Bielínyélínyé 8
8
1Sɔ́lɔ, uwɔ́ umáabá ekelu na ebe bɔ́mɔ́ɔn Ítiene.
Guobígi gá Béedeb bá busió
Buɔ́s buád, abábanyɛg guóbigonyi Beédéb bá Yelúsalɛm bugaga. Beédéb gidigid abásálámand agá biéns bá gus bá Yudé na Samalí, asiá bedúmeb béméesién. 2Band bá nuládád na Gɔdányá obónyo Ítiene, obónd abábaŋa wɔ́ giod. 3Sɔ́lɔ, uwɔ́, umabɛ́kɛ́ndɛ́naán gá gúgényígenyi beédéb, umóol úbíŋén agá sig nuyá, wémenyi beédéb, na bagánd, na banɔ́mandɔ, wétenyi bɔ́ agá gians gá mbíne. 4Ebe bámáasálámándaán móol bábaán mɔkɔɔ́m mɔkɔɔ́m, boól bédúmbényí Ndág ya Nsɔ́m.
Gugál gá Gɔdányá Samali
5Anaány gɔg Fílibe méedúnúg aga tísɔn wa Samalí omodió gá gudúmbenyi Ndág ya Nsɔ́m ya Kilíse. 6Biŋi ibiónd ekelu omoom, ibiábɛ́gɔ́dɛ́n gugál gá Fílibe, gágual ká, bímɔ́ɔbɔɔ́n bisey ɛbɛ́ umáalá biónd biánɛ́ganɛg. 7Biád bá bíliíndié giod máamán aga band bámáabiánán bɛ́, biágaan dugogó. Giod gá binsúgule na bióŋ méeŋúgeén. 8Giod gá bɛdɔdɛn igiábá agá tísɔn uwaány. 9Mɔnd mabá ulɔbɔɔn agá tísɔn uwaány búgányɛ gianta gá gɛsɛgɛl. Ɔfɛ́n wág mabá Símune, umabá aŋanyány, ukémenyi band bá Samalí, umabá ubiɔ́yɔ ká unyɛ mɔnd wa mfí. 10Band gidigid mabɛ́gɔ́dɛ́n wɔ́, gubanyɛg gá baábayɔ, guám agá bagɔn. Bámabá bɔ́yɔ ká: «Mɔnd ewe nyɛ bugaga bá Gɔdányá ubú bábɛ́laná ká bugaga ubɔgɔ́n.» 11Bámabɛ́gɔ́dɛ́n wɔ́ anaány gianta gá gɛsɛgɛl, gágual ká umabá ukémenyi bɔ́ na manyɛ mág. 12Anɛ́ bámáadáb Ndág ya Nsɔ́m ya bufuŋ bá Gɔdányá na ɔfɛ́n wá Yésu kilíse ɔwɔ́ Fílibe mɔ́ɔyɔɔ́n bɔ́, na bagánd na banɔ́mandɔ ebébíduenen. 13Símune uwɔ́ muát uwɛɛ́y eŋédéb, uwebídu, udɛmand gutɛ́naán Fílibe. Anɛ́ umáanaán mesey na melinsi mámáabiálá, uwɔ́ muát, uwedúm guméŋemeŋ. 14Anɛ́ bɔ́mɔ́ɔb ká band bá Samalí magɛ́ndɛgɛ́n gugál gá Gɔdányá, bedúmeb bámáabá Yelúsalɛm abádɔ́mɛ́n bɔ́ na Piéle na Sáŋa. 15Bámáal na guege, obóbísógólonyi góbusió bá Basamalitɛ́ŋ ká bágɛ́ndɛ́gɛn Ɛsámb yá Mefúny. 16Gá guán, Ɛsámb yá Mefúny mabá ímáanyɛ ídíselín ta mɔnd omoom ɔgɔ́b gá ɔlɔŋ. Gɔɔ́gɔ nduén bámáabiá gusúg agá ɔfɛ́n wá Ɔgúnɔ́ Yésu. 17Na Piéle na Sáŋa abádála bɔ́ ɛmbɔg agá ɛduá, abábia Ɛsámb yá Mefúny. 18Anɛ́ Símune máan ká beédéb mábiá Ɛsámb yá Mefúny gigúl ɛgɛ́ bedúmeb máadálá bɔ́ ɛmbɔ́g, uwadán ká wéŋin na Piéle na Sáŋa muonyi. 19Uganyɛ ká: «Ánumfá yaŋuá sɔ́n bugaga ubuány nɛnama nɛ́nyá ká ebe ɔbɔ́ nganúdála bɔ́ ɛmbɔ́g, bábia Ɛsámb yá Mefúny.» 20Piéle guondinyi wɔ́ gɔg ká: «Nsɛ́ na muonyi mɔ́w, nɔw muát núnyím anyɛ́ abɛ́dáganá ká bányɛ bɔ́guɔ́nd mfaán yá Gɔdányá na muonyi. 21Adɛgúbianan ta andáŋáb, ta ndán agá busɔ́m ebue, gágual ká ɔdɛm wɔ́w dɛbá osi ogóbusió bá Gɔdányá. 22Bíbísíd biád bɔ́w bá ɛmbɛ́dágɛ́dɛ́n, óbísógólidi Ɔgúnɔ́ ɔ́gɔ unyɛ bágɔ́gɔtɛ́nɛn gɔ́w gá biád bá ɛmbɛ́dágɛ́dɛ́n. 23Nguánan ká ɔdɛm wɔ́w nyɛ gulal giod, aŋuá giɔ́l gá bɔbɛ.» 24Símune ganyɛ gá Piéle na Sáŋa ká: «Ónubísógólónyí banuá muát Ɔgúnɔ́ gám góbusió ká buand bá bɔbɛ dɛŋala agá manda ɔmɔ́ numɔ́nuɔyɔ́.» 25Na Piéle na Sáŋa mɔyɔ́ manda ɔmɔ́ bámáanaán obónd ɔbɔ́bɔɔn anyɛ́ béméedúmbényí gugál gá Ɔgúnɔ́. Agá gélem ány, obónd gɔg Yelúsalɛm. Agá nŋili, oboól bédúmbényí Ndág ya Nsɔ́m agá bɛdɔŋ giod bá Samalí.
Na Fílibe na eŋeli buól wa ngɔ́mɔnɔ wa gɛdɔŋ gá Etiopí
26Ɛ́ngɛlɛs ya Ɔgúnɔ́ ganyɛ gá Fílibe ká: «Ɛmbɛ gɛmbádá wa gɛdɔŋ, agá nŋili idúnúgené, gudúm Yelúsalɛm, guám Gása. Nɛ́nuán aya, mɔnd dɛbá agá nŋili.» 27Fílibe uwedúmbi gudɔ́mb. Agá nŋili, uwaán mɔnd. Mɔnd uwaány mabá ngɔ́mɔnɔ wa mfí agá gɛdɔŋ gá Etiopí. Umabá ulɛ́ŋá masɔ́m má muonyi má ofuŋ uwagánd bábɛ́laná ká Kandása. Mɔnd uwaány mabá usiondoón gá mbísógól Yelúsalɛm, 28Umabá ílúkié agág gá gɛgálɛ́d ɛgɛ́ nnyát gɔ́gɔnɔ́, wondoon agagá. Wuúl úbánán mbɔbɔnɔ ya ibús Isayí. 29Ɛsámb yá Mefúny ganyɛ gá Fílibe ká: «Bídídígín, ɔ́fuɔ́gɛ́n gɛgálɛ́d.» 30Fílibe gɔb na ɔdɛd, wɔ́bɔɔ́n anyɛ́ mɔnd uwaány bananá mbɔbɔnɔ ya ibús Isayí. Fílibe ganyɛ gág ká: «Agɔ́sɔ́ŋɔ́na buand ubú abananá bese na bese e?» 31Mɔnd guondinyi ká: «Nanyá inyá bágubá nsɔ́ŋɔ́n, mɔnd máal udindémbúgínyí e?» Uganyɛ gá Fílibe ká úbɔ́lɛ́g agá gɛgálɛ́d úlúkumin agág gá masiá. 32Giéns gá mbɔbɔnɔ ɛgɛ́ umáabá ubanan mɔyɔ́ ká:
Bémendényí wɔ́ anɛ ɛdɔ́dɔ́mbá,
ɛyɛ́ bábaná na yɛ́ agá nisigíd bidug
gɔɔ́gɔ́ anɛ ɛdɔ́dɔ́mbá ídiábaŋáná gigúl bámuananá yɛ́ meyed,
udimagálɛ́d.
33Agá gubíséli gág,
ebeén gusɔ́mb buóny bág anyɛ́ buófonó.
Uwɔ́ ta gubia mɔnd wa guamɛnɛn wɔ́,
Ta mɔnd udigɔyɔ buóny bá baan bág.
Anaány gúnyá ká, bámasɔ́mb gusɔ́d gág egegus.
34Gianta gá mɔnd igiány ganyɛ gá Fílibe ká: «Sígol, ibús eye gúgála buóny bány e? Bág bá bɛ́muát e, ɔ́gɔ bá sɔ́gɔ́ ondodi e?» 35Fílibe gugɔ́l gugál, gubanyɛg agá giéns igiány, uwɔyɔɔn mɔnd uwaány Ndág ya Nsɔ́m ya Yésu. 36Anɛ́ bámáabá bɔ́yɔ moóny bánda, abánaám kɔɔ́m madɛ́ga máabá, gianta gá mɔnd igiány ganyɛ gág ká: «Madɛ́ga eme, giág gílégené ká ndibídú e?» [ 37#8.37 Bɔ́guɔ́yɔ agá imbɔbɔnɔ síndodió ká: Fílibe ganyɛ gág ká: «Ámádában na ɔdɛm wɔ́w gidigid, anyɛ wagubia nduen.» Mɔnd uwány guondinyi ká: «Nguádában ká Yésu Kilíse nyɛ mɔɔn wá Gɔdányá.»] 38Uwedényígenyi gɛgálɛ́d, ebeseel bɔ́bɔ́ beem agá madɛ́ga, Fílibe uwedu wɔ́. 39Bámáal bámaán agá madɛ́ga, Gíliíndié gá Ɔgúnɔ́ igiádɔ́mbán Fílibe, gianta gá mɔnd igiány ta guand guán wɔ́, ta anaány, igɛɛ́b nobusió na ɔŋɛnd agá bɛdɔdɛn nagadá. 40Fílibe uwɔ́ uwɔnɔbifuɔ́g uganyɛ Asót, wuúl údúmbényí Ndág ya Nsɔ́m agá bɔtísɔn gidigid ɔbɔ́ umáabá uyɔgaan, guám anyɛ́ umáab guég agá gianta gá tísɔn bábɛ́laná ká Sesalé.
ទើបបានជ្រើសរើសហើយ៖
Bielínyélínyé 8: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
