Rawma ege 2
2
Guma mala Gazlavay ma a heɗe a heɗe
1Hwa ma kejetene guma ŋ hejəye ŋgha, kaw hwa laɓa hwa vayay, hwa kanala kula ŋ zlap ma wende ma ata ɓer ata ha ŋkwa, askwaw, mavəday, mada hwa jene guma ŋ ɗala, hwa yam hwa kala ana mbe ca, ana ebe ŋghe, hwa ja guma ca, ŋ ha ŋkwa yam. 2Cemey, heje kasan ca, Gazlavay a kejetene guma ma a heɗe a heɗe ŋ hejəye ma kalaw, ana ebe ŋghe ege. 3Hwa ulakza ca, hwa ma kejetene guma ŋ hejəye ma kala dadawar ege ana maa hwa kala yam ŋgha ca, hwa nereh ŋkwa ata laja guma mala Gazlavay vaw? 4Gazlavay ca, mbəy tuwah, mbəy a lesew dakala, a kesew gay ŋtakwaw ege. Hwa ca, ana səkan bəse vaw? Hwa kasan taŋtaŋ mala Gazlavay ca, a jeɓzahwaw ŋ bawza lanja ŋkwa aza, səkwaw vaw? 5Unaf ŋkwa ɓarɓar ŋ zləme, hwa kaɗaw ŋ bawza lanja ŋkwa aza, səkwaw. Ana ebe ŋghe, hwa kenjewha laghwaɗ unaf ma dakal ata ha ŋkwa, a pes maa Gazlavay a naghwalza laghwaɗ unaf anta ey laja guma anta ma a heɗe a heɗe. 6A nevelene ŋ kaw vayay, tete ata zlan anta ege maa a lata. 7A neveletene lanja ma kaŋtakw səkwaw, ŋ hejəye ma katal ŋ la taŋtaŋ ege ey hejəye ma katal ŋ mpam ɓardakw mala Gazlavay, lahəman ey lanja maa kaw ɗala a kanamac, askwaw. 8Cemey, Gazlavay a naghwalza laghwaɗ unaf anta mambaza a laŋgaz ata hejəye ma kaɗa gham a mbe ege, ma kewenzene ha ka a ma njenjəwen, səkwaw ege, ma kasəbar səkan ma kadak səkwaw ege. 9Gef ey lalak əy nandaha ata hejəye tewtew ma kala dadawar ege, a namar ata Yahudu ege kwagwa, a dəwze anta, ata hejəye ma tata Yahudu ege səkwaw ege yam. 10Cemey, Gazlavay a neveletene ɓardakw, lahəman ey zəhay ŋ hejəye tewtew ma kala taŋtaŋ ege, ŋ Yahudu ege kwagwa, a dəwze anta, ŋ hejəye ma tata Yahudu ege səkwaw ege yam. 11Mavəday, Gazlavay ca, a kamay hejəye mayamay, askwaw. 12Hejəye tewtew ma kasan ma maŋkanaŋkan səkwaw ege, əy kala dadawar ca, əy namac, cemey, ara ma maŋkanaŋkan ma jata səkwaw. Cemey, hejəye tewtew ma kasan ma maŋkanaŋkan, əy kala dadawar ca, əy nejetene guma a ma maŋkanaŋkan anta. 13Cemey, hejəye ma tuwah a tama Gazlavay ege ca, ara hejəye ma zləme ma maŋkanaŋkan ege ende ŋghe gagaha səkwaw, cemey, səy hejəye ma kalaw, ana maa ma maŋkanaŋkan anta, a kaɗawaw. 14Hejəye ma tata Yahudu ege səkwaw ege ca, əy kasan ma maŋkanaŋkan səkwaw. Mada əy la səkan maa ma maŋkanaŋkan a kaɗawaw, a ha tata ca, əy law, ana maa ma maŋkanaŋkan anta mbəy ŋ tata, cemey, ma maŋkanaŋkan tata, askwaw. 15Zlan tata ege, əy kaghwalza ca, səkan maa ma maŋkanaŋkan a kaɗawaw ca, kéŋtereye a unaf tata ege. Ledeŋ ŋkwaɓ tata a kaghwal ma ata tata yam. Mavəday anta, ata vah wende ca, ledeŋ ŋkwaɓ tata a kaghwalza səkan maa əy kalata ma kadak səkwaw ege ey ma kadak ege. 16Səkan anta a naghwalha a pes maa Gazlavay a kanaja guma ata ledeŋ ŋkwaɓ hejəye maɓahaɓah ege, ta ŋ Yesu Almasəyhu, ana maa Ma Mewe ma Taŋtaŋ maa sa kaghwalza ŋgha, a zlap.
Yahudu ege əy kewenzene ha aka ŋ ma maŋkanaŋkan səkwaw
17Cemey, hwa ca, hwa ya hwa ɗala Yahudu, hwa kégereye ata ma maŋkanaŋkan, hwa kala ghav, mavəday hwa ya, hwa ɗala mala Gazlavay. 18Hwa ma kasan səkan maa Gazlavay a kaɗawaw, ma maŋkanaŋkan kásasərakzahwaw aza ŋ may səkan ma taŋtaŋ. 19Hwa kedeŋza ca, hwa kula ŋ ghwelzetene taf ŋ ulaf ege leŋ ŋ weɗzetene la ŋ hejəye ma ŋ kuzle ege. 20Hwa ma ŋgaz hejəye ma kasan səkan səkwaw ege, a zeney, hwa ma sasərak uzəye#2.20 Hejəye ma kasan ma mala Gazlavay ege kwagwa səkwaw.. Hwa lem lasan səkan leŋ ma ma njenjəwen tewtew ca, ta ŋ ma maŋkanaŋkan. 21Ayaw, teh zlam kadak kadak. Hwa kasasərakzata vedəye, ca, hwa kasasərakza ha ŋkwa, askwaw vaw? Hwa keghwelzetene zlap ŋ hejəye, hwa ya: «Hune ɗaw ŋ ŋhel səkwaw», cemey, ŋkwa ca, hwa ŋhel ŋ vay? 22Hwa kazlap, hwa ya: «Hwa ɗaw ŋta kusam a bəza səkwaw,» cemey, hwa a ha ŋkwa, hwa kaŋta kusam a bəza. Hwa kazlap, hwa ya, «Hwa ɗaw ŋ da kule səkwaw», cemey, hwa keŋhel səkan ma a ujek kule anta ege. 23Hwa kala ghav ata ma maŋkanaŋkan, cemey hwa kahəmanza Gazlavay, askwaw, hwa kagayza ma maŋkanaŋkan aka. 24Cemey, ana maa kéŋtereye, ende ŋghe: «Hejəye ma tata Yahudu ege səkwaw, əy kazlap ma ma kadak səkwaw ata Gazlavay mavəday hune.» 25Mada hwa kala səkan ana maa ma maŋkanaŋkan a kaɗaw ca, wese ca, lazla mandulay ŋkwa kadak. Cemey, mada hwa kala səkan ana maa ma maŋkanaŋkan a kaɗaw, askwaw ca, wese ca, hwa kábaw ŋkwa ana ɗala ma kázla mandulay aza, askwaw. 26Mada ɗala ma kázla mandulay, askwaw, cemey, a kala səkan ana maa ma maŋkanaŋkan a kaɗaw ca, Gazlavay a kanasarza ana maa kázla mandulay aza, askwaw vaw? 27Ana ebe ŋghe, ɗala ma kázla mandulay ŋ kusam anta, askwaw, cemey, a kewenzene ha aka a ma maŋkanaŋkan ca, a neghemahwaw, hwa ɗala ma kázla mandulay aza, ma kewenzene ha aka a ma maŋkanaŋkan maa Gazlavay a valahwaw, askwaw. 28Cemey, ara səkan maa heje kegəre a nje ma kanabawza ɗala aza ŋ ɗala Yahudu ma njenjəwen səkwaw, askwaw ca, ara vevərek ma ata kusam ma kanabawzahwaw aza ŋ ɗala maa kázla mandulay aza, səkwaw. 29Cemey, lazla mandulay maɓahaɓah maa heje kegəre, askwaw, maa Gazlavay a caza ka ŋ unaf ɗala wese ca, ara mbe ma kanabawza ɗala aza, ŋ ɗala Yahudu ma njenjəwen. Lazla mandulay anta ca, a kanala a leŋter ma ŋ ma maŋkanaŋkan, askwaw, cemey, a nala ca, a Zəwet mala Gazlavay. Ɗala Yahudu ma njenjəwen ca, ara hejəye ma kanahəmanza, askwaw, cemey, ara Gazlavay ma kanahəmanza.
ទើបបានជ្រើសរើសហើយ៖
Rawma ege 2: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL
