Luka 17
17
Ɗal mpət abə pəl mpət
(Mat 18.6-7; Mrk 9.42)
1Yesu zlap a zlapatana a magəli tə aagi, iŋgaya: «Kwa səkən ma katak ala a ndəv a mpət akas. Ama dadawər ata ala ma ji a ghut həji aagi a ɗal mpət. 2Galaɓa həji ma dzawanə mana ŋvən ka ata wəla, a həji a fakə a riy a mtil, aha ndə a kandəv ala minja aka ŋtaguleŋ a mpət. 3Huni mbəla ŋkwaɓ aska ha kuni.
Andza zlinahw taɗalahu mpət aka, ŋgəzə. Andza taha a dza ra meni, pəlanə mpət tə ka. 4Kwa andza zhin ŋshiliɗ ana mpət ndə a ɗalahu ata vah, ama andza taha a dzahu ra zhin ŋshiliɗ ci, hwa apəlanə mpət tə watsa ka.»
Ɓərɓər ta ɗal awa a Bizlaf
5Həji ta zlən aagi, zlap aa zlapanə a Madagal: «Fəlzani ɗal awa cini!» aagiy. 6Bay Madagal iŋgaya: «Andza huni abə awa a ꞌunəf kuni, kwa andza mbə karamsa meni, huni azlapanə bəza a guvji watsə: “Dəɗha dzara kwa a bəza a ɗi, nda ŋgəɓ ha kwa ka a mtil,” ana huniy, a aɗalahuni awa.
Zlən ataa ala ma ɗal zlən
7Ala vaye a taba kuni, abə ala ma ɗalanə zlən ma kaꞌusanə, aka səku, ma kanjinanə, ndə a zhina tə a damə, a kaazlapanə: “Vas a ndaha a zəm səkən,” iy vaya? 8Aɓa azha, a azlapanə: “Nda daka səkən zəm, tsa rəkuts zlən kwa, hwa daaka səkən zəm, ara ndə a gwar tə ata ler ta zəm səkən naka abə sa səkən naka. Azha a diwzha, abə hwa azəm aŋkwa, abə hwa asa aŋkwa,” wəra? 9Azha, a kaɗalanə wasiy ana ala ma ɗal zlən watsa ara ndə, a ɗal andza ndə a may vəw? 10Andza ikwa ana huni yəm, ndə huni ɗal zlən ndə aa ghalahuni ka a ɗalə tiwtiw, huni zlap: “Ni ɗa həji ma ɗal zlən ndə sləf a ŋkula ndza ka aagi. Ara ndə, ni ɗal zlən ndə aa ghalani a ɗalə bəza.”»
Yesu tareh həji fagwalakw aagi wam
11Avəli ci, Yesu a kandaɓa nda tə ata təf Wərusalima, azha a pew gwara a hayak Samariya abə Galili. 12Ndə a ɗa peteŋ a hayak ma dzuk minja ya, həji fagwalakw aagi wam aa ndaha, aa lima abə təmta. Gar aa gar ta ka abə gədək tə, 13azha, lik aagi wəla abə ɓərɓər tə, aagi iŋgaya: «Yesu, Madagal, za hahər kwa ata ni.»
14Ndə a gərata, dəba a azlapatana: «Huni nda, huni nda ghalazə ha kuni ara maɗal kwakus aagi.» Ndə aa kanda ya, tsərfay a suguf tə ana fagwalakw ta. 15Ala minja ŋtaguleŋ a taba ta, ndə a gəra fagwalakw tə tasuguf tə, zhin a zhinha, a kahəmən Bizlaf abə guɗaŋ tə. 16Ala watsa gəliɓ a gəliɓ tə ka atama a Yesu, ŋtiŋ i wənək tə ka a hayak, a ɗalanə wasiy. Ala watsa ci, a ɗa ndə Samariya.
17Mbara, Yesu a zlap azha: «Həji ma wam watsa aagi tiwtiw, aa tareh ta vəw, wəra? Mbara, ma dzaŋfaɗ ndiɓi aagi a vata? 18Kwa ŋtaguleŋ ala ma tsazə deŋ ka, a zhinha, a ɗalanə wasiy a Bizlaf, aka səku səy ndə mbələm watsə səku vəw?» 19Azha, Yesu iy kəsha iŋgaya: «Gar kwa wəzəm, nda kwa, ɗal awa kwa tarehahu bəza.»
Ndaha la ndza bay Bizlaf
20Farisa aagi ɗiw aa ɗiwzə Yesu: «A ndaha azha, ana la ndza bay Bizlaf tə vepiy?» aagiy. Zhin a zhinatana: «La ndza bay Bizlaf a kaandaha andza səkən ndə huni kagərata aagi səku. 21Həji kaazlap ya: “Huni taŋzə, tsakwa,” ana həjiy səku, aka səku: “A ŋge a ɗi,” həjiy səku. Ara ndə a ɗa ya, la ndza bay Bizlaf a taba kuni.»
Ma vah ndaha Mbə həji ma dəgnak
22Mbara azha, zlap a zlapatana a magəli aagi: A kaagwar tə ata vah tə, ndə huni kaamay a gərazə Mbə həji ma dəgnak kwa vah ŋtaguleŋ, ama huni kaagəra akas. 23Aagi azlapahuni: «“Tsakwa a ɗi,” aka səku, “Tsa a ŋge a ɗi,” ama huni ɗiw a ndas, huni ɗiw a shis. 24Ara ndə a ɗa, vah ta zhinha Mbə həji ma dəgnak, a andza andza sasən manavan ma ndza a wəzəm a wəzlaf, ma kaweɗ la ata nduŋ mana Bizlaf a vaŋ ata guva minja. 25Ama, səy sha masa yaka dagala kwagwa, a gwar ata ndə aa kaaŋkalzə ana həji ma ndza akacihwa aagi.
26Azha, andza ndə a va a ɗal tiɗa a landza Nuhu, a aɗal andza sha yəm ata landza Mbə həji ma dəgnak. 27Həji aagi aa kazəm səkən zəm, aa kasa səkən aagi, aa kaji wali, aa kandatana dimi a wata a wəzhi ta aagi, a vaŋ ata vah ndə Nuhu a nda tə a gəlmbə ma dagal. Azha a tsutsa, yəm ma dagal tandaha a bazlata bəza tiwtiw. 28Aka səku, səkən ma va a ɗal a landza Ludəw, a zhin a ɗal andza sha: həji aagi kazəm səkən, aa kasa səkən, aa kasəkəmha səkən aagi, aa kaber səkən aagi, aa kaŋgəɓ mpi aagi, aa kaꞌun jak aagi. 29Ama vah ndə Ludəw a nda tə a bəza a hayak Suduma ya, Bizlaf a ɗaha manavan abə kwahu andza həregadedeŋ aha təmta, kilbiɗ a bazl ta bəza tiwtiw. 30A aɓin a ndza ikwa ma vah ndə Mbə həji ma dəgnak a kaaghalha ha tə.
31Ma vah watsa, ala ma ndza a wəzəm a ha jak, təf ara aka a taduka tə ka a kwar səkən tə aagi a jak tə akas. Andza ikwa ana ala ma nda tə a damə a ꞌus, təf ara aka a zhinha abə ma a diwzha aha wata tə akas. 32Huni deŋzə səkən ma pew abə wala Ludəw. 33Ala ma kaagas a reh miɗ tə, a afəcak bəza. Ya, ala ma fəcak miɗ tə bəza dawna sa, a reh tə. 34Sa kazlapahuni, abə zaɗə watsə, həji aagi gbak ata la wan ata kusəm ma ŋtaɗ: aagi aji minja bəza, minja a aɗa mba ka. 35Wali gbak, aa kashin ata ŋvən ma ŋtaɗ: aagi aji minja bəza, minja a aɗa mba ka. 36Mawəl aagi gbak, aa damə a la ma ŋtaɗ: aagi aji minja bəza, minja a aɗa mba ka.»
37Magəli tə aagi ɗiw a ɗiwzə: «Azha, a vata abə a ɗal ana səkən watsa aagi, Bay Madagal?» Zhin a zhinatana: «La ndə səkən a mca tə a heɗe, a tsutsa abə zləbiy aagi dzam.»
ទើបបានជ្រើសរើសហើយ៖
Luka 17: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
