Sáŋa 8
8
1Yésu gɔ́b gɔg agá nɔgɔnd ná bolifié. 2Gúbélénenyi, uwond agá ɔnyɛb wá Gɔdányá, band gidigid bámáaba ány ebébídídíginin wɔ́. Uwelukumin, uwedúm gufúnyifunyi bɔ́. 3Umáal unyá gúfúnyifunyi bɔ́, gɛdam gá befúnyifúny bisele na Bafalisiɛ́ŋ gúulén agánd béméegegí wɔ́ wala gɛdáŋa, ebédényígenyi wɔ́ ogóbusió bá band. 4Bágányɛ gá Yésu ká: «Ofúnyifúny, dimégegí agánd ewe wala gɛdáŋa. 5Moyíso mɔdiɔ́yɛ́dɛ́n ká diɔ́nɔ nɛnama ná bagánd iniány na adány, aŋuá ɔguɔ́yɔ ká giág e?» 6Bámagála anaány ká bɔ́dɔ́lɛ́g wɔ́, ká úmáguɛn, bɔ́sɔ́mɛ́n wɔ́ bábaan wɔ́ agá nɛgál. Uwɔ́ gugudimid, gudúm guɔ́ŋɔ egegus na inɔ́nɔ́ yág. 7Anyɛ́ bámáabaán nobusió na gunɔdigɔnɔn wɔ́ na iŋófúnyi, uwabɔ́nɔ́g uganyɛ gɔ́b ká: «Nsɛ́ mɔnd umabásaná udiál gɛfal ákɛn guéti agánd ewe nɛdány.» 8Uwand gugudimid uwedúm guɔ́ŋɔ inyɔ́ŋ egegus. 9Anyɛ́ bɔ́mɔ́ɔb gugál uguány, abádɔgaan ány omoom omoom, gudúmín gá bilunu, obósió Yésu ány na agánd uwaány. 10Yésu máal ubúnúgana, uganyɛ gá agánd ká: «Agánd, band bád nyɛ nány e? Ta mɔnd udɛmágufá gɛgua ɔ́gɔ́ ɔ?» 11Uwondinyi ká: «Ta mɔnd Ɔgúnɔ́.» Yésu ganyɛ gág ká: «Yaŋuá sɔ́n ndigúgufánan gɛgua, ɛmbɛ, adiánd gual gɛfal ta buɔ́s.»
Yésu nyɛ gise gá gus
12Yésu uwand gudúm gugála gɔ́b, uganyɛ gɔ́b ká: «Inyɛ gise gá gus, ewe wunládaná gabia gise gá gusɔ́d, udínuánd guandɛd sɔ́n ta buɔ́s agá mbíne.» 13Bafalisiɛ́ŋ ganyɛ gɔg gág ká: «Anyɛ eŋél gɛ́laluá wɔw aŋuá muát, gɛ́laluá gɔ́w dɛbá na mfí.» 14Yésu guondinyi bɔ́ ká: «Agá meliŋítas inyɛ eŋél gɛ́laluá wam yaŋuá muát, gɛ́laluá gám nyɛ na mfí, gágual ká ngúlɛnsan kɔɔ́m yíleniné, na kɔɔ́m yɛbaná. Banuá gɔg nudɛgɔ́lɛnsaan ta kɔɔ́m yíleniné, ta kɔɔ́m yɛbaná. 15Yaŋuá, ndigúgélenyi ta mɔnd, banuá gɔg nugúgélenyi anyɛ band. 16Búmoól ká ngélenyi, nɛgál nám nyɛ busi, gágual ká ndɛbá yaŋuá eŋényé, inyɛ na Babá, uwɔ́ umáandɔ́m. 17Búnyɛ́ buɔ́ŋɔ́n agán gá bisele ká band bándɛ mɔ́ɔyɔ́ buanda búmoom, gɛ́laluá gɔ́b nyɛ́ na mfí. 18Inyɛ eŋél gɛ́laluá wam yaŋuá muát, Babá sɔ́n umándɔ́m gúŋélenyi gɛ́laluá.» 19Obófuún wɔ́ ká: «Tiɔ́ nyɛ nány e?» Uwondinyi ká: «Nudigúlɛnsaan ta yaŋuá, ta Babá. Núnlɛnsaán, gesí nugúlɛnsaan sɔ́n Babá.» 20Yésu mɔyɔ́ moóny amaány gɛsɛgɛl umáabá ufúnyifunyi agá ɔnyɛb wá Gɔdányá, kɔɔ́m báganá bɛbiág, mɔnd waguadɛgɛn wɔ́ dɛmabá, gágual ká gɛsɛgɛl gág mabá gímaányɛ gídísiég.
Yésu guɔ́yɔ gɔb gág agá masiá má sié
21Yésu guand guɔyɛdɛn bɔ́ ká: «Ngadɔ́mb, nugaŋamba, anyɛ́ nudiábáná bágɔb kɔɔ́m yɛbaná, nugegú agán gá gɛnana.» 22Beyúdɛn mɔyɔ́ bɔ́bɔ́ na bɔ́bɔ́ ká: «Unyɛ bágubia mbɛ́dágɛ́dɛ́n ya guɔbiɔ́n anyɛ́ wɔyɔnɔ́ ká: “kɔɔ́m yɛbaná nudɛbá bágɔb kɔ́”?» 23Uwondinyi bɔ́ ká: «Banuá nunyɛ agá gus egue, yaŋuá ngúlenin ugumuana. Bánuá, nuguɔ́bɔnɛn gus, yaŋuá ndɛguɔ́bɔnɛn na gú. 24Buád buanda imɔ́ɔnuɔ́yɛ́dɛ́n ká nugegú agán gá bɛnana. Gá guán, nudiguádábaán ká inyɛ uwɔ́ inyá, nugegú agán gá bɛnana.» 25Obófún Yésu gɔg ká: «Anyɛ ányá e?» Uganyɛ gɔ́b ká: «Ubú iméedúm gúnuɔ́yɔɔn gutɔ guedúm agá nidúmin. 26Manda mbiananá ká nnuɔ́yɔɔn, yónd ínúgélenyi gá mɔ́ nyɛ giod. Ewe umáandɔ́m nyɛ meliŋítas, buanda imɔ́ɔb wɔyɔ, búbú yɔyɔnɔ́ band gusúg.» 27Bɔ́bɔ́ gɔg bɔ́dimɔ́ɔb ká umabá ugálá agá giáy gílɛ́ŋaná Sié. 28Yésu guɔyɛdɛn bɔ́ gɔg ká: «Anyɛ́ nugenúmbúlígenyi yaŋuá Mɔɔn wá mɔnd, nugalɛns ká inyɛ ɔwɔ́ unyá. Nugalɛns sɔ́n ká ndiguála buanda gám gá muát, nguɔ́yɔ gɔg ɔbɔ́ Babá méemfúnyifúnyí. 29Ewe umáandɔ́m nyɛ́ nam, udigúŋnɛnaan yaŋuá eŋényé, gágual ká nguála bɛsɛgɛl gidigid buanda ulɛ́ganá.» 30Anyɛ́ umáabá ugálá anaány, giod gá band abádáb wɔ́. 31Yésu ganyɛ gá Beyúdɛn bámáadáb wɔ́ ká: «Númɔ́lɔb babɛ́gɔ́dɛ́nán gám gá gugál, nugabá bafɔ́nɔfɔ́n bám, 32nugalɛns meliŋítas, meliŋítas genuémi sɔ́n gá buɔ́l.» 33Obóndinyi wɔ́ ká: «Diguɔ́bɔnɛn na nugɔgɔ na Ábalahám, ta buɔ́s mɔnd mabása udidiíyí giɔ́l gá mɔnd. Nanyá ányá wɔguɔyɛd ká bégediémi gá buɔ́l e?» 34Yésu guondinyi ká: «Agá meliŋítas, ngúnuɔ́yɔɔn ká mɔnd gidigid walaná gɛfal nyɛ giɔ́l gá gɛfal. 35Giɔ́l dɛbá dɔ́ndɔ wa niíd ná gians ná band, nánié mɔɔn nyɛ́ dɔ́ndɔ busió bum. 36Yaŋuá Mɔɔn wá mɔnd, íménuémi gá buɔ́l, nugabá gɔg agá meliŋítas filí. 37Ngúlɛnsaan ká nunyɛ band bá nugɔgɔ ná Ábalahám. Anyɛ́ buóny bám diénúbíŋéníné gɔg, buád buanda nuambaná nŋili ya guŋɔɔ́n. 38Yaŋuá nguɔ́yɔ ubú Babá méendíyé, banuá gɔg nuguála ɔbɔ́ sié wanɔ mɔ́ɔnuɔ́yɛ́dɛ́n!» 39Ababák wɔ́ bágányɛ gág ká: «Sié wasɔ unyá Ábalaháma.» Yésu ganyɛ gɔ́b ka: «Ɔ́gɔ nunyɛ agá meliŋítas, baan bá Ábalaháma, ánualá sɔ́n bielínyélínyé bág. 40Nɛ́nuán gɔg, ta anyɛ́ nnyá gunuɔ́yɛdɛn meliŋítas ɔmɔ́ Gɔdányá méemfúnyifúnyí, banuá nuguámba nŋili ya guŋɔɔ́n. Ábalaháma dɛmaal nɛnama na buanda iniány. 41Banuá gɔg nuguála bielínyélínyé bá sié wanɔ.» Abábak wɔ́, bágányɛ gág ká: «Dɛdɛbá baan bá ɔɔ́nd. Digúbianan sié táŋ omoom unyá Gɔdányá.» 42Yésu guɔyɛdɛn bɔ́ ká: «Ɔ́gɔ Gɔdányá nyɛ agá meliŋítas sié wanɔ, gesí nugúŋlɛ́ga, gágual ká ngúlenin aga Gɔdányá, nnyɛ aya gág góbusió. Ndígubílín aya gám gá muát, ɔwɔ́ gɔg umáandɔ́m. 43Nudɛgɔ́sɔ́ŋɔ́na ubú nnuɔ́yɔnɔ́ gá giág e? Gágual ká nudɛbá agá edény wá gumbɛ́dɔ́lɛ́gɛn. 44Nunyɛ baan bá ɔmbɛ́lɛmbɛ́l, nugúlɛga guala ubú sié wanɔ bílénené. Guedúm agá bɛbanyɛ́gɛ́nɛ́n, unyɛ oŋónóniny, umabása udidélímín agá meliŋítas, gágual ká udiguɔ́yɔ meliŋítas. Gɛsɛgɛl unéŋené, uguɔ́yɔ moóny ubídáganá, gágual ká unyɛ ɔsɔ́bɔsɔ́b, uwɔ́ nɔ́ sié wa gɛsɔbɔ. 45Anyɛ́ yaŋuá yɔyɔnɔ́ gɔg meliŋítas, buád buanda nudiádábáná ubú yɔyɔnɔ́. 46Ányá agán gá ɔlɔŋ unyá wegudíye ká nguál gɛfal. Ímábá nguɔ́yɔ meliŋítas, gá giág nudiádábáná ubɔ́ yɔyɔnɔ́ e? 47Ewe unyá na Gɔdányá gúbɛ́dɔ́lɛ́gɔɔn moóny mág, banuá gɔg nudigumbɛ́dɔ́lɛ́gɔɔn gágual ká nudibá na Gɔdányá.» 48Beyúdɛn obóndinyi wɔ́ ká: «Digúbianan nɛɛ́m ná guɔyɛd ká anyɛ mɔnd wa gɛdɔŋ gá Samalí, ond abianan giád gá gíliíndié.» 49Uwondinyi bɔ́ ká: «Ágó, ndibá na giád gá gíliíndié. Yaŋuá gɔg, ngúbúlígenyi Sié wam, banuá nuen gumbúlígenyi! 50Ndɛguámba nugúm nám ná bɛ́muát, mɔnd#8.50 Mɔnd bɔ́yɔnɔ́ aya nyɛ Gɔdányá. nyɛ kɔ́ wuŋambanɛná nú, wond ugélenyinyi. 51Agá meliŋítas, ngúnuɔ́yɔɔn, mɔnd mábɛ́dɛ́gaan gugál gám, udiínugu.» 52Beyúdɛn ganyɛ gág ká: «Dɛgɔ́lɛnsan nɛ́nuán ká anyɛ na giád gá gíliíndié. Ábalaháma megú, mubús má Gɔdányá umuégú sɔ́n, aŋuá gɔg ɔguɔ́yɔ ká: “Ewe ubɛ́dɛ́ganá moóny mɔ́w, diínugú ta buɔ́s.” 53Sié wás Ábalaháma uméegú, agúbɛ́dága ká anyɛ ɔgɔ́n gág e? Mubús má Gɔdányá umuégú sɔ́n, ɔgúbígɔ́lɔɔn muát anyɛ giág e?» 54Uwondinyi bɔ́ ká: «Mbígúményí yaŋuá muát, gesí nugúm nám dɛbá ta onkól, ewe wumbúlígenyé unyá Sié wam, banuá nuɔyɔnɔ́ ká unyɛ Gɔdányá wanɔ. 55Nánié nudɛgɔ́lɛnsaan wɔ́, yaŋuá gɔg ngúlɛnsaan wɔ́. Mmɔ́yɛd ká ndɛgɔ́lɛnsaan wɔ́, ngabá ɔsɔ́bɔsɔ́b anyɛ banuá. Yaŋuá ngúlɛnsaan wɔ́ yond mbɛ́dɛ́gaan moóny mág. 56Ábalaháma sié wanɔ mabá agá bɛdɔdɛn anyɛ́ umáabɛ́dágɛ́d ká ugaán buɔ́s bám; umáan bú, uwɔɔ́b bese ta bɔ́guɔyɔ.» 57Beyúdɛn ganyɛ gág ká: «Amány adɛbiá ta duɔŋ etín ándɛ na duát, ɔyɔ gɔg ká águán Ábalaháma e?» 58Yésu guondinyi bɔ́ ká: «Agá meliŋítas, ká Ábalaháma sién úbá, yaŋuá imabá nganyɛ.» 59Abábád gɔg adány gá gúnɔnɔn wɔ́. Uwɔbiɔ́sɛgɛnɛn bɔ́, uwaám agá ɔnyɛb.
ទើបបានជ្រើសរើសហើយ៖
Sáŋa 8: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
