Bielínyélínyé 12
12
Nigú ná Sáka na giadɛgɛna gá Piéle
1Agá gɛsɛgɛl giád, ofuŋ Elódo gudúm gunusenyi gɛdám gá giɔ́b gá beédéb. 2Uwéŋín bugaga ká bɔɔ́n Sáka endimen Sáŋa na nugub. 3Anyɛ́ umáanaán buála Beyúdɛn bese, uwand guéŋin bugaga báguadɛgɛn Piéle. Buɔ́s bá budɔ́mb bá bɛnyɔka bá kand ginudúgin. 4Elódo guɔyɛd ká bádɛgɛn wɔ́, béti wɔ́ agá gians gá mbíne, uwedényíginyi bimbi bíní bá musia múní múní gá gubídenyi wɔ́. Umabɛ́dágá gugéli wɔ́ ogóbusió bá band agá gélem gá budɔ́mb bá pasika wa Beyúdɛn. 5Piéle mabá gɔg abɛ́dɛ́mánán agá gians gá mbíne, giɔ́b gá beédéb bísógólonyi Gɔdányá gág góbusió na bugaga.
6Elódo mabá agá edény wá gúgélenyi Piéle ogóbusió bá nigúl na band. Na budug, gisiósio ká nɛgál gagúbá, Piéle mabá ubɛ́dɛ́man gadágadá wa musia muándɛ. Umabá agúdán na bianta bá masɛŋɛ mándɛ. Begiíg mabá agá niíd ná gians gá gúbídenyi wɔ́. 7Kɔ́ nɔ kɔ́, ɛngɛlɛs ya Gɔdányá guámɛ́nɛn puas, gians gá mbíne gufuóg na gise. Ɛngɛlɛs ya Gɔdányá gubísíd Piéle agá nɔndɔ, usɛ gág ká: «Adɔ́g fiaŋ.» Masɛ́ŋ mámáabá agág gá ɛmbɔ́g amágás gás. 8Ɛngɛlɛs ya Gɔdányá ganyɛ gág ká: «Bisúŋ kandá wɔ́w, ágɔ́d sɔ́n imfaŋáŋá sɔ́w.» Piéle guɔ́bɛ́n yɛ́. Ɛngɛlɛs guɔ́yɛ́kɛnɛn ká: «Biág gɛsɔnɔ gɔ́w gá gúmuana ónd áŋlád.» 9Piéle guám agá gians gá mbíne, gulád ɛngɛlɛs ya Gɔdányá. Udɛmabɛ́dágɛd ká ubú ɛngɛlɛs máal nyɛ meliŋítas. Umabɛ́dágá ká búnyɛ giényigie. 10Abáyɔɔg gimbi gá musia gíbúsió, gá gándɛ sɔ́n. Abánaám agá nibíŋínín nɛ́máabá na bɛkɔ́ŋ, nɛ́máalɛ́ŋá tísɔn. Iniébífuun nɛ́nɛ́ muát ɔgɔ́b góbúsió. Abaám, abábɛ́sɛdɛn agá gɛbala. Kɔ́ nɔ kɔ́, ɛngɛlɛs ya Gɔdányá guságɛ́nɛn Piéle. 11Ány gɔg Piéle gubɛ́dágɛd buanda búmánuál wɔ́. Uganyɛ ká: «Nɛ́nuán nguánaan bese na bese ká búnyɛ́ meliŋítas, Ɔgúnɔ́ águndɔ́mɛ́n ɛngɛlɛs yaga ká yɛ́ŋáŋɔ́n agá ɛmbɔ́g sá Elódo, na gá bɔbɛ ɔbɔ́ nigúl ná Beyúdɛn máambɛ́dánɛ́n.» 12Umáal na gɔlɛns buanda búmáabɛ́ndɔ́mbána, uwɔb agá nuyá ná Maliá inyódió Sáŋa bámáalɔ́g ká Malákuse. Giod gá band mabɛ́gɔ́sɛ́d kɔ́ gá gúbísógólonyi. 13Piéle gukilidin niíd ná gians. Eŋél buol wa agánd bábɛ́laná ká Lódo gubɛ́sɛdɛn gá gúfuun. 14Uwalɛns ekelu wá Piéle. Na bɛdɔdɛn giod, udimefuun niíd ná gians, uwond na ɔdɛ́d nagadá gá guɔyɛ́d ká Piéle nyɛ agá ɔɔ́nd. 15Bágányɛ gág gɔ́g ká: «Anyɛ ɔduɔ́duɔ», ɔwɔ́ guɔyɔ guɔyɔ gɔg ká búnyɛ́ meliŋítas. Ɔbɔ́yɛd gág ká: «Búnyɛ ɛngɛlɛs yaga». 16Gɛsɛgɛl giád, Piéle ábaan nobusió na gukilen. Anyɛ́ bámáal ná gufuun niíd ná gians, abaán wɔ́, ebéméŋeméŋ. 17Uwaal bɔ́ bulinsi na ɔmbɔ́g ká bélúŋ. Uwɔyɔɔn bɔ́ anyɛ́ Ɔgúnɔ́ méendényí wɔ́ ká waám agá gians gá mbíne. Uganyɛ ká: «Gɔɔ́nuɔyɛ́dɛ́n Sáka na belimen bág bómodió sɔ́n.» Uwaám, uwɔb kɔɔ́m gómodió.
18Buɔ́s máal ná gubála, musia umuábɛ́yɔ́gaan na bugaga, múbiófoon ubú Piéle nyá guɛ́y. 19Elódo guéŋin bugaga báguamba wɔ́, ta guámɛ́nɛn. Elódo máal na gugélenyi musia, uwéŋin bugaga ká bɔɔ́n mú. Agá gélem gá manda amaány gidigid, Elódo guadɔg Yudé, uwɔb Sesalé, uwedúmbi kɔ́ gɛdam gá gɛsɛgɛl.
Nigú ná ofuŋ Elódo
20Elódo mabiánán gianta gá gɛsan na band bá gɛdɔŋ gá Tíl na Sídɔ́ŋ. Ɔbɔ́bɔɔ́n ká baáb guán wɔ́. Ɔbɔ́biɔ́nd Balasátuse, ogiíg wá nɛgɛlɛ ná ofuŋ. Abáb guɔyɛ́dɛ́n Elódo ká waál bumbén. Gá guán, manyán má Tíl na Sidɔŋ móolónín agá gɛdɔŋ gá Elódo. 21Buɔ́s bá ndán, Elódo gubiág gɛsɔnɔ gág gá bufuŋ. Uwelukumin agág gá buufe, uwedúm gugálá gá nigúl. 22Band ebédúm guánsa ká: «Búnyɛ anyɛ Gɔdányá ugálaná, sá mɔnd.» 23Kɔ́ nɔ kɔ́, ɛngɛlɛs ya Ɔgúnɔ́ guág Elódo gunúma gágual ká umɔbígɔ́lɛ́n nukany ná Gɔdányá. Biyeli ibiákɔkɔla wɔ́, uwegú. 24Gugál gá Gɔdányá ugúbaan nobusió, uguásálámand kɔɔ́m gidigid. 25Anyɛ́ na Balanábasa na Sɔ́lɔ máal ná guman busɔ́m bɔ́b Yelúsalɛm, ɔbɔ́gɔ́l Sáŋa bámáalɔ́g ká Málakuse, obónd naga.
ទើបបានជ្រើសរើសហើយ៖
Bielínyélínyé 12: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
