Luka 10
10
Zlən ataa magəli ma raŋshiliɗ aha gbak aagi
(Mat 9.37-38; 10.7-16; Mrk 6.8-11; Luk 9.3-5)
1A diwzha tə, Bay Madagal dəba a adəm magəli ndiɓi aagi raŋshiliɗ aha gbak, azha, zlən a zlənata gbak gbak a atama tə, a ŋge a hayak ma dzamadzam aagi tiwtiw abə la ndə sha tə, a kaanda a heɗe. 2Zlap a zlapatana iŋgaya: «Səkən dagala ata wəvə, ci həji ta dzamazə aha wata aagi, aa ɓəraŋ. Huni tarha, aska cina la ndiri a zlənha həji ta dzamha səkən ma ndza ata wəvə ndiɓi aagi dagala. 3Huni nda! Sa kazlənahuni andza wəzhi ŋcimi ma ndza a taba həzhi damə aagi. 4Ara huni ji dala aara, kwa slibi, kwa aŋci. Huni ɗiw a ji a gar aka ata təf a zlapzanə ana alas.
5Ndə huni kaaɗa peteŋ a wata ala, huni diw a zlap mpər, “Təwah maɗal ata jak watsə huni.” 6Andza ala ma kaɗiw təwah a wata watsa aka, təwah kuni a andza a heɗe. Andza aka səku, təwah kuni mazhina tə ara huni. 7Huni ndza a wata ala watsa, huni zəm abə sa səkən ndə aa vəlahuni, ara ndə a ɗa ya, ala ma ɗal zlən, təf ara aka a ji wəda zlən tə. Ara huni anda a wata ala minja.
8Ndə huni kaagwar kuni a hayak ma dzamadzam kwa ma a vatəy, andza həji aagi talamzahuni, huni zəm səkən ndə aa vəlahuni. 9Huni reh həji dawər ma ndza a hayak watsa aagi, huni zlapatana a həji ma ndza a tsutsa aagi: “La ndza bay Bizlaf huk aska huni,” huniy. 10Ama, andza huni tagwar kuni a hayak ma dzamadzam kwa ma a vatəy, ndə aa ŋkula lamzahuni, huni nda kuni ata la ꞌwat, huni zlapatana a həji aagi tiwtiw: 11“Kwa bərdibərdi hayak kuni ma ndza ata ŋgas cini, ni kaŋtəwahuni ka. Aska a huni a sən ka ci, zlən ndə huni ɗal gamak: Huni sən ka la ndza bay Bizlaf huk abəra huni.” 12Sa zlapahuni: vah ndə Bizlaf a kaaya həji aagi ata guma ya, a aɗa galaɓa guma ataa Sadum aha aŋta.»
Hayak ma dzamadzam ma ŋkula ɗal awa
(Mat 11.20-24)
13«Dadawər ata hwa, Kurazin! Dadawər ata hwa, Baytisayda! Ara ndə a ɗa, andza tsufa ma ɗal ara huni, a ɗal ikwa, a hayak Tirus abə hayak Sidun ci, həna akacihwa abə aagi ambaɗ landza ta bəza səku, həna aa tabəw rəkuts ta ka abə makərnana, aa tavahw ha ta ka abə wilnjik. 14Sha ana ndə a ɗa, vah guma ci, a ɗa galaɓa hayak Tirus abə hayak Sidun aha huni a guɗaŋ. 15Hwa azha, hayak ma dzamadzam Kafarnahum, deŋ kwa ci, hwa ɗa mgbuk kwa aska mana Bizlaf, hwiy vəw? Aŋghə! Hwa adenehha kwa andza mgbuk ara həji ma mca ta aagi.»
16Yesu zlap a zlapatana zhana a magəli tə aagi: «Ala ma ji a zlima ma kuni, a ɗa ma naka ana ndə a zlima, ala ma ŋkalzə ma kuni, ma naka ana ndə a ŋkalzə. Ala ma ŋkalzə ma naka, a ɗa ma ala ma zlənaka ana ndə a ŋkalzə.»
Magəli ma raŋshiliɗ aha gbak aagi tazhina ta
17Magəli ma raŋshiliɗ aha gbak ma zlənazlən watsa aagi, aa zhinha abə ɓas dagala, aa kazlap: «Bay Madagal, kwa miɗ ma gamak aagi tahawani ata zləm kwa.» 18Yesu zhin a zhinatana: «Sa tagəra Gətili a kandəvha a wəzəm a wəzlaf andza sasən manavan. 19Huni tehi: sa tavəlahuni ɓərɓər ta nda ata sheshuk aagi abə rəji aagi, abə ndəraɗ ɓərɓər ataa həji jaga kuni aagi tiwtiw, kwa səkən ma kaaɗalahuni akas. 20Ama, huni ɗiw a ɓas ara ndə miɗ ma gamak aagi kahawahuni səku, huni ɓas aɓa azha, ara ndə a ɗa, zləm kuni taŋtiraya a wəzəm a wəzlaf.»
Yesu a kaɓas
(Mat 11.25-27; 13.16-17)
21Tiɗa a tsutsa, Yesu mkpef abə ɓas ara Miɗ ma ghwaɗeɗe, a kadza wəla, iŋgaya: «Wa vana, Bizlaf Madagal ma ndza aha la ma ndza a wəzəm a wəzlaf, abə ma ndza ata hayak, sa kaɗalahu wasiy, ata səkən ndə hwa ɓah bəza ara həji ma sən səkən aagi abə həji ma wirwir aagi, aska hwa ghalatana a həji ndə zlən ta andza a wəzhi ma fashiɗ aagi. Ayəw, Vana, a ndza ikwa ara ndə a ɗa may kwa. 22Vana tavəlaka səkən aagi ka tiwtiw ata ra naka. Ala ma kasən Mbə akas, səy Vana. Ala ma kasən Vana akas, səy sa Mbə tə, abə həji ndə Mbə a kamay a ghalatana aagi.»
23A diwzha tə azha, Yesu zlaz a zlazaktana ma a magəli tə aagi, zlap a zlapatana a təmta gagagha, iŋgaya: «Təwah a huni ata səkən ndə huni kagərata aagi! 24Ayəw, sa kazlapahuni, dagala ana həji ma ɗaf ma ndə aa zlimazə ara Bizlaf aagi abə bay aagi tagas a gəra səkən ndə huni kagəra, ama aa talima a gəras. Aa tagas a zlima səkən ndə huni katehi, ama aa talima a teh səku.»
Maŋgəla ndə Samariya ma ŋtan
25Masərək ma ma garagar minja, takaw a gar a wəzəm, azha a may a slənzə Yesu, dəba a aɗiwzə, i kəsha iŋgaya: «Masərək, sa ɗalzə avaŋga abə sa lima miɗ ma ŋkula kəɗaŋ?» 26Yesu zlap a zlapanə: «Səkən ma ŋtiraya a wəzaha a ma ma garagar veme? Ndə hwa kayə a mən veme?» 27Zhin a zhinanə: «May Madagal Bizlaf kwa abə ꞌunəf kwa ŋtaguleŋ, abə miɗ kwa tiwtiw, abə ɓərɓər kwa tiwtiw, abə deŋ ŋkwaɓ kwa tiwtiw. Zhana, may masliji kwa, andza ndə hwa kamay ha kwa.» 28Yesu i kəsha iŋgaya, ya: «Hwa tazhinazə bəza təwah, ɗalə ikwa, hwa alima miɗ ma təwah ma ŋkula kəɗaŋ.»
29Ama, masərək ma ma garagar a may a ghalə ɗiw ma tə təwah, zlap a zlapanə a Yesu: «Ma ɗa masliji naka, vaya?» iy 30Yesu i kəsha iŋgaya: «Ala minja a nda a bəza a Wərusalima, a nda a Yeriku, ŋhil aagi, tak aa tak bəza, vət aa lanə səkən tə aagi bəza tiwtiw, kpa kpa aa dzə, mbasl aa mbasl ka, ata ꞌunəf ata ꞌunəf, aa tsaa kanda ta. 31A tsutsa, maɗal kwakus minja, a nda gwara təf watsa. Ndə nja tə ɗa gwar ata ala watsa, zlaŋ a zlaŋ tə a təf minja gədək abəra, tsaa kanda tə. 32Zhana andza sha, ala ndə Lewi minja, a nda gwara a tsutsa. Ndə nja tə a ɗa gəra ala watsa, zlaŋ a zlaŋ tə a təf minja gədək abəra, tsaa kanda tə.»
33Ama, ala ndə Samariya minja aka, a nda tə ciwirha gədək, huk abəra ala ndə aa dzə ka. Ndə a gəra, hahər kpa a dzə bəza aska. 34Kərəɗ a kərəɗha, dəba a aɗalanə mali ka abə menjivek ata mbəlah tə, paɗ a paɗanə ka. Tiw a tiwi ata madambərzhahw tə, jaɓ a jaɓ ka a jak ta wan mbəluk aagi, dəba a aləm a heɗe.
35A kwaf tə, leŋ a ji dala, pa a vəlanə ana ala ma ndza aha jak ta wan mbəluk aagi watsa, i kəsha iŋgaya: «“Taŋaka nja ata ala watsə. Ndə sa kazhinha gwara a ɗi, səkən ndə hwa gəy tiwtiw ata ala watsa, sa ndaha a ŋtərahu ka.”» Iy.
36Azha, Yesu iŋgaya: «A taba həji ma mahkaɗ watsa aagi, deŋ kwa, ma ɗa masliji ataa ala ndə ŋhil aagi dzə ka watsa vaya?» 37Masərək ma ma garagar, zhin a zhinanə: «Ala ma ɗalanə təwah.» Azha Yesu i kəsha iŋgaya, ya: «Nda, ɗalə andza sha yəm,» iy.
Yesu a wata tiw Marta abə Mariyama
38Ndə, Yesu abə magəli tə aagi ata təf, aska aagi nda a hayak ma dzuk minja, wala minja aka, zləm tə Marta, daŋ a yazə Yesu bəza a wata tə. 39Həla mamən minja aka, zləm tə Mariyama, ndaa ka a ndza tə ka aska ŋgas ataa Bay Madagal, a kateh ma ndə a kaghalə. 40Marta a kabəw kusəm a da səkən zəm. Tsaw a ndaha ara Yesu, zlap a zlapanə: «Bay Madagal, a kaɗalahu gamak ana landza həla mana watsə aka wəra? Ndə a mbaslaka zlən aka a sa ŋtaguleŋ naka. Zlapanə mandaha a lamzaka,» iy. 41Madagal, zhin a zhinanə: «Marta, Marta, hwa kamgbəslmgbəsl, azha deŋ kwa aska səkən aagi dagala. 42Ama səkən ŋtaɗ ana ma təwah. Mariyama a mayɓa sha, kwa ala a kaaɓin a lə bəza ara akas.»
ទើបបានជ្រើសរើសហើយ៖
Luka 10: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
