Bielínyélínyé 16
16
1Pólo mánaám Dɛlɛbé, uwadɔ́mb Lisitɛ́lɛ. Ɔfɔ́nɔfɔɔ́n mabá kɔ́ ɔfɛ́n ká Timoté. Inyódió wág mabá eŋédeb wá Beyúdɛn. Sié wág mɔnd wa Gɛlɛ́k. 2Beédéb bámáabá bɔ́sɔ́dɔn Lisitɛ́lɛ na abá Ikonióm mɔyɔ́ ká Timoté nyɛ bese. 3Pólo mambá ká úgɔ́l Timoté anyɛ ogúl waga wa ɔŋɛnd. Uwɔgɔ́l wɔ́, uwans wɔ́, gágual ká Beyúdɛn bɔ́mɔ́ɔsɔ́dɔɔ́n kɔ́ malɛnsán ká sié wa Timoté mabá mɔnd wa Gɛlɛ́k. 4Agá bá tísɔ́n ɔbɔ́ Pólo na Silása máabá bádɔ́mbaan kɔ́, bɔ́mɔyɔɔ́n beédéb manda ɔmɔ́ na bedúmeb na bagɔn bá Yelúsalɛm máagɔ́d. Abaál gɔ́b ká bábiádɛgɛnɛn gá mɔ́ bese na bese. 5Giɔ́b gá beédéb magɔ́nɛ́nán agá guádáb. Giod gá beédéb sɔ́n mɔbiɔ́yɛ́kɔ́nɛ́n sig buɔ́siɔ́.
Ɔmbɛ́lɛ́gɛ́n wá Pólo Maseduán
6Na Pólo na Silása mayɔ́g biéns bá gus bá Filisí, na gá Galasí, ta gudélímin kɔ́ gágual ká Ɛsámb yá Mefúny melég bɔ́ guɔyɔ Ndág ya Nsɔ́m agá giéns gá gus gá Así. 7Anyɛ́ bámáasiám agá masiá má giéns gá gus gá Misí abábia mbɛ́dágɛ́dɛ́n yá gɔb agá giéns gá gus gá Bitiní. Mefúny má Yésu anaány gúnyá Ɛsámb yá Mefúny gɔg, iyánd guleg bɔ́. 8Buád buanda bámáayɔɔ́g Misí, ebédúnúg agá nɛyɔ́gɛ́n ná Tolowás. 9Na budug ubuány, Pólo uwabia giényigie. Mɔnd wa Maseduán uwámɛ́n wɔ́, umabá ndényé ubísógólonyi wɔ́, wɔyɔ ká: «Sígol, óló Maseduán esídídúgún.» 10Agá gélem gá giényigie gá Pólo, idiedúm guamba nŋili ya gɔb kɔ́ nɔ kɔ́ Maseduán, gágual ká dɛmalɛnsaán cácácá ká Gɔdányá madɛ́bɛ́lɛ́gɛ́n ká diédúmbényí Ndág ya Nsɔ́m agá kɔɔ́m agany.
Lidí mádáb Ɔgúnɔ́
11Idiɔgɔ́l Sitíme Tolowás, ta gudélímin agá nŋili. Idianaám agá ɛlua yá Somatalás. Mémbelibéli, idianaám agá tísɔn wa Neyapolísi. 12Idiélíki ány, ɛdɛɛb agá tísɔn bábɛ́laná ká Filíp. Tísɔn uwaány nyɛ gianta gá tísɔn gá giéns gá gus gá Maseduán, gínyá agá gubia gá Lɔ́m, idiedúmbi gɛdám gá medug kɔ́. 13Buɔ́s bá Sábat, idiám agá tísɔn gá gɔb agá masiá má nubɔmɔ, kɔɔ́m dɛmáabɛ́dágá ká, dɛnyɛ bɔ́gúfuɔg kɔɔ́m gá mbísógól gá Beyúdɛn kɔ́. Idielukumin, idiagálɛ́d gá bagánd bámáabɛ́gɔ́sá agá kɔɔ́m agany. 14Omoom wa bagánd abaány mabá ɔfɛ́n ká Lidí. Umabá eduús wa bɛnɔg bá bá sanda bobólodod. Umóolónín agá tísɔn bábɛ́laná ká Tiatíl, umabá uganyá gúbúlígenyi Gɔdányá. Umabá udíbídɔ́lɛ́gɔɔn; Ɔgúnɔ́ uwefuun ɔdɛm wág ká úbɛ́dɔ́lɛ́gɔɔn, na ká úgɛ́ndɛ́gɛn gugál gá Pólo. 15Anyɛ́ uméebídú na niíd nág ná gians gidigid, uwadɛ́bɛ́lɛ́gɛn uganyɛ ká: «Ɔ́gɔ nugúbɛ́dága ká nguádában Ɔgúnɔ́ gá meliŋítas, énusílúkúmín agamia.» Uwal buanda gidigid ká diéluminyi.
Bémétí Pólo na Silása agá gians gá mbíne
16Buɔ́s búmodió, dɛmabá dɛbaan agá kɔɔ́m gá mbísógól, eŋél buol wa agánd uwuúl gá gúsidígólí. Umabiánán numɔ́ny, numabá nuálá ká wɔ́yɔ manda máganúbɛ́dɔ́mban. Umabá ubíŋenyinyi bagɔn bág giod gá muonyi. 17Uwedúm gudíládan wánsa wɔyɔ ká: «Band abaány nyɛ bél buol bá Gɔdányá unyá ayáyá ugumuana. Bégúnúdúmbenyinyi nŋili yɛbaná nanɔ agá gisódio.» 18Umalá anaány bɛsɛgɛl gidigid umáabá udiánaan. Gá guamaná, Pólo uwɔ́b ilób, uwebígébélidinyi giád gá gíliíndié igiány, uganyɛ gá gɛ́ ká: «Agá ɔfɛ́n wá Yésu Kilíse, mmál gɔ́w ká ámá agá nuɔ́l ná agánd uwaány. Kɔ́ nɔ kɔ́, giád gá gíliíndié igiám.» 19Anyɛ́ band umáabá walaan bɔ́ buol máan ká udɛbá báguand gubɔ́taan bɔ́ muonyi, abádɛgɛn Pólo na Silása, abában bɔ́ agá nilumen ná band, ogóbúsió bá besúmb bɛsan. 20Abában bɔ́ ogóbúsió bá besumb bɛsan bá Lɔ́m. Bágányɛ ká: «Band ebe gúbueŋenyi tísɔn wasɔ, banyɛ Beyúdɛn. 21Bégúfúnyifunyi manda ɔmɔ́ basuá band bá Lɔ́m didiásɛgɛ́mánáná ta guádáb, ta gulád.» 22Biŋi bá band ibiɔ́bɛ́n na Pólo na Silása gudá. Besúmb bɛsan bá gɛdɔŋ gá Lɔ́m, ɔbɔ́yɛd ká bétúlúne bɔ́ bɛla bɔ́b, ebéŋín bugaga ká bégíde bɔ́. 23Bámáal béméegidé bɔ́ bese ná bese, ebéti bɔ́ agá gians gá mbíne, ebéŋin bugaga gá ogiíg ká úbídenyi bɔ́ bese ná bese. 24Ogiíg uwaány máal wɔ́bɔn mbɛ́dɛ́na iyaány, uwéti bɔ́ agá mɔɔn wa nɛgɛlɛ agá gians gá mbíne. Uwagɔ́d bɛgɔnd bɔ́b agá bilu.
25Na ɔdɛm wa budug, Pólo na Silása mabá bóbísógólonyi, bɔ́dɔ́ŋɔ ɛsag gá gúkanya Gɔdányá. Bɔsɔ́gɔ́ bómodió bámáaba agá gians gá mbíne bɛ́dɔ́lɛ́gɔɔn bɔ́. 26Kɔ́ nɔ kɔ́, gus uguébiéyidin bugaga, mugɔnɔ má gians gá mbíne umuébiéyidin, eŋíd yá bians gidigid eyédúmbi gubífuun, masɛŋɛ má ebe gidigid bámáabá agá gians gá mbíne amáguanan. 27Ogiíg uwanyɔg. Anɛ́ umáan ká eŋíd yá gians gá mbíne mabá éfúnén, uwɔgɔ́l nugub nág ká úbiɔ́n, gágual ká umabá ubɛ́dága ká band gidigid bámáabá kɔ́ mɔbɛ́nɔ́nɔ́n#16.27 Mɔnd uwány mambá gubiɔ́n gágual ká umalɛnsán ká, gisele gá Balomɛ́ŋ guɔ́yɔ, ká bɛmbɔg mɔ́bínɔ, bɔ́guɔ́nɔ ogiíg unyá gubá ubɛ́dɛ́gan bɛ́.. 28Pólo uwánsɛ́d ekelu ugumuana ugany ká: «Adibiál buand bá bɔbɛ, basuá bem dɛnyɛ kɔ́.» 29Ogiíg uwófún gise, uwedúmbi gubídídígin agá mɔɔn wa nɛgɛlɛ, wuúl útátán na buwa. Uwenebiétínyí Pólo na Silása agá bɛgɔnd. 30Agá gélem gá guémi bɔ́, uwófún bɔ́ ká: «Banɔ́mandɔ, yál nanyá ká mbia gisódio e?» 31Obóndinyi wɔ́ ká: «Ádáb Ɔgúnɔ́ Yésu, ábia gisódio nɔ́w na gians gɔ́w gá band.» 32Ɔbɔ́yɔɔn wɔ́ gɔg gugál gá Ɔgúnɔ́ na ebe gidigid bámáabá bɔ́sɔ́dɔɔn agág gá gians. 33Agá gɛsɛgɛl igiány, na ɔdɛm wa budug, uwɔb nɔbɔ gá guasugá imféŋ sɔ́b. Kɔ́ nɔ kɔ́, ebédu wɔ́, na band bág bá gians gidigid. 34Ogiíg uwaány uwɔb na pólo na Silása agagá, uwafɛn bɔ́. Umabá ofuógón na bɛdɔdɛn na gians gág gá band, gágual ká umáadáb Gɔdányá.
35Kɔɔ́m máal gábálánan, besumb bɛsan bá Lɔ́m abádɔ́m bebíd ká bɔ́siɔyɛ́dɛ́n ogiíg ká: «Únɛɛn band abaány!» 36Ogiíg uwɔsiɔyɛ́dɛ́n Pólo uganyɛ ká: «Musia méŋín bugaga bágúnúnɛɛn, nunyɛ báguám nɛ́nuán nɔb agá pɔ́ɔɔɔ.» 37Pólo ganyɛ gɔg ká: «Bɔbɔ́ bámáal ká bédígíde agá eŋís yá band kand gudígélenyi, basuá dɛnyá band ɔbɔ́ bisele bá Lɔ́m áŋɛ́ganá, ebédiéti agá gians gá mbíne. Nɛ́nuán, báguámba gudiémi agá niɔs e? Buanda dɛbá anaány, nsɛ́ bésidiémí bɔ́bɔ́ muát.» 38Musia umɔ́nɔyɔɔ́n besumb gugál uguány gidigid. Besúmb mabiánán buwa anyɛ bɔ́mɔ́ɔb ká na Pólo na Silas mabá band ɔbɔ́ bisele bá Lɔ́m áŋɛ́ganá. 39Abábɛ́sɛdɛnɛn bɔ́ ká bɔ́ŋɛ́n bɔ́ gɛnɛnɛna. Agá gélem ány, ebémi bɔ́, bágányɛ gɔ́b ká bámaan agá tísɔn. 40Anyɛ́ na Pólo na Silása mám agá gians gá mbíne, abáb aga Lidí. Agá gélem gá guán beliméne na guágan bɔ́ makánya, abádɔ́mb.
ទើបបានជ្រើសរើសហើយ៖
Bielínyélínyé 16: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
