Markus 9
9
1Yesu a zlepetene zeney, a ŋgaya: «Njenjəwen, sa kazlapahune, hejəye vedəye ŋ taba hejəye ma ete ŋghe ege, əy kanamac, askwaw, səy əy megəre Lazam bay mala Gazlavay mandaha aza a ɓardakw anta.»
Labaw kusam Yesu
2Wan ŋkwah a dəwze anta ca, Yesu a ŋtata ata Pəyer, Yakuba leŋ Yuhana, a jeɓzata ata barla ma jem, tata gagaha. Aya, kusam anta pəla, a baw anta ata nje tata. 3Rəgwac anta a weɗ, tezlezle mambaza, kaw ɗala ma kula ŋ manhayak ŋgha, ŋ weɗza pepeɗek ana mbe ca, askwaw. 4Aya, madarlaŋw ma mahkaɗ ege wese, əy gəreta ata Eləya ey Musa, əy kazlap a Yesu. 5A təwse ca, Pəyer a zlepene ŋ Yesu, a ŋgaya: «Masasərak, kadak ca, heje njakwaw aka ete ŋghe. Nene naba guɗakw ege aka mahkaɗ, teŋguleŋ mala ŋkwa, teŋguleŋ mala Musa, teŋguleŋ mala Eləya.» 6Pəyer ca, a kasan səkan maa a kazlap səkwaw, mavəday mbe ey madarlaŋw ma gbak ege wese ca, əy kálalak tata. 7Kəɗe ca, mahwabakw a ndaha, aya, a jaɓata, əy zləme ula a zlapaha aka ŋma, a ŋgaya: «Ebe ŋghe ca, ara Mba naka maa sa kaɗaw mambaza, hune tehzene zlam!» 8A təwse a təwse, madarlaŋw ege wese, əy sar la a həzlar tata ca, kaw əy kegəre ɗala wende zeney askwaw, səy Yesu teŋguleŋ anta. 9Maa əy katadakwha aka ata barla wese ca, Yesu a ŋgazata aka, a ŋgaya: «Hune ɗaw ŋ ghwalza səkan maa hune gəre ŋghe ŋ kaw vayay səkwaw, səy Mba Ɗala magwarzamha aza ata lamac.» 10A təwse ca, əy lamza ma maa Yesu a zlepetene wese. Cemey, əy ɗawza ha tata ege, əy ŋgaya: «Lagwarzamha aza ata lamac anta ca, a ɗaw ŋ zlap ca, vaŋgay?»
11A dəwze anta ca, əy ɗawza Yesu, əy ŋgaya: «Maghwal ma maŋkanaŋkan ege, əy ŋgaya: “Səy Eləya mandaha aza kwagwa ca,” ŋ vay?» 12Yesu a zenetene, a ŋgaya: «Ayaw, səy Eləya mandaha aza kwagwa ŋ lamzata səkan ege aka tewtew kadak kadak. Cemey, ma meŋtereŋter ŋ ɗerewel maa, a ŋgaya: “Səy Mba Ɗala masa gef aza mambaza leŋ əy mececefza səkwaw” wese ca, ŋ vay? 13Cemey, sa kazlapahune, Eləya ca, kándaha aza tew. Hejəye əy kélene səkan ege maa əy kaɗaw aza tewtew ana maa Leŋter ege əy zlap a heɗe.»
Yesu a gam zəwet malula ma ŋ ha mbaw aza
14Maa əy vaŋha ara madarlaŋw ege vedəye ca, əy gəre hejəye vəram a həzlar tata, aya, maghwal ma maŋkanaŋkan ege, əy kaja səbakw a tata. 15Maa hejəye əy gəre Yesu ca, ŋkwaɓ kéŋgetene aza, aya, əy hey, əy nda ŋ zlepzene. 16Yesu a ɗawzata madarlaŋw anta ege, a ŋgaya: «Hune ja səbakw ca, ata vemey?» 17Ɗala teŋguleŋ ŋ taba hejəye, a zenene, a ŋgaya: «Masasərak, sa dahwaw mba naka, mba mawal, zəwet malula kámbalza, mbəy kula ŋ zlap səkwaw. 18Kaw a katay, mada zəwet anta kámbalza ca, a nahza ata hayak, a lene hubaf ŋ pakam, a ɓam zləɗeŋ, a serene kusam aza. Sa káɗawzata madarlaŋw ŋkwa ege ŋ gam zəwet anta aza, ca, əy kála kula ŋ gam səkwaw.» 19Yesu a zlepetene, a ŋgaya: «Hune hejəye dadawar ege, maa lalam parham ege, sa naja ara hune zeney ca, walaŋ vanay? Sa nesewahune zeney ca, walaŋ vanay? Hune dekey mba anta!» 20A təwse ca, əy dene mba anta. Maa zəwet malula wese a gəre Yesu ca, a gwegwecza mba wese a mazlazlay, a ndav ata hayak, a teteŋgel, hubaf a laha ŋ pakam. 21Yesu a ɗawza cen mbaw wese, a ŋgaya: «A merene ca, vepey?» Cen mba anta a zenene, a ŋgaya: «A merene ca, maa mbəy mbaw pəzekw ende ŋghe. 22Gas vəram, zəwet anta kánahza ŋ kwahwaw, askwaw ca, ŋ yam ŋ jaza. Cemey, mada hwa kula ca, mbahw san hahar ata nene, cekzene!» 23Yesu a zlepene, a ŋgaya: «Hwa zlepekey, hwa ya: “Mada hwa kula ca,” ŋ vay? Mada ɗala kélemzekey aza ca, kaw vemey a nala.» 24A təwse a təwse, cen mba wese a ja ula, a ŋgaya: «Sa kálamzahwaw aza, cemey, cekzekey, mavəday lalam naka parham.» 25Yesu a gəre ca, hejəye vəram, əy keɓecha ara tata. Aya, a bebecza zəwet malula wese, a zlepene, a ŋgaya: «Zəwet ɓaɓa ey madaŋgazlam, sa kazlapahwaw, damhaza ŋ mba ŋgha, hwa ɗaw ŋ zenha ŋ mbe zeney səkwaw!» 26Zəwet wese a ja ula, a ɓərazlza a mazlazlay, aya, a damha aza. Mba wese haŋga kámac anta, ha hejəye vəram, əy ŋgaya: «Kámac anta!» 27Cemey, Yesu a mbal ra mba wese, a gwarzamza, aya a garza aka. 28Maa Yesu a nda anta a wata ca, madarlaŋw anta ege, əy ɗawza, əy ŋgaya: «Nene kála kula ŋ gam zəwet anta səkwaw ca, mavəday vemey?» 29Aya, Yesu a zenetene, a ŋgaya: «Ŋseŋ zəwet ŋghe ca, heje la kula ŋ gam aza ca, səy a larak Gazlavay.»
Yesu a ghwalza lamac anta ey lagwarzamha aza anta ata lamac magbak anta
30Əy gwarzam tata a təwse, əy nda ta ŋ hayak Galəyləy. Yesu a kaɗaw kaw vayay a san la maa mbəy a təwse səkwaw, 31mavəday, a kasasərakzata madarlaŋw anta ege, a kezlepetene, a ŋgaya: «Əy navalza Mba Ɗala aza asa ra hejəye, əy najaza, aya, ata wan mahkaɗ a dəwze anta ca, a nagwarzamha aza ata lamac.» 32Cemey, madarlaŋw anta ege əy kezləme ma maa a zlepetene anta, səkwaw, əy kalalak ŋ ɗawza ata ma anta.
Ma pa ma dakal ca, vayay?
33Ata Yesu ey madarlaŋw anta ege, əy hwasha ŋ uzam Kafarnahum. Aya, maa əy kádam tata a ujek ca, Yesu a ɗawzata, a ŋgaya: «Hune ja səbakw ata taf ca, ata vemey?» 34Cemey, əy nja ka tete, mavəday, ata taf ca, əy kája səbakw ŋ taba tata ŋ san ɗala ma pa ma dakal ca, vayay. 35Yesu a nja ka, aya, a yata madarlaŋw anta ege ma wam aha gbak, a zlepetene, a ŋgaya: «Mada ɗala a kaɗaw ŋ nja, ara ɗala ma mpar ca, səy mabawza ha anta aza ŋ ɗala matakwaɗ ŋ taba hejəye tewtew leŋ meletene zlan ŋ hejəye tewtew.» 36A dəwze anta ca, a ŋta mba ma pəzekw, a deŋza ka ŋ taba tata. A səkaw mba wese, a zlepetene, a ŋgaya: 37«Kaw vayay ma lamza mba ma pəzekw ŋghe aza, ana ebe ŋghe mavəday zlam naka ca, a lamza ca, sa. Kaw vayay ma lemzekey aza yam ca, a lamza ca, sa gagaha səkwaw, cemey, a lamza ca, ɗala ma leɓekey.»
Ɗala ma kaɗa gham a heje səkwaw ca, ara ɗala ŋtakwaw
38Yuhana a zlepene, ŋ Yesu a ŋgaya: «Masasərak, nene kégəre heje wende aka, a kagamata zəwet malula ege a zlam ŋkwa, aya, nene ɗaw ŋ tak ka, mavəday mbe ca, mbəy ŋ lajav ŋtakwaw askwaw.» 39Cemey, Yesu a zenene, a ŋgaya: «Hune ɗaw ŋ tak ka səkwaw, mavəday, mada ɗala kula ŋ la zaɓəla a zlam naka ca, heje anta kula ŋ zlap ma ma kadak səkwaw ata sa, səkwaw. 40Ɗala ma kaɗa gham a heje askwaw ca, ara heje ŋtakwaw. 41Cemey, kaw vayay ma valahune yam cekuɗe ŋ sa, mavəday hune hejəye Almasəyhu ege ca, njenjəwen sa kazlapahune, heje anta a nelem laŋtar anta.»
Hune sla aka, hune ɗaw ŋ ndav ŋ la gay səkwaw
42«Kaw vayay ma ŋcakwza ɗala teŋguleŋ ŋ taba ma pəzekw pəzekw ma lemzekey aza ŋghe ege, ŋ la gay ca, zukwan əy mejewene ŋvan ma dakal ata ula, əy manahza aza ŋ ŋtele yam. 43Mada ra ŋkwa a kaŋcakwzahwaw ŋ la gay ca, razlza, zukwan hwa madam ŋ lanja ma katuwaɗ səkwaw kaw vepey a ra teŋguleŋ, aha maa hwa kanadam a ra ŋkwa ege gbak tata, ŋ gef ŋ kwahwaw ma kamac səkwaw kaw vepey. 44[Ata la anta ca, gwaŋkwaɗ ma kazam kusam ɗala ege, əy kamac, askwaw, kwahwaw yam, a kamac, askwaw.] 45Mada ŋgas ŋkwa a kaŋcakwzahwaw ŋ la gay ca, razlza, zukwan hwa madam ŋ lanja ma katuwaɗ səkwaw kaw vepey a ŋgas teŋguleŋ aha ma hwa kanadam a ŋgas ŋkwa ege gbak tata ŋ kwahwaw ma kamac səkwaw kaw vepey. 46[Ata la anta ca, gwaŋkwaɗ ege ma kazam kusam ɗala ege, əy kamac, askwaw, kwahwaw yam, a kamac, askwaw.] 47Aya, mada nje ŋkwa a kaŋcakwzahwaw ŋ la gay ca, hweslekza, zukwan hwa madam ŋ Lazam bay mala Gazlavay a nje teŋguleŋ aha maa hwa kanadam a nje ŋkwa ege gbak tata ŋ kwahwaw ma kamac səkwaw kaw vepey. 48Ata la anta ca, gwaŋkwaɗ ma kazam kusam ɗala ege, əy kamac, askwaw, kwahwaw yam, a kamac, askwaw. 49Cemey, Gazlavay a naca kwahwaw ata kaw vayay tewtew ana mabanban maa əy kala ŋ səkan ta zam. 50Mabanban ca, ara səkan ma taŋtaŋ. Cemey, mada mabanban anta barbar zeney askwaw ca, heje nala kula ŋ zenaza barbar anta ca, vaŋgay? Səy hune nja, hune hejəye maa mabanban ŋ kusam tata ege aka, hune nja ŋ zəhay ŋ taba ŋkune ege.»
ទើបបានជ្រើសរើសហើយ៖
Markus 9: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL