Mata Ladam
Ladam
Ma Mewe ma Taŋtaŋ ana zlap ca, labara ma taŋtaŋ ma kanasasamzata hejəye. Ma Mewe ma Taŋtaŋ ŋgha anta a kaghwalzaheje ma ata Yesu ey zlan anta ma a lata ege. Ara madarlaŋw anta Mata ma ŋteraza Ma Mewe ma Taŋtaŋ ŋgha anta. Mata anta ca, maa Yesu a yaɓa ca, ara ɗala macak budaw 9.9-13. Mata kégəreta səkan ege tewtew a nje anta leŋ kézləmeta səkan ege tewtew maa Yesu a lata. Mata a kazlap, Yesu ca, ara Almasəyhu Masasərak Madakal ma ɓarɓar, Mata a ŋteretene Ma Mewe ma Taŋtaŋ anta ca, ŋ Yahudu ege ma lamza ma mala Yesu Almasəyhu Mereh manhayak aza. Mata a kaghwalzaheje maa Yesu a ghefza səkan maa uzəye ma zlap ma mala Gazlavay ma zlezle ege əy ghwalza, ana zlap ca, landaha mala Mereh heje 1.22-23; 2.15, 17-18, 23; 4.14-15; 8.17; 12.17-21; 13.35; 21.4-5; 27.9-10. Mavəday anta, kázlap dakala ata Ma Maŋkanaŋkan mala Musa. Ha bay laghwal zlap anta a deŋ ca, ata Yesu Almasəyhu 1.1. Yesu ca, ara mba Dawuda, ara Almasəyhu, ana zlap ca, ara ɗala maa Gazlavay késeɗene mel aza, ana zlap ca, Gazlavay kámayza ŋ rehza manhayak tewtew 1.21, ara Əymanuyəyla, ana zlap ca, Gazlavay a kanja a heje 1.23. Yesu Almasəyhu ca, ara Mba Gazlavay. Ara Gazlavay a ha anta ma zlap ana ebe ŋghe 3.17. Hejəye vəram əy kásan ta ŋ zaɓəla ege maa a lata ege yam 14.33; 16.16; 17.5; 27.40-43. Mata kázlap dakala ata lazam bay ma mgba ata uzlaf ana zlap ca, lazam bay mala Gazlavay. Yesu kádaza lazam bay ma ata uzlaf anta aza ŋ taba hejəye 16.28. Yesu anta kázlap a laslaŋgal ma ege vəram ŋ ghwalza lazam bay anta. Lazam bay kénjeye mavəday hejəye tewtew səkwaw ca, ŋ Yahudu ege gagaha səkwaw 4.23; 9.35; cemey, ŋ ɗala ma lamza ma mala Yesu aza, mayakza manhayak aka 19.29. Mavəday anta, Mata a zlap a ɓarɓar, a ŋgaya: «Hune san ka, hejəye tewtew ma kanaɗaf ma ege, əy ŋgaya “Bay Madakal, Bay Madakal” ca, tata ma kanadam ata Lazam bay ma mgba ata uzlaf səkwaw, cemey, səy hejəye ma kala zlan ege ana maa Vana, Bay Madakal ma ata uzlaf a kaɗawaw 7.21.» Lazam bay ŋgha ca, a naghwalha ŋ ɓardakw ma dakal tewtew ma mgba ata uzlaf 6.10; 26.29. Labara Ma Mewe ma Taŋtaŋ ŋgha anta ca, Yesu a daza ŋ hejəye tewtew. Yesu a ha anta kátawar ŋ uzam ege leŋ kəva uzam ege mala Urusaləyma ey Galəyləy tewtew ŋ ghwelzetene Ma Mewe ma Taŋtaŋ ŋ hejəye 9.35-36. Kézlepetene ŋ madarlaŋw anta ege ŋ hwasza Ma Mewe ma Taŋtaŋ anta hwas ata ghala manhayak, əy maghwalza ma anta leŋ əy mesesərekzetene ŋ hejəye ma ŋ manhayak ege tewtew, ndar əy la tata ŋ madarlaŋw anta ege 28.16-20.
Lasəbar zlap ege
Jeje mala Yesu ege ey lambaw Yesu 1-2
Laghwal zlap ey zlan mala Yuhana maban hejəye ŋ yam baptəysma ege 3.1-12
Yesu a ban ŋ yam Baptəysma leŋ Malula a slanza 3.1–4.11
Zlan mala Yesu ege ŋ Galəyləy 4.12–18.35
Leŋcəwer mala Yesu mar aka ŋ Galəyləy ha hwas ŋ Urusaləyma 19-20
Yesu mbəy ŋ Urusaləyma, əy mbalaw leŋ əy daraw ata mpe gafaŋgal 21-27
Lagwarzamha mala Yesu aza ata lamac ey laghwal kusam anta maa a ghwalaza 28.
ទើបបានជ្រើសរើសហើយ៖
Mata Ladam: BHS
គំនូសចំណាំ
ចែករំលែក
ចម្លង
ចង់ឱ្យគំនូសពណ៌ដែលបានរក្សាទុករបស់អ្នក មាននៅលើគ្រប់ឧបករណ៍ទាំងអស់មែនទេ? ចុះឈ្មោះប្រើ ឬចុះឈ្មោះចូល
© 2025 CABTAL