2 Kɔlɛntiɛ́ŋ 8
8
Guágaan makánya ká bɛbiág bɛ́gɔ́sɛ́gan
1Belimen, diguámbá ká dínúlínsi nanyá Gɔdányá nyá gudíyé bese waga gá beédéb bá giéns gá gus gá Maseduán. 2Guɔ́bɛ́g águal ká bádɔ́mbɛ́n agá yɔɔ́bɛ́dɛn ɛyɛgɔ́n; ta anaány, gianta gɔ́b gá bɛdɔdɛn igiál ká béŋin gudúmbídenyi, ta anyɛ́ gɔsɔ́g gɔ́b máadɔ́mbaán anaány. 3Inyɛ eŋél gɛ́laluá wɔbɔ ká béguéŋin gɛdam bábiananá, ebédúmbídenyi muát, mɔnd dɛɛ́gɔgɔ́da bɔ́. 4Bógudíbísógólonyi ká muonyi mɔ́b bíbúlídenyi na muonyi múmódió múmáabaán aga beédéb bá Yelúsalɛm. 5Dídiígubá dibíbídenyi ká baál ubú bányá gual. Báguakɛn gubiéŋin gá Ɔgúnɔ́, abád gubiéŋin gás agá gubílén gá Gɔdányá. 6Títe umáabanyɛ́g aganuá buol bágɔ́gɔ́sa muonyi má gɔb Yélúsalɛm. Díguág wɔ́ makánya ká usiyíb buol ubuány.
7Manda gidigid gúdege aganuá. Nugúbianan giondiɔdɛ́mɔ́, nubianan bugél, nulɛnsaan meliŋítas, nulɛnsaan gubiéŋin onkimo wanɔ, nuond nudɛ́lɛ́ga. Diguámba sɔ́n ká núdég agá buól bégúdúgúnenin. 8Ndɛgɔ́nɔ́gɔ́dɛ́naan na buanda, ngúnuɔ́yɔɔn gusúg nanyá beédéb bá biɔ́b bímodió nyá gudúgún bɔsɔ́g beédéb fiaŋ fiaŋ. Iménúfúnín nŋili yá gual ká núdíye ká ɛlɛ́ga yán nyɛ meliŋítas. 9Nugúlɛnsaan nanyá Yésu Kilíse Ɔgúnɔ́ wasɔ méedídíyé bese waga. Uwɔ́ umáabá ɛnɔ́m, uwádáb ká wónd anyɛ mɔnd udiábiánáná buanda gán góbúsió, anaány ká gɔsɔ́g gág ál ká núbá ɛnɔ́m.
10Banuá numáabá band bóbusió yɔŋ iyíné ká nuɔ́yɛd ká nuguámba gudúgún beédéb bá Yelúsalɛm, unuabá sɔ́n bóbusió ká núbányɛg bú. Yam ɛmbɛ́dágɛ́dɛn iyaány inuéŋené, igúsɛgɛmanan nanɔ. 11Énuyíbi buanda numáabányɛ́g guala na manda nubiananá. Ánualá bú na gɛnɔg gá ɔdɛm numáabanyɛ́g na gɛ́. 12Gɛsɛgɛl mɔnd éŋené na ginɔg gá ɔdɛm, Gɔdányá guádábaan buanda wéŋené, uguámba ká mɔnd éŋeen agá edeny wá ubú ubiananá, saá gá ubú udiábiánáná. 13Ndɛmɔ́nuɔ́yɛdɛn ká nuɛ́y basɔ́gasɔga ká núdúgúne bɔsɔ́gɔ́. Band gidigid gúbianan ká bábá buanda búmoom. 14Nunyɛ bɔ́gúgɔ́l bɛdálág bán nɛ́nuán ká núdúgúne ebe bádiábiánáná. Númásám sɔ́n buɔ́s, bɔ́bɔ́ sɔ́n begenúdúgún na ɛbɔ́b. Anaány band gidigid gabá buanda búmoom. 15Musámb má Imbɔbɔnɔ guɔ́yɔ ká: Ewe umáabád giod, dimabia gudúmbídenyi, mɔnd umáabád siɔdɛd dimasám buanda#8.15 Alɛ́ŋɛ́d Eso 16.18. 16Nukany bá na Gɔdányá umáag agá ɔdɛm wá Títe ká úbiéŋin anyɛ basuá. 17Úguádáb ká wuúl aganuá anyɛ́ inyá gugedi guɔyɛdɛn wɔ́. Búnyɛ́ nɔ́ ká uwɔ́ muát úgubá umámán gɔsɔ́mb ká wuúl. 18Dígudɔ́m wɔ́ na endimen wasɔ wa guádáb omodió. Beédeb bá biɔ́b gidigid gúkanya endimen wasɔ uwaány gágual ká ugúdúmbenyi Ndág ya nsɔ́m bese. 19Beédeb sɔ́n bányá guɔyɛd ká wɔ́b nasɔ Yelúsalɛm gá guéŋin beédéb muonyi múnyá gɔbɛ́gɔ́sa. Buol ubuány gúgúmenyi Ɔgúnɔ́, buónd búdíyenyi ká diguámba gudúgúne bɔsɔ́gɔ́. 20Didiguámba ká mɔnd dísɔ́mɛ́n gá nɛnama ɛnɛ́ dínyá guala na giod gá muonyi egie bányá gudɛ́dɔ́gɛn. 21Diguámba guala manda bese agá eŋís yá Gɔdányá, ta agá eŋís yá band. 22Dígunúdɔ́mɛ́n sɔ́n endimen wasɔ omodió na bá Títe. Disaman gudúmbenyi wɔ́ agá yɔɔ́bɛ́dɛn, bɛsɛgɛl gidigid idián ká ugúbiéŋeen, uguánd gumeny gubiéŋeen gágual ká uguóndonyi ɔdɛm gán. 23Giáy gɛ́lɛ́ŋaná Títe, nganyɛ yanda naga, uguála sɔ́n buól nam gán góbusió. Belimen bás bányá naga, beédéb bá biɔ́b bányá gɔdɔ́m bɔ́. Báguála buól gá gúgúmenyi Kilíse. 24Énudíyé bɔ́ ká nugúbíléne bɔ́ meliŋítas, anaány beédéb bá biɔ́b gaán bese na bese ká dígubianan nɛɛm ká diɔ́bɔɔn bese nanɔ.
ទើបបានជ្រើសរើសហើយ៖
2 Kɔlɛntiɛ́ŋ 8: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល