Luka 15
15
Maŋgəla ma ndza ata ŋcemek ma fəcak tə ndə həji gəra bəza
1Matsak jamargwal aagi abə həji ma ɗal mpət aagi kakərəɗha abəra Yesu tiwtiw aska a teh ma tə. 2Azha, Farisa aagi abə masərək ma ma garagar aagi, aa kaŋguzŋguz, aagi iŋgaya: «Ala watsə, a kalamzə həji ma ɗal mpət aagi, a ndza abə təmta, a kazəm səkən abə təmta!» aagiy.
3Mbara azha, Yesu zlap a zlapatana maŋgəla watsə: 4Ala minja a taba kuni aka, ŋcimi tə aagi teemeri, ŋtaguleŋ a fəcak tə ya, a kaambasl ma radzaŋfaɗ aha dzaŋfaɗ aagi ka ata dərzləm, aska a nda gasəha ma fəcak tə a gwar ata vah ndə a kaagəra bəza aka wəra? 5Tiɗa ndə a kaagərazə bəza, ꞌunəf tə a ɗa mkpef abə ɓas dagala, a tiwazə ata wəla.
6«Azha ndə a zhina tə aha wata, a dzam ŋgwanambə tə aagi abə masliji tə aagi ya, a zlapatana: “Kiyzaŋkwa a ɓas, ara ndə a ɗa, ŋcemek naka tafəcak tə, sa tagərazə bəza!” 7Sa zlapahuni, a aɓin a ndza ikwa ana ɓas ma ndza a wəzəm a wəzlaf aska ala ma gəy ma ma ŋtaguleŋ ma mbaɗ landza tə bəza, dəy aha həji ma radzaŋfaɗ aha dzaŋfaɗ ma dəlili ma ŋkula ji deŋ ta mbaɗ landza ta aagi.»
Maŋgəla ma ndza ata dala ma fəcak tə ndə həji gəra bəza
8«Andza, wala minja aka, ndə yəm dala aka wam, ci ŋtaɗ a fəcak tə ya, a kaabaz kwahu ata patərla tə, a zlaɗha la ma ndza a daba tə bəza aska a gasə abə ŋkwaɓ a gwar ata ndə a kaagəra dala watsa bəza aka wəra? 9Azha tiɗa ndə a gəra bəza, a dzam ŋgwanambə tə aagi abə masliji tə wali aagi, a zlapatana: “Kiyzaŋkwa a ɓas, ara ndə a ɗa, yəm dala naka ma fəcak tə, sa tagəra bəza!” 10Sha ana ndə sa kazlapahuni, ikwa abə aagi aɓin a ɓas ana matəf Bizlaf aagi, aska ala ma gəy ma, ma mbaɗ landza tə bəza ŋtaguleŋ.»
Maŋgəla ma ndza ata mbə ma fəcak tə ndə həji gəra bəza
11Zlap a zlap zhana: «Ala minja abə wəzhi mawəl aagi gbak. 12Mbə ma feŋ zlap a zlapanə a cin tə: “Vana, vəlaka mavəy zəm jak naka, ma kaaɓin a ɗa ataa naka.” Cin ta, ɓizh a ɓizhatana səkən tə aagi bəza. 13A wan kajik ikwa a diwzha tə, mbə ma feŋ watsa kəram i mavəy səkən tə aagi tiwtiw, tsaa kanda tə a hayak ma gədək, kəɗaŋ a gəy səkən tə watsa aagi bəza ata laɗal badaway. 14Tiɗa ndə a gəy səkən tə bəza tiwtiw, bay mintish minja taa tə a hayak watsa, a tsutsa azha, səkən ara aka zhanas, dəba a aza marva. 15Tsaa kanda tə a ɗalanə zlən ana ala minja a hayak watsa, zlən a zlənə a damə a la tə aska a həbar gəladam aagi. 16A kamayɓa səkən ndə aa kavəlatana a gəladam aagi aska a zəmə, aska a ndar bəra tə, ama ala a kavəlanə akas. 17Azha, dəba a adeŋi, iŋgaya: “Həji ma kaɗalanə zlən a wata vana aagi, vana? Ci aa ga abə wəda, azha sa, a ɗi, sa kamca ara mintish! 18Sa anda naka ara vana, ci, sa azlapanə: Vana, sa tagəyanə ma a Bizlaf, sa tagəyahu ma. 19Sa teete a ɗa mbə kwa zhanas. Saraka andza ala ma ndza a taba həji ma kaɗalahu zlən aagi.” 20Tsaa kanda tə ara cin.
Tiɗa ndza tə abə gədək tə, cin tagərazə bəza, hahər kpa a dzə bəza aska. Dəba a ashaha, a nda lamazə, a mbələ a mabəra tə. 21Azha, mbə zlap a zlapanə: “Vana, sa tagəyanə ma a Bizlaf ma ndza a wəzəm, sa tagəyahu ma yəm. Sa teete a hwa yaka abə mbə kwa zhanas.” 22Ama cin zlap a zlapatana a həji ma kaɗalanə zlən aagi: “Huni vas a daaha rəkuts ndə sləf a heɗe kahkah, huni tsanə ata zlikusəm, huni tsanə fewfew aka ata ra, abə aŋci gwabəla aka a ŋgas. 23Huni mbəlaha mbə vilŋga ma gapagap, huni fatə, kiyzaŋkwa a ɗal gwaygwaya. 24Ara ndə a ɗa, mbə naka watsə, tamca tə, ama tasəfəna tə. Tafəcak tə, ama tagəraya.” Dəba aagi aɗal gwaygwaya.
25Mbə ma dagal a damə a la. Tiɗa ndə a kazhina tə aha wata, huk abəra jak, a kazlima, səkən a kadza, dəməs a kadəməs. 26Daŋ a yaha ala minja ŋtaguleŋ a taba həji ma ɗal zlən aagi, azha dəba a aɗiwzə səkən ma kaɗal. 27Ala ma ɗal zlən watsa dəba a azhinanə: “Zlinahw ta zhinha tə, sha ana ndə cihw a dza mbə zla ma gapagap aka, ara ndə a gəra mbə tə tazhina tə wirwir.”
28A tsutsa, tikush zliŋgin ma dagal a ghuɗek tə, gədas a ŋkalzə a nda a gi. Cin tsa ndaha aha bəza a dzanə ra. 29Ama mbə zhin a zhinanə a cin abə ꞌunəf: “Va dagala, sa kaɗalahu zlən, sa tava a ŋkalzə ma kwa akas. Ama hwa tava a vəlazaka, kwa mbə hacaka aska ni aɗal gwaygwaya abə ŋgwanambə naka aagi akas. 30Ama ndə mbə kwa a ndaa tə, sha ana ma gəy ŋtsəɓ kwa aagi abə dahali, hwa tadzanə mbə vilŋga ma gapagap.”
31Mbara, cin tə zlap a zlapanə: “Mbə naka, hwa, hwa a ɗi abəra sa, pal, səkən ma ndza ara sa tiwtiw, a ɗa ataa aŋkwa. 32Ama kadək a həji a ɗal gwaygwaya aska a lawaɗ, ara ndə a ɗa, zlinahw watsə tamca tə, tasəfəna tə. Tafəcak tə, ama həji tagəra bəza.”»
ទើបបានជ្រើសរើសហើយ៖
Luka 15: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
