Zlən ataa həji ta zlən aagi 5
5
Ananiyas abə Safira
1Ala minja, zləm tə Ananiyas, abə wala tə Safira, ma ta dzəv a ber səkən ta aagi bəza. 2Aa riy ma ta abə wala tə, mawəl ɓah i guva minja bəza, baraf tə, leŋ Ananiyas a daatana a həji ta zlən Yesu aagi, pa a tsatana ka atama ta. 3Ama, Piyer zlap a zlap, iŋgaya: «Ananiyas, hwa dəɗanə ꞌunəf kwa ka a Gətili ara veme? Hwa tazlanə gaɗaɗaŋ aka a Miɗ ma ghwaɗeɗe, hwa taɓah baraf dala ndə hwa berazə ata la watsa bəza. 4Hwa kula a mbasl la watsa ka a ber, aka səku, hwa kula a ber la watsa a ɗal səkən ndə hwa kamayə abə dala tə. Ara veme abə shiŋ deŋ ŋkwaɓ ma həna watsə a ndaahu ka a ꞌunəf? A həji aagi abə hwa zlatana gaɗaɗaŋ səku, ama, hwa zlanə a Bizlaf!» 5Ndə Ananiyas a zlima zlap watsa, bərəzl a ndəv tə, mca a mca tə. Ŋzliŋ tadza həji ma zlima ma watsa aagi bəza tiwtiw. 6Dərlaŋ aagi tsaw aa ndaha, paɗ aa paɗə, jaɓ aa jaɓi a kahə.
7A ɗal bəza ler mahkaɗ a diwzha tə, wala ataa Ananiyas, taa tə. Kwa tasən səkən ma pew səku. 8Piyer ɗiw a ɗiwzə, aagi iŋgaya: «Ghalaka, ata dala watsə ikwa abə huni zlap a ber la kuni watsa vəw?» iy. Zhin a zhinanə, iŋgaya: «Ayəw, a ndza andza sha!» iy. 9Azha, Piyer zlap a zlapanə, iŋgaya: «Avaŋga ana hwa abə mawəl kwa, huni deŋɓa a gas ma aska Miɗ ataa Bay Madagal? Tehzə, ŋgas ataa həji ma ndaa a kaha mawəl kwa aagi a ɗi a bəza majak. Aagi ajaɓahu ana hwa yəm,» iy. 10A tsutsa a tsutsa, bərəzl a ndəv tə aska ŋgas Piyer, a nəp a wəzlaf a wəzlaf, las a mca tə. Ndə dərlaŋ watsa aagi ɗa peteŋ a gi, aa nda gəra tamca tə zhana, leŋ aa jaɓə a kahə abəra mawəl tə. 11Həji ma ɗalanə awa a Yesu aagi tiwtiw abə həji ma zlima zlap watsa aagi tiwtiw, aa kanaana, ara ŋzliŋ a guɗaŋ akas.
Tsaɓan ataa həji ta zlən Yesu aagi
12Vərəm ana mbaɗ aagi abə tsaɓan aagi kaɗal a taba həji aagi ana həji ta zlən Yesu aagi. Həji ma ɗalanə awa a Yesu aagi tadzəvha ka ata la ma ŋtaguleŋ tiwtiw aska balak Suleymanu. 13Ama kwa ala ŋtaguleŋ ma ji a ndaha ara təmta akas. Avəli azha, həji aagi zlap ma ma ŋtan aagi dagala ata təmta. 14Azha, ŋgaɓa həji aagi a kavas a fəl a guɗaŋ, mawəl aagi abə wali kaɗal awa aska ma Bay Madagal, azha dzəvha həji ma ɗalanə a Yesu aagi, a kafəl. 15Azha, dəba aagi adaatana həji dawər kwa ma ndza a vatəy aagi tawanata ka ata həzhiɗ ta aagi a mazləm təf, aska ndə Piyer a kapewha ya, a kushaŋ tə a dishzə kwa ŋtaguleŋ a taba ta. 16Ŋgaɓa həji aagi, aa ndaha a ŋge a hayak ma huk abəra Wərusalima aagi. Dəba aagi adaaha həji dawər aagi abə həji ndə miɗ ma gamak a kasatana yaka aagi tiwtiw, həji watsa aagi aa mbəl tiwtiw.
Mbəla həji ta zlən Yesu aagi abə pəla ta
17Azha, madagal maɗal kwakus abə həji tə ma ndza aska aagi tiwtiw; ma ɗa, ndiɓi aagi Saduki aagi, ndə aa kazlap, sərah tadzata bəza a guɗaŋ. 18Dəba aagi ambəla həji ta zlən ataa Yesu watsa aagi ata nja manahayak, shak aa zata ka a jak yaka. 19Ama, abə zaɗə, matəf Bizlaf mpaŋ a dəɗ majak ataa jak yaka, kwar a kwarata a bəza, zlap a zlapatana, iŋgaya: 20«Huni nda, huni nda a gar a jak kwakus, a tsutsa, huni ghalatana ma miɗ watsə a həji aagi tiwtiw,» iy. 21Həji ta zlən Yesu watsa aagi, aa talamzə zlap watsa. A kwaf biŋ tə, aa tsaa kanda ta a jak kwakus, azha, dəba aagi asərəkatana səkən a həji aagi. Madagal maɗal kwakus abə həji ma ndza abəra aagi taa ta, dəba aagi aya mawəl ma msahw msahw ata Yahuda aagi tiwtiw aska aagi riy ma, azha, dəba aagi azlən həji aagi aska a kwaratana həji ta zlən ataa Yesu ma ndza a jak yaka aagi. 22Ama, həji ndə aa zlənata watsa aagi ɗa gwar a tsutsa, kwa aa tagərata a jak yaka akas. Zhin aa zhina ta a ghal ma watsa a həji ma ndza ata la zla guma ma dagal aagi: 23«Ni gəra jak yaka tatsakaya katkadək. Həji ma həbar jak watsa aagi a majak, ama ndə ni dəɗ majak, kwa ni tagəra ala a mən aka səku.» 24Ndə madagal ma ndza aha həji ma həbar jak kwakus aagi abə magulakwakw maɗal kwakus aagi zlima ma watsa, hak aa ghərəŋ ta ata zlən ataa həji ta zlən Yesu watsa aagi, dəba aagi aɗiwzə ata səkən ma kaaɗal. 25Ama, ala minja, peteŋ taa tə a ghalatana, iŋgaya: «Huni taŋzə, həji ndə huni zata ka a jak yaka nana aagi, aa tsakwa, aa kagar a jak kwakus, azha, aa kasərəkatana səkən a həji aagi.» 26Mbara azha, tsaw ala ma dagal ma ndza aha həji ma həbar jak kwakus aagi, a nda abə suji ma ndza aska aagi, aska a daaha həji watsa aagi. Ama, aa tazlapatana abə gulak aka zhana səku, ara ndə a ɗa, ŋzliŋ a kadzata ara həji ma ndza abəra təmta aagi, ara ndə aa kaŋgwafata ka abə ŋkəɗaŋ. 27Leŋ mahəbar jak kwakus aagi daaha həji watsa aagi ata la zla guma, azha dəba madagal maɗal kwakus dəba a aŋgəzata, iŋgaya: 28«Ni tatakahuni ka a sərək səkən ataa ala watsə, ni kaji tep səku, ama, anawatsə, aŋkuni, hayak Wərusalima tiwtiw dzəsl abə ma kuni. Huni may a zhinha dadawər ampəs ataa ala watsa ata ni vəw!» 29Ama, Piyer abə həji ta zlən ndiɓi aagi, zhin aa zhinatana, aagi iŋgaya: «Galaɓa həji jiɓa ma ataa Bizlaf aha ataa həji aagi. 30Bizlaf ataa jiji takwa aagi, tagarazə Yesu ndə huni dar ka a mca ata mpi ma gəzlaŋgarak a bəza a jiɓ. 31Sha ana ndə Bizlaf a tsəz ka anawatsə ata guva zəm tə, taɗal ka Bay, zhana Marehahəji, aska həji ma ndza a hayak Isərayila aagi a mbaɗ landza ta bəza abə pəl mpət. 32Ni ana ma gəra səkən watsa aagi tiwtiw abə nja cini, ni abə Miɗ ma ghwaɗeɗe ndə Bizlaf a vəlatana a həji ma ɗal awa aska ma tə aagi.»
33Ndə həji ma ndza ata la dzam guma ma dagal aagi zlima ma watsa, aa tamgbesh ta, aa may a bazl həji ta zlən Yesu aagi ka. 34Ama, takaw ala minja a gar a wəzəm a taba ta: A ɗa ndə Farisa, ndə aa kayə Gamaliyel, a ɗa masərək ma ma garagar ndə həji aagi kahawanə tiwtiw. Zlap a zlap aska aagi apəlazata ka aha bəza a dza miɗ kajik. 35A diwzha tə, dəba a azlap, iŋgaya: «Isərayila aagi, huni mbəla ŋkwaɓ katkadək aska səkən ndə huni kamay a ɗalatana a həji watsə aagi. 36Slaɓ slaɓ watsə, həji tagəra payha Tudas: tatsa ha tə ka a ɗa ala ma dagal, həji ma kasəbarə aagi ɗal bəza teemeri ŋfaɗ. Sha tə abə ha tə, tadzaya, azha həji ma səbar aagi tiwtiw aa tawiɗ ta ŋtaɗ ŋtaɗ, azha, kwa ŋtaɗ ala tafinha akas. 37Həji tagəra payha Yahuda ndə Galili, ambəɗa a diwzha tə, a ŋgəɗ həji aagi tiwtiw: Həji aagi vərəm, aa tasəbarə, sha tə yəm tamca tə, həji ma səbarə aagi tiwtiw, həji tagəra la safay tas. 38Azha, sa kazlapahuni, huni cecef shiŋ həji ma həna watsa aagi səku, huni mbaslata ka, aa manda! Ara ndə a ɗa, andza zlən ndə aa kaɗal aagi, a ndaha ara həji aagi, aka səku ara təmta, sha ana ma denehɓa ha tə; 39andza, a ndaha ara Bizlaf, huni kula a safayata bəza səku, ara huni a nda kuni a taba həji ma ɗa ghəm abə Bizlaf aagi.»
Həji ma gulakwakw aagi taji ma tə. 40Zhin dəba aagi ayaha həji ta zlən Yesu watsa aagi, azha, dəba aagi agəzlata. Dəba aagi atakata ka, ara ndə aa kaazlap aka ata zləm Yesu, a diwzha tə, pəl aa pəlata ka. 41Həji ta zlən watsa aagi, tsaw aa ndaa ta a bəza a taba həji ma ndza ata la zla guma ma dagal aagi. Aagi abə ɓas dawna ndə Bizlaf a gəra zlən ta təwah, aa sa yaka aska zləm ataa Yesu. 42Kala pish, aa ndza a jak kwakus andza ndə aa wata ta aagi, aa tagum sərək səkən ma parpar parpar aagi abə ɗaf Ma wiyə ma təwah ataa Yesu a ɗa Kərist səku.
ទើបបានជ្រើសរើសហើយ៖
Zlən ataa həji ta zlən aagi 5: GOU
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
