Bielínyélínyé 3
3
Giéŋugié gá gigónd agá ɔnyɛb wá Gɔdányá
1Buɔ́s búmodí, na Piéle na Sáŋa mabaán agá ɔnyɛb wá Gɔdányá gá mbísógól ya bɛsɛgɛl bɛ́dadɔ. 2Egúy na nibíŋínín na ɔnyɛb wá Gɔdányá bábɛ́laná ká: Gɛnɔ́g gá niíd ná gians, mɔnd mabá kɔ́ umáabá gigónd bébíbiéne waga. Sig buɔ́siɔ́ bámabá básiágaán wɔ́ ány ká wɔ́ŋɔɔn manda gá ebe bébíŋené agá ɔnyɛb wá Gɔdányá. 3Anɛ́ umáan na Piéle na Sáŋa bébíŋen agá ɔnyɛb, uwɔŋɛn bɔ́ muonyi. 4Abádámb wɔ́ eŋís sóoŋŋŋ. Piéle ganyɛ gág ká: «Dɛ́lɛ́ŋɛd» 5Mɔnd uwaány uwadámb bɔ́ eŋís sóoŋŋŋ, gágual ká umabá ubɛ́dága ká bágagufá wɔ́ buanda. 6Piéle ganyɛ gág gɔ́g ká: «Ndɛbá ta na muonyi ta na gól, buanda ubú mbiananá gɔg, mmágufá bú: Agá ɔfɛ́n wá Yésu Kilíse wá Násalɛd adɔ́g, ánda!» 7Uwadɛgɛn mɔnd agá ɔmbɔ́g uwɔnɛ́m, uwedugi mɔnd, kɔ́ nɔ kɔ́, bɛgɔnd na mugɔ́lɔgɔ́l má gigónd umuágɔ́nɛ́n, 8uwebénsén, uwedélímin, uwɔb gá guanda; uwebíŋín ɔlɔŋ nɔbɔ aga ɔnyɛb, wanda, uyalaba, ukanya Gɔdányá. 9Giŋi gá band igiánaan wɔ́ wanda, ugúmenyi Gɔdányá. 10Anyɛ́ bámáalɛ́ns ká uwɔ́ unyá mɔnd unyá gubá ilukié agá gɛnɔ́g gá niíd ná gians wɔŋɔɔn, bɔ́bɔ́ gidigid abábia buwa, béméŋeméŋ buand búmáamɛ́n wɔ́.
Gugál gá Piéle agá ɔnyɛ́b wa Gɔdányá
11Mɔnd uwaány dɛmand gutɛ́naán na Piéle na Sáŋa ta gá mɔɔn wá gɛsɛgɛl. Band gidigid ɔbɔ́bɔŋ bɔ́, béméŋeméŋ. Búmabá agá mugɔnɔ má balánda bábɛ́laná ká: Balánda wa Salomɔ́ŋɔ. 12Piéle máal wánaan anaány, uganyɛ gá giŋi gá band ká: «Band bá Ísalayɛl, Nugúméŋemeŋ ubú búmánubiál góbúsió bá giág e? Nugúdɛ́lɛ́ŋa anyɛ, agá bugaga na nuládad nás ná bɛ́muát dɛmanuál ká mɔnd uwaány ánda e?
13«Gɔdányá wa Ábalaháma, wa Ísaka na wa Yákɔba, Gɔdányá wa badadá séeŋin eŋél buol waga Yésu nugúm. Banuá numéedú wɔ́ unuond unuabɛ́sáŋɔ́n wɔ́ agá eŋís yá Piláta, búbú e Piláta muát masɔ́mb ká útɛɛ́n wɔ́. 14Unuabɛ́sáŋɔ́n ewe unyá Ɛsámb na osi, únuófún ká bánɔ́tɛ́nɛn oŋónónín. 15Ofuŋ wá gusɔ́d uwɔ́ numɔ́ɔn, Gɔdányá éguenyi wɔ́ aga ebeguén. Dɛnyɛ bél gɛ́laluá gá bú. 16Nɛ́nuán nuguánaan mɔnd ewe nuond nulɛnsaan wɔ́. Ɔfɛ́n wá Yésu úménuéŋúgí wɔ́ gágual ká diguóndonyi ɔdɛm agagá. Búnyɛ giondiɔdɛ́mɔ́ aga Yésu gímánuál ká wéŋúg busió bum anyɛ́ nuánaná.
17«Buam e, nŋɔ́lɛnsaan bese na bese ká nanɔ na bagɔn bán, numáal Yésu anaány gá kand gɔlɛnsa. 18Kányɛ gúnyá uwɔ́ Gɔdányá, umakɛ́n gugála agá eŋid yá mubús mág gidigid ká Kilíse waga ɔ́nuɔ́bɛ́gɔɔn, búbɔ́ búmónúbífuógídónyí. 19Enunúgí gubá gán, nuónd aga Gɔdányá ká wéli bɛfal bán. 20Ány Ɔgúnɔ́ ganúnúfá bɛsɛgɛl bá gudúkid, únúdɔ́mɛ́n Yésu, Kilíse uwɔ́ umáakɛ́n gueyid gán gobúsió. 21Wád Yésu gúbianan ká waál gubá ugumuana, guám agá gɛsɛgɛl ɛgɛ́ buand gidigid gonuónd gɛŋɛ́lɛŋɔ́siɔ, gɔɔ́gɔ anyɛ́ Gɔdányá mɔ́ɔyɔɔ́n mubús mág umɔ́ɔdɔ́bɔ́n nsua búgányɛ gianta gá gɛsɛgɛl. 22Gɔɔ́gɔ anyɛ́ Moyíso mɔ́ɔyɔ́ ká: Ɔgúnɔ́ Gɔdányá wanɔ ganɔ́dɔ́mɛ́n ibús anɛ yaŋuá, ígámɛ́n gadágadá wanɔ. Nugúbianan ká núbɛ́dɔlɛ́gɔɔn buand gidigid ígɔnúnuɔ́yɔɔn. 23Mɔnd gidigid ugenuén udibidɔ́lɛ́gɛ́n ibús iyaány genyím. 24Mubús má Gɔdányá gidigid, gubanyɛg aga Samuɛ́la na mubús múmáaládaán wɔ́ gá igɔ́b gɛsɛgɛl mɔyɔ́ ubú búbiálaná medúdug eme. 25Banuá nunyá baan bá mubús na bá nɛlad ɛnɛ́ Gɔdányá máal na besié bán, gigúl ɛgɛ́ umáal gá Ábalaháma ká: Nŋafɔn egúl yá gus gidigid agá gélem gá nɔgɔgɔ nɔ́w. 26Búnyɛ gán góbúsió Gɔdányá máakɛ́n gudɔ́bɔ́n eŋél buol waga ká únúfɔ́n, waál ká sig mɔnd a agán gá ɔlɔŋ tɛ́n biád bág bá bielínyélínyé.»
ទើបបានជ្រើសរើសហើយ៖
Bielínyélínyé 3: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
