Sáŋa 2
2
Gisey góbusió
1Medug mándɛ máal mámáadɔ́mb, gigiŋ igiábiál kɔɔ́m bábɛ́laná ká Kána agá giéns gá gus gá Galilé. Inyódió Yésu mabá sɔ́n gá gɛ́. 2Bámabɛ́lɛ́gɛ́n sɔ́n Yésu na bafɔ́nɔfɔ́n bág. 3Magɛ́b máal mámáman, inyódió Yésu ganyɛ gág ká: «Bádɛ́gábá andɔ na magɛ́b.» 4Yésu guondinyi ká: «Iná, giág gɛ́ ɛ, aŋuá abiananá ká éndíye buanda inyá ká yaál e? Gɛsɛgɛl gám mányɛ gídiége.» 5Inyódió ganyɛ gá bél buol ká: «Ánualá buanda gidigid ugɔgúnúɔyɛd.» 6Museny mabá kɔ́ mútíndad. Beyúdɛn mabá bágaan madɛ́ga kɔ́ gá gúbɛ́sɔ́ga ɛmbɔ́g na mɔ́ ká, bábá begubeg agá eŋís yá Gɔdányá. Isény táŋ ímoom mabá bɔ́gúgɔ́l efide duged etín átán. 7Yésu guɔyɛdɛn bél buol ká: «Ónufuógónyí museny umuány mum na madɛ́ga»; obófuógi mú tás liéŋŋŋ. 8Uganyɛ gɔ́b ká: «Nɛ́nuán ɔ́nubɔ́ŋɛ́dɛ́d madɛ́ga nɔ́b nuéŋín mɔnd wendenyé budɔ́mb.» Ebénéŋín wɔ́ anyɛ́ umɔ́ɔyɛ́d. 9Mɔnd uwaány uwɔ́bɛ́dɛn madɛ́ga mámáabá mágányɛ magɛ́b. Udɛmalɛns kɔɔ́m mómóolín, bél buol béméenú madɛ́ga malɛnsán. Uwabɛ́lɛ́gɛn muát gigiŋ. 10Uganyɛ gá muát gigiŋ uwaány ká: «Mɔnd gidigid guákɛnan guéŋen magɛ́b má bese gá band, bámáman guódúg, ány weémenyé mádiábáná bese. Aŋuá asabɛ́dɛ́gɛn ma bese gusiám nɛ́nuán e?» 11Anaány Yésu máal gisey gág góbúsió agá tísɔn wa Kana, giéns gá gus gá Galilé. Uwedíye nugúm nág, bafɔ́nɔfɔ́n bág abádáb. 12Manda amaány máal mámáabɛ́dɔ́mbaan, uwedúnúg agá tísɔn wa Kapɛlɛnahúm, na inyódió, na belimen, na bafɔ́nɔfɔ́n bág. Bádɛmal kɔ́ medug giod.
Gɛsɔgɔna gá ɔnyɛb
(Mat 21.12-17; Mál 11.15-17; Lúk 19.45-46)
13Budɔ́mb bá guáŋɛ́g bá Beyúdɛn máal búgányɛ egúy, Yésu uwɔb Yelúsalɛm. 14Uwɔfuɔgɛn agá ɔnyɛb wá Gɔdányá, bedús mélúke, na bɛdɔ́mbá, na munúg. Benúg muonyi mabá sɔ́n kɔ́. 15Umáal ná gual nusué nág ná iŋoli, uwakɔ́ŋa bɔ́ agá ɔnyɛb wá Gɔdányá, na mélúke, na bɛdɔ́mbá e. Uwegusenyi bɛdál bɔ́b bá nionyi, muonyi má benúg muonyi umuáfamfam. 16Uganyɛ gá bedús munug ká: «Nudisiíyi gians gá Babá kɔɔ́m gá nionyi, énuŋélínyí mɔ́ ány.» 17Bafɔ́nɔfɔ́n bág abábɛ́dágɛd ká búnyɛ buɔ́ŋɔ́n ká: Gɔdányá, ɛlɛ́ga mbiananá gá nuyá nɔ́w nyɛ gianta ta bɔ́guɔyɔ#2.17 Alɛ́ŋɛ́d Isayí 69.10. 18Bagɔn bá Beyúdɛn ɔbɔ́gɔ́l gugál, bágányɛ gág ká: «Gisey gínúm agagúnuál ány ká édídíye ká anyɛ na bugaga báguala manda amaány e?» 19Uwondinyi bɔ́ ká: «Ánugád ɔnyɛb wá Gɔdányá ewe, gá medug mádadɔ, yédugi wɔ́.» 20Beyúdɛn ganyɛ gág ká: «Bámáal etín ándɛ na duɔŋ dútíndád gá gufuág ɔnyɛb wá Gɔdányá; aŋuá ɔyɛd ká, gá mɔɔ́s mádadɔ édugi wɔ́ e?» 21Gians ɛgɛ́ Yésu máabá wɔyɔ mabá nuɔ́l nág. 22Buád buanda, anyɛ́ Yésu máanyɔ́g aga ebeguén, bafɔ́nɔfɔ́n bág abábɛ́dágɛd ká umɔyɔ́n bɔ́ bú. Abádáb gugál gá Yésu na ugú Musamb má Imbɔbɔnɔ ɔ́yɔnɔ́.
Yésu gɔ́lɛnsan ɔdɛm wá mɔnd táaaa
23Yésu máal umáanyá gúbába Yelúsalɛm gɛsɛgɛl gá budɔmb báguáŋɛ́g, giod máadábaán wɔ́ gágual ká bámáanaán bisey ɛbɛ́ umáalá. 24Búdimala wɔ́ gɔg ta buanda gágual ká umalɛnsaán bɔ́ gidigid bese na bese. 25Búdimóofoon ká bɔ́yɔɔn wɔ́ gubá gá band, gágual ká umalɛnsaán ɛdɛm sɔ́b.
ទើបបានជ្រើសរើសហើយ៖
Sáŋa 2: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
