2 Kɔlɛntiɛ́ŋ 1
1
Mbígélid
1Yaŋuá Pólo inyɛ edúméb wá Yésu Kilíse agá gubílén gá Gɔdányá. Nam na endimen wasɔ wa guádáb anyɛ Timoté, dimébígélídí giɔ́b gá beédéb gá Gɔdányá gínyá agá tísɔn wa Kolɛ́nt na ebe bányá agá giéns gá gus gá Akayí gidigid. 2Nsɛ́ Gɔdányá Sié wasɔ, na Ɔgúnɔ́ Yésu Kilíse nɔ́fɔ́n, wónd únúfá bumben.
Pólo guéŋeen Gɔdányá nukany
3Nukany bá na Gɔdányá Sié wa Ɔgúnɔ́ wasɔ Yésu Kilíse. Unyɛ Babá unyá ofuógón na bese, wond wáganɛn makánya gá bɛsɛgɛl bim. 4Ugúdiágaan makánya agá guɔ́bɛ́g gás gidigid, ká basuá sɔ́n diágaan ebe bábiananá anama yá guɔ́bɛ́g gidigid makánya gɔɔ́gɔ anyɛ́ ɔwɔ́ Gɔdányá udiáganá makánya. 5Búnyɛ́ nɔ́ ká, nɛnama nímoom guɔ́bɛ́g giod díleniné góbusió bá Kilíse, anaány sɔ́n udiáganá makánya giod. 6Guɔ́bɛ́g mádiámanɛn giod, búnyɛ gágual ká núbia makánya na gisódio. Gɔdányá mádiágaan makánya, búnyɛ́ ká dínuágaan makánya máganuál ká núbia bugaga bɔ́guɔ́d guɔ́bɛ́g gúmoom ugú diɔ́bɛ́gɔnɔ́ nɛ́nuán. 7Diguágaan ɔdɛ́m aga Gɔdányá gán góbúsió gágual ká dɛgɔ́lɛnsaan anyɛ́ nuɔ́bɛ́gɔnɔ́ guɔ́bɛ́g gúmoom diɔ́bɛ́gɔnɔ́, nugabia sɔ́n makánya. 8Belimen, diguámba ká núlɛ́ns nanyá dimɔ́ɔbɛ́g agá bɔtísɔn bá Así. Dɛmɔ́ɔbɛ́g ta bɔ́guɔyɔ, guɔ́bɛ́g uguány madɛ́dɔ́mb bugaga nɛnama nɛ́nyá ká dimedúm guákɛ́naan na gusɔ́d gás. 9Dɛmabá diganyá gúgedenyi ká bágagúsɔ́mb ká bɔ́diɔ́n. Búmabiál anaány ká didiágaán ɛdɛm sás gá basuá muát, diágaan gɔg ɛdɛm gusúg agá Gɔdányá wenyugenyé bɛlɔŋ aga ebeguén. 10Ɔwɔ́ umáadiáŋɔ́n gá nɛnama na nigú anyɛ iniány, ɔwɔ́ uganuánd gudiáŋɔ́n. Diguágaan ɔdɛm agagá ká ugand gudiáŋɔ́n. 11Banuá sɔ́n nugúdiáganɛn ɔmbɔ́g anyɛ́ nubísógólonyó gás. Anaány band giod éŋené Gɔdányá nukany gágual ká uguéŋen biondiny gá imbísógól bálaná gás góbusió.
Pólo mésúgí ɔŋɛnd wág
12Buanda buálaná diɔ́bɔɔn bese nyɛ ká dɛgɔ́lɛnsan agás gá ɛdɛm bese na bese ká dígubígɔ́lɔn agá gubíséli na agá meliŋítas agá eŋís yá band, dúmbá dúmba agán gá eŋís. Saá agá nsiŋi yá mɔnd manda amaány gidigid nyá gudílenin, mégudílenin aga Gɔdányá, ɔwɔ́ unyá gudiéndenyi agá bese waga. 13-14Búnyɛ́ nɔ́ ká buanda dinuɔ́ŋɔnɔ́ agás gá imbɔbɔnɔ nunyɛ bágúbanan gágual ká búdɛ́bá muyú guɔ́b. Ngúbɛ́dága ká nugaámɛ́nɛn ká nuɔ́b buanda gidigid diɔyɔnɔ́. Ta nudiɔ́b buanda gidigid nɛ́nuán, buɔ́s Ɔgúnɔ́ Yésu gonúsiondo, nugɔ́bɔɔn bese nasɔ, buanda búmoom basuá sɔ́n digɔnuɔ́bɔɔn bese nanɔ. 15Na giondiɔdɛ́mɔ́ igiány inyá gubá mbɛ́dága ká yiíl nsɛ́nuán ká núbia bɛdɔdɛn bɛsɛgɛl biándɛ anyɛ́ nuganúŋán. 16Ngubá yamba gɔdɔ́mbɛ́n aganuá na gɔb na gusiondo gám Maseduán ká núŋágɛ́n ɔmbɔ́g ká yɛɛ́b nobusió na ɔŋɛnd wám buáy bá giéns gá gus bábɛ́laná ká Yudé. 17Anyɛ́ mmáadán ká ngaal bú, búnyá mmagálɛ́d anyɛ mɔnd unyá kand méne e? Gúmén duged dám gúlenin gá ɛmbɛ́dágɛ́dɛ́n sɛ́nyá anyɛ sá band bá gus egue e? Nɛnama nɛ́nyá, nɛ́nuán yɔyɛd ká Ɛɛ́ŋ, mɔɔn wá gɛsɛgɛl yaal ká Ágó! 18Gɔdányá nyɛ eŋél gɛ́laluá wam, gugál dɛmɔ́ɔnuɔ́yɔɔ́n, dɛmabá gɛsɛgɛl gímoom na Ɛɛ́ŋ, na Ágó. 19Gágual ká Yésu Kilíse Mɔɔn wá Gɔdányá diméenúdúmbényínyí aganuá nam na Silifɛ́ŋa na Timoté dɛmabianan «Ɛɛ́ŋ» na «Ágó», unyɛ gɔɔ́gɔ «Ɛɛ́ŋ»! 20Agagá Gɔdányá mɔ́ɔyɛ́d ká Ɛɛŋ gá manda gidigid umáadán. Agá ɔfɛ́n wá Yésu Kilíse sɔ́n diɔyɔnɔ́ ká, ANÁNYƐ, gá guéŋin Gɔdányá nugúm. 21Gɔdányá uméegúníní nɛlad nás nanɔ aga Kilíse, uwond uwɔdídɔ́bɔ́n. 22Ɔwɔ́ umóond uwaág gɛlɛns gág agasuá gídíyenyé ká dɛnyɛ bág, uwond uwaág Ɛsámb yá Mefúny agás gá ɛdɛm ká dɛ́lɛ́ns bese na bese ká ugadɛ́fá manda umáadɛ́dánɛn. 23Ndimand gusiondo Kolɛ́nt gágual ká ndimamba ká ínúsésenyi. Gɔdányá nyɛ eŋél gɛ́laluá wam, nsɛ́ wúŋɔ́n ímábá ndiguɔ́yɔ meliŋítas. 24Didiguámba ká dɛ́nɔ́gɔ́dɛ́nan manda nubiananá nuála agá guádáb gán, gágual ká nusaman gubiádɛgɛnɛn guádáb, diguámba gɔɔ́gɔ gunuágɛ́n ɔmbɔ́g ká núbá agá bɛdɔdɛn.
ទើបបានជ្រើសរើសហើយ៖
2 Kɔlɛntiɛ́ŋ 1: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល