1 Tesalonisiɛ́ŋ 2
2
Buol bá Pólo Tesaloník
1Belimen bám bá guádáb, nugúlɛnsaan bese na bese ká didíguúl aganuá gá gile. 2Nugúlɛnsaan sɔ́n ká dimakɛ́n guɔ́bɛ́g agá tísɔn babɛ́laná ká Filíp, abádɛ́sɛ́ga kɔ́. Anyɛ́ dimásiám aganuá, Gɔdányá uwadiág makánya mɔ́gúnuɔ́yɛdɛn Ndág ya Nsɔ́m yíleniné agagá, ta anyɛ́ meyú máabá kɔ́. 3Gugál gás dɛmabá bɛsɔbɔ, didimabianan biád bá ɛmbɛ́dágɛ́dɛ́n, ɔ́gɔ ká dínúnéŋe. 4Gɔdányá máan ká dinyɛ agá edeny wégúdúmbenyi Ndág ya Nsɔ́m. Didigúgála ká díbá bese agá eŋís yá band, digúgála gɔg ká díbá bese agá eŋís yá Gɔdányá wánaná ɛmbɛ́dágɛ́dɛ́n sá ɛdɛm saás. 5Nugúlɛnsaan ká didimagála ká dínómbinombi band, ta ɛmbɛ́dágɛ́dɛ́n saás dɛmabá gá gúdáŋába muonyi, Gɔdányá nyɛ eŋél gɛ́laluá wasɔ. 6Didimamba nukany núleniné aga band bá gus, ta agán gá buay, ta agá buay bá band bóndodi. 7Nánié dimabá bágual dinúgúdá ká nuánda agá bugaga bás gágual ká dɛnyɛ bedúmeb bá Kilíse. Didimɔ́sɔ́dɔɔn nanɔ agá ɔndɔndɔ gɛsɛgɛl dimáabá nanɔ. Dimɔsɔ́dɔɔ́n nanɔ gɔg niaŋ ɛ́nɛ́ agánd gɔ́lɔnɔ́ gɛsɛgɛl na baan bág. 8Góbusió bá ɛlɛ́ga dɛ́máabiánán gán, dimabá ndényé ká dínuéŋin saá gɔɔ́gɔ Ndág ya Nsɔ́m ya Gɔdányá, dimambá sɔ́n ká dínuéŋin gusɔ́d gás gá muát, gágual ká ɛlɛ́ga yás gán góbusió mabá gianta ta bɔ́guɔyɔ. 9Belimen, nudɛgɔ́nɔmɔnɔm meyú na gɛdɔmbɔ gás anyɛ́ dimáalá buol na budug anyɛ na buɔ́s. Didimebíléne ká dɛ́nɔ́bɛ́n gɛnɔ anyɛ́ diméenuéŋén Ndág ya Nsɔ́m ya Gɔdányá. 10Nanɔ́, na Gɔdányá nunyɛ bél bɛ́laluá bás ká dimɔsɔ́dɔɔ́n gadágadá wa beédéb bese, begubeg, agá ndényé, ta gɛbɔ́liɔ. 11Nugúlɛnsaan ká dimalá na sig mɔnd a agán gá ɔlɔŋ niaŋ ɛnɛ́ mɔnd álaná na baan bág. 12Dígúnuéŋen ɛsɔ́m, idianuágaan makányá. Idianúsásɛ́d ká núsɔ́dɔɔn anyɛ́ Gɔdányá bílénené. Uwɔ́ waád unúbɛ́laná ká núbíŋín agá Bufuŋ bág ká nuán nugúm nág.
Pólo gúkanya guádáb gá band bá Tesaloník
13Numagɛ́ndɛ́gɛ́n Ndág ya Nsɔ́m ya Gɔdányá dimɔ́ɔnuɔ́yɔɔ́n. Nudimɔgɔ́l yɛ́ anyɛ gugál gá band, numɔgɔ́l yɛ́ anyɛ gugál gá meliŋítas gúleniné aga Gɔdányá, gúnyɛ nɔ́, gúnyɛ gugal gá Gɔdányá. Gúgú guád guálaná buol agá ɛdɛm sán banuá beédéb. Buád buanda basuá diéŋené Gɔdányá nukany gɛsɛgɛl gidigid. 14Belimen, buanda búmáal biɔ́b bá beéded bínyá biladán na Yésu Kilíse bínyá agá giéns gá gus gá Yudé, bɔ́bɔ́ sɔ́n búnyá gunuámɛ́n. Guɔ́bɛ́g ugú Beyúdɛn móobígí bɔ́, nɛnama niád sɔ́n band bán nyá gunuóbígi. 15Bádɛ́n Beyúdɛn bɔ́mɔ́ɔn Ɔgúnɔ́ Yésu na mubús má Gɔdányá, obónd ebédísésenyi. Bádiguála bese ogóbusió bá Gɔdányá, bányɛ́ bambɛ́lɛmbɛ́l bá mɔnd gidigid. 16Bégúdílégeen guɔyɔɔn ebe bádiábá Beyúdɛn Ndág ya Nsɔ́m inyá bógúsódi bɔ́. Bágúbaan nobusió na guɔ́yɛ́kɔnɛn bɛfal bɔ́b bágányá bála gɛsɛgɛl gidigid. Ilób yá Gɔdányá iyésúgúdenyi guguɛ́n bɔ́.
Pólo guámba guond Tesaloník
17Belimen, gá igás giáy, anyɛ́ dimáadɔ́gán gá mɔɔn wa gɛsɛgɛl agá eŋís, saá agá ɛmbɛ́dágɛ́dɛn, idiabia gianta gá nsana ya gunuán. Idial buanda gidigid búmóofoón ká diámɛ́nɛn. 18Bɛsɛgɛl giod, dimambá ká diíl aganuá, dúmbádúmba yaŋuá Pólo, ɔmbɛlɛ́mbɛ́l uwedílég gɔg. 19Aganuá diáganá ɛdɛm saás, dibianan bɛdɔdɛn bás, na bulinsi bá guámɛ́nɛn búganuál ká diɔ́bɔn bese ogóbusió bá Ɔgúnɔ́ wasɔ Yésu anyɛ́ ugenuúl. 20Búnyɛ́ nɔ́, banuá núnyá nugúm nás na bɛdɔdɛn bás.
ទើបបានជ្រើសរើសហើយ៖
1 Tesalonisiɛ́ŋ 2: MMU2
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល