká: «Ɔgúnɔ́, búdigúguala buanda ká endimen wám saŋnɛɛn yaŋuá eŋényé ká yálá buol ebue gidigid e? Ɔyɛ́dɛ́n wɔ́ gɔg ká Úsindúgún.» 41Ɔgúnɔ́ uwondinyi ká: «Máta, Máta ewe, aguágɛ́naan ond ebíyíken gá giod gá manda. 42Búmoom nyɛ́ kɔ́ búnyá bese, Maliá seyid ginɔ́g gá niaf, bédiínuélínyí wɔ́ nɛ́ ta gá buɔ́s.»
ទើបបានជ្រើសរើសហើយ៖
Lúkasa 10: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
