Sáŋa 19
19
1Piláta guɔyɛd ká bóloón Yésu bégíde wɔ́ na nusue. 2Musia umuág agá ɔduɔ́ wá Yésu ndanyá múmáanugá na duoli dá insánd; umuónd umuág wɔ́ gɛla gá lóoo. 3Bámabá bábɛ́nyɛkanɛn wɔ́ bɔ́yɔ ká: «Dimégubígélídi ofuŋ wá Beyúdɛn!» Bónd básába wɔ́ ɛmbɛ́l.
4Piláta guand guám agá ɔɔ́nd uganyɛ gá giŋi gá band ká: «Ɔ́numbɛ́dɔ́lɛ́gɛ́n, yéŋin bugaga bágual ká bénúlénin wɔ́ aya agá ɔɔ́nd, ány nugagúlɛns ká ndɛmaán gɛbɔ́liɔ́ agá nuɔ́l ná mɔnd ewe gísígimananá ká mfúdi wɔ́.» 5Yésu guám, umabiánán ndanyá ya insánd agá ɔduɔ́ na gɛla lóoo. Piláta ganyɛ gɔ́b ká: «Ánulɛ́ŋa, mɔnd waád ewe!» 6Anyɛ́ gɔg bɔgɔ́gɔ na begiíg ɔnyɛb wá Gɔdányá máan wɔ́, ebédúm guánsa bɔyɔ ká: «Sánd wɔ́ agá kolos, sánd wɔ́ agá kolos!» Piláta guondinyi bɔ́ ká: «Ánɔɔ́b guasánd wɔ́ banuá muát agá kolos, gágual ká yaŋuá ndiguánaán gɛbɔ́liɔ́ giálaná ká mfúdi wɔ́.» 7Bágányɛ gág ká: «Digúbianan gisele, gisele igiány guɔ́yɔ ká bɔɔ́n wɔ́, gágual ká usɔyɛd ká unyɛ mɔɔn wá Gɔdányá.» 8Piláta máal na guɔ́b anaány uwand gubia buwa gɔdɔ́mb anaány. 9Uwond agá gians, uwófún Yésu ká: «Nány óloninó?» Yésu dimondinyi wɔ́. 10Piláta ganyɛ gág ká: «Adɛguámba guŋondinyi e? Adɛgɔ́lɛnsan ká ngúbianan bugaga bɔ́guɔyɛd ká bágɔ́nɛ́n ta ɔ́g ká bágúsand agá kolos e?» 11Uwondinyi wɔ́ ká: «Ta bugaga búmoom adɛgúbianan agá nuɔ́l nám, búmén búdɛ́bá bugaga Gɔdányá máagɔfá. Buád buanda gifudie gá mɔnd uségundú ɔgɔ́w gá ɛmbɔ́g dɔ́mbaná gɔ́w.» 12Gudúm ány, Piláta uwedúm guamba nŋili ya gual ká únɛɛn wɔ́. Beyúdɛn gɔg ebédúm guánsá bɔ́yɔ ká: «Ámánɛɛn mɔnd uwaány, gúgúnyá ká adɛbá buanda na ofuŋ uwɔgɔ́n! Mɔnd ubiɔ́yɔnɔ́ ká unyɛ ofuŋ, unyɛ ɔmbɛ́lɛmbɛ́l wa ofuŋ uwɔgɔ́n!» 13Piláta máal na guɔ́b anaány, uwɔyɛd ká bémi Yésu agá ɔɔ́nd; uwɔ́ gulukumin agá niluku ná mɔnd ugélenyinyé, agá balánda wa adány bábɛ́laná na nuébelé ká Gabata. 14Manda amaány mabɛ́dɔ́mbaán agá gélem gá ɔdɛm wá buɔ́s, budɔ́mb bá Pásika mabá ká búgabá mémbelibél. Piláta ganyɛ gá Beyúdɛn ká: «Ɛ́nɛ́ ofuŋ wán ewe!» 15Ebédúm guánsa bɔ́yɔ ká: «Ɔɔ́n wɔ́! Ɔɔ́n wɔ́! Sánd wɔ́ agá kolos!» Uwɔ́ guófún bɔ́ ká: «Búguófoon ká nsánd ofuŋ wán agá kolos e?» Bɔgɔ́gɔ guondinyi ká: «Dɛdɛgúbianan ofuŋ ómodió gúmén gúdɛ́bá ofuŋ uwɔgɔ́n Sesála.» 16Piláta gɔg guduún bɔ́ Yésu ká básánd wɔ́ agá kolos.
Bámásánd Yésu agá ɛgɔnɔ
(Mat 27.32-44; Mál 15.21-32; Lúk 23.26-43)
Abádɔ́mbán Yésu. 17Yésu muát gɔbɛ́dɔ́gɛ́n kolos waga ká waám tísɔn, gutɔ guám kɔɔ́m bábɛ́laná ká Ginkólóŋ kólóŋ gá ɔduɔ́ bágúbɛ́laan gɛ́ na nuhebele ká Gɔlɔgɔ́ta. 18Agá kɔɔ́m agany bámaásánd wɔ́, bámasánd sɔ́n kɔ́ band bándɛ, Yésu mabá gadágadá wɔbɔ. 19Piláta mɔyɛ́d ká bɔɔ́ŋ agá ɔkɔ́k, baág agá ɛgɔnɔ. Inyɔ́ŋ bɔ́mɔ́ɔŋ agá ɔkɔ́k uwaány mabá siɔ́yɔ ká: «Yésu wa Násalɛd, ofuŋ wá Beyúdɛn.» 20Beyúdɛn giod mabanaán inyɔ́ŋ isiány, gágual ká sɛ́mabá siɔ́ŋɔ́n na nuébelé, na nugɛlɛ́ka, na nulatɛ́ŋa, and sɔ́n kɔɔ́m bámáasánd wɔ́ mabá egúy na tísɔn. 21Bɔgɔ́gɔ ganyɛ gá Piláta ká: «Adɛmásɛgɛmanan guɔyɛd ká bɔɔ́ŋ ká “Ofuŋ wá Beyúdɛn” besé ɔyɛd ká bɔɔ́ŋ ká “Ginɔg egie sɔyɛd ká: Inyɛ ofuŋ wá Beyúdɛn”.» 22Uwondinyi bɔ́ ká: «Buanda ɔbɔ́ nsɔ́guɔ́n gagúbá kɔɔ́kɔ́ anaány.»
23Musia máal nágusand Yésu, umuɔ́gɔ́l bɛla bág umuáfɛd gá eluku éní, na mɔɔná na ɛnág. Ɔbɔ́gɔ́l sɔ́n sugude umáabiág gúsigúsié wa bɛla, gɛla igiány mabá gɛnɔgán gudúm agá ɔduɔ́ gutɔ guám egegus, gidimabianan eledié. 24Umuɔ́bɔ́n, múganyɛ ká: «Dɛdɛláf sugude ewe, nsɛ́ dísɛ́lɛ́g wɔ́ gá guán mɔnd ubiananá ká úgɔ́l wɔ́.» Anaány ká buóny búmɔɔ́biɔ́yɛ́d agá ɛŋɔ́ŋɛ́n ká: Básabiáfaan bɛla bám, bómónd bámásɛ́lɛ́g sugude wam. Buanda ubuány musia máal.
25Inyódió Yésu mabá egúy na kolos ɔwɔ́ Yésu máabá asandán, endimen inyódió mabá sɔ́n kɔ́, na Maliá agany Kɛlɛyópasa, na Maliá Magadalá. 26Umáal naguán inyódió egúy na ɔfɔ́nɔfɔ́n umáabá ubíléne giod, uganyɛ gág ká: «Inaá gɔ́lɔɔ́n wɔ́ anyɛ mɔɔn wɔ́w.» 27Uwɔyɛd gá ɔfɔ́nɔfɔ́n uwaány ká: «Gɔ́lɔɔ́n wɔ́ anyɛ nigódió.» Gudúm ány, uwedúm gugɔ́lɔɔ́n inyódió Yésu anyɛ mɔnd wa niíd nág ná gians.
Nigú ná Yésu
(Mat 27.45-56; Mál 15.33-41; Lúk 23.44-49)
28Agá gélem, anyɛ́ Yésu máalɛnsaán buand búmóofoón ká búsiám masiám. Uwagálɛ́d, anaány ká ɛŋɔ́ŋɛ́n bífuógidonyi. Uganyɛ ká: «Nɛɛ́da gúŋnúma. #19.28 Dɛlɛ́ŋɛ́d ps 69.22» 29Gisuá mabá agá kɔɔ́m agany, gimáabá gifuógón na magɛ́b matuán. Ebéyub giyugu agá magɛ́b, abábayɔɔn gɛ́, abaág gɛ́ agá nsónsó ya gɛgas gá bɔgɔ́nɛd bábɛ́laná ká isop, ebédugi gɛ́ gutɔ guám agá niíd ná Yésu. 30Yésu máal úmɔ́sɔ́sɛ́d gɛ́, uganyɛ ká: «Buand búnyá guófoon ká búbiál mámán gúbiál», agá gélem ány, uwadáb ɔlɔŋɛ, uwáfɛ́gɛn ambak.
Bómófól nɔ́ndɔ ná Yésu
31Búmabá Felédé, budug bámáabá bábɛ́kálaŋa gá budɔ́mb bá sábát. Bagɔn bá Beyúdɛn dɛmamba ká bɛlɔŋ lɔ́bɛn agá mugɔnɔ budug bá sábát. Gá guán, budug ubuány nyɛ gianta gɔ́b góbusió. Obófún Piláta ká: Diguamba ká básɔ́mb bɔ́ bɛgɔnd bónd béli bɛlɔ́ŋ bɔ́b agá mugɔnɔ. 32Musia umuúl umuáganda biko bá bɛgɔnd bá mɔnd uwomoom, umuónd umuágand má mɔnd wa gándɛ bámáasánd na Yésu. 33Anyɛ́ bámáab guám agá Yésu, abaán ká umabá umámán gúgú; buád buanda béméen gugand bɛgɔnd bág. 34Isia yá ímoom iyófol wɔ́ buáy bág búmoom na niɔŋɔ, na manɔŋ na madɛ́ga gudúmbi gudúm guámaan. 35Mɔnd wɔyɔnɔ́ manda eme, umáan mɔ́ bese na bese na eŋís yág. Ubú wɔyɔnɔ́ nyɛ meliŋítas. Ugúlɛnsaan ká uguɔ́yɔ meliŋítas ká banuá sɔ́n nuádáb#19.35 Bómodió guɔ́yɔ ká nuádában. 36Gá guán, manda amaány mabiálá anaány ká ɛŋɔ́ŋɛ́n sá mbɔbɔnɔ bífuógidonyi; síguɔ́yɔ ká: Bɔ́digɔbɛ́gɔ́dɛn ta giko gág gímoom#19.36 Alɛ́ŋɛ́d Esod 12.46; Nob 9.12; ps 34.21. 37Búnyɛ buɔ́ŋɔ́n sɔ́n agá giéns gá mbɔbɔnɔ gímodió ká: Bágalɛ́ŋa ewe bómóofól nɔndɔ.#19.37 Sak 12.10
Munyon má Yésu
(Mat 27.57-61; Mál 15.42-47; Lúk 23.50-56)
38Agá gélem gá manda amaány, Yɔ́sɛba wa tísɔn bábɛ́laná ká Alimaté gɔb guobiófún agá Piláta, ímábá unyɛ bágúfá wɔ́ bugaga bágual ká wɔ́b wɔ́gɔ́l gɛlɔŋ gá Yésu wónyó. Piláta guádábɛn wɔ́; uwɔnɔgɔ́l gɛ́. Yɔ́sɛba mabá ɔfɔ́nɔfɔ́n wá Yésu, gágual ká umabiánán gɔg buwa na bagɔn bá Beyúdɛn, buád buanda umáabá ubíɔsɛgɔɔn. 39Nikodɛ́ma guúl sɔ́n, waád Nikodɛ́ma nyɛ mɔnd umáab guán Yésu nsua na nsua na budug. Umóolón buanda anyɛ bokílo nitín na bát bá megud má ɔlɔf, madábɔ́nán ná miíl bulény bulény na Alɔwɛ́s. 40Bɔ́bɔ́ bem bándɛ #19.40 Na Nikodɛ́ma na Yɔ́sɛba ebémúŋe gɛlɔŋ gá Yésu na biéns bá bɛla, obódinoon wɔ́ megud má ɔlɔ́f, gɔɔ́gɔ anyɛ́ Beyúdɛn ganyá bádábɔ́na bɛlɔ́ŋ bɔ́b gɛsɛgɛl gá gúnyo. 41Gɛsɔ́mb mabá egúy na kɔɔ́m bámáasánd Yésu. Agá gɛsɔ́mb igiány, gɛbɛl gɛgɔ́s mábá kɔ́, bámáabá bámányɛ bódínyó mɔnd gá gɛ́. 42Anyɛ́ búmáabá ɔmbɛ́d wá sábát, na nɔ́ sɔ́n ká gɛbɛl mabá egúy, obónyo Yésu.
ទើបបានជ្រើសរើសហើយ៖
Sáŋa 19: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
