Bielínyélínyé 14
14
Pólo na Balanábasa agá tísɔn wa Ikoniómo
1Agá tísɔn wa Ikonióm, búmabá buanda búmoom anyɛ Antiyóso. Pólo na Balanábasa, bámáabá agá gians gá mbísógól gá Beyúdɛn. Ɔbɔ́yɔ niɔy ná Yésu gɔb águám anyɛ́ band máag ɛdɛm sɔ́b aga Gɔdányá. 2Gɛdam gá Beyúdɛn gíméen gídiádáb medídígín ebe bámáal badiál Beyúdɛn ká bábia biád bá ɛmbɛdágɛ́dɛ́n gá beédéb. 3Pólo na Balanábasa mabábɛ́d Ikoniómo gianta gá gɛsɛgɛl. Bɔ́mɔyɔ́ niɔy ná Ɔgúnɔ́ kand gubia buwa, Uwafá bɔ́ bugaga bá guala melinsi na bisey, ká údíye ká gugál gág gá ɛlɛ́ga bɔ́mɔ́ɔyɔ́ mabá meliŋítas. 4Band bá tísɔn máadɔ́gán, Gɛdam giáy gá Beyúdɛn, ebe giáy gá bedúmeb. 5Ány Beyúdɛn na ebe bámáal bádiál Beyúdɛn, na bagɔn máasɔ́mb ká bágúbianan ká bésésenyi bɔ́, bónd bɔɔ́n Pólo na Balanábasa na guétenyi bɔ́ adány, 6Pólo na Balanábasa ɔ́bɔɔn anaány, abaáb agá bá tísɔn bá Lísitɛlɛ, na Dɛlɛbé, na bá tísɔ́n bá giéns gá gus gá Likoni na agá masiá. 7Uguány sɔ́n bɔ́mɔyɔ Ndág ya Nsɔ́m.
Giéŋugie gá ginsúgule Lísitɛlɛ, gugál gá Pólo
8Mɔnd mabá Lísitɛlɛ umáal udidélímén, umebíbién ginsúgule, bébíbiéne waga, udimandɛd. 9Buɔ́s búmodió, umɔbɛ́dɔ́lɛ́gɔɔ́n Pólo ugála. Pólo uwadál wɔ́ eŋís sóŋŋŋ, uwaán ká mɔnd uawány nyɛ na guádáb gúnyá ká wéŋúg. 10Pólo uwɔyɛdɛn wɔ́ ekelu magɔ́gɔ́n ká: «Adɔ́g ndényé ɔgɔ́w gá bɛgɔnd.» Mɔnd uwelúbúg na ɔŋɛnd. 11Anyɛ́ band bá Likoní máan ubú Pólo máal, ebédúm guansa na nuɔbɔ́, bɔ́yɔ ká: «Bagɔdánya égusel agás gá gadágadá anyɛ band.» 12Bámabɛ́laán Balanábasa ká «Sés», Pólo ká «Ɛ́lɛ́mɛs», gágual ká uwɔ́ umáabá egélígel. Ɛfɛ́n isiány nyɛ ɛfɛ́n sá bá Gɔdányá bɔ́b. 13Aságɔsag wa Sés ɔnyɛb wág nyá agá nibíŋínín na tísɔn, uwúlén bɛnɔ́m bá melúke mányá nyaŋányaŋá na bafalúwa agá nɛfuɛn nɔ́b. Uwám ekelu na giŋi ká béŋin bɛbiág. 14Balanábasa na Pólo máal bɔ́bɔɔn anaány, abábɛ́láfa bɛla, ebédúmbi gɔb giáy giŋi máansá. 15Bágányɛ ká: «Ehé buam, giág igiány nualaná e? Dinyɛ band anyɛ banuá. Ndág ya nsɔ́m dinuɔ́yɔnɔ́ inyɛ ká nútɛ́n manda ma gilé amaány nualaná, núbɛ́gɔ́ŋɔ́n giáy gá Gɔdányá unyá ɔgɔ́s, umáal muana na gus, manáŋ abɔ́sa, na manda meem manyá kɔ́. 16Nsua, Gɔdányá manɛɛ́n bɛdɔŋ ká biánda ɔgɔ́b gá gubíléne. 17Ta anaány udimɔdɔmb guala band bese ká údíye ká unyɛ nɔbɔ, wéŋeén bɔ́ nɔbɔ́l núbísúgunené agá imbu siéŋené giod gá manyán agá gɛsɛgɛl gɛ́sɛ́gɛmananá. Ufuógonyi ɛdɛm sán na bɛdɔdɛn.» 18Ta anyɛ́ Pólo na Balanábasa máagálá anaány, bɔ́mɔ́ɔbɛ́g ká bélég giŋi guéŋin bɔ́ bibiág.
19Beyúdɛn móolín Antiyóso na Ikonióm, abásibɛ́lád giŋi. Anɛ́ bámáan bɔ́ bágányá guétenyi Pólo adány, bétútúle wɔ́, ebémi wɔ́ agá tísɔn, bábɛ́dága ká uganyɛ eguén. 20Bafɔ́nɔfɔ́n bág máal bámáabɛ́sɛdɛn agág gá buáy, uwadɔg uwond agá tísɔn. Mémbelibéli, ɔlɔŋ na Balanábasa, abádɔ́mb gá gɔb Dɛlɛbé.
Gusiondo gá Pólo na Balanábasa
21Pólo na Balanábasa ɔbɔ́yɔ Ndág ya Nsɔ́m agá tísɔn wa Dɛlɛbé, band giod obónd bafɔ́nɔfɔ́n. Agá gélem ány, obónd agá bɔtísɔn Lísitɛlɛ, Ikonióm, na Antiyóso. 22Bémegúnínényí ɛdɛm sá bafɔ́nɔfɔ́n, bédídígen bɔ́ ká bágɔ́nɛ́naan agá guádáb, bɔ́yɔ ká: «Búguófoon ká diɔ́bɛ́g ká díbíŋín agá Bufuŋ bá Gɔdányá.» 23Pólo na Balanábasa ɔbɔ́dɔ́bɔ́n bagɔn agá sig giɔ́b gá beédéb, bóbísógólonyi, bábɛ́bɛ́dɛ́gaan na nsana gɔ́b góbusió, béŋeen bɔ́ gá mbisógól aga Ɔgúnɔ́ uwɔ́ bámáadáb.
24Abáyɔɔg giéns gá gus gá Pisidí, abánaám gí gá Pamfilí. 25Ɔbɔ́yɔ gugál gá Gɔdányá Pɛ́lɛsé, ebédúnúg Atália. 26Ány bɔ́mɔ́ɔgɔ́l gidoŋ ɛgɛgɔ́n gá guond Antiyóso wa Silí. Agá tísɔn uwaány bómóobísógólónyí gɔ́b gá buol bányá guala. 27Bámáal bámáan Antiyóso, abágɔ́sɛ́d beédéb gá guɔyɔɔn bɔ́ manda gidigid ɔmɔ́ Gɔdányá máalá nɔbɔ. Dúmbádúmbá nanyá uméefúnín band bámáal bádiál Beyúdɛn niíd ná guádáb. 28Pólo na Balanábasa ebédúmbi gianta gá gɛsɛgɛl na bafɔ́nɔfɔ́n.
ទើបបានជ្រើសរើសហើយ៖
Bielínyélínyé 14: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
