Bielínyélínyé 6
6
Gudɔ́bɔ́n gá band bátíndád nomo ká bédúgúné bedúmeb
1Agá medug amaány, bafɔ́nɔfɔ́n mɔbiɔ́yɛ́kɛ́nɛ́n, beédéb bágálaná nugɛlɛ́ka ebédúm gubɛ́dáda bɔsɔ́gɔ́ bágálaná nuébelé bɔ́yɔ ká: «Sig buɔ́siɔ́, gigúl báfaná manyán, bédiguéŋén bisi bá giɔ́b gás manyán nsɔ́b.» 2Bedúmeb bát na bándɛ abábɛ́lɛ́gɛn gilumén gá bafɔ́nɔfɔ́n gidigid, bágányɛ gɔ́b ká: «Búdɛ́bá osi ká dɛ́nɛɛn guɔyɔ gugál gá Gɔdányá ká diáfaan band manyán. 3Buád buand belimen, buófonó ká nuámbɛd agán gá ɔlɔŋ band bátɛ́ndád nomo ɔbɔ́ band ɔ́yɔnɔ bese gɔ́b, band bofuógón na Ɛsámb yá Mefúny, bábiananá sɔ́n nsiŋi, diéŋin bɔ́ buol ubuány. 4Basuá dɛgabaan nobusió na gubiéŋeen gá mbísógól na guɔyɔ gugál gá Gɔdányá.» 5Mbɛ́dágɛ́dɛ́n iyaány iyaal band gidigid bese. Ebéyid gɔg Ítiene, mɔnd umáabá ófuógón na giondiɔdɛ́mɔ́ na Ɛsámb yá Mefúny, ebéyid sɔ́n Fílibe, Polokólo, Nikanɔ́la, Timɔ́ŋɔ, Palamenása na Nikolasa mɔnd wa Antiyóso umáabɛ́gɔ́ŋɔ́n agá guádáb gá Beyúdɛn feké. 6Abaáb nɔbɔ ogóbúsió bá bedúmeb. Obóbisógólonyi gɔ́b góbusió abádálaan bɔ́ ɛmbɔ́g agá ɛduá. 7Gugál gá Gɔdányá mabaán nobusió na gubiɔ́yɔ, bafɔ́nɔfɔ́n giod biɔ́yɛ́kɔnɛn Yelúsalɛm. Baságɔsag giod ebéŋin ɛdɛm sɔ́b aga Yésu.
Giadɛgɛna gá Ítiene
8Gɔdányá méeŋín Ítiene bugaga na ɛlɛ́ga yág. Uwal bigégén bá manda na bianta bá mélinsi agá gadágadá wa band. 9Gɛdám gá band igiédundin wɔ́: Bámabá band bá gians gá mbísógól gá Beyúdɛn ɔfɛ́n ká: «Biɔ́l bínyá filí». Band bá Silɛn na Alɛkɛsandilí, Beyúdɛn bá Silisí na bá giéns gá gus gá Así. Abaáb gá gúsuŋenenyi na Ítiene. 10Badimabá bégúdémbényi naga, gágual ká umabiánán Ɛsámb yá Mefúny, íyɛ́ íméeŋén wɔ́ nsiŋi ya bugel. 11Ɔbɔ́nd gɔg band ká bɔ́yɛd ká: «Díguɔ́b wɔ́ usiga na Moyíso na Gɔdányá.» 12Anaány bémeéliígenyi band, bagɔn bá gɛdɔŋ na bóŋ bisele. Bɔ́bɔ́ gubílúgin Ítiene, guadɛgɛn wɔ́, abábaan wɔ́ agá nɛgál ɛnɛgɔn. 13Ány, abámbɛd bél bɛ́laluá bá bɛsɔbɔ ká bɔ́yɛd ká: «Mɔnd ewe gubaan nobusió na guɔyɔ biád bá moóny gá ɔnyɛb wá Gɔdányá na bisele bá Móyíso. 14Dímɔ́ɔb Ítiene wɔyɔ ká Yésu wa Násalɛd waád uwaány ánɔ́gád ɔnyɛb wá Gɔdányá wond únúgi bisele ɛbɛ́ Moyíso méediéŋín.» 15Ebe gidigid bámáabá lukúm lukúm agá kɔɔ́m gá nɛgál ɛnɛgɔn abádámb Ítiene eŋís, abaán ká busió bág nyɛ anyɛ busió bá ɛngɛlɛs.
ទើបបានជ្រើសរើសហើយ៖
Bielínyélínyé 6: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
